1. Samuilo 11
11
E Amoncura ano Javeš-Gilad
1[Tegani o Nahaš, o caro e Amoncurengo ćerda baro bilačhipe e Gadese thaj e Ruvimese plemese gija so bi sa lenđe muršenđe ikalola i desno jakh thaj ni dola khoni te avol lenđe ano pomoć. Gija o Nahaš ikalda i desno jakh dži jekhe izraelskone muršese istočno tari len o Jordan. Al, efta milje (7 000) manuša našle tare Amoncura thaj đele ano Javeš-Gilad.#11,1 Tegani … Javeš-Gilad Kava tekst naj ane tradicionalna jevrejska tekstura, nego lija pe andaro jekh purano kumransko rukopis. ]
Jekh čhon pale gova, o Nahaš o Amonco avilo thaj ćerda logori trujal o Javeš-Gilad.
E Javešanura vaćarde lese: “Phande savez amencar, tegani amen ka služi tuće.”
2Al o Nahaš o Amonco vaćarda: “Ka phandav tumencar savez talo jekh uslov, savorenđe tumendar te ikalav i desno jakh thaj gija te ladžarav sa o Izrael.”
3E starešine taro Javeš vaćarde lese: “De amen efta đive te bičhala glasnikuren ane sa o Izrael. Te ni avilo khoni amenđe ano pomoć, ka preda amen tuće.”
O Saul oslobodil o Javeš-Gilad
4E glasnikura resle ani Giva kaj bešlo o Saul thaj vaćarde e narodose so sasa ano Javeš. Tegani savore lije zurale te roven. 5A o Saul baš ane gova trenutko avola tare njive pire guruvencar.
Gija o Saul pučlja: “So si kale narodosa? Sose gaći roven?”
A e manuša vaćarde lese sa so vaćarde e Javešanura.
6Kana šunda gova o Saul, o Duxo e Devleso zurale ulilo pe leste thaj o Saul but holajlo. 7Lija duje guruven thaj čhinda len ke kotora save dija e glasnikurenđe te inđaren ane sa e krajura e Izraelese e haberesa: “Gija ka ćerol pe e guruvencar dži jekhe manušese savo ni džal palo Saul thaj palo Samuilo.”
I dar taro GOSPOD dolda sa e narodo thaj savore đele sar jekh. 8Kana o Saul ćidija len ano Bezek thaj đinda len, sesa trišel milje (300 000) Izraelcura thaj tranda milje (30 000) Judejcura.
9Tegani vaćarde e glasnikurenđe save avile: “Gija vaćaren e manušenđe taro Javeš-Gilad: ‘Theara, kana o kham ka avol emzuralo, savore ka aven spasime.’”
Kana e glasnikura đele thaj phende gova, e manuša taro Javeš sesa but baxtale.
10Tegani e Javešanura phende e Amoncurenđe: “Theara ka iklja angle tumende, thaj ćeren so manđen amencar.”
11Theara đive, o Saul ulada e vojska ane trin čete. Rano ki sabalin čalade ano logori e Amoncurengo, pa gija mudarde len sa dži kana o kham sasa emzuralo. A kola save ačhile džuvde našle kaj dikhlje, čak ni duj džene ni ačhile katane.
E Saule proglasin bašo caro
12Tegani o narodo phenda e Samuilese: “Ko gova vaćarda: ‘Dal o Saul ka vladil amencar?’ Anen gole manušen te mudara len.”
13Al o Saul phenda: “Avđive khoni ni ka avol mudardo golese so avđive o GOSPOD spasisada o Izrael.”
14O Samuilo phenda e narodose: “Ajde ka dža ano Gilgal. Odori ka proglasi e Saule bašo caro.”
15Gija sa o narodo đelo ano Gilgal, thaj odori anglo GOSPOD proglasisade e Saule bašo caro. Ande e GOSPODESE žrtve bašo katanipe, a tegani o Saul thaj sa e Izraelcura ćerde bari proslava.
Currently Selected:
1. Samuilo 11: GSP
Highlight
Copy
Compare
Share
Want to have your highlights saved across all your devices? Sign up or sign in
