چھاگلاسگون 9

ساؤلی حضرت عیسیٰ مسیح یکا ایمان کھیونگس۔

1اینّا توسلا رمسیح لوبٹوگس تشانگما سادین زیرکھانّی ساؤل اِمامِ اعظمی کا سونگتے، 2مسیح لامیکا ڈولکھانّی بُوژا تانگ بومو تشانگما زومستے، تسونپا چوستے یروشالیمّا کھیونگ نیانچیسلا کھوا چھوگسّکیور چوس زیرتے دمِشق گی یہُودی پے مجلِس گُونی نانّگا ستانچیسلا ایگیجیگ ڈِیستے تونگ جوس۔ 3ساؤل دمِشق گی نیموا لیبّاچیگ، ہونمیدلا نامکھانے بابسکھانّی اوت لدانگشانجیگی کھوا سکورس۔ 4کھو سیکا گیل، یانگ کھوا سونگسکادچیگ تشور، ”ساؤل ساؤل کھیرانگی نگا چیبا ناگھسباردو ستانّاد؟“

5شاولی زیرس، ”مسیح نیرانگ سو این۔“

کھونگی لانسالس، ”نگا نی حضرت عیسیٰ، کھیرانگی ناگھسباردو ستانکھانبو این۔ 6تا کھیرانگ گیالسا سونگ، یانگ تیرو کھیورانّگا چوگوشیسپو شادین۔“

7ساؤل نیامپو چھاکھانّی میگون ہالاستے ہانڈانگ سونگ چیازیرنا کھونگونلا سکاد تشور اِین نانگ سوانگ ماتھونگ۔ 8ساؤلی سیکانے لانگستے میگ پھیسپا کھوا چانگ ماتھونگ۔ کھوے ٹوپاگونّی کھوا لاگپا تھامستے دمِشق گا ٹھیدتے کھیرس۔ 9جاگ سوم تشوگپا، کھوا میگنے ماتھونگ یانگ تینّا توسپو کھوے چانگ زانگ مازوس، چانگ تھونّگانگ ماتھونگس۔

10دمِشق گی نانّگا حضرت عیسیٰ سی یکا ایمان چوکھان حننیاہ زیرکھانّی لوبٹوگ دوگادپین، مسیح ژالزیگسشیگی نانّگا کھوا مولس، ”حننیاہ۔“

کھوے لانتانگس، ”مسیح۔“

11مسیح کھوا مولس، ”کھاڈانگ زیرکھانّی ثانگی نانّگا یودکھانّی یودے کھانگپا سونگتے، تَرسُس پا ساؤل زیرکھانّی می بوے سکورلا ٹیس، داگسا کھوے دُعا جوروگ۔ 12ساؤلا ژالزیگسشیگی نانّگا حننیاہ یونگستے یانگسکیار تھونگتھوبچیسلا کھوے گویکا لاگپا بورّا تھونگ۔“

13حننیاہ سی جْوس ، ”کیے مسیح، ای می بوے نیرانگی ہلژخمہ میگون نیامپو یروشالیمّی نانّگا تسامشیگ نودپا سکیالکھانبوے سکورلا نگا جان می مانگپونے تشور۔ 14کھو یروانگ اِمام کُنی چھونمو گونی چھوگسنے وانگچھا تھوبتے نیرانگی تشان کھورکھان تشانگما زومستے کھیرچیسّی پھیا یونگستے اینوگ۔“

15اِین نانگ مسیح حننیاہ لا مولس، ”تا کھیرانگ سونگ چیازیرنا کھو نگے لدامسکھانّی جابستوگپا یہُودی مانکھان گُون، گیالپوگون تانگ بنی اِسرائیل پاگونلا نگے سکورلا شادکھانبو این۔ 16نگے تشان کھورچیسلا کھوا تسامشیگی ناگس لینگوشیسپو نگے کھوا ستانین۔“

