2. Samuilo 6
6
O David anol o Kovčego taro savez ano Jerusalim
(1. Dnev 13,1–14; 15,25–16,43)
1O David palem ćidija tranda milje (30 000) emšukar vojnikuren ano Izrael, 2pa lencar đelo andari Vaala i Judejsko, thaj pesa lija e Devleso kovčego, savo inđarol o alav e GOSPODESO pe vojske, savo si ko presto maškare heruvimura.
3E Devleso kovčego čhute po nevo vordon thaj ikalde le andaro ćher e Avinadaveso, savo sasa ko brego. E vordonesa upravisade e Avinadavese čhave, o Uza thaj o Ahjo. 4E Devleso kovčego sasa po vordon, a o Ahjo džalasa angle leste. 5O David thaj sa o izraelsko narodo ćhelde anglo GOSPOD bašalindoj pe sa e vrste kaštunale instrumentura taro kedar, e harfencar, lirencar, dairencar, udaraljkencar thaj činelencar.
6Kana avile dži e Nahoneso gumno, e guruva sapletisajle, pa o Uza vastesa dolda e Devleso kovčego. 7O GOSPOD but holajlo po Uza golese so ni dikhlja so ćerol. Golese o Dol čalada le, thaj o Uza mulo odori, paše Devleso kovčego.
8O David holajlo golese so o GOSPODESI holi peli po Uza. Golese gova than i avđive akhardol Perec-Uza.#6,8 Perec-Uza. Kava značil: “Perajipe e Uzaso.”
9Gova đive o David darajlo taro GOSPOD thaj phenda: “Sar e GOSPODESO kovčego šaj te avol dži mande?”
10Golese ni manglja te lol e GOSPODESO kovčego peste, ane Davideso foro, nego bičhalda le ano ćher e Jovid-Edomeso, o Gitejco. 11E GOSPODESO kovčego ačhilo ane Jovid-Edomeso ćher trin čhon thaj o GOSPOD blagoslovisada le thaj sa lese ćherutnen.
12E carose e Davidese phende: “Baše Devleso kovčego, o GOSPOD blagoslovisada e Jovid-Edomese ćherutnen thaj sa so isi le.”
Tegani o David đelo thaj lija e Devleso kovčego andare Jovid-Edomeso ćher thaj bare baxtasa inđarda le upre ane Davideso foro. 13Kana e manuša save inđarena e GOSPODESO kovčego nakhle šov korakura, o David žrtvujisada po jekhe guruve thaj po jekhe thule terne guruve. 14O David pe peste inđarda o svešteničko laneno prsluko thaj ćhelda anglo GOSPOD andari sa i zor. 15Gija vov thaj sa o izraelsko narodo inđarena e GOSPODESO kovčego, dena vika tari bax thaj phurdena ane bakrane šinga.
16A kana e GOSPODESO kovčego resola ane Davideso foro, i Mihal, e Saulesi čhej, dićhola taro džamo, thaj dikhlja sar o caro o David hutol thaj ćhelol anglo GOSPOD. Golese o David but pelo ane laće jakha.
17E GOSPODESO kovčego ande thaj čhute ke leso than ano šatori savo o David vazdija lese, a o David anda e GOSPODESE e phabarde žrtven thaj žrtve bašo katanipe. 18Kana o David završisada golesa so dija e phabarde žrtven thaj e žrtve bašo katanipe, blagoslovisada e narodo ano alav e GOSPODESO pe vojske, 19pa dži jekhe manušese thaj džuvljaće save sesa ćidime maškare Izraelcura, dija po jekh mangro, kolako tare urme thaj kolako tare šuće drakha. Pale gova, sa o narodo đelo pese ćhere.
20Kana i o David irisajlo ćhere te blagoslovil pire ćherutnen, i Mihal, i čhej e Saulesi, iklili te resol le thaj phenda: “O caro e Izraeleso avđive sasa but dostojanstveno kana pučarda pe gija angle sluškinje tare pire službenikura, sar nesavo dilo manuš!”
21Pe gova o David phenda laće: “Ćheldem anglo GOSPOD savo birisada man, a na će dade il nekas avere andaro leso ćher, thaj čhuta man te avav vladari pe GOSPODESO narodo – o Izrael. Thaj me vadži ka ćhelav anglo GOSPOD 22thaj vadži pobut ka ladžarav korkoro man. Thaj vadži pobut ka perav ane mingre jakha, a e sluškinje tare save tu vaćare, ka sikaven manđe čast.”
23Golese e Mihala, e Saulese čheja, ni sesa čhave sa dži kaj sasa džuvdi.
