2. Samuilo 1
1
O David dodžanol baše Sauleso thaj e Jonataneso meripe
1Pale Sauleso meripe, o David, kana pobedisada e Amalečanuren, irisajlo ano Ciklag thaj odori ačhilo duj đive. 2Trito đive avilo jekh manuš andare Sauleso logori, pharade šejencar thaj po šoro sasa le čhordo praho sar bi sikavola o žalipe. Kana avilo anglo David, pelo ke koča angle leste mujesa dži i phuv.
3O David pučlja le: “Katar ave?”
A vov vaćarda: “Našljem andaro izraelsko logori.”
4O David pučlja le: “So gova sasa? Vaćar manđe!”
O manuš vaćarda: “I vojska našli andaro maripe, thaj but vojnikura mudardile. A i o Saul thaj leso čhavo o Jonatan mudardile.”
5Tegani o David pučlja e terne manuše savo anda lese kava haberi: “Katar džane so o Saul thaj leso čhavo o Jonatan mudardile?”
6O manuš vaćarda: “Slučajno sema ki gora Gilboa thaj aviljem dži o Saul. Sasa navalimo pe piro koplje, a e marimase vordona thaj e grasta samo so ni resle paše leste. 7Vov irisajlo thaj dikhlja man, pa akharda man, a me vaćardem lese: ‘Aktaljem!’ 8Vov pučlja man: ‘Ko san tu?’ A me vaćardem lese: ‘Me sem Amalečanino.’ 9Tegani vov phenda manđe: ‘Ačh upreder mande thaj mudar man! Ane mulikane dukha sem, al sem vadži džuvdo.’ 10Gija me ačhiljem upreder leste thaj mudardem le, golese so džangljem so gija ranimo, ni ka ačhol džuvdo. Tegani uljardem i kruna tare leso šoro thaj i narukvica savi sasa lese po va, thaj ake, andem len tuće, gospodarona.”
11Kana o David šunda gova, dolda thaj pharada e šeja pe peste tari žal, a gija ćerde thaj sa e manuša so sesa lesa. 12Žalisade, ruje thaj postisade dži ki rat golese so o Saul, o Jonatan, e GOSPODESI vojska thaj o narodo e Izraeleso mudardile taro mačo.
13O David pučlja kole manuše savo anda lese o haberi: “Katar san?”
O manuš vaćarda: “Me sem čhavo jekhe abandžijaso, savo si Amalečanino, al amen beša maškar tumende.”
14O David pučlja le: “Sar tromajan te vazde ćo va po pomazaniko e GOSPODESO thaj te mudare le?” 15Thaj dija vika jekhe tare pe sluge pa vaćarda lese: “Av thaj mudar kale!”
Thaj o sluga mudarda le.
Dži kaj o terno manuš merola, 16o David vaćarda lese: “Korkoro san bango bašo ćiro meripe, golese so svedočisadan korkoro protiv tute kana phendan: ‘Mudardem e GOSPODESE pomazaniko.’”
O David žalil palo Saul thaj palo Jonatan
17Tegani o David đilabija kaja rovavni đili taro Saul thaj taro leso čhavo o Jonatan, 18thaj phenda: “Nek e Judejcura sikljon kaja đili tari džitka.” Goja đili pisime si ane Jašareso lil:
19“I slava ćiri, Izraele, peradi si
ke će bregura pašljol!
O, sar pele e ratnikura!
20Ma vaćaren golestar ano Gat,
ma phenen gova ke droma e Aškelonese,
te ma avol šukar e filistejskone čhejenđe,
te ma radujin pe e čheja tare biobrezime manuša.
21O, e gilboanska gore,
te ma avol tumen ni rosa ni bršnd.
E poljura te ma den bijanipe baše žrtve,
golese so pe tumende e ratnikoso štito si meljardo,
e Sauleso štito ačhilo bi makhlo uljesa.
22Taro rat e mudardengo, tari khoj e ratnikurenđi,
e Jonatanesi džitka ni crdija pe,
a ni e Sauleso mačo ni ačhilo šuko.
23O Saul thaj o Jonatan, ano džuvdipe mila thaj mangle sesa,
ni ano meripe ni uladile.
Tare orlura po sigate sesa,
a po zurale tare lavura.
24Čhejalen e izraelska, roven palo Saul.
Ane barvale skerletna šeja uravola tumen,
thaj zlatna ukrasura čhuvola pe tumare šeja.
25O, sar ano maripe pele e ratnikura!
Ke bregura e izraelska o Jonatan mulo pašljol.
26Mo ilo tari dukh pharadol pale tute, Jonatane, phrala,
golese so but mangljem tut.
O manglipe ćiro sasa manđe po šukar
taro manglipe e džuvljako.
27O, sar pele e ratnikura
thaj phađilo lengo marimaso oružje!”
