2. Samuilo 2
2
O David pomazimo bašo caro
1Pale gova o David pučlja e GOSPODE: “Te džav li upre ane nesavo foro e Judako?”
A o GOSPOD phenda: “Dža.”
O David pučlja: “Kaj te džav?”
O GOSPOD vaćarda: “Ano Hevron.”
2Gija o David đelo odori pe duje romnjencar e Ahinoamasa taro Jizreel thaj e Avigajilasa, savako rom, o Naval andaro Karmel, mulo. 3O David inđarda pesa i e manušen save sesa lesa thaj lenđe familijen, pa đele te bešen ano Hevron thaj ane forura save sesa trujal leste. 4Tegani e Judejcura avile ano Hevron thaj pomazisade e Davide bašo caro pe Judaso pleme.
Kana e Davidese vaćarde so e manuša andaro Javeš-Gilad prahosade e Saule, 5vov bičhalda lenđe glasnikuren e haberesa: “Te blagoslovil tumen o GOSPOD golese so sikaden gasavo manglipe tumare gospodarese, e Saulese, gija so prahosaden le. 6O GOSPOD akana nek sikavol tumenđe po manglipe thaj po vernost, a i me ka iriv tumenđe šukarimasa golese so gija ćerden. 7Akana aven zurale thaj hrabra, golese so tumaro gospodari o Saul si mulo, a man e Judaso pleme pomazisada baše piro caro.”
E Davidesi vojska marol pe e Saulese vojskasa
8Al o Avner, o čhavo e Neroso, o glavno zapovedniko e Saulese vojskako, lija e Saulese čhave e Iš-Bošete thaj inđarda le ano Mahanajim, 9pa čhuta le te avol caro po Gilad, po Ašuri, po Jizreel, po Efrem, po Venijamin thaj pe sa o Izrael. 10E Iš-Bošete, e Saulese čhave, sesa saranda (40) berš kana postanisada caro e Izraeleso thaj vladisada duj berš. Al e Judaso pleme ačhilo pašo David. 11O David ano Hevron vladisada pe Judaso pleme efta berš thaj šov čhon.
12O Avner, o čhavo e Neroso, đelo e Iš-Bošetese, e Saulese čhavese, slugencar andaro Mahanajim ano Givon. 13A o Joav, o čhavo e Cerujako thaj e Davidese sluge iklile angle lende pašo jekh rezervoari bašo paj ano Givon. Nesave lendar bešle tari jekh rig pašo rezervoari, a avera ki dujto rig.
14Tegani o Avner vaćarda e Joavese: “E terne čhave nek ušten thaj nek len te peraven pe jekh averesa angle amende.”
O Joav phenda: “Šaj.”
15Tegani arakhlje dešuduje (12) terne čhaven andare Venijamineso pleme save ka maren pe bašo Iš-Bošet, o čhavo e Sauleso, thaj dešuduj (12) tare Davidese sluge. 16Von dolde jekh avere taro šoro thaj pusade pe e mačosa ane pašavre, thaj katane perena mule. Golese gova than ano Givon akhardol Helkat-Hacurim, so značil “Polje e mačurengo”.
17Gova đive sasa baro maripe thaj e Davidese sluge pobedisade e Avnere thaj e Izraelcuren. 18Odori sesa e Cerujaće trin čhave, o Joav, o Avišaj thaj o Asael. O Asael prastola sigate sar i srna ano polje, 19pa vov lija te prastol palo Avner, thaj ni đelo ni levo ni desno dži kaj jurisada le.
20O Avner irisajlo thaj pučlja: “Tu li san gova, Asaele?”
O Asael phenda: “Me sem.”
21Tegani o Avner phenda lese: “Dža levo il desno. Dol nesave terne čhave, thaj lestar le o oružje.”
Al o Asael ni manglja te ačhol thaj te ni prastol pale leste.
22O Avner palem vaćarda e Asaelese: “Ačhav te praste pale mande! Sose te mudarav tut? Sar bi tegani šajine te ikljav angle jakha e Joavese, će phralese?”
23Al o Asael palem ni manglja te ačhol thaj o Avner pusada le e palune kotoresa taro koplje ano vođi. O koplje e Asaelese iklilo ko dumo, gija vov pelo ko than mulo. Dži jekh manuš savo avilo ko than kaj o Asael pelo thaj mulo, bi ačhola gothe.
24Al o Joav thaj o Avišaj nastavisade te džan palo Avner thaj kana lija te perol i rat resle dži o brego Ama paši Gija, ko drom premali givonsko pustinja.
25Tegani e Venijamincura ćidije pe palo Avner, ćerde i četa thaj ačhile ano položaj ko vrho e bregoso.
26O Avner dija vika premalo Joav: “Dal trubul ane sa e đivesa te xal amen o mačo? Dal ni dićhe kaj sa kava bilačhe ka završil pe? Kobor vadži ka ađućare te naredi će manušenđe te ma jurin vadži pumare phralen?”
27O Joav vaćarda: “Xama sovli po džuvdo Dol, te ni vaćaresa, me manuša bi nastavina te jurin pe phralen dži sabalje.”
28Tegani o Joav phurdija ano bakrano šing, thaj sa lesi vojska ačhili – ačhade te jurin e Izraelcuren thaj te maren pe.
29O Avner thaj lese manuša celo goja rat đele maškari Arava. Nakhle prekali len o Jordan, phirde opašo đive thaj resle ano Mahanajim.
30O Joav irisajlo taro juripe palo Avner thaj ćidija sa e vojska. Sem o Asael, falisada dešenja (19) vojnikura e Davidese. 31E Davidese sluge mudarde trišel thaj šovardeše (360) Venijamincuren save sesa e Avneresa. 32Tegani lije e Asaele thaj prahosade le ane lese dadeso limori, ano Vitlejem. Pale gova o Joav thaj lese vojnikura phirde celo rat thaj resle ano Hevron kana lija te ikljol o kham.