17تینے حننیاہ ساؤل دُوگستے یودسے کھانگپا لیب یانگ نانگکوگا سونگتے کھوے لاگپا شاولیکا بورتے مولس، ” فونو ساؤل، کھیرانگ یرو یونگ زانے لامّا حضرت عیسیٰ مسیح جالتے اینپین۔ کھونگی کھیورانّگا یانگسکیار تھونگچیس تانگ ہلژخمہ رُوح بوے گانگچیسّی پھیا نگا ایکا کالا زادس۔“ 18تینّامالّا ساؤلی میگی کانے پاگسپا تسوگسشیگ بودتے کھوا یانگسکیار تھونگتھوب۔ تینے لانگستے کھوے غوتا لینس، 19کھارجی زوستے ستینگنے کھوے زوگسپوے نانّگا ستوبس سکییس۔

حضرت ساؤلی دمِشق تانگ یروشالیمّی نانّگا گواہ سالس۔

تینے حضرت ساؤل جاگبانشیگ لوبٹوگسگون نیامپو دمِشق گا دُوگس 20یانگ یہُودی پے مجلِس گُونی نانّگا حضرت عیسیٰ سی سکورلا شادچیس گوزوگستے مولس، ”کھونگ نی خُدےبوژا تانتان اینوگ۔“ 21تیرو یودکھانگونّی کھونگی لابجا تشورّاچیگ ہالاستے چیگ تانگ چیگّا ٹیس، ”ای میبو یروشالیمّی نانّگا حضرت عیسیٰ مسیح تشان کھورکھانگون ٹھیسّتور چوچیسّی سونڈوس ثانٹے چوکھان یانگ یروانگ کھونگون زومستے تسونگپا چوستے اِمام کُنی چھونمو گونی لدُونلا کھیرّالا یونگستے مانوگا؟“ 22حضرت ساؤل چھوسشادچیسّی نانّگا مانّگا ستوبسچان گیورین سونگ، یانگ دمِشق گی نانّگا یودکھانّی یہُودی پاگونّی، حضرت ساؤلی، حضرت عیسیٰ سی نی تانتانلا خُدے لدامّا زادکھانّی مسیحا اینکھان ستانکھانبوے گیابگالّا چانگ زیر مانیان۔

23توسبانشیگی ستینگنے یہُودی پاگونّی کھونگ سادچیسّی ٹابس تانگس، 24اِین نانگ ساؤل لا کھونگونی جوسنگانگون گیوسّونگ۔ تیگون تشانّیین میدپا گیالسے گھوگونّیکا کھونگ سادچیسلا ثونگستے دوگادپین۔ 25اِین نانگ ساؤلی لوبٹوگسگونّی کھونگ ژانلا تسیپوجیگی نانّگا گیانگستے گیالسے سیگپے نانّگا یودکھانّی کارکھونگ جیگنے تُھورلا پھابس۔

26کھونگ یروشالیمّا لیبّاچیگ، لوبٹوگسگون نیامپو دوگچیسّی سونڈوس چوس، اِین نانگ کھونگ تشانگما جیگس چیازیرنا، حضرت ساؤل لدینبا مسیح لوبٹوگس گیورتے اینکھانبویکا کھونگون دِین ماشیس۔ 27اِین نانگ برنباس زیرکھانبوے، حضرت ساؤلی کھونگرانگ نیامپو رسُول گُونی ٹوا ٹھیدتے کھیونگس۔ برنباسی کھونگونلا زیرس، ساؤل لامنے چھین یود زانے مسیح جالتے کھو نیامپو جالتا زادکھان یانگ کازوگ ہامپا نیامپو دمِشق گی نانّگا کھونگی حضرت عیسیٰ سی گواہ تانگسکھانگونّی سکورلا شادس۔ 28حضرت ساؤل رسُول گُون نیامپو دُوگس، یانگ یروشالیم گانگپوے نانّگا ہامپا نیامپو مسیح سکورلا شادین ڈولس۔ 29کھونگی یُونانی سکاد تانگکھانّی یہُودی پاگون نیامپوانگ ڈولدور چوادپین، اِین نانگ تیگونّی کھونگ سادچیسّی سونڈوس چوس۔ 30ایمان چان (فونو) گونلا تیبو گیوس چھاچیگ، کھونگون یونگستے حضرت ساؤل قَیصرؔیہ گیالسا کھیرتے تَرسُس سی ڈونگکھیرلا لامچوگس۔

