1. Korinćanenđe 15
15
O uštiba e mulengoro
1Podsetinava tumen, phraljalen, ko evanđelje savo propovedinđum tumenđe, savo hem priminđen, ano savo hem terđovena. 2Prekalo adava evanđelje tumen hem spasinena tumen, te ićerena tumen upro okova so propovedinđum tumenđe. Te na ćerena ađahar, džabe verujinena.
3Adalese so, predinđum tumenđe okova soi najbitno, okova so hem me priminđum: da o Hrist mulo zako amare grehija, baš sar so pisini ano Sveto lil, 4da inele parume, da o trito dive uštino taro mule, sar so pisini ano Sveto lil, 5hem da mothovđa pe e Petrese, a onda hem sa e dešu duje apostolenđe. 6Onda mothovđa pe e phraljenđe, kola tegani zajedno inele više oto panšel džene. But olendar panai dživde, a nesave mule. 7Onda mothovđa pe e Jakovese, i onda sa e apostolenđe. 8A ko kraj mothovđa pe hem maje, e najbednone manušese.
9Adalese so me injum najtikoro maškaro apostolja, hem na injum dostojno te vičinav man apostoli, adalese so progoninđum e Devlesere khanđirja. 10Ali, pali milost e Devlesiri injum akava so injum. Lesiri milost premala mande na inele džabe. Trudinđum man više sarijendar, ali na me, nego i milost e Devlesiri savi inele mancar. 11Ađahar, bilo me ili on: adava propovedinaja hem ano adava poverujinđen.
12A te propovedini pe da o Hrist uštino taro mule, sar adava da nesave maškara tumende vaćerena da nane uštiba taro mule? 13Te nane uštiba taro mule, onda ni o Hrist na uštino taro mule. 14A te o Hrist na uštino taro mule, džabei amaro propovediba, džabei hem tumari vera. 15Onda hem amen injam hovavne svedoci adalese so svedočinaja da o Devel vazdinđa e Hriste taro mule, kole na vazdinđa taro mule tei čače da o mule na uštena sar so nesave phenena. 16Adalese so, te o mule na uštena, onda ni o Hrist na uštino taro mule. 17A te o Hrist na uštino taro mule, džabei tumari vera – pana injen ano tumare grehija. 18Onda propele hem okola kola mule, a verujinde ano Hrist. 19Te samo zako akava dživdipe čhivaja amari nada ano Hrist, onda injam najbednija oto sa o manuša.
20Ali, o Hrist čače uštino taro mule, sar garancija da hem okola kola mule ka ušten. 21Adalese so, sar so o meriba alo prekalo manuš, ađahar hem o uštiba taro mule alo prekalo manuš. 22Adalese, sar so sare ano Adam merena, ađahar sare kolai ano Hrist ka oživinen. 23Ali, o uštiba taro mule džala palo redo: prvo o Hrist, a onda, kad ov ka avel, okola kola lese pripadinena. 24Tegani ka avel o kraj. O Hrist ka uništini sa e vladaren, sa i vlast hem o zoralipe, a onda ka predel sa o carstvo e Devlese e Dadese. 25Adalese so, o Hrist valjani te vladini sa đikote sa lesere neprijatelja na ovena čhivde talo lesere pre. 26O meriba ka ovel uništime sar zadnjo neprijatelji. 27Adalese so, ano Sveto lil pisini: “O Devel sa čhivđa talo lesere pre.” A kad phenela: “sa čhivđa talo lesere pre”, jasnoi dai sa čhivdo talo leste sem Okova kova sa čhivđa talo leste. 28A kad sa ka ovel čhivdo talo leste, onda hem korkoro o Čhavo ka čhivel pe talo Okoleste kova sa čhivđa talo leste, te šaj e Devle ovel vlast upro sa.
29I so ćerena okola kola krstinena pe zako mule? Te o mule uopšte na uštena taro mule, sose krstinena pe zako olenđe? 30Sose hem amen stalno reskirinaja amaro dživdipe? 31Hava sovli upro baripe savo frdava tumencar ano Hrist Isus amaro Gospod, phraljalen, da svako dive injum ani opasnost te merav. 32Te zbog o manušikane motivija marđum man e “zverencar” ano Efes, savi korist isi man adalestar? Te o mule na uštena taro mule, onda, “Hajde te ha hem te pija, adalese so tejsa ka mera.”
