Romans 13

Hagallongo ange gi dagi o de henua

1Dangada alodahi gi hagallongo ange gi gilaadeu gu gaavange ssauaa e dagi ai. Go hiidinga e deai donu se sauaa o dahi dangada e dagi ai, noo e dee se mee mai i daho de Maadua. Gai sauaa alodahi e hanu go de Maadua ne hagaduulia. 2Deenei ai, be goai e hai baasi ange gi ssauaa nei, e hai baasi ange donu gi de hagatau a de Maadua, gai dangada e haia mee nei e hagaduasala donu. 3Go hiidinga denga dagi e dee se hai e hagamaatagu ai gilaadeu e haia tanuaa, aagai go gilaadeu e haia de baubau. Noo koe e lodo gi dee madagu goe i tangada iai ssauaa e dagi ai, gai koe haia tanuaa, gai ia ga tuhi ai naa goe. 4Go hiidinga ia go tangada hai hegau o de Maadua ne hai gi danuaa adu ai gi de goe. Aagai noo koe e hai de mee dee heohi, gai koe gi madagu, go hiidinga ia e dee se ngadi dau donu dana gadilaasa; ia se dangada hai hegau niio de Maadua e hagasula ina dono lili ange gi dangada e haia mee dee heohi. 5Deelaa ai, hagallongo ange gi gilaadeu gu hagasauaa gi dagina, e dee go hiidinga donu huu o de hagaduasala, aagai go hiidinga hogi o tagi o de lodo. 6Deenei hogi de hiidinga oodou e hagao ai laa taagisese, go hiidinga de gau iai ssauaa ni dangada hai hegau niio de Maadua, i delaadeu hagahai hegau ssauaa nei.#Mat 22.21; Mark 12.17; Luke 20.25 7Hagao ina mee alodahi oodou e muli ange ai gi dangada: e dee hilihili be go taagisese, be go taagisese o denga goloa ma alahenua, aabe go de hagadubu.

De hagasula de hainga i de aloha

8Goodou gi dee muli ange gi dahi dangada i dahi mee, aagai gi hagadau aaloha, go hiidinga be goai e aloha ange gi dangada e hagasula donu de hainga alodahi a de Maadua. 9Gai denga hainga nei, “Aude dagodo haisala, aude daia tangada gi magau, aude gaiaa, aude nnoo,” aama hainga ange laa e hagapuni alodahi i muna e hai ange laa, “Koe gi aloha i tangada e baa adu gi de goe#13.9 tangada e baa adu gi de goe e bei go dangada alodahi e dee hilihili. gi bei doo aloha donu i de goe.” #Exo 20.13-15, 17; Deut 5.17-19, 21; Lev 19.18 10De aloha e dee hai ange de mee dee heohi gi tangada e baa ange gi de ia; deenei ai, de aloha e hagasula de hainga alodahi.

11Gai e dee deenei donu huu, gai goodou gu iloo donu dagodo o de masavaa go iainei; gu dae mai donu de masavaa oodou e aalahage ai. Go hiidinga iainei gu kii ange donu de baa mai taadeu hagaola, ma de masavaa odaadeu ne daamada ai laa de hagadonu. 12Gu ui de boo, gai gu dae mai de laangi. Deenei ai, gidaadeu ga tili hegau o de gohu gai ga hagauda goloa hebagi o de maalama. 13Gidaadeu ga hai hegau gi danuaa, bei dagodo o dangada e hai hegau i de masavaa e ao ai de mee, e dee go de hai daonga ga hagalonga ai ma de unu ga ssenga, e dee go de hai be se manu ma denga dahulinga dagodo haisala, aabe go de hagadaumee aama de lodo gaiaa. 14Aagai goodou gi kahu i Tagi Maolunga go Iesu Klisdo, gai gi dee hagassula ina lodo haisala o de angaanga.

Currently Selected:

Romans 13: DBD

Highlight

Copy