2. Samuilo 19
19
O Joav koril e Davide
1Tegani e Joavese phende: “Eke o caro rovol thaj tugujil palo Avesalom.”
2Gija, gova đive i pobeda ćerdili ano žalipe baši sa i vojska, golese so i vojska šunda so o caro tugujil pale po čhavo. 3I vojska gova đive čorale irisajli ano foro, sar so čorale iril pe i vojska savi ladžarda pe gija so našli andaro maripe.
4O caro učharda po muj, thaj zurale ruja andaro sa o glaso: “Avesalome, mo čhavo, Avesalome, mo čhavo, mo čhavo!”
5O Joav đelo ko caro ano ćher thaj phenda: “Avđive ladžardan sa ćire vojnikuren, a von akana arakhlje o džuvdipe ćiro, ćire čhavengo thaj čhejengo, ćire romnjengo thaj ćire romnja-ropkinjengo. 6Tu manđe kolen save mrzin tut, a mrzi kolen save manđen tut. Avđive šukar sikadan kaj khanči ni značin tuće ni e zapovednikura ni e vojnikura, golese so dikhav kaj sasa tuće pošukar o Avesalom avđive te ačhola džuvdo, a savore amen te mudardivasa. 7Nego, akana iklji thaj ohrabri će vojnikuren. Golese so, xama sovli e GOSPODESA, te ni ikliljan, dži erat ni ka ačhol tut ni jekh jedino manuš. Gova ka avol tuće pobaro bilačhipe tare sa so sasa tut tare ćiro ternipe dži akana.”
8Tegani o caro uštilo thaj bešlo paši kapija.
Kana vaćarde e vojskaće: “Eke o caro bešol paši kapija”, sa i vojska avili angle leste.
O David iril pe ano Jerusalim
A ane gova vreme, e Izraelcura save sesa ki Avesalomesi rig, našle ćhere. 9O narodo andare sa e izraelska plemenura raspravila maškar peste vaćarindoj: “O caro spasisada amen andare vasta amare dušmanurengo. Ikalda amen andare vasta e Filistejcurenđe, a akana našlo andari phuv bašo Avesalom. 10A o Avesalom, kas pomazisadam te avol amaro caro, mudardilo ano maripe. Sose akana khoni ni vaćarol tare gova so e caro e Davide trubul te iri palal?”
11Kova so vaćarola pe ane sa o Izrael, avilo dži o caro thaj dži leso ćher. Golese o caro o David bičhalda glasnikuren e sveštenikurenđe ani Juda, e Sadokese thaj e Aviatarese, haberesa: “Pučen e Judaće starešinen: ‘Sose tumen te aven empalune save ka pomožin manđe te iriv ma ani mi palata sar caro? 12Tumen sen mingre phrala, mingro rat. Sose te aven empalune save ka pomožin e carose te iril pe?’ 13A e Amasese phenen: ‘Dal tu naj san mingro rat? Nek o Dol emzurale kaznil man te ni čhutem tut te ave šorutno zapovedniko mingre vojskako sa dži kana san džuvdo, umesto o Joav.’”
14Gija o David barilo ane ile e Judejcurenđe, pa von složisajle jekhe glasosa thaj bičhalde haberi e carose: “Iri tut sa ćire slugencar.”
15Tegani o caro pojdisada te iril pe thaj avilo dži i len o Jordan. E Judejcura avile ano Gilgal te ađućaren le thaj te nakhaven le prekalo Jordan. 16Kana e Judejcura pojdisade te resen e caro e Davide, lencar sigate đelo thaj o Šimi, o čhavo e Geraso savo sasa Venijaminco andaro Bahurim. 17Lesa sesa milja (1 000) Venijamincura thaj o Civa savo sasa službeniko ane Sauleso ćher, lese dešupandž (15) murša čhave thaj lese biš (20) sluge. Von siđarde te aven dži i len o Jordan te resen e caro. 18Von nakhle prekali len te nakhaven e carose ćherutnen thaj te ćeren sa so vov rodol lendar.
Kana nakhlo prekalo Jordan, o Šimi, o čhavo e Geraso, pelo ke koča anglo caro, 19thaj phenda lese: “Oprosti manđe gospodarona. Bistar o bilačhipe savo me, ćiro sluga, ćerdem kova đive kana tu, gospodarona carona, đeljan andaro Jerusalim. Ma vadži te de gođi tare gova, 20golese so džanav kaj grešisadem. Golese ake, avđive aviljem angluno tare sa e Josifeso pleme te resav tut, mingre gospodare thaj caro.”
21Tegani o Avišaj, o čhavo e Cerujako phenda: “E Šimi trubul te mudara! Dija armaja e GOSPODESE pomazaniko!”
