چھاگلاسگون 11

حضرت پطرؔس سی کھوے لاسگون سالپو ہاگوچوگّا زادس۔

1یہُودیہ نانّگا یودکھانّی رسُول گُون تانگ جان فونو گونلا یہُودی مانکھان گونّیانگ خُدے کیکا ایمان کھیونگستوگ زیرتے تشور۔ 2حضرت پطرؔس یروشالیمّا لوگستے سکیودّاچیگ، لا لقپہ ہلژخمہ چھوکن کھاچیگی کھونّگا سکیون رجود چوستے زیرس، 3”نیرانگ یہُودی مانکھان تشیتوگونّی کھانگپا سونگتے کھونگون نیامپو زان زوستوگ۔“

4تینے حضرت پطرؔس سی جونگکھان تشانگما گونّے جوگ تشوگپا تشیر تشیر تشیرلا کھونگونلا شادس۔ 5”نگے یافا ڈونگکھیرّی نانّگا دُعا جوین یودپین، ہونمیدلا نگا ای ژالزیگسپو تھونگ۔ نامکھانے راس چھینمو تسوگسشیگ ٹو ژیکونے زومستے نگے لدُونلا پھابس۔ 6نگے تیبوا تانتان چوستے ستاسپا، تینانّگا ثالکھان تانگ ناگتشوگسّی سیمسچان، بوتسیگ نامینا تشانگس تانگ چاچیو گُون تھونگ۔ 7تینے نگا سونگسکادچیگی ’حضرت پطرؔس ، تا لانگستے یگون سادتے زو‘ مولین تشور۔“

8”نگے زیرپین، ’کیے مسیح مانے میزا، دیرینگ تشوگپا نگے یہُودی پے شریعت ثونگستے یتسوگسّی تشیتو تانگ کھاملوگ زانگون مازوسپین‘۔“

9”نامکھانے تے سونگسکادپوے لان نیسپا مولس، ’خُدے ژانگما زادکھانگونلا کھیرانگی تشیتو مازیر۔‘ 10تینّابو تشیر سوم چونگ، تے ستینگنے تے تشانگما لوگستے نامکھا تھینّا زادس۔“

11”تینّا توسلا قَیصرؔیہ نے نگا یودسا کالکھانّی مینگّو سوم، نگا ڈانگسا دوگکھانّی کھانگپابوے گھویکا لیب۔ 12ہلژخمہ رُوح بوے نگا مولس ’ کھیرانگ ای میگون نیامپو تھےژومس میدپا سونگ۔‘ ای ایمان چان فونو ڈوگانگ نگا نیامپو یونگس، یانگ نگاجا گُون نگا بودّا کالکھانّی می بوے کھانگپے نانّگا سونگپین۔ 13کھوے نگاجا شادس، کھوا کھورانگی کھانگپے نانّگا خُدے فرشتاجیگ جالتے ’یافا زیرسا میگون لامچوگستے شمعُوؔن حضرت پطرؔس زیرکھانّی میبو یرو بودتے کھیونگ۔ 14کھوے شادکھانّی لونبوے کھیرانگ تانگ کھیرانگی نانگتشانگس تشانگما تھارپا تھوبین‘ مولّاراگ۔“

15”نگے شادچیس گوزوگ چواچیگ، کھونگّونّیکانگ ہلژخمہ رُوح بابس کازوگی نگاتانگونّیکا گوما بابستے اینپین۔ 16تینے نگا حضرت عیسیٰ مسیح ’یوحنّانی چھوی غوتا التے اینپین، اِین نانگ کھیوجاگونلا ہلژخمہ رُوح بوے غوتا تھوبین‘ مولکھانبو ایدتو یونگس۔ 17حضرت عیسیٰ مسیح ا ایمان چوکھان نگاتانگونلا سالکھانّی تینّا برکت پو خُدے کھونگون لانگ سالتے اینّا، تینے خُدا گیابگال چونیانین سامکھان نگا سو اینوگ؟“

18سکیون رجود چوکھانگونّی تے سپیراگون تشورّاچیگ، کھونگونی گیابگال چوچیس پھانگستے خُدا ستودپا پھولین زیرس، ”تا ہاگو، گیودپا چوکھانّی یہُودی مانکھان گونلانگ خُدے تھامیدپے میتشے تھوبچیسّی سکابس سالّا زادتے اینوگ۔“

انطاؔکِیہ گیالسے نانّگا یودکھانّی عبادت خانہ۔

19حضرت ستِفنُس سادتے ستینگنے ناگس تھونگکھانّی ایمان چانگون شورتے تھاگرینگی یول، پھونیشیا، کُپُرؔس تانگ انطاؔکِیہ گیالسا گُونلا لیب۔ کھونگونی خُدے حُکم یہُودی پاگونلا مانے ماشادس۔ 20اِین نانگ کھونگونی ٹونے کُپُرؔس تانگ کیرین یولنے اینکھان کھاچیگ انطاؔکِیہ گیالسا سونگتے یہُودی مانکھان گُونلا حضرت عیسیٰ مسیح سکورلا گاموےناتسُول شادچیس گوزوگ چوس۔ 21مسیح خُدے کھیود کھونگون نیامپو یودپین، یانگ می مانگپوے لونبویکا ایمان کھیونگستے حضرت عیسیٰ مسیح گیابنے ڈانگس۔

22تے ناتشولبو یروشالیمّا یودکھانّی عبادت خانہے تشور، یانگ کھونگونی برنباس انطاؔکِیہ ا لامچوگس۔ 23برنباس تیرو لیبّاچیگ، خُدے شزدے تھونگتے تھاد، یانگ کھونگونلا حضرت عیسیٰ مسیح نانّگا ستانپو دوگچیسلا سونڈوس ثانٹے چوچیسّی سپوسپا سالس۔ 24برنباس نیما می زانگپوجیگ، ہلژخمہ رُوح بوے گنگستے ایمان ستانپوچان اینپین۔ کھونگ گیُودتے می مانگپوے حضرت عیسیٰ مسیح نانّگا ایمان کھیونگس۔

25تینے برنباس حضرت ساؤل ژالّا تَرسُس سی گیالسا سکیودس۔ 26حضرت ساؤل تھوبّاچیگ، کھونگ انطاؔکِیہ ا کھونگرانگ نیامپو کھیونگس۔ تیرو کھونگ نیسکو لو گانگپو عبادت خانہے نانّگا دزومستے می ما مانگپوا حضرت عیسیٰ سی سکورلا لابّا زادس۔ انطاؔکِیہ ی نانّگا گومارانگ مسیح لوبٹوگس گونلا مسیح پا زیرس۔

27تینّا توسلا پیغمبر کھاچیگ یروشالیم نے بابستے انطاؔکِیہ ا سکیودس۔ 28کھونگونی ٹونے چیگ اگبُس زیرکھانبو لانگستے ہلژخمہ رُوح گیُودتے رومی نگایوگا یودکھانّی یول گانگپوے نانّگا موگے ثانٹے یونگچیسّی لونگستانبو سالس۔ (ای موگیبو رومی گیالپو کلودیوسّی توسلا جُونگستے این)۔ 29لوبٹوگسگونّی رانگرانگی کھیود نانگجین یہُودیہ نانّگا یودکھانّی ایمان چانگونلا پینے روگس چوچیسلا تھاگچادس۔ 30یروشالیمّی شریعت لابکھان گون ی لاگا تانگچیسلا حضرت ساؤل تانگ برنباس نیامپو کھونگونی پینے لدوسکھانبو کالس۔

Currently Selected:

چھاگلاسگون 11: LBJNT

Highlight

Copy