چھاگلاسگون 10

کُرنیلیُس سی حضرت پطرؔس لا سکیود جوالا می کالس۔

1قَیصرؔیہ نانّگا اٹلی پے ماگتشوگسّی نانگنے ماگیے سپونبو کُرنیلیُس زیرکھانجیگ یودپین۔ 2کھو تانگ کھوے نانگمی تشانگما ما ایمان چان تانگ خُدا سیوا چوین کھونگی جیگسّی نانّگا میتشے پھودکھان یودپین۔ کھو نیالباچانگونلا سنینگ پھیستے تانگکھان تانگ جاگدانگ خُدا دُعا ژوکھانجیگ یودپین۔ 3جاگشیگ دزارّے ستینگنے ہالام چھوتشود سومپاجیگیکا، ژالزیگسشیگی نانّگا خُدے فرشتا کھوے لدُونلا سکیودین سالپو تھونگ یانگ کھونگی مولس، ”کُرنیلیُس۔“

4کُرنیلیُس جیگساین فرشتے چھوگسلا میگ گیانگستے ستاس، یانگ کھوے زیرس، ”کیے مسیح چی چولے۔“

فرشتے لانسالس، ” کھیرانگی چینبا تانگ دُعا گُون خُدے چھودپے تشولّا نامسّا زادس۔ 5تا می کھاچیگ یافا لامچوگستے شمعُوؔن حضرت پطرؔس زیرکھانّی میبو یرو بودتے کھیونگ۔ 6کھو کوبا نییکھان شمعُوؔن ی کھانگپا دُوگستے یود، کھوے کھانگپا گیاتشوے تھاما یود۔“

7یگون مولتے فرشتا سکیود تشارّاچیگ، کُرنیلیُس سی رانگی یوگپو نیس تانگ کھوے جابستوگپا ایمان چانّی ماگمیبوا بودس، 8یانگ کھونگونلا جونگکھان تشانگما شادتے یافا لامچوگس۔

حضرت پطرؔس لا ژالزیگس تھونگ۔

9ستینگماجاگپو کھونگ تشانگکو پھیسّی نانّگا یوپے نیموا لیبّاچیگ، نیینگّونگ زامشیگّا حضرت پطرؔس کھانگپے کھیتھوگّا دُعا جُوالا سکیودس۔ 10کھونگ ستوگسپا چیتونگشیگ زین سام، یانگ کھارجی ڈالڈیگ چوین یودتوس، کھونّگا ژالزیگسشیگ تھونگ۔ 11کھونّگا نامکھا پھیتے راس چھینمو تسوگسشیگ چھوگسژی کانے تھامستے دُنیا چھوگسلا پھابین تھونگ۔ 12تینانّگا دُنیائیکا یودکھانّی سیمسچان، بوتسیگ تانگ چاچیو نامینا تشانگس گُون دوگپین۔ 13تینے کھونّگا سونگسکادچیگی، ”حضرت پطرؔس لانگستے یگون سادتے زو“ مولین تشور۔

14اِین نانگ حضرت پطرؔس سی لانسالس، ”کیے مسیح، شینانگ یگون میزا، نگے دیرینگ تشوگپا تشیتو یا زا میچھوگچیسّی زان جیگ مانے مازوسپین۔“

15تینے کھونّگا تینّا سونگسکادپوے لان نیسپا مولس، ”خُدے ژانگما زادکھانبوا تشیتو مازیر۔“

16لان سوم تینّا ژوگس سونگ، تینے ہونمیدلا تے راسپو نامکھا تھینتے کھیرّا زادس۔

17حضرت پطرؔس سی رانگی سامبے نانّگا تے ژالزیگسپوے تونتاگی سکورلا سامین یود زانے کُرنیلیُس سی حضرت پطرؔس کھیونگا لامچوگکھانگون شمعُوؔن ی کھانگپے گھویکا لیب۔ 18تے میگونّی بودتے شمعُوؔن حضرت پطرؔس زیرکھانبو تیرو دُوگستے یودا زیرتے ٹیس۔

