1. Mojsije 42
42
E Josifese phrala aven ano Egipat
1Kana o Jakov dodžanglja kaj ano Egipat isi điv, pučlja pe čhaven: “Sose samo bešen thaj dićhen jekh avere?” 2Tegani vaćarda: “Šundem kaj ano Egipat isi điv. Džan odori thaj ćinen amenđe, te bi ačhasa džuvde thaj te ma bi merasa bokhatar!”
3Tegani e deš phrala e Josifese đele ano Egipat te ćinen điv. 4Al e Venijamine, e Josifese phrale, o dad avere phralencar ni bičhalda, golese so darajlo te ma avol nesavo bilačhipe pe leste. 5Gija e Izraelese čhave sesa maškare kola save đele ano Egipat te ćinen điv, golese so o bokhalipe avilo thaj ani phuv i Hanaansko.
6O Josif sasa o egipatsko upravitelji, kova savo bićinda o điv sa e manušenđe ki phuv.
Lese phrala avile angle leste thaj pele ke koča mujesa dži ki phuv. 7Kana o Josif dikhlja pe phralen, pindžarda len, al ćerda pe premal lende sar abandžija thaj holjame pučlja len: “Katar aviljen?”
Von phende lese: “Andari phuv i Hanaansko te ćina xamase.”
8O Josif gija pindžarda pe phralen, al von le ni pindžarde. 9Vov dija gođi tare sune so dikhlja, thaj phenda: “Tumen sen špijunura! Aviljen te dićhen e slaba thana kale phuvaće.”
10Von phende lese: “Na, gospodarona, amen sam ćire sluge thaj aviljam te ćina xamase. 11Savore sam čhave jekhe manušese thaj sam poštena manuša. Ćire sluge naj špijunura.”
12O Josif phenda pe phralenđe: “Na, tumen aviljen te dićhen e slaba thana kale phuvaće.”
13Von irisade: “Amen, ćire sluge, sama dešuduj (12) phrala, čhave jekhe dadese tari phuv i Hanaansko. O emcikno akana si amare dadesa thaj jekh naj vadži džuvdo.”
14Al o Josif vadži phenda lenđe: “Gija si sar so phendem tumenđe: Tumen sen špijunura! 15Gija ka iskušiv tumen: Xav sovli po faraon, akatar ni ka ikljen dži kaj tumaro terno phral ni avol akari! 16Bičhalen jekhe tumendar te anol tumare phrale. Avera phrala ka ačhen kate ano phanglipe! Gija ka proveriv tumare lafura thaj ka dikha dal vaćaren čačipe. Te ni vaćarden čačipe, xav sovli po faraon, tegani sen špijunura!”
17Pale gova čhuta len ano phanglipe trin đive.
18Trito đive phenda o Josif: “Ćeren gija thaj ka ačhen džuvde, golese kaj sem manuš savo daral e Devlestar. 19Te sen poštena, nek ačhol jekh tumendar ano phanglipe. Avera džan thaj inđaren o điv tumare bokhale familijaće. 20Pale gova anen mande tumare emterne phrale, gija te dikhav kaj si čačukane tumare lafura thaj te ma mudardon.” Thaj von složisajle golesa.
21Pale gova jekh averese phende: “Sigurno reslja amen i kazna baše amaro phral. Dikhljam lesi muka dži kaj molisada amen baše piro džuvdipe, al ni šundam le, golese kava baro pharipe arakhlja amen.”
22O Ruvim phenda lenđe: “Ni li phendem tumenđe ma te grešin protiv o čhavo? Al tumen ni mangljen te šunen man. Akana rodol pe računo lese ratese.”
23Al von ni džanglje kaj o Josif haljarol len, golese kaj vov lencar vaćarda prekalo tumači. 24O Josif irisajlo lendar thaj lija te rovol. Tegani palem irisajlo thaj vaćarda lencar. Pale gova crdija e Simeone lendar thaj phenda te phanden le angle lenđe jakha.
E Josifese phrala irin pe ano Hanaan
25Pale gova zapovedisada o Josif te pheren lenđe traste đivesa, thaj dži jekhese te irin lese pare ane traste thaj te den len sa so trubul dromese. Gija i ćerde. 26Von čhute o điv pe pumare hera thaj đele gothar.
27Kana ko drom ačhile te soven, jekh lendar putarda pi trasta te parvarol pe here, dikhlja kaj odupral ani trasta sesa e pare.
28Tegani phenda pe phralenđe: “E pare irisade manđe! Aktale ani mi trasta!”
Tegani von lije te tresin tari dar, pa pučlje jekh avere: “So ćerda amenđe o Dol?”
29Kana resle ke po dad o Jakov ano Hanaan, phende pe dadese sa so sasa, 30vaćarindoj: “O manuš savo si gospodari gole phuvako, holjame vaćarda amencar thaj phenda kaj aviljam ane goja phuv sar špijunura. 31Al amen phendam lese: ‘Poštena sam manuša, naj sam špijunura. 32Sama dešuduj phrala, čhave jekhe dadese tari phuv i Hanaansko. O emcikno akana si amare dadesa thaj jekh naj vadži džuvdo.’ 33Tegani kova gospodari ani goja phuv vaćarda amenđe: ‘Gija ka džanav dal sen poštena manuša: Ačhaven jekhe phrale ke mande, len xamase baše tumari bokhali familija, pa džan! 34Tegani anen manđe tumare emcikne phrale, gija te džanav kaj naj sen špijunura, nego poštena manuša. Pale gova ka iriv tumare phrale, thaj tumen šaj slobodno te phiren ane kaja phuv.’”
35Sar čučarde pumare traste, dži jekh lendar arakhlja pe pare ane kese. Kana von katane lenđe dadesa dikhlje e kese e parencar, darajle.
36Lengo dad o Jakov phenda: “Tumendar ka ačhav bize čhave! O Josif najstalo, najstalo ni o Simeon, a akana manđen te len mandar thaj e Venijamine. Sa ćidija pe protiv mande!”
37Tegani phenda o Ruvim pe dadese: “Šaj mudare mingre duje muršen te ni andem e Venijamine palal. De le mande, a me ka iriv le tuće palal.”
38Al o Jakov phenda: “Mo čhavo ni ka džal tumencar, golese so leso phral mulo thaj samo vov ačhilo. Ko drom šaj araćhol tumen nesavo bilačhipe. Me sem purano manuš, thaj i žal palo Venijamin savi bi ćerena manđe, bi mudarola man.”
Currently Selected:
1. Mojsije 42: GSP
Highlight
Share
Copy
Want to have your highlights saved across all your devices? Sign up or sign in
