Rɔmdara 8
8
Mɔ̃ ha pɛdaar teenanɩ a na‐n ɩrɛ na Thu Phuu fãga na jala
1Nɛnɛ̃ gɩrɛ so heene na hale kpɩɩrakɛ wɩrɛraakɛ hanɩ Jeju Kirisitira ga. 2Gɩdonɩ Thu Phuu fãgaakɛ n ˈlaanɛnɩ yire dɩɩ the asɩ bɩɛl dora nakha Jeju Kirisiti, gɛr birsene mi a ti mi sopugoo fãgara na khiri fãgara. 3Gɩrɛ jɔfʋ na kɔɔ punoni a cʋaˈ, gɩdonɩ tibili tibil do pa a ˈleere fãga, Thãgba kɔɔ cʋʋ gɛr, gɩdonɩ a kɔɔ thʋɔn ɔɔ thɛthɛɛ Bikuun dɩɩ do sopugo dɔ nɔɔ, dɩ gba tibil tomɩr dɩɩ hona asɩ sopugo tomɩ, dɩ mɛ̃ Thãgba heen sopugookɛ hanɩ tibili tibil do para sor. 4Thãgba cʋʋrɛ gele dɩ mɛ̃ sɛrɛɛkɛ na‐n ɩrɛnɩ mɔ̃kɛ asɩ tibil do pa n ƴaalnaˈ, sɩɩ do mɔ̃ Thu Phuu n ƴaalnɩ sɩ‐n ɩɩr, na cʋʋ datelẽekɛ jɔfʋ n ƴaalnɩ ga‐n cʋɛ.
5Gɩdonɩ wɩrɛ n ɩrɛnɩ na tibil dʋʋrɩkɛ fãga ˈleenɩ, awɩ kpɩɛr koo tibili tibil do padara gɩ‐n jal; sɩ wɩrɛ n ɩrɛnɩ mɔ̃kɛ Thu Phuu n so warnɩ, awɩ kpɩɛr koo Thu Phuudarara gɩ‐n jal. 6Kpɩɛr faarɛ koo tibili tibil do padara khir gɩ, sɩ kpɩɛr faarɛ koo Thu Phuudara yire gɩ na ha ɩɩ. 7Gɩdonɩ kpɩɛr faarɛ koo tibili tibil do padara, gɩ‐n ɩnanɛ laarɛ nakha Thãgba; gɩdonɩ tibili tibil do pa na‐n wur dɩbara Thãgbaa jɔfʋra ga, dɩ a na puno gɩrakɛ dakha ga. 8Dɩ wɩrɛɛkɛ n ɩrɛnɩ na tibil dʋʋrɩkɛ fãga ˈleenɩ wa puno na da Thãgba haarra ga. 9Sɩ ne wer na‐n ɩɩr na tibil dʋʋrɩkɛ fãga ˈleenaˈ, sɩ mɔ̃kɛ Thu Phuu n so narnɩ nɩ‐n ɩɩr, adora Thãgbaa Thu har anɩ bɩnɔ. Ado tibil na hana Kirisitii Thuəˈ, aa do Kirisitiida ga. 10Ado Kirisiti har anɩ bɩnɔ, sɩrakɛ dɩɩ do anɩ tomɩ khire dɩɩ do sopugo dɔ nɔɔ, sɩ thue na hananɛ yire gɩ do so hɛllɛ dɔ nɔɔ. 11Ado Thãgbaa Thuukɛ kɔɔ cʋɛnɩ Jeju dɩ ɩɩr a the khirera ha anɩ bɩnɔ, ʋrɛɛkɛra cʋɛnɩ Jeju Kirisiti dɩ ɩɩr a the khirera, ɔrra na ˈlaanɛ yire anɩ tomɩ khinəna, gɩ the ɔɔ Thurəəkɛra hanɩ anɩ bɩnɔ.#1 Kor 3:16
