1. Korinćanenđe 14
14
O prorokujiba hem o vaćeriba ano avera jezici
1O mangipe te ovel tumaro cilj! Mangen but o duhovna darija, a posebno mangen but o daro oto prorokujiba! 2Adalese so, ko vaćeri ano jezici, na vaćeri e manušenđe, nego e Devlese. Niko na haljola le, adalese so Duhoja vaćeri o tajne. 3A ko prorokujini, e manušenđe vaćeri: izgradini len, ohrabrini len hem utešini len. 4Ko vaćeri ano aver jezici, izgradini samo pes, a ko prorokujini, izgradini i khanđiri. 5Me bi mangava sare te vaćeren ano avera jezici, ali po više bi mangava te prorokujinen. Okova kova prorokujini po baroi okolestar kova vaćeri ano avera jezici, sem te adava kova vaćeri ano avera jezici na tumačini adava so phenđa, te šaj i khanđiri te izgradini pe.
6Te me, phraljalen, avava kora tumende hem vaćerava ano avera jezici, so adava ka koristini tumenđe te na anđum tumenđe otkrivenje, džandipe, proroštvo ili sikaviba? 7Istoi ađahar hem o instrumenća, sar soi flauta ili harfa, te na dena jasno ton, sar te pendžari pe i melodija savi bašali pe upro lende? 8Ili, te i truba ćerela nejasno zvuk, ko ka spremini pe zako mariba? 9Ađahar hem tumen, te vaćerena e manušenđe lafija save on na haljovena, sar onda on ka džanen so tumen vaćerena? Samo džabe ka frden tumare lafija. 10Ko sveto isi edobor razna čhibja hem nijekh nane bizo značenje. 11Te na haljovava i čhib okolesiri kova vaćeri maje, ondai adava manuš maje abanđija, a hem me olese injum abanđija. 12Ađahar hem tumen: adalese so mangena but o duhovna darija, mangen but više te oven tumen o duhovna darija save izgradinena i khanđiri.
13Adalese, ko vaćeri ano avera jezici, nek molini pe te šaj tumačini adava so phenđa. 14Adalese so, te molinđum man ano avera jezici, mlo duho molini pe, ali tegani na koristinava mli godi. 15So, onda, te ćerav? Ka molinav man duhoja, ali ka molinav man hem gođaja. Ka đilabav duhoja, ali ka đilabav hem gođaja. 16Adalese so, te zahvalineja e Devlese samo duhoja, sar okova kova na haljola ka phenel “Amen” ko to zahvaliba kad na džanel so vaćereja? 17Tu šukar zahvalineja, ali okova kova šunela na izgradini pe.
18Zahvalinava e Devlese so više sarijendar tumendar vaćerava ano avera jezici. 19Ali, ani khanđiri najangle ka vaćerav pandž lafija mla gođaja, te šaj hem averen te sikavav, nego deš hiljade lafija ano avera jezici.
20Phraljalen, ma razmislinen sar čhavore, nego ano bišukaripe oven nevina sar o bebice, a ano razmisliba oven zrela. 21Ano Zakoni pisini:
“Averengere čhibjencar hem prekalo muja e abanđijengere
ka vaćerav akale narodose,
ali ni tegani naka šunen man,”
phenela o Gospod.
22Adalese, o avera jezici nane znako zako vernici, nego zako nevernici, a o prorokujiba nane zako nevernici, nego zako vernici. 23Adalese, te čedinđa pe sa i khanđiri hem sare vaćerena ano avera jezici, i đerdinena o manuša kola na haljovena ili o nevernici, na li ka phenen da injen diline? 24Ali, te sare prorokujinena, i đerdini nesavo neverniko ili kova na haljola, ka dikhel dai grešniko hem tumare lafija ka osudinen le; 25o tajne lesere vilesere ka ikljon ko svetlost, i ka perel mujeja đi phuv hem ka poklonini pe e Devlese, vaćerindoj: “O Develi čače maškara tumende!”
O redo ani khanđiri
26So, onda, phraljalen? Kad čedena tumen, svakone isi nešto: nekas psalam, nekas sikaviba, nekas otkrivenje, nekas ano avera jezici, nekas tumačenje zako adala jezici. Nek sa adava ovel e khanđirjaće ki izgradnja. 27Te neko vaćeri ano avera jezici, nek vaćeren duj džene, najviše trin, jekh po jekh, hem neko nek tumačini so phende. 28A te nane niko te tumačini, onda adava manuš nek traini, i nek vaćeri samo pese hem e Devlese.
29A zako proroci: nek vaćeren duj ili trin džene, a avera nek prosudinen adava so phende. 30Ali, te neko ko adari bešela primini otkrivenje, okova o prvo kova vaćeri nek traini. 31A sare tumen šaj, jekh po jekh, te prorokujinen, te šaj sare oven sikavde hem ohrabrime. 32O duhija e prorokonengere pokorinena pe e prorokonenđe. 33Adalese so o Devel nane Devel oto nered, nego oto mir.
Sar so hem ano sa o khanđirja e Devlesere manušengere, 34o romnja valjani te trainen ani khanđiri. Nane lenđe muklo te vaćeren, nego nek pokorinen pe, sar so hem o Zakoni phenela. 35A te mangena nešto te sikljoven, nek čhere pučen pumare romen. Adalese so, na dolikujini e romnjaće te vaćeri ani khanđiri.
36Na li tumendar iklilo e Devlesoro lafi? Ili samo kora tumende reslo? 37Te neko mislini dai proroko ili da isi le duhovno daro, valjani te džanel da akava so pisinava tumenđe naredbai e Gospodestar. 38A te neko adava na priznajini, ni ov korkoro naka ovel priznajime e Devlestar.
39Adalese, mle phraljalen, mangen but o daro oto prorokujiba hem ma braninen te vaćeri pe ano avera jezici. 40Ali, nek sa ovel pristojno hem uredno.
Currently Selected:
1. Korinćanenđe 14: RAB
Highlight
Copy
Compare
Share
Want to have your highlights saved across all your devices? Sign up or sign in