19حضرت پطرؔس ، کھوا تھونگکھانّی ژالزیگسپوے سکورلا سامبا تانگین یودتوس ہلژخمہ رُوح بوے کھونّگا مولس، ” شمعُوؔن می سومی کھیرانگ ژالدوگ۔ 20تا لانگستے یوگا سونگ، یانگ کھونگون نیامپو چھاچیسلا تھےژومس ماچو، چیازیرنا کھونگون نگے لامچوگستے این۔“

21تینے حضرت پطرؔس یوگا بابستے سونگ، یانگ کھونگونلا، ”کھیوجے ژالکھانّی میبو نگا این، کھیوجا چیپھیا یونگسپین؟“ زیرتے ٹیس۔

22کھونگونی لانتانگس، ”نگاجا گُون ماگیے سپونبو کُرنیلیُس سی چھوگسنے یونگستے این، کھونگ ٹانگپو تانگ خُدا سیوا چوین کھونگی جیگسّی نانّگا میتشے پھودکھانجیگ این، یانگ یہُودی پا تشانگمے کھونّگا سیوا چواد۔ خُدے ہلژخمہ فرشتے کھونّگا شمعُوؔن حضرت پطرؔس سی مولکھانگون نیانتھوبچیسلا نیرانگ کھونگی کھانگپا بُود مولتے کا سالتوگ۔“ 23تینے حضرت پطرؔس سی کھونگون نانّگا بودتے تیرو دوگ چوگّا زادس۔ ستینگماجاگپو حضرت پطرؔس تے میگون نیامپو سکیودس، یانگ کھونگ نیامپو یافا فونو کھاچیگانگ سونگ۔

حضرت پطرؔس کُرنیلیُس سی کھانگپا سکیودس۔

24ستینگماجاگپو کھونگون قَیصرؔیہ لیب۔ کُرنیلیُس کھونگ سکیودچیسلا ثونگستے یودپین، یانگ کھوے رانگی نیینڈونگون تانگ دزاو نییموگون نانگ بودتے یودپین۔ 25حضرت پطرؔس کھانگپا لیبستے کُرنیلیُس تھونّگاچیگ، کھوے کھونگی ژابسّیکا گییلتے سجدہ تانگس ۔ 26اِین نانگ حضرت پطرؔس سی کھوا ”لونگ“ مولتے لانّگا زادس، ”نگا نی کھیرانگ ژوگس میجیگ این نگا چھاگماپھول“ مولس۔

27تینے حضرت پطرؔس کُرنیلیُس نیامپو سپیرا سالین کھانگپے نانّگا سکیودس، یانگ می مانگپوجیگ دزومستے یودکھانبو زِیگس۔ 28کھونگی تے میگونلا مولس، ”یہُودی پاجیگّا یہُودی مانکھان جیگ نیامپو ڈیل بورچیسپو یہُودیہ پے شریعت نانگجین گالتے اینکھان کھیوجاگونلا گیوس اینّوگ۔ اِین نانگ نگے سوجیگّانگ ریگسنگان یا تشیتو زیر میچھوگچیسپو، خُدے نگا سنگون چوگّا زادس۔ 29تیبویپھیا کھیوجاگونّی نگا یرو بُود زانے نگے چانگ گیابگال ماچوا یونگسپین۔ تا کھیوجے نگا چیپھیا یرو بودتے این؟“

30کُرنیلیُس سی لانتانگس، ”دیرینگ سانگ جاگ جی سنگونلا دزارّے ستینگنے چھوتشود سومپا، اینّا توستشود زامشیگیکا، نگے نگارانگی کھانگپے نانّگا دُعا چوادپین ، ہونمیدلا نامزا لدانگشان نامسکھانّی میجیگ نگے لدُونلا جانگستے جوگس ۔ 31کھونگی مولس، ’کُرنیلیُس خُدے کھیرانگی دُعا گُون سانّا زادس، یانگ کھیرانگی چینبا تانگکھانگونّیکا سنانّگا سالس۔ 32تا سوجیگ یافا لامچوگستے شمعُوؔن حضرت پطرؔس زیرکھانبو یرو بودتے کھیونگ۔ کھونگ شمعُوؔن کوبا نییکھانّی کھانگپا دُوگستے یود، کھوے کھانگپا گیاتشوے تھاما یود۔‘ 33تینّابویپھیا تینّامالّا نگے نیرانّگا بودّا می کالپین یانگ نیرانگیکا سکیودپا نگاجا ما تھادپو سونگ۔ مسیح نیرانّگا مولکھانگون نیانچیسلا خُدے سکوندونلا نگاجا تشانگما ایکا دزومستے این۔“

