2. Samuilo 20
20
E Ševasi pobuna
1Odori slučajno sasa jekh bilačho manuš, Venijaminco, leso alav sasa Ševa, čhavo e Bihrijaso. Vov phurdija ano bakrano šing thaj dija vika:
“Amen naj amen kotor ano David,
ni nasledstvo ano čhavo e Jesejeso!
Izraelcuralen, savore džan ane tumare šatora!”
2Tegani sa e Izraelcura mukhlje e Davide thaj đele palo Ševa, o čhavo e Bihrijaso. Al e Judejcura ačhile paše piro caro sa e dromesa dži kaj đele tari len o Jordan dži o Jerusalim.
3Kana o David irisajlo ani pi palata ano Jerusalim, lija kole deše romnjen-ropkinjen saven ačhada te brinin pe tari palata, thaj čhuta len te bešen ano jekh ćher tali straža. Vov dija len sa so trubuja len, al ni suta lencar vadži. Gija ačhile phangle dži ko meripe. Živisade sar udovice.
4O caro phenda e Amase: “De vika e Judejcuren te aven mande baše trin đive, a i tu ava gothe.”
5Gija o Amasa đelo te akharol e Judejcuren, al ačhilo pobut nego so o caro odredisada.
6Tegani o David phenda e Avišajese: “Akana o Ševa, o čhavo e Bihrijaso, ka ćerol amenđe pobaro bilačhipe nego o Avesalom. Le mingre manušen, thaj dža pale leste te ma bi avola dži e zurale forura thaj te našol amenđe.”
7Gija, talo Avišajeso zapovest sesa e Joavese vojnikura, e Kerećanura, e Peletovcura thaj sa e ratnikura. Von iklile andaro Jerusalim thaj đele palo Ševa, o čhavo e Bihrijaso. 8Dži kaj sesa paši bari stena ano Givon, angle lende avilo o Amasa. O Joav sasa urado ano vojničko gad, a ko maškar sasa le kuštik, pe savi sasa phanglo o mačo. Al, sar phirda, o mačo ispelo lese.
9O Joav pučlja e Amase: “Sar san, phrala?”, thaj dolda le desnone vastesa tari brada te bi čumidola le.
10O Amasa ni sasa oprezno bašo mačo savo sasa ane Joaveso va, pa gija o Joav pusada le ano vođi. E Amasase pora čhordile ki phuv – ni trubuja dujto drom te pusavol pe te bi merola. Tegani o Joav thaj leso phral o Avišaj, nastavisade te džan palo Ševa, o čhavo e Bihrijaso.
11Jekh tare Joavese manuša ačhilo pašo Amasa thaj dija vika: “Ko si e Joavese thaj e Davidese, nek džal palo Joav!”
12O Amasa pašlilo ane piro rat ko drom, a kova e Joaveso manuš dikhlja kaj sa i vojska savi naćhol gothe, ačhol te dićhol ano Amasa, pa crdija le taro drom ano polje thaj učharda le ogrtačesa. 13Kana crdije e Amase taro drumo, sa i vojska đeli palo Joav te bi džana palo Ševa, o čhavo e Bihrijaso.
14Vov nakhlo maškare sa e izraelska plemenura dži i Avel-Bet-Maaha thaj maškaro krajo e Berićanurengo. Savore von ćidije pe katane thaj đele pale leste. 15E Joavesi vojska avili thaj okolisada i Ševa ani Avel-Bet-Maaha. Vazdije rampe tari phuv savi sesa trujal o foro sar bi dena ane leste. Dži kaj sa e Joavesi vojska dija zor te peravol e forose duvara, 16andaro foro jekh gođaver džuvli dija vika premale lende: “Šunen! Šunen! Phenen e Joavese te avol akate te vaćarav lesa.”
17Kana o Joav avilo paše late, voj pučlja le: “Tu li san o Joav?”
Vov vaćarda: “Me sem.”
Tegani voj vaćarda lese: “Šun so me, ćiri sluškinja, ka vaćarav tuće.”
A vov vaćarda: “Šunav.”
18Voj lija te vaćarol: “Angleder phenola pe: ‘Rode odgovor ano Avel’, thaj gija ćerola pe. 19Amen sam kola save manđen mir thaj save si pačavne ano Izrael. Amaro foro jekh si tare emvažna forura ano Izrael, a tu manđe te uništi le. Sose manđe te phađe kova so si e GOSPODESO?”
20O Joav phenda: “Dur tare gova! Dur te avol mandar te uništiv il te phagav. 21Ni mangav gova, nego jekh manuš kaso alav si Ševa, o čhavo e Bihrijaso andare Efremese bregura, uštilo protiv o caro David. Den amen samo le jekhe, pa ka crdav man taro foro.”
Tegani i džuvli phenda e Joavese: “Ake, ka čhuden tuće leso šoro prekalo duvari.”
22I džuvli đeli thaj sa e manušenđe andaro gova foro phenda kava šukar predlog savo sasa la. Gija von čhinde o šoro e Ševaso, e Bihrijase čhaveso, thaj čhudije le e Joavese. Tegani o Joav phurdija ano bakrano šing thaj lese vojnikura đele andaro foro thaj irisajle ane pumare šatora, a vov irisajlo ko caro ano Jerusalim.
23O Joav sasa zapovedniko pe sa i izraelsko vojska, a o Benaja, o čhavo e Jehojadeso, sasa zapovedniko e Kerećanurengo thaj e Peletovcurengo. 24O Adoram sasa zadužime baše manuša save ćeren bući ki zor, a o Josafat, o čhavo e Ahiludeso, sasa beležniko. 25O Šeja sasa pisari, o Sadok thaj o Aviatar sveštenikura, 26a i o Ira, o Jairovco, sasa e Davideso svešteniko.
