1. Samuilo 19
19
O Saul manđol te mudarol e Davide
1O Saul phenda pe čhavese e Jonatanese thaj sa pe službenikurenđe te mudaren e Davide.
Al o Jonatan but manglja e Davide, 2thaj golese vaćarda e Davidese: “Mo dad o Saul rodol prilika te mudarol tut. Vodi redo tutar theara sabalje. Arakh than kaj šaj te garado. 3Me ka ikljav thaj ka ačhav angle mo dad ano polje kaj ka ave tu. Ka vaćarav lesa tutar, pa ka vaćarav tuće so dodžangljem.”
4O Jonatan hvalisada e Davide ke po dad o Saul thaj phenda lese: “Ma o caro te ćerol khanči bilačhe pire slugase e Davidese. Vov tuće khanči ni ćerda bilačhe, a kova so ćerda, sasa tuće taro baro korist. 5Čhuta po džuvdipe ano opasnost kana mudarda kole Filistejco. O GOSPOD anda bari pobeda bašo sa o Izrael, a tu gova dikhljan thaj sana baxtalo. Sose bi ćeresa greh, golesa so ka čhore e Davideso nevino rat gija so ka mudare le bizo razlog?”
6O Saul šunda e Jonatane thaj xalja sovli: “Xama sovli po džuvdo GOSPOD, o David ni ka avol mudardo.”
7O Jonatan akharda e Davide thaj sa vaćarda lese. Pale gova inđarda le ko Saul, thaj o David služisada e Saule sar angleder.
8Kana sasa palem maripe, o David đelo te napadil e Filistejcuren. Čalada pe lende gaći zurale kaj savore našle angle leste.
9O bilačho duxo savo sasa bičhaldo taro GOSPOD ulilo po Saul kana bešlo ane po ćher e kopljesa ano va. Dži kaj o David bašalola, 10o Saul dikhlja te čhudol o koplje ane leste thaj gija te kovil le ko duvari. Al o David crdija pe, thaj o koplje ačhilo ano duvari. Goja rat o David našlo thaj spasisajlo. 11O Saul bičhalda e špijunuren te dićhen pe Davideso ćher, a ki sabalin te mudaren le.
E Davidesi romni i Mihal phenda e Davidese: “Erat te ni našljan, theara ka ave mulo.”
12Tegani i Mihal mukhlja e Davide tele taro džamo, pa vov gija našlo thaj spasisajlo. 13Pale gova i Mihal lija jekhe ćherutne idole thaj čhuta le ko than e sojimaso, ko šoro e ćherutne idolese čhuta e buznjaće bala thaj učharda le e Davidese šejenca.
14Kana o Saul bičhalda e manušen te dolen e Davide, i Mihal phenda: “Nasvalo si.”
15O Saul palem bičhalda len te dićhen e Davide thaj phenda lenđe: “Anen le sa e thanesa, te mudarav le.”
16Al kana e manuša dije andre, dikh – ki postelja pašljol o ćherutno idol, a ko šoro buzikane bala.
17O Saul phenda e Mihalaće: “Sose nakhadan ma thaj mukhljan me dušmane te našol thaj te spasil pe?”
A i Mihal phenda lese: “O David vaćarda manđe: ‘Mukh man te našav il ka mudarav tut.’”
18Kana o David našlo thaj spasisajlo, đelo ko Samuilo ani Rama thaj sa vaćarda lese so ćerda o Saul. Pale gova vov thaj o Samuilo đele ano Najot thaj odori ačhile.
19E Saulese phende: “Ek, o David si ano Najot paši Rama.”
20O Saul bičhalda e manušen te dolen e Davide, al kana lese manuša dikhlje e prorokuren sar prorokujin, a e Samuilo sar vodil len, pelo pe lende o Duxo e Devleso, thaj lije i von te prorokujin.
21Sa gova vaćarde e Saulese, pa vov bičhalda avere manušen. Al i von lije te prorokujin. Pale gova i o trito drom, pa i von lije te prorokujin.
22Tegani o Saul korkoro avilo ani Rama.
Avilo dži ko baro bunari pašo Sehu, thaj pučlja: “Kaj si o Samuilo thaj o David?”
A von phende lese: “Ano Najot paši Rama.”
23Gija o Saul lija te džal ano Najot paši Rama. O Duxo e Devleso pelo pe leste, thaj i vov prorokujisada odrumal sa dži kana ni reslo ano Najot. 24Odori uljarda pestar e šeja, pa prorokujisada i anglo Samuilo. Gijate nango pašlilo gova đive thaj i rat. Golese vaćarol pe: “Dal si i o Saul jekh tare prorokura?”
Currently Selected:
1. Samuilo 19: GSP
Highlight
Copy
Compare
Share
Want to have your highlights saved across all your devices? Sign up or sign in
