Romans 12
12
Ssigidaumaha e mouli laa
1Deenei ai, ogu daina, au e dangidangi adu, i hiidinga de abodonu o de Maadua, goodou gi dugua ange oodou angaanga alodahi e hai ai ssigidaumaha e mouli laa, gai e dabu ma de hagamalangilangi ange gi de Maadua — deenei donu doodou hai daumaha heohi gai se muna abodonu. 2Goodou gi dee hagadulagi ange gi dagodo o henua i lalo nei, aagai goodou gi suuia oodou dagodo, i de sui hagahoou oodou maanadu, gi maua ai e goodou i de hagatale ange ma de tonu abodonu gi lodo o de Maadua — e danuaa laa, gai e hagamalangilangi ma de heohi abodonu.
3Gai au e hai adu gi goodou alodahi, i hiidinga de abodonu o de Maadua mai gi de au, dahi ma dahi gi dee gona odi dana hagadubudubu donu huu ia; aagai ia gi maua i de maanadu gi heohi, bei de hai a de Maadua gu gaavange ai gi dahi ma dahi dono duuhanga i de gai. 4Gai gidaadeu se angaanga e dahi, gai e lagolago ono diba, gai diba alodahi o de angaanga e dagodo daudahi alaadeu hegau,#1 Co 12.12 5gai e bei ai hogi odaadeu dagodo i lodo o Klisdo: gidaadeu e soa, gai e dahi donu huu angaanga, gai diba alodahi e dau ange gi denga diba ange laa. 6Aagai mee ne ngadi gaamai gi gidaadeu i de abodonu o de Maadua e dagodo geegee, gai gidaadeu gi hagahai hegau ina mee nei: noo go de agoago i de basa pelaabisi, gai gi haia de hegau nei gi bei odaadeu duuhanga i de gai;#1 Co 12.4-11 7noo go de bale ange dangada, gai gidaadeu gi balea ange dangada; noo go de agoago, gai tangada gi agoago; 8tangada e hagammahi ina lodo o dangada, gi hagammahi ina ange lodo o dangada; tangada e ngadi gaavange mee, gi lodo mmahi i de ngadi gaavange mee; tangada se dagi gi hagaduu ngae gi dagina; gai tangada e abodonu ange laa gi dangada, gi abodonu ange gi dangada i de malangilangi.
De aloha
9Oodou aaloha gi se mee abodonu; goodou kino i de baubau, gai daohia de mee danuaa. 10Goodou hagadau aaloha i de hagadau aaloha o denga daina, gai gi hagadau hagadubu. 11Goodou gi dee vaiduu gai gi lodo mmahi i de hai hegau, i doodou hai hegau ange gi Tagi Maolunga. 12Goodou gi malangilangi i de tali hagalodolodo, ma de golomagi oodou lodo i doodou hagaduasala ina, gai dalodalo i masavaa alodahi. 13Goodou bale ange dangada o de Maadua gu duasala laa; goodou abodonu ange gi dangada.
14 Hagamanuuia ina gilaadeu e vaivai haia goodou; goodou hagamanuuia ina dangada, e dee hagamalaia gilaadeu.#Mat 5.44; Luke 6.28 15Malangilangi madali gilaadeu e malangilangi, gai tangi madali gilaadeu e tangi. 16Goodou nnoho hagabuni i de hagadau abodonu; goodou gi dee llodo maolunga, gai hai soa ange ma de hagahedaea ange goodou gi gilaadeu e maolalo. Goodou gi dee hagataba i oodou lodo bolo goodou e iloo mee alodahi.#Pro 3.7
17Goodou gi dee suuia ange de baubau i de baubau, gai haia de mee heohi i madamada o dangada alodahi. 18Gai noo se mee e maua e goodou i de hai, gai goodou gi nnoho i de baba madali dangada alodahi. 19Ogu soa hagamogomogo, goodou gi dee suuia ange de baubau, aagai dugua ange gi hai hegau de bole ⌊o de Maadua⌋, go hiidinga gu sisi e hai ange: “Go au e suuia ange de baubau; au e sui ange naa donu,” go Tagi Maolunga e hagadaba.#Deut 32.35 20Gai
“Noo doo hagadaumee gu hiigai, gai koe haangai ina ange ia;
noo ia gu hieunu, gai koe hagaunumia ange ia.
Noo koe e hai mee nei, gai koe e hagabudu ange naa
denga maga ahi gi honga dono biho.” #Pro 25.21-22
21Goodou gi dee dugua ange gi kii de baubau i goodou, aagai goodou haia gi kii tanuaa i de baubau.
Currently Selected:
Romans 12: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
