Rɔmdara 9
9
Gɩrɛ Thãgba kɔɔ ƴaalnɩ Ɩjɩrayɛl bɩsanana
1Sobɔr mɩ‐n so mɔ̃ mɩ donɩ Kirisitiida, ma‐n sõsoaˈ. Ɩ̃ kpɩɛrnɔɔkɛ n pɛnɩ Thu Phuuda nũu yɩ gɛr dɩ sobɔr mɩ‐n so, 2dɩ gbobire jɔɔ na ha helle n har ɩ̃ hara wire fɛʋ. 3Dɩ mɛrɛɛ thɛthɛ ka nar sʋɔn n ˈle mɩ gɩ lee mɩ kpɩɩ nakha Kirisiti ɩ̃ omisɔɔ sora, kɛ dɔnɩ ɩ̃ ca bɩnɔ, 4kɛ dɔnɩ Ɩjɩrayɛldara, kɛ Thãgba cʋʋnɩ dɩ wɩ do ɔɔ bikuunsɔ, a dona wɩrɛ a cʋʋnɩ dɩ wɩ jɩ mɔ̃ ɔɔ i dʋbɩ hanɩ, na wɩrɛ a kɔɔ ʋlfɛnanɩ nɔ bɩɛl ʋlfɛrɛ, na wɩrɛ a kɔɔ hanɩ jɔfʋ, na Thãgba fʋɔr bʋɔ, na wɩrɛ Thãgbaa ʋlfɛsɔ telenɩ,#Thɩɩ 9:4 5kɛ dɔnɩ mama thɩ kɔ̃tɩnaa məlsɔ. Kirisitii tibil dora wɛrra a the, kɛ dɔnɩ ʋrɛ kəəneni thɩ̃ɛ fɛʋra gɩrɛ, Thãgba gɩ a hɩ̃ khɩɩrɛ waa khorr. Amɛn.
6Sɩ ga do Thãgbaa thɩmɩɩ debire a do mɔlɔ thɩ̃aˈ, gɩdonɩ ga do wɩrɛ fɛʋʋkɛ dɔnɩ Ɩjɩrayɛlɩ məl dʋɔn Ɩjɩrayɛldara ga. 7Dɩ ga do wɩrɛ fɛʋʋkɛ dɔnɩ Abɩrahamɩ məl dʋɔn Thãgbaa bɩsãsɔaˈ. Sɩ Thãgba kɔɔ sor Abɩrahamna ayɩ: “Ɩjakɩɩ bɩsãsɔ wɛr na dɔ afɩ məl.”#Jən 21:12 8Kɩrʋ dʋɔn, ga do bɩsanaakɛ wɩ‐n kɔnɩ wɛɛ kha wɛr n dɔ Thãgbaa bɩsãsɔaˈ; sɩ ɔɔ məl dɔ bɩsanaakɛ wɩ kɔnɩ mɔ̃ Thãgba kɔɔ ʋlfɛnɩ ga har. 9Hɩnɛ gɩrɛ dɔnɩ ʋlfɛ thɩmɩɩrra gɩ sor ayɩ: “Wa bɔ caraakɛra ma birni ma‐n ɩ̃ Sara na kʋɔn kũubir.”#Jən 18:10 10Sɩ ga do gɩrɛ dɩbara ga, sɩ Rebekaa bɩsãsɔ thɩ bɩɛlɩ bisɔ wɛ, kɛ dɔnɩ Ɩjakɩ asɩ mama thɩ kɔ̃tɩ̃. 11Gɩdonɩ bɩsanaale na thenɩ dɩɩra pɩ a na cʋʋ bɔɔ dɩ puure ga, 12Thãgba kɔɔ sor Rebekara ayɩ: “Diine na dɔ kɔ̃tɩn cacadaarra.” Dɩ thɩ̃ɛ thakɛ daan gɩ nɩna dɩ Thãgba n phire ʋrɛ a‐n ƴaalnɩ dɩ wɩɩ, sɩ ga do tibili thɩ̃ cʋʋra gɩ thaˈ.#Jən 25:23 13Dɩ gɩ har mɔ̃ gɩ kherenɩ Thãgbaa sɛbɛra ayɩ: “Jakɔbɩ mɩ na sa bo Ejayʋ.”#Mal 1:2–3
14Dɩ mɔ̃ sa so gɩrɛ? Thãgba na‐n cʋʋ gɩrɛɛkɛ telenenaa yaa? Kpɩɩrakaˈ. 15Gɩdonɩ a sor Mʋɩjɩra ayɩ: “Ʋrɛ mɩ‐n ƴaalnɩ ɩ̃ jɩ bʋɔra, mɩ‐n ƴaalnɩ bʋɔ n fɔ mɩ ɔrra, bʋɔ n fʋ mɛr ɔrra.”#Thɩɩ 33:19 16Dɩ gɛr gɩ ga do gele ther ʋrɛraakɛ n ƴaalɛnɩɩ pa, agɩbo ʋrɛraakɛ na cʋɛnɩ thɩ̃ɛɛ pa ga, sɩ gɩ ther Thãgbaraakɛ n jɩɛnnɩ tibil bʋɔra. 17Gɩ sor Thãgbaa sɛbɛra aa, Thãgba sor Faarɔna ayɩ: “Mɛr ɩrɛ fɩ mɛna fɩ do nɔɔ ɩ̃ nɩna ɩ̃ fãga, gɩ do nɔɔ dakha ɩ̃ i n kpaar thɩɩraakɛ koo.”#Thɩɩ 9:16 18Gɛr gɩ a‐n jɩrɛ ʋrɛ a‐n ƴaalnɩ a jɩ bʋɔra, sɩ dɩ cʋʋ ʋrɛ a‐n ƴaalnɩ dɩ ɔɔda n khɩɩr.