31تینے یہُودیہ، گلِیلی تانگ سامریہ یول گانگپوے نانّگا یودکھانّی عبادت خانہ گُونلا ردوگنگال ماتھونّگا جیدے یودپین۔ ہلژخمہ رُوح گیُودتے کھونگونلا شید تانگ سپوسپا تھوب، یانگ مسیح جیگس تانگ سیوے نانّگا میتشے پھودچیسپوے کھونگونی ٹانگسکا رگیاسین سونگ۔

اینیاس تانگ تبِیتا۔

32حضرت پطرؔس ناسّا چیگنے چیگّا چھا زانے، کھونگ لیدّا ڈونگکھیرّی نانّگا دوگکھانّی ایمان چانگونّی ٹوا لیب۔ 33تیرو کھونّگا اینیاس زیرکھانّی میجیگ تھوگ کابوا زاپھوگتے ڈول مانیانّا مالتسیکا دُوگستے لو گیاد چھادپین۔ 34تینے حضرت پطرؔس سی کھوا، ”اینیاس حضرت عیسیٰ مسیح کھیرانگ پھانچوگا زادتے این؛ تا لونگس، رانگی مالتسا ثیل“ مولپا کھو تینّامالّا کواگ لانگس۔ 35تے میتھونگکھان لیدّاپا تانگ شارونپا تشانگمے مسیح کا ایمان کھیونگس۔

36یافا ڈونگکھیرّی نانّگا تبِیتا (یُونانی سکادّی نانّگا دورکاس) زیرکھانّی لوبٹوگ بوموجیگ یودپین۔ کھوے توسگیون لاس زانگپو تانگ نیالباچان گُونلا روگس چوادپین۔ 37حضرت پطرؔس لیدّے نانّگا یودتوس، تے بوموبوا زُومو ثانٹے یونگستے شی، یانگ کھوے زوگسپو غوتا تے ستانگتھوگی نانگجیگی نانّگا بورس۔ 38لیدّا ڈونگکھیربو یافانے نیمو یودپا، لوبٹوگس گونلا حضرت پطرؔس لیدّا یودکھانبو تشورتے، کھونگونی حضرت پطرؔس سی کا می نیس، ”شزدے زادتے یرو گیوگسپا سکیودّا زاد“ جُوالا لامچوگس۔

39حضرت پطرؔس تے می نیسکو نیامپو سکیودس یانگ کھونگ تیرو لیبّاچیگ، میگونّی کھونگ ستانگتھوگی نانگبوے نانّگا کھیرس۔ تیرو انے مارانگمو تشانگما نگوین، تبِیتا کھونگون نیامپو یود زانے کھوے تسیمسکھانّی کوسلاگّون حضرت پطرؔس لا ستانس۔

40حضرت پطرؔس سی تے نانگی نانّگا یودکھان تشانگما پھیلوگا پھینگس، یانگ پِیکدونگ ژُوگستے دُعا جوا زادس۔ تینے شیکھانّی زوگسپوے چھوگسلا ستاستے، ”تبِیتا لونگس“ مولس۔ تابیتے رانگی میگ پھیس یانگ حضرت پطرؔس تھونگتے لانگس۔ 41حضرت پطرؔس سی لاگپا تھامستے کھو کانگپیکا لانگچوگّا زادس۔ تینے ایمان چان تانگ انے مارانگمو گُون بودتے تبِیتا سونتیا اینکھانبو ستانّا زادس۔ 42ای سکورّی ناستشولگون یافا ڈونگکھیر گانگپوے نانّگا کھییبس، یانگ می مانگپوے مسیح کا ایمان کھیونگس۔ 43حضرت پطرؔس جاگبانشیگ یافای نانّگا شمعُوؔن کوبا نییکھانّی کھانگپا دُوگس۔

Currently Selected:

چھاگلاسگون 9: LBJNT

Highlight

Copy