یہُودی مانکھان گُونلا گاموےناتسُول تشور۔

34تینے حضرت پطرؔس سی مولچیس گوزوگ، ”خُدے سوانگ چھوگس میزادچیسپو نگا تانتان ہاگو۔ 35اِین نانگ خُدے گیالکھاگ تشانگمے نانگنے کھونگی سیوا تانگ جیگسّی نانّگا لام زانگپویکا ڈولکھانگونلا گاموےناتسُول نیانچیسلا گاسوس زادّانوگ۔ 36حضرت عیسیٰ مسیحانگاتانگ تشانگمے مسیح یانگ کھونگ گیُودتے خُدے نیامپو جیدے یودچیسپو اینوگ زیرتے بنی اِسرائیل پاگونّی پھیا گاموےناتسُول پو شادس۔ 37یوحنّانی غوتا لینچیسّی سکورلا شادتے ستینگنے، گلِیلی یولنے گوزوگستے یہُودیہ گانگپوے نانّگا چونگکھانبو کھیوجاگونلا گیُوس اینوگ۔ 38خُدے حضرت عیسیٰ سی ناصرة پا ہلژخمہ رُوح تانگ ستوبس نیامپو سکوا زادس، یانگ کھونگ ناسّا مانگپوا سکیودتے چھاگلاس زانگپو زادچیس تانگ ردودگونّی گوبے وانگی یوگا یودکھانگون پھانچوگا زادس، چیاجونا خُدا کھونگ نیامپو جُوگستے اینپین۔

39حضرت عیسیٰ سی یہُودی یول تانگ یروشالیمّی نانّگا زادکھانگونّی گواہ نگاجا گُون این۔ کھونگونی کھونگ کیانگشینگا کیانگستے سادس۔ 40اِین نانگ خُدے کھونگ جاگ سومپے جاگّا سونتیا لانّگا زادتے نگاجا گُونلا سنگون چوگّا زادس۔ 41تشانگمالا کھونگ ماجال، اِین نانگ خُدے گواہ تانّگالا لدامّا زادکھان نگاجا گُونی کھونگ جال۔ شیکھانگونّی ٹونے سونتیا جانگستے نگاجا گُونی کھونگ نیامپو زوسپین یانگ تھونگسپین۔ 42خُدے نگاجا میگونلا حضرت عیسیٰ سی نی، شیسون نییسکویکا شاگس زادچیسلا کھونگی سکوا زادکھانبوے گواہ تانگچیس تانگ تبلیغ سلا کا سالس۔ 43حضرت عیسیٰ سی یکا ایمان چوکھان تشانگمالا کھونگی تشان گیُودتے دِیگپا چوکھانگونلا مُعافی تھوبین زیرتے کھونگی سکورلا پیغمبر تشانگمے گواہ سالتے اینوگ۔“

44حضرت پطرؔس سی ای سپیراگون شادین یود زانے، کھونگی لون نیانین یودکھان تشانگمیکا ہلژخمہ رُوح بابس۔ 45حضرت پطرؔس نیامپو یونگسکھانّی یہُودی پا ایمان چانگونّی، یہُودی مانکھان گونّیکانگ ہلژخمہ رُوح بابسکھانبو تھونگتے ہالاس۔ 46چیازیرنا کھونگونی یہُودی مانکھان گُونی ماشیسکھانّی سکادگونّی نانّگا خُدا ستودپا پھولین تشور۔

تینے حضرت پطرؔس سی مولس، 47”کھونگونلا چھوی غوتا لینچیسنے گھاگچیسّی ہامپا سوی چوین کاگونلا نگاجا تھوبکھانّی تینّا ہلژخمہ رُوح بو تھوبتے اینوگ۔“ 48حضرت پطرؔس سی کھونگونلا حضرت عیسیٰ مسیح مِنتخسی نانّگا غوتا لینگوس زیرتے کا سالس۔ تینے کھونگونی حضرت پطرؔس لا جاگ کھاچیگ کھونگ نیامپو جوگچیسلا جُووا پھولس۔

Currently Selected:

چھاگلاسگون 10: LBJNT

Highlight

Copy