33Ma oven hovavde: “O bišukar društvo rumini o šukar navike.” 34Rasvestinen tumen hem ma grešinen više! Nesave tumendar na pendžarena e Devle. Adava vaćerava tumenđe sar te lađarav tumen.
35Ali nesave tumendar ka pučen: “Sar adava o mule uštena? Savo telo ka ovel len kad ka ušten taro mule?” 36Bigođakereja! O seme savo sejineja našti te oživini te prvo na merela. 37Hem okova so sejineja, nane da sejineja telo savo posle ka ovel, nego sejineja samo obično zrno, bilo te ovel zrno e đivesoro ili nesave avere semesoro. 38Ali o Devel dela le telo savo ov mangela. Svako e semese dela telo savo olese pripadini. 39Adalese so nane svako telo isto: aver telo isi e manušen, aver e životinjen, aver e čirikljen, a aver e maćhen. 40Isto ađahar isi e nebosere hem e phuvjakere telija; ali o sjaj oto e nebosere telijai averčhane e sjajestar oto e phuvjakere telija. 41E khame isi plo sjaj, e maseke plo sjaj hem e čerenjen isi pumaro sjaj. A svako čereni razlikujini pe oti aver palo plo sjaj. 42Ađahar ka ovel hem kad o mule ka ušten. Sejini pe raspadljivo telo, a taro mule uštela o neraspadljivo; 43sejini pe ani lađ, a taro mule uštela pe ani slava; sejini pe ano bizoralipe, a taro mule uštela pe ano zoralipe; 44sejini pe prirodno telo, a taro mule uštela o duhovno.
Te isi prirodno telo, isi hem okova duhovno. 45Adalese soi ađahar pisime ano Sveto lil: “O prvo manuš, o Adam, ulo dživdo biće.” A o poslednjo Adam, o Hrist, ulo duho kova dela dživdipe. 46Ali na inele prvo duhovno telo, nego prirodno, a posle duhovno. 47O prvoi manuš tari phuv, ćerdo oto prah e phuvjakoro, o dujtoi manuš taro nebo. 48Savo inele e phuvjakoro manuš, esavkei hem sa e phuvjakere manuša; savoi e nebosoro manuš, esavkei hem sa e nebosere manuša. 49Hem sar so amen injamle slika e phuvjakere manušesiri, ađahar ka ova hem slika e nebosere manušesiri.
50Akava phenava tumenđe, phraljalen, adalese so o telo hem o rat našti te nasledinen e Devlesoro carstvo, niti o raspadljivo te nasledini o neraspadljivo. 51Ače, phenava tumenđe i tajna: naka mera sare, ali sare ka ova menjime, 52otojekhvar, ano trepkiba e jakhakoro, kad ka šunđol i poslednjo truba. Adalese so, ka šunđol i truba hem o mule ka ušten ano neraspadljivo telo, a amen ka ova menjime. 53Adalese so, akava raspadljivo telo mora te menjini pe ano neraspadljivo, hem akava mulikano ano okova savo na merela. 54A kad akava raspadljivo telo ka menjini pe ano neraspadljivo hem akava mulikano ano okova savo na merela, tegani ka pherđol o vaćeriba savoi pisime ano Sveto lil:
“O meribai uništime.”
55“Meriba, kaj akana ti pobeda?
Meriba, kaj akana to zoralipe saveja dukhaveja?”
56O meriba lela plo zoralipe taro greh, a o greh lela plo zoralipe taro Zakoni. 57Ali, hvala e Devlese kova dela amen pobeda prekalo amaro Gospod Isus Hrist.
58Adalese, mle volime phraljalen, oven zorale hem ićeren tumen! Uvek oven pherdeste predana zaki buti savi o Gospod dinđa tumen adalese so džanen da tumaro trud ano Gospod nane za džabe.
Currently Selected:
1. Korinćanenđe 15: RAB
Highlight
Copy
Compare
Share
Want to have your highlights saved across all your devices? Sign up or sign in
