1. Samuilo 12
12
O Samuilo crdol pe anglo Saul
1O Samuilo vaćarda sa e Izraelcurenđe: “Šundem tumen sa so vaćarden thaj čhutem tumenđe caro. 2Akana isi tumen caro savo ka vodil tumen. A me phuraljem thaj parnile me bala, al akh me čhave si tumencar. Sema tumaro vođa tare mingro ternipe dži avđive. 3Aktaljem! Svedočin protiv mande anglo GOSPOD thaj angle leso pomazime caro: Lijem li nekase guruve? Lijem li nekase here? Xoxadem li nekas? Čhutem li khanika te ćerol khanči ki zor? Lijem li nekastar pare te bi phandava jekh jakh ki nepravda? Te khanči ćerdem tare gova, ka iriv tumenđe palal.”
4A von phende: “Ni xoxadan amen, niti čhutan khanika te ćerol khanči ki zor. Nikastar khanči ni lijan.”
5A o Samuilo phenda: “O GOSPOD si svedoko protiv tumende, a svedoko si avđive i leso pomazime caro kaj ni arakhljen khanči baše so šaj tužin man.”
O narodo phenda: “Va, o Dol si svedoko.”
6Tegani o Samuilo phenda e narodose: “O GOSPOD si gova savo birisada e Mojsija thaj e Aarone thaj vov ikalda tumare paradaden andaro Egipat. 7Golese, ačhen kate te optuživ tumen anglo GOSPOD te dav tumen gođi tare sa e bare buća save ćerda o GOSPOD tumenđe thaj tumare paradadenđe.
8Kana o Jakov avilo ano Egipat, tumare paradada lije te roven premalo GOSPOD. O GOSPOD tegani bičhalda e Mojsija thaj e Aarone, save ikalde tumare paradaden andaro Egipat, thaj ande len te bešen ane kava than. 9Al von zabistarde e GOSPODE, pire Devle, thaj vov predajisada len ane vasta e Sisrase, e zapovednikose tari vojska ano foro o Hacor, thaj mukhlja len ane vasta e Filistejcurenđe thaj e carose taro Moav. Savore von sesa ano maripe protiv tumare paradada. 10Von tegani lije te roven premalo GOSPOD thaj vaćarde: ‘Grešisadam golese so ačhadam e GOSPODE thaj služisadam e Vaalenđe thaj e Astartenđe. Ikal amen andare vasta amare dušmanurenđe, a amen ka služi samo tuće.’ 11Tegani o GOSPOD bičhalda e Gedeone, e Vedane, e Jeftaje thaj ko krajo i man, e Samuile. Gija o GOSPOD oslobodisada tumen tare vasta tumare dušmanurenđe trujal tumende thaj bešljen ano mir.
12Al kana dikhljen kaj ka napadil tumen o amonsko caro o Nahaš, vaćarden manđe: ‘Na, manga amencar te vladil o caro’ – iako si tumaro caro o GOSPOD, tumaro Dol. 13Ake tumenđe akana o caro save rodijen thaj birisaden. O GOSPOD dija tumen caro. 14Te isi tumen dar taro GOSPOD, te služisaden lese thaj te pokorisaljen lese, te ni bunisaljen protiv lese zapovestura thaj te tumen thaj tumaro caro savo vladil tumencar đeljen palo GOSPOD, tumaro Dol, ka avol tumenđe šukar. 15Al te ni pokorisaljen e GOSPODESE thaj te bunisaljen protiv e GOSPODESE zapovestura, tegani o GOSPOD ka avol protiv tumende sar so sasa protiv tumare paradada.
16Golese akana, ačhen gothe kaj sen thaj dićhen savi bari bući o GOSPOD ka ćerol angle tumare jakha. 17Dal naj akana o vreme te ćidol pe o điv? Ka akharav e GOSPODE te bičhalol gromura thaj bršnd. Tegani ka haljaren savo baro bilačhipe ćerden anglo GOSPOD kana rodijen caro.”
18Tegani o Samuilo akharda e GOSPODE, a o GOSPOD isto gova đive bičhalda gromura thaj bršnd.
Sa e narodo dolda bari dar taro GOSPOD thaj taro Samuilo, 19pa vaćarde e Samuilese: “Moli tut će GOSPODESE, ćire Devlese baše amende, ćire sluge, te ni mera. Golese so, pe sa avera amare grehura dodijam vadži jekh bilačhipe kana rodijam e caro.”
20Al o Samuilo vaćarda e narodose: “Ma daran! Tumen ćerden sa gova bilačhipe, al ma irin tumen taro GOSPOD, nego služin lese sa tumare ilesa. 21Ma vadži te peren ke koča e idolurenđe tare save naj korist. Von našti te spasin tumen golese so von naj khanči. 22Baše piro baro Alav o GOSPOD ni ka čhudol pe narodo, golese so vov manglja tumen te aven leso narodo. 23A dur te avol mandar te grešisadem premalo GOSPOD thaj te ačhav te moliv man tumenđe thaj te ni sikavav tumen taro šukar thaj čačukano drom. 24Dićhen te avol tumen dar taro GOSPOD thaj verno služin lese sa tumare ilesa. Ma bistren save bare buća ćerda tumenđe. 25Al te vadži ćerden bilačhipe, ka aven sar metlasa šulade, i tumen thaj tumaro caro.”
Currently Selected:
1. Samuilo 12: GSP
Highlight
Copy
Compare
Share
Want to have your highlights saved across all your devices? Sign up or sign in
