2. Samuilo 13
13
I Tamara thaj o Amnon
1Akava sasa palo nesavo vreme: e Davidese čhave, e Avesalome, sasa but lačhi phen savako alav sasa Tamara. A o Amnon, e Davideso aver čhavo, zaljubisajlo ane late. 2E Amnonese gaći sasa pharo baši Tamara, savi sasa lese phen taro dad, pa nasvajlo golese. Voj vadži sasa čhej, gija voj naštine te avol korkori e muršencar pa golese o Amnon džanglja kaj našti te avol dži late.
3E Amnone sasa amal kaso alav sasa Jonadav. Vov sasa čhavo e Davidese phraleso, e Šimeso, thaj sasa but lukavo manuš.
4Vov pučlja e Amnone: “Sose san tu, e caroso čhavo, svako sabalje gija bibaxtalo? Dal ni ka vaćare manđe?”
A o Amnon phenda lese: “Zaljubisaljem ani Tamara, i phen me phralesi e Avesalomesi.”
5O Jonadav phenda lese: “Pašljo ani postelja thaj ćer tut nasvalo. A kana ka avol ćo dad te dićhol tut, tu phen lese: ‘Mukh te avol mi phen i Tamara thaj te dol man te xav. Angle mande nek ćerol xape, akate kaj šaj te dikhav la, pa te xav andare laće vasta.’”
6Gija o Amnon pašlilo ani postelja thaj ćerda pe nasvalo.
Kana o caro avilo te dićhol le, o Amnon phenda lese: “Mukh te avol mi phen i Tamara thaj angle mande te ćiravol supa knedlencar, pa te xav andare laće vasta.”
7Gija o David bičhalda haberi e Tamaraće ani palata: “Dža ano ćher ćire phraleso, e Amnoneso, thaj ćer lese khanči xamase.”
8Gija i Tamara đeli ano ćher pe phraleso e Amnoneso, a vov pašljola. Voj lija zala humer, dospisada angle leste thaj ćerda knedle. 9Tegani lija o lonco thaj ikalda i supa angle leste, al vov ni manglja te xal.
O Amnon phenda: “Vaćar savore te ikljen avri.”
Thaj savore iklile.
10Pale gova, o Amnon phenda e Tamaraće: “An manđe o xape ani soba kaj sovav, te xav andare ćire vasta.”
I Tamara lija kova xape savo ćerda, thaj inđarda ani Amnonesi soba kaj vov sovol.
11Al kana voj dija le te xal, vov dolda la thaj phenda: “Av thaj sov mancar, phene.”
12A i Tamara phenda lese: “Ma phrala! Ma ladžar man. Gija khanči naj šukar ano Izrael te ćerol pe! Ma ćer gasavo dilipe. 13So bi tegani avola mancar? Kaj bi šajine te thovav i ladž mandar? A tu bi avesa sar jekh tare dile ano Izrael. Nego, vaćar e carosa. Vov ni ka branil te lav tut romese.” 14Al vov ni manglja te šunol la, nego suta lasa ki zor golese so sasa pozuralo latar. 15Odma pale gova, o Amnon but zamrzisada la. Leso mrzipe sasa pobaro taro manglipe savo sasa le premale late angleder.
O Amnon phenda laće: “Ušti thaj dža!”
16I Tamara phenda: “Na! Te ikaldan man akana, gova ka avol vadži pobaro bilačhipe tare kova so ćerdan manđe.”
Al vov ni manglja te šunol la, 17nego dija vika pe sluga thaj phenda: “Ikal akale džuvlja akatar thaj phande o vudar ključosa pale late.”
18Tegani o sluga ikalda la thaj phanglja o vudar ključosa. E Tamara sasa dugačko haljina bajencar, save phiravena ane gova vreme e carose čheja save vadži ni sute khanikasa. 19I Tamara čhorda pese praho po šoro thaj pharada koja dugačko haljina savi inđarda. Tegani čhuta pe va prekalo muj thaj đeli zurale rojindoj.
