1. Samuilo 10
10
O Samuilo pomazil e Saule bašo caro
1Tegani o Samuilo ikalda o čaro e uljesa thaj čhorda o ulje e Saulese po šoro. Čumidija le thaj vaćarda: “O GOSPOD pomazisada tut te ave vladari po Izrael, savo si leso nasledstvo. [Ka vladi pe GOSPODESO narodo thaj ka oslobodi len tare dušmanura save si trujal lende. A kava ka avol tuće znako kaj o GOSPOD čače pomazisada tut bašo vladari pe kova so si leso:] 2Kana ka dža mandar avđive, ka rese duje manušen paše e Rahiljako limori, ano Celcah ani Venijaminesi phuv. Von ka phenen tuće: ‘Arakhadile e hernja saven đeljan te rode. Ćo dad ačhada te dol gođi lendar, a lija te sikiril pe tuće thaj pučol: So si me čhavesa?’
3A kana gothar ka dža po dur thaj kana ka rese dži o baro kaš o Tavor, ka rese trine dženen save džan te slavin e Devle, upre ano Betel. Jekh ka inđarol trine buzoren, dujto trin mangre, a o trito jekh morčhi mol. 4Von ka pozdravin tut thaj ka manđen te den tut duj mangre, a tu ka le len. 5Pale gova ka ave ani Giva e Devlesi#10,5 Giva e Devlesi Akava alav značil: “E Devleso brego.”, kaj si o filistejsko logori. Kana ka ave pašo foro, ka rese prorokuren save uljen taro brego thaj prorokujin. Angle lende ka bašalen lire, daire, frule thaj harfe. 6Tegani o Duxo e GOSPODESO ka uljol zurale pe tute, pa i tu ka prorokuji lencar thaj ka ćerdo aver manuš. 7Thaj kana ka pherdon sa kala znakura, ćer so de gođi kaj si šukar golese so si o Dol tusa. 8Dža angle mande tele ano Gilgal, a me ka avav tute te anav e phabarde žrtven thaj e žrtven bašo katanipe. Efta đive ađućar dži kaj ni avav tute thaj dži kaj ni phenav tuće so te ćere.”
O Saul odredime bašo caro
9Čim o Saul irisajlo taro Samuilo te bi džala pese, o Dol menjisada leso ilo, a sa kola znakura pherdile ane gova đive. 10Kana o Saul reslo ani Giva, premal leste avile nesave prorokura. O Duxo e Devleso zurale ulilo pe leste thaj vov lija te prorokujil lencar.
11Kana e manuša dikhlje e Saule sar prorokuil avere prorokurencar, savore save pindžarena le angleder, jekh avere pučlje: “So sasa kava e Kisose čhavesa? Dal si i o Saul jekh tare prorokura?”
12A jekh tare manuša savo sasa gothar vaćarda: “Ka phene kaj si vov lengo vođa.”
Gija avilo o vaćaripe: “Dal si i o Saul jekh tare prorokura?”
13Kana ačhada te prorokujil, o Saul đelo ko brego.
14E Sauleso kako pučlja le thaj lese sluga: “Kaj gova đeljen?”
A o Saul vaćarda: “Te roda e hernjen, al kana dikhljam kaj našti arakha len, đeljam ko Samuilo.”
15Tegani e Sauleso kako phenda: “Moliv tut, vaćar manđe so phenda tuće o Samuilo.”
16A o Saul phenda lese: “Vaćarda amenđe samo so arakhadile e hernja.”
Al ni phenda lese khanči tare kova so phenda lese o Samuilo, kaj ka avol caro.
17O Samuilo akharda te ćidol pe o izraelsko narodo anglo GOSPOD ani Micpa, 18pa vaćarda e Izraelcurenđe: “Gija phenol o GOSPOD, o Dol e Izraeleso: ‘Me ikaldem o Izrael andaro Egipat thaj oslobodisadem tumen andare vasta e Egipćanurenđe thaj tare sa avera carstvura save mučina tumen. 19Al tumen avđive čhudijen tumare Devle savo oslobodil tumen taro bilačhipe thaj tare nevolje. Vaćarden: Na, de amen caro! Golese akana ačhen anglo GOSPOD premale tumare plemenura thaj premale tumare familije.’”
20Tegani o Samuilo naredisada te aven sa e izraelska plemenura, thaj e kockasa sasa birimo e Venijamineso pleme. 21Pale gova naredisada te avol e Venijamineso pleme pale pire familije thaj e kockasa sasa birimi e Matrijasi familija, a tari goja familija o Saul, o čhavo e Kisoso. Al kana rodije le, naštine te araćhen le.
22Golese pučlje e GOSPODE: “Avilo li gova manuš kate?”
A o GOSPOD phenda: “Ektalo garada pe pali oprema e vojskaći.”
23E manuša prastije thaj ikalde le gothar, a vov ačhilo maškaro narodo thaj sasa po učo savorendar bašo jekh šoro.
24Tegani o Samuilo vaćarda e narodose: “Dićhen li e manuše kas birisada o GOSPOD? Naj lese khoni ravno ane sa o narodo!”
A o narodo dija vika: “Nek avol džuvdo o caro!”
25O Samuilo vaćarda e manušenđe save si e prava thaj e dužnostura e carose thaj pisisada len ano lil savo čhuta anglo GOSPOD. Pale gova bičhalda sa e narodo te džal ćhere.
26Gija o Saul đelo ćhere ani Giva, a lesa đele nesave zurale manuša kase ile o Dol dotaknisada.
27Al nesave bilačhe manuša phende: “Sar kava manuš šaj spasil amen?”
Thaj golese so mrzisade le, ni ande lese nisave darura. A o Saul ni vaćarda lenđe khanči baše gova.
Currently Selected:
1. Samuilo 10: GSP
Highlight
Copy
Compare
Share
Want to have your highlights saved across all your devices? Sign up or sign in
