چھاگلاسگون 12

عبادت خانہ گونلا مانّگا ناگس ستانس۔

1ہالام تینّا توسلا گیالپو ہیرودِیس عبادت خانہے ایمان چان کھاچیگّا ناگس ستانچیس گوزوگ۔ 2کھوے، یوحنّانی فونو حضرت یعقُوبؔ رایَ نیامپو سادچوگس۔ 3تے لاسگونّی یہُودی پاگون تھادپو چھا تھونگتے گیالپوے حضرت پطرؔس سانگ زومچوگس (تیبو پیساگی توسچھینّی توسلا چونگ)۔ 4حضرت پطرؔس زومستے ستینگنے ہیرودِیس کھونگ تسونکھانگی نانّگا کاگچوگس، یانگ ثونگچیسلا ماگمی ژیچانّی سدے ژیا کھاگ کالس۔ ہیرودِیس پیساگی توسچھینّی ستینگنے حضرت پطرؔس میمانگسّی لدُونلا کھیونگستے کھونّگا شریعت چھادین سام۔

5حضرت پطرؔس تسونّی نانّگا یود زانے، عبادت خانہ پوے سنینگ تاگپانے خُدا کھونگی پھیا دُعا چوادپین ۔

6ہیرودِیس حضرت پطرؔس میمانگسّی لدُونلا ٹھیمسچادّی پھیا کھیونگی سانگ تشان چیگی سنگونلا، لچاگتھاگ نیسلا تاگستے کھونگ ماگمی نییسّی پارلا نیدلا سونگتے یودپین، یانگ تسونکھانگی گھویکا ماگمیگون ثونگستے یودی توس، 7ہونمیدلا خُدے فرشتاجیگ تیکا سکیودپا، تینانگ گانگپو اودّی گانگس۔ تے فرشتابوے حضرت پطرؔس سکولّا زادتے کھونّگا نیدتشاد یانگ مولس، ”گیوگسپا لونگس“ حضرت پطرؔس سی لاگپا تاگسکھانّی لچاگتھاگپو بُود۔

8تینے فرشتے حضرت پطرؔس لا مولس، ”رانگی سکیراگس چینگ یانگ پابُو گُون۔“ حضرت پطرؔس سی تینّابو چوس، یانگ فرشتے کھونّگا مولس، ”رانگی ژازار گُون یانگ نگے گیابنے یونگ۔“ 9حضرت پطرؔس فرشتے ستینگرانگنے تسونکھانگنے پھیلوگا سکیودس، کھوے فرشتے زادکھان گُون ژالزیگسشیگ اینوگ سام، تے تشانگما نگوسپوا جونگتے اینکھانبو دِین ماشیس۔ 10کھونگ نیسکو گھوثونگپا تانگپو تانگ نیسپے دونّے سونگتے لچاگسّی گیاسگھویکا لیب، کا بو گیالسے نانّگا بینادپین۔ کھونگونی پھیا تے گھوبو کھورانگ بیسونگ، کھونگون گھونے بینگتے ڈولین سونگ، یانگ ثانگی جوگا لیبّاچیگ، فرشتابو ہونمیدلا کھونگی دونّے ستورس۔

11تینے حضرت پطرؔس لا ہاگوتے مولس، ”تا نگا چانگ تھےژومس میراگ، خُدے کھونگرانگی فرشتا کالا زادتے ہیرودِیس تانگ یہُودی پے اُسکیونگونی جوسنگانّے نگا تھارچوگا زادس۔“

12حضرت پطرؔس سی جُونگکھانگون ہاگواچیگ، کھونگ حضرت یُوؔحنّا ٰ کابوا مرقُس سانگ زیرّادپین کھوے اما حضرت مریم می کھانگپا سکیودس۔ تیرو فونو مانگپو دزومستے دُعا جوادپین۔ 13حضرت پطرؔس سی پھیلوگی گھو ردونگسپا، رودا زیرکھانّی یاتو بومو، گھو پھیالا یونگس۔ 14کھوا حضرت پطرؔس سی سکاد شیسپا ایزام تھادپو سونگ کھوے گھو ماپھیا گیوگین لوگستے سونگتے، ”حضرت پطرؔس پھیلوگا گھویکا یونگستے راگ“ زیرس۔

15فونو گونّی لانتانگس، ” کھیرانگ سنیوستے اینوگ۔“ اِین نانگ تے بوموبوے اوتسوگ تانگستے لدینبا کھونگ حضرت پطرؔس اینوگ زیرپا کھونگونی زیرس، ”حضرت پطرؔس سی فرشتا اینڈو۔“

16اِین نانگ حضرت پطرؔس سی گھو ردونگین دُوگس یانگ گھو پھیسپا حضرت پطرؔس تھونگتے کھونگون ہالاس۔ 17حضرت پطرؔس سی لاگپا نیامپو چوبچادچیسلا ستاگس چوس، یانگ کھونگ خُدے تسونکھانگنے پھینّگا زادکھانّی سکور شادّا زادس۔ یانگ ” یعقُوبؔ تانگ فونو گونلا ایگون شود“ مولتے کھونگرانگ جان ناسّاجیگّا سکیودس۔

18نام لانگسّاچیگ حضرت پطرؔس میدپا، کھونگ نیامپو چی سونگ سامتے ماگمی گونلا ہیلینگس ثانٹے جوگس۔ 19ہیرودِیس حضرت پطرؔس کارونگسا گیالّا چوستے تسالچوگس، اِین نانگ کھونگی سکورلا چانگ گیُوس ماسونگپا کھوے گھو ثونگپاگونلا ٹیسو تانگستے کھونگون سادچیسّی کا تانگس۔

گیالپو ہیرودِیس شی۔

تینے ہیرودِیس، یہُودیہ نے قَیصرؔیہ سونگتے تیرو توسبانشیگ دُوگس۔ 20تا ہیرودالا صور تانگ صیدا ی میگون نیامپو ماثانٹے ثو یودپین۔ تے یولّی اُسکیونگون سپیرا تانّگالا یونگس، یانگ گیالپوے لوکھیل چانّی لونپو بالاستوسّی چھوگسّکیور تھوبستے جیدے کھیونگچیسّی پھیا جُووا پھولس، چیازیرنا زاگیو نیوچیسلا کھونگون ہیرودِیس یولیکا راگلاستے یودپین۔

21لدامکھانّی جاگّا ہیرودِیس گیالپوے کوسلاگ گونتے رانگی ٹھیسّیکا دُوگستے میمانگسلا سپیرا تانگس۔ 22تے میگونّی کُوچو تانگین زیرس، ”ای سونگسکادبو می مانپا خُدے اینوگ۔“ 23ہیرودِیس میمانگسگونّی خُدا ستودپا ماپھولّا کھوا ستودپا پھولچیسپوا تھاد پاسانگ تینّامالّا خُدے فرشتے کھوا چھادپا سالس، یانگ بوتسیگی کھوے زوگسپو کُولے کُولے کھو شیشی تشوگپا زوس۔

24اِین نانگ خُدے حُکم یارگیاس چھین پھیلین سونگ۔

25برنباس تانگ ساؤلی پینے روگس کالکھانبو شریعتی لابکھان گون لا ستادس۔ تےستینگنے کھونگون مرقُس زیرکھانّی می نمپو حضرت یُوؔحنّا ٰ ٹھیدتے یروشالیم نے لوگستے سکیودس۔

Currently Selected:

چھاگلاسگون 12: LBJNT

Highlight

Copy