1. Samuilo 18
18
E Saulesi dar taro David
1Pale Davideso vaćaripe e Saulesa, e Jonataneso thaj e Davideso o amalipe postanisada zurale phanglo thaj o Jonatan manglja le sar korkoro pes. 2Tare gova đive o Saul ačhada e Davide paše peste thaj ni mukhlja le te iril pe ane pe dadeso ćher. 3O Jonatan phanglja savez e Davidesa, golese so manglja le sar korkoro pes. 4Vov uljarda po ogrtači savo inđarda thaj dija le e Davidese, a gija dija le thaj piro oklop, pa čak i po mačo, i džitka thaj i kuštik.
5Kana bi o Saul bičhalola e Davide khanči te ćerol, o David gova ćerola but šukar. Golese o Saul čhuta le te avol šorutno pe ratnikura. Gova ni sasa šukar samo e vojskaće, nego i e Saulese službenikurenđe.
6Kana i vojska irisada pe ćhere taro maripe ane savo o David mudarda e Filistejco, e džuvlja andare sa e izraelska forura baxtale iklile te ađućaren e caro e Saule dži kaj ćhelde thaj đilabije, a e daire thaj e lire bašalena. 7A dži kaj ćhelde, đilabije gija:
“O Saul mudarda miljen,
a o David deše miljen.”
8O Saul but holajlo, golese so ni sasa lese šukar kaja đili.
Dija gođi ane peste: “E Davidese dije deše miljen, a manđe samo miljen! Samo još o carstvo falil lese!”
9Tare gova đive o Saul dićhola e Davide banđe jakhencar.
10Theara đive, o Dol bičhalda bilačhe duxo zurale te uljol po Saul. O Saul lija te diljarol ano ćher, a o David sar so ćerola, bašalola i lira. O Saul ićarola o koplje ane vasta, 11pa čhudija le premalo David vaćarindoj ane peste: “Ka koviv le ano duvari.”
Al o David duj droma crdija pe te ma mudarol le.
12O Saul darajlo taro David, golese so o GOSPOD sasa e Davidesa, a irisada po dumo lestar. 13Golese o Saul crdija e Davide pestar thaj čhuta le te avol šorutno pe milje. O David inđarola pe vojska ano maripe 14thaj sasa but uspešno ane sa so ćerda, golese so o GOSPOD sasa lesa. 15Kana dikhlja kobor si o David uspešno, o Saul vadži pobut darajlo lestar. 16Al sa e manuša andaro Izrael thaj i Juda manglje e Davide golese so inđarola len ano maripe.
17O Saul phenda e Davidese: “Akh mi phureder čhej, i Merav. Ka dav tut la romnjaće, samo služi manđe hrabro thaj mar e GOSPODESO maripe.”
Golese so o Saul dija gođi: “Ni trubul me te vazdav mo va pe leste. Nek ćeren gova e Filistejcura.”
18Al o David phenda e Saulese: “Ko sem me, savo si mingro džuvdipe thaj i familija me dadesi ano Izrael, te bi avava e caroso džamutro?”
19A kana avilo o vreme i Merav te lol e Davide romese, dije la ko Adriel andaro Meholj.
20A e Saulesi poterni čhej i Mihal, but manglja e Davide. Kana vaćarde gova e Saulese, sasa lese but šukar.
21Golese o Saul dija gođi ane peste: “Ka dav le e Mihala romnjaće. Voj ka avol lese zamka thaj e Filistejcura po loćhe ka mudaren le.”
Gija o Saul phenda e Davidese: “Avđive isi tu dujto prilika te ave mo džamutro.”
22Tegani zapovedisada pe službenikurenđe: “Vaćaren korkore e Davidesa thaj phenen lese: ‘Ek, šukar san ane jakha e carose thaj sa lese službenikura manđen tut. Golese akana, av leso džamutro.’”
23Kana e Saulese službenikura phende gola lafura e Davidese, vov vaćarda: “Tumen li den gođi kaj si gova cikni bući te ave e caroso džamutro? Me sem čoro thaj naj sem khanči.”
24Kana e službenikura phende e Saulese so vaćarda o David, 25o Saul phenda: “Phenen e Davidese: ‘O caro baši piri čhej ni manđol khanči sem šel (100) morčha taro obrezanje e Filistejcurengo, te bi osvetila pe dušmanurenđe.’”
O Saul gija dija gođi te bi o David mudardola tare vasta e Filistejcurenđe.
26Kana e službenikura gova vaćarde e Davidese, vov prihvatisada te avol e Sauleso džamutro. Angleder nego te naćhol o rok savo o Saul dija e Davidese, 27o David thaj lese manuša đele thaj mudarde dujšel (200) Filistejcuren. O David anda lenđe morčha taro obrezanje thaj dži jekh ikalda anglo caro, te bi avola e caroso džamutro. Tegani o Saul dija le pe čheja e Mihala romnjaće.
28Kana o Saul dikhlja kaj si o GOSPOD e Davidesa thaj kaj lesi čhej i Mihala manđol e Davide, 29vadži pobut darajlo taro David thaj dži o krajo sasa leso dušmano.
30E filistejska zapovednikura nastavisade te džan ano maripe protiv e Izraelcura, al kobor god droma gova ćerde, o David sasa po uspešno nego sa avera e Saulese zapovednikura. Gija leso alav ćerdilo but slavno.
Currently Selected:
1. Samuilo 18: GSP
Highlight
Copy
Compare
Share
Want to have your highlights saved across all your devices? Sign up or sign in
