2. Samuilo 7
7
E Devleso obećanje e Davidese
(1. Dnev 17,1–15)
1Kana o caro o David lija te bešol ani piri palata, o GOSPOD dija le odmor tare sa lese dušmanura save sesa trujal leste, 2thaj o David vaćarda e prorokose e Natanese: “Ak, me bešav ani palata tare kedrura, a e Devleso kovčego ačhilo ano šatori.”
3A o Natan phenda e carose: “Ćer sa so dijan gođi, golese so si o GOSPOD tusa.”
4Goja rat e GOSPODESO lafi avilo e Natanese: 5“Dža thaj phen me slugase e Davidese: ‘Gija vaćarol o GOSPOD: Dal san tu kova savo ka ćerol manđe ćher ane savo ka bešav? 6Ni bešljem ano ćher sar e Izraelcuren ikaldem andaro Egipat pa sa dži avđive. Đeljem taro than dži o than, a o šatori sasa mingro boravište. 7Al, kaj god te džava e Izraelcurencar, nikad ni phendem nekase tare lese plemenska šorutne, savenđe zapovedisadem te aven pastira taro mingro narodo – o Izrael: Sose ni ćerden manđe ćher tare kedrura?’”
8“Golese vaćar mingre slugase, e Davidese: ‘Gija vaćarol o GOSPOD pe vojske: Me sem kova savo andem tut tare pašnjakura, gothar kaj arakhljan e bakren, te ave vladari pe mingro narodo – o Izrael. 9Sema tusa kaj god đeljan, thaj crdijem angle tute sa ćire dušmanuren. Me ka ćerav ćo alav te avol baro, sar so si e alava e embare manušenđe ki phuv. 10A ka ćerav i than mingre narodose, e Izraelese, thaj ka čhuvav len te bešen odori, te bi avola len lengo ćher thaj te ne bi khoni uznemirila len. E bilačhe manuša ni ka ćeren lenđe vadži pharipe, sar so ćerde ko anglunipe, 11sar so ćerde od kana čhutem e sudijen mingre narodose, e Izraelese. Thaj ka dav tut odmor tare sa će dušmanura. Me, o GOSPOD, vaćarav tuće kaj me korkoro ka zuravav ćiro vladarsko ćher. 12Kana ka avol o vreme te mere thaj te pašljo maškare ćire paradada, ka ćerav te nasledil tut ćiro potomko – jekh tare ćiro rat – thaj me ka zuravav leso carstvo. 13Vov ka vazdol ćher bašo mingro Alav, a me ka zuravav o presto tare leso carstvo ane sa e đivesa. 14Me ka avav leso dad, a vov ka avol mingro čhavo. Kana ka ćerol nesavo bilačhipe, ka kazniv le rajasa thaj ka čalav le sar so o dad čalavol pe čhave. 15Al ni ka čhinavav lestar mo manglipe, sar so čhinadem mo manglipe e Saulese, save crdijem tutar. 16Ćiro vladarsko ćher thaj ćiro carstvo ni ka properol angle mande ane sa e đivesa. Ćiro presto ka avol zuralo ane sa e đivesa.’”
17Gija o Natan vaćarda e Davidese sa kala lafura thaj sa so dikhlja.
E Davidesi molitva
(1. Dnev 17,16–27)
18Tegani o caro o David ulilo ano Sveto Šatori, bešlo anglo GOSPOD thaj phenda: “Ko sem me, GOSPODE Devla, thaj so si mingri familija pa gaći te vazde man? 19Thaj ko da sasa tuće zala gova, GOSPODE Devla, pa vaćardan i taro budućnost mingre vladarskone ćhereso. Dal gija, GOSPODE Devla, ćere e manušencar?
20So bi me, o David, šajine vadži te phenav tuće? Golese so, tu džane man, GOSPODE Devla. 21Baše ćiro lafi thaj pale ćiro manglipe ćerdan kala bare buća thaj sikadan len manđe, ćire slugase. 22Čače san baro, GOSPODE Devla! Naj khoni sar so san tu thaj naj aver Dol sem tute, baš gija sar so šundam amare kanencar. 23Thaj ko si sar ćiro narodo o Izrael – jedino narodo ki phuv savo o Dol đelo te oslobodil, te bi gova avola leso narodo thaj gija te proslavil piro Alav? Ćerdan bare thaj čudesna buća baše lende thaj baši ćiri phuv, thaj tradijan avere naroduren angle ćiro narodo save tuće oslobodisadan andaro Egipat, taro aver narodo thaj tare lenđe devela. 24Čhutan o Izrael te avol ćiro narodo ane sa e đivesa, a tu GOSPODE, ćerdiljan lengo Dol.
25A akana, GOSPODE Devla, o obećanje savo dijan manđe, ćire slugase, thaj me vladarskone ćherese, nek ačhol ane sa e đivesa. Ćer sar so obećisadan. 26Ćiro alav ka avol baro ane sa e đivesa thaj e manuša ka vaćaren: ‘O GOSPOD pe vojske Dol si po Izrael!’ O ćher će slugaso, e Davideso, ka zuravol angle tute. 27GOSPODE pe vojske, Devla e Izraeleso, tu akava sikadan manđe, ćire slugase, kana phendan: ‘Me ka vazdav ćiro ćher.’ Golese i tromajem te moliv tut gija. 28Va, GOSPODE Devla, tu san Dol! Ćire lafura si čačukane, a tu sa kava šukaripe obećisadan manđe, ćire slugase. 29Akana moliv tut te blagoslovi mo vladarsko ćher, te bi ačhola angle tute ane sa e đivesa. Golese so, tu GOSPODE Devla, dijan o obećanje thaj ćire blagoslovesa ka avol blagoslovime mo vladarsko ćher ane sa e đivesa.”