20Lako phral o Avesalom phenda: “Dal kova ćiro phral o Amnon sasa tusa? Ma vaćar akana khanči, phene. Vov si ćo phral. Ma čhuv gova ano ćo ilo.”
Gija i Tamara ačhili te bešol ane pe phraleso, e Avesalomeso ćher, bibaxtali thaj korkori.
21Kana o caro o David šunda sa so sasa, but holajlo. 22A o Avesalom ni vaćarda vadži e Amnonesa, golese so mrzisada le so ladžarda lese pheja e Tamara.
O Avesalom mudarol e Amnone
23Duj berš pale gova, kana e Avesalomese manuša ranglje lese bakren ano Vaal-Hacor paši granica e Efremesi, o Avesalom dija vika sa e carose murše čhaven te aven odori ki gozba.
24O Avesalom đelo ko caro thaj phenda: “Ek me manuša save randen e bakren lije te ćeren bući. Manđe li tu carona thaj će službenikura te džan odori mancar, ćire slugasa?”
25O caro phenda: “Na, mo čhavo. Ni trubul te dža savore. Samo bi avasa tuće ko pharipe.”
Iako o Avesalom terisada e caro te džal lesa, vov ni manglja, nego blagoslovisada le.
26Tegani o Avesalom phenda: “Ako tu ni manđe, tegani moliv tut te mućhe me phrale e Amnone te džal mancar.”
A o caro pučlja le: “Sose vov te džal tusa?”
27Al sar o Avesalom but rodija gova lestar, o caro mukhlja i e Amnone thaj sa avere pire murše čhaven te džan lesa.
28O Avesalom zapovedisada pire slugenđe: “Šunen man: Kana o Amnon ka avol ani šukar volja tari mol, me ka phenav tumenđe: ‘Čalaven po Amnon’, a tumen mudaren le. Ma daran. Me sem kova savo čhuvol tumen te ćeren gova. Aven zurale thaj hrabra!”
29Gija e Avesalomese sluge ćerde e Amnonesa sar so vov zapovedisada lenđe. Tegani sa e carose murša čhave uštile, uklile pe pire hera thaj našle.
30Dži kaj von vadži sesa ko drom premalo ćher, e Davidese phende: “O Avesalom mudarda sa e carose murše čhaven – nijekh ni ačhilo džuvdo.”
31O caro tegani uštilo, pharada pe šeja thaj pašlilo ki phuv. A i sa lese službenikura pharade pe šeja, pa ačhile paše leste.
32Tegani o Jonadav, o čhavo e Davidese phraleso, e Šimeso, phenda: “Gospodarona, ni trubul te de gođi kaj mudarde sa će murše čhaven. Mudarde samo e Amnone. O Avesalom manglja gova te ćerol vadži tare kova đive kana o Amnon ladžarda lese pheja, e Tamara. 33Golese, gospodarona, carona, ma te brini tut so phende tuće kaj sa će čhave mudardile. Samo o Amnon mudardilo.”
34Pale gova, o Avesalom našlo.
O sluga savo sasa ki straža dikhlja bute manušen ko drom zapadno pestar thaj sar uljen natele taro jekh brego.
35Tegani o Jonadav phenda e carose: “Eke dićhe, e carose čhave aven. Sasa baš gija sar so phendem tuće.”
36Samo so vaćarda gova, e carose čhave dije andre thaj lije zurale te roven. A i o caro thaj sa lese službenikura lije ćerče te roven.
37O Avesalom našlo ko Talmaj, o čhavo e Amihudeso, o caro taro Gešur. A o caro o David ruja pale po čhavo đivesencar. 38Kana o Avesalom našlo ano Gešur, odori ačhilo trin berš. 39Kana e carosi dukh palo Amnon nakhli, leso ilo lija te dukhal le palo Avesalom.