22Pe gova o David phenda: “So man isi tumencar, e Cerujaće čhavencar? Tumen li sen mancar il protiv mande? Dal avđive trubul nekas te mudara ano Izrael? Dal me ni džanav so sem tare kava đive palem caro e Izraeleso?”
23Tegani o caro xalja sovli thaj phenda e Šimise: “Ni ka mere.”
24A i e Sauleso unuko, o Mefivošet avilo te resol e caro. Vov ni brinila tare pe pingre, ni ranglja pe mustaka, niti thovola pe šeja taro đive kana o caro đelo, pa sa dži o đive kana o caro irisajlo džuvdo thaj sasto.
25Kana o Mefivošet avilo andaro Jerusalim te resol e caro, o caro pučlja le: “Sose ni đeljan mancar Mefivošete?”
26A o Mefivošet phenda: “Gospodarona, carona, mo sluga o Civa xoxada man. Me, ćiro sluga, našti phirav šukar. Vaćardem lese: ‘Ka upregniv e here, te uštav pe leste thaj te džav palo caro.’ 27A vov vaćarda tuće bilačhe mandar. Al tu san, gospodarona carona, sar e Devleso anđelo. Golese, ćer sar so de gođi kaj si emšukar. 28Khoni tari familija me paposi ni zaslužisada tare mingro gospodari o caro khanči aver sem o meripe, a tu palem mukhljan man, ćire sluga, maškare kola save xan paše ćiro astali. Tegani, katar man pravo te žaliv ma?”
29A o caro phenda lese: “Ni trubul vadži te vaćare khanči. Andem odluka tu thaj o Civa te ulaven e njive.”
30O Mefivošet phenda e carose: “O Civa nek lol sa. Šukar si samo so tu, gospodarona carona, irisaljan ćhere džuvdo thaj sasto!”
31A i o Barzilaj o Gilađanino avilo andaro Rogelim te bi naćhola e carosa prekali len o Jordan thaj gothar te ispratil le. 32O Barzilaj tegani sasa but purano – sasa le ohtovardeš (80) berš. Vov sasa but barvalo manuš thaj dži kaj o caro bešola ano Mahanajim, brinila pe e caro te avol sa so trubuja le.
33O caro phenda e Barzilajese: “Ava te naćhe mancar prekali len o Jordan thaj ačh mande ano Jerusalim, me te briniv ma tutar.”
34Al o Barzilaj phenda e carose: “Vadži kobor berša ačhilo man džuvdipe, te bi akana džava e carosa ano Jerusalim? 35Akana isi man ohtovardeš (80) berš. Naj sem khančese. Šaj li me, ćo sluga, te pindžarav o ukus tare kova so xav thaj so pijav? Šaj li vadži te šunav e pevačurengo thaj e pevačicengo glaso? Sose te avav tuće ko pharipe, mingreja gospodarona, carona? 36Ka nakhav tusa prekali len o Jordan samo te isprativ tut zala. Ni zasluživ gasavi nagrada. 37Mukh man te irivma, te merav ane mingro foro, pašo limori me dadeso thaj me dako. Al, ake ćiro sluga o Kimham. Vov nek naćhol tusa, mingre gospodaresa e carosa, pa de lese gova so de gođi kaj si emšukar.”
38Tegani o caro phenda: “Šukar, o Kimham ka naćhol mancar, thaj me ka ćerav lese kova so si tuće emšukar. A i tuće ka ćerav sa so manđe.”
39Sa o narodo nakhlo prekali len o Jordan. Kana o caro nakhlo prekali len, čumidija e Barzilaje thaj blagoslovisada le. Tegani o Barzilaj irisajlo ćhere.
40Kana o caro nakhlo ano Gilgal, lesa nakhlo thaj o Kimham. Dži kaj o caro naćhola prekali len, pomožisada le sa e Judasi vojska thaj opaši vojska andaro Izrael.
41Sa e Izraelcura lije te aven ko caro thaj te pučen le: “Sose amare phrala e Judejcura čorde tut thaj inđarde tut prekali len o Jordan, sa ćire ćherutnencar thaj će slugencar?”
42A e Judejcura vaćarde e Izraelcurenđe: “Golese so si o caro amari pašutni familija. Sose holjavon baše gova? Dal xaljam ke caroso računo? Dal lijam khanči amenđe?”
43Tegani e Izraelcura phende e Judejcurenđe: “Ano Izrael isi deš plemenura. Gija amen isi deš droma pobut pravo ko caro nego tumen. Sose tegani dićhen te peraven amen? Na li amen angleder savorendar phendam so o caro trubul te iril pe?”
Al e Judejcura sesa pozurale ane lafura tare Izraelcura.