Mɔ̃ Thãgba hananɩ hʋɛ a na jɩ tibil bʋɔra agɩbo a heen tibil sor
19Dɩ anaa fa bule mer: Dɩ a thale gɩ, anye Thãgba hana na so tibilidara, gɩdonɩ ʋmɔ̃ hale na lã gɩrɛraakɛ a‐n ƴaalnɩ? 20Ɩ̃ kuun, amɛ fɛrkɛ do a na banana Thãgba thɩ̃ banaa? Bʋlaakɛ wɩ‐n mɩnɩ na bulele ʋrɛ n mɩɛnɩ, anyera a‐n cʋʋ nɩ thalera ya?#Eja 29:16; 45:9 21Ga do mɩmɩ n dɔ kɔ̃tɩn jaarra gaa? Ja bulo bɩɛlla a‐n gba dɩ mɩna bʋlaa yenyɔ, bɩɛl n do bʋla ɓʋ̃ɔ, dɩ bɩɛl n do thɔ̃ pɔɩ cʋʋdaa. 22Dɩ ga do gɩrɛ Thãgba cʋʋnɩ thalera gɩ ha gaa? A kɔɔ ƴaalɛ wer a nɩnana ɔɔ nĩkhi a cʋʋna tɩbɩla wɩ jɩ mɔ̃ ɔɔ fãga hanɩ, sɩɩ do a fʋrɛ haar jɔɔ bʋlaasɔraakɛ teananɩ a ɩrɛna gar ɔɔ nĩkhirə, kɛ dɔnɩ gɩrɛ dananɩ kʋɛrɛ. 23A kɔɔ ƴaalɛ dakha a nɩna bʋlaasɔɔkɛ a jɩnɩ bʋɔra mɔ̃kɛ ɔɔ i dʋbɩrɔnɩ a thʋ̃ kãasɩ, kɛ dɔnɩ bʋlaasɔɔkɛ a kɔɔ maanɩ thɩɩnɛ gɩ ˈlɛ ɔɔ i dʋbɩ; 24dɩ sɛr wɛ, kɛ a kɔɔ wenɩ sɩ ga do Juifi caarra ɩkha the dɩbara ga, sɩ ca kpal ɩkha harrɛ. 25Gɛr dʋɔn gɩrɛɛkɛ a kɔɔ sonɩ Ojee sɛbɛra ayɩ:
“Wɩrɛɛkɛ na kɔɔ dɔnɩ ɩ̃ toaˈ,
ma we wer ɩ̃ too.
Dɩ ʋrɛ na kɔɔ dɔnɩ ɩ̃ nadaaraˈ,
ma wɩɩrɛ ʋrɛ mɩ nanɩ.#Oje 2:23
26Dɩ pa dɔɔkɛ wɩ kɔɔ so warnɩ ayɩ: Na do ɩ̃ toaˈ,
liir wa we wɩ Thãgba yidaarɩ bikuunsɔ.”#Oje 1:9
27Ejaɩ dakha hulene Ɩjɩrayɛldara ayɩ: “Adorakɛ Ɩjɩrayɛl bɩsana jɔr a ho lanyɔ̃ gbalãkothɩn, sɩ gbe dɩbara na ˈlɛ taarɛ;#Eja 10:22–23 28gɩdonɩ gɩrɛ Kɔ̃tɩn kɔɔ sonɩ, koo a na cʋʋ gɩ dɩ ga dã kɔrɔ thɩɩraakɛ.” 29Dɩ mɔ̃kɛ Ejaɩ kɔɔ ˈlaanɩ yɩɛ a sor ayɩ: “Ado Kɔ̃tɩnɩkɛ dɔnɩ fãga koo hɩ̃daar na kɔɔ sɩ sar məl ɩkha gbəˈ, sa kɔɔ honanɛna Sɔdɔm dɩɩ, sa kɔɔ horra Gɔmɔɔr dɩɩ.”#Eja 1:9
Mɔ̃ gɩ hanɩ Ɩjɩrayɛldarara na tutugo bʋɔɔ thɩmɩɩ
30Dɩ mɔ̃ sa so gɩrɛ? Ca kpalaakɛ na‐n kɔɔ dɔnɩ bʋɔ sor n hɛla war Thãgbaa ƴɛra ga, wɩ ˈlɛr so hɛllɛ, sɩ so hɛllɛ gɩɩkɛ thɛnɩ ha pɛrɛra; 31sɩ Ɩjɩrayɛldara wer kɛ n ƴaalɛnɩ so hɛl jɔfʋ, wa kɔɔ yɩ jɔfʋ thalaˈ. 32Mɔ̃ dɔ kɩrʋ? Gɩdonɩ ga do ha pɛrɛra wɩ kɔɔ ƴaal ga, sɩ awɩ thɔ̃ cʋʋra wɩ kɔɔ ƴaal gɩ. Nɛ bara bokaarra wɩ kɔɔ be nɔɔ, 33dɩ gɩ har mɔ̃kɛra gɩ kherenɩ Thãgbaa sɛbɛra ayɩ:
“Hɩnɛ mɩ thɩɩnɛ nɛ bara bokaar Sɩyɔna,
nɛ bara gbãgbaan gɩ,
dɩ ʋrɛ pɩɛrnɩ haar ɔrra,
ga ɩ̃ kpɩɩrakɛ a na dʋʋraa yicuruəˈ.”#Eja 28:16
Currently Selected:
Rɔmdara 9: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