12Gɛr gɩ omɩna, sɩ hananɛ helu sɩ ga do asɩ tibil do pa sɩ hana helu sa‐n ɩɩr mɔ̃kɛ a‐n ƴaalnaˈ. 13Ado na ɩɩr mɔ̃kɛ tibili tibil do pa n ƴaalnɩ khir nɩ fʋ fʋrɔ, sɩ ado Thu Phuu nɩ‐n ka gba dɩ na‐n kʋna gɩrɛ tibili tibil do pa n cʋʋnɩ ga dor na hananɛ yire. 14Gɩdonɩ wɩrɛɛkɛ n pɛnɩ Thãgbaa Thu nũu, wɛr dɔ Thãgbaa bikuunsɔ. 15Gɩdonɩ Thu Phuukɛ nɩ ˈlɛnɩ ga cʋʋ nɩ nɩ ho dea nɩ bir nɩ lõ maarra ga, sɩ Thu Phuukɛ cʋɛ nɩnɩ dɩ nɩ do Thãgbaa bikuunsɔ gɩ, dɩ sa‐n wero: Aba, ɩ̃ Thɩ.#Mar 14:36; Gal 4:6#Gal 4:5–7 16Thu Phuu thɛthɛ n gbɛba kha na asɩ thu sɩ da‐n nɩrɔ dɩ sɩ dor Thãgbaa bɩsãsɔ. 17Dɩ ado ɔɔ bɩsãsɔ sɩ do, sɩ dor dakha thɩ̃ hɩna; Thãgbaa thɩ̃ hɩ̃dara ha sɩ, dɩ sɩ bul kha na Kirisiti thɩ̃ɛ a hɩ̃, adora sɩ‐n gaarɛ bʋɔ na ɔr gɩ do nɔɔ sɩ gbɛbɩ kha na ɔɔ i dʋbɩ.
Bɔna kɔ̃tɩ̃ɩkɛ n pɩɛrɛnɩ ha pɛdaar
18Mɩ jɩrɛ tue dɩ bʋɔɔkɛ sɩ‐n gaarnɩ nɛnɛ̃ bɔɔkɛ, ga hɩɩr kha na i dʋbɩrɛɛkɛ Thãgba na ha sɩnaˈ. 19Thɩ̃ tinəne koo n pɩɛrɛ gɩrɛ na ƴaal kɔ̃tɩ̃ɩ ka bɔɔkɛ Thãgba na nɩrɔnɩ ɔɔ bikuunsɔ. 20Gɩdonɩ ʋrɛ fɔnɩ thɩ̃ tinəne a ɩɩrɔ dɩɩ debi a do mɔlɔ thɩ̃ɛ, ga do gɩdonɩ thɩ̃ tinəne ƴaalɛ gɛr a cʋʋrɔ mãˈ;#Jən 3:17–19 21sɩ gɩ do nũ pɛrɛ hale, dɩ thɩ̃ tinənee thɛthɛra na ther kʋɛ dee dʋʋrra a na lõ Thãgbaa bɩsãsɔɔ wa doraakɛ na ɓɔnanɩ na ka. 22Gɩdonɩ sɩ jɩrɛ a dana nɛnɛ̃kɛ thɩ̃ tinəne ɓibi n ser da‐n gaarna a ho mɔ̃ wallɛ n fʋnɩ khɛr. 23Ga do thɩ̃ tinəne bɩɛl gɩ dɩbara ga, sɩ na sɛrɛ dakharakɛ, kɛ hananɩ Thu Phuu dɩ do caca khaardaa ɓo, sɩ‐n ser ser na bɩnɛ, dɩ sa‐n pɩɛrna bikũu dʋʋr na asɩ tomɩ birse.#2 Kor 5:2–4 24Gɩdonɩ asɩ taakɛ sɩ ˈlɛnɩ nũ pɛrɛra gɩ do; sɩ a sɩ yɩ gɩrɛ sɩ‐n pɛnɩ nũu pɩ na yire, ga do nũ pɛrɛ gɩ bã; gɩdonɩ amɛ na‐n pɛ nũu gɩrɛraakɛ a yɩnɩ pɩ? 25Sɩ ado sa pɛ nũu gɩrɛraakɛ sa yɩnaˈ, mee ha fʋrɛ sa‐n pɩɛrna thɩ̃ doole.
26Mɛ̃ dakha Thu Phuu n bul si asɩ yɔɔra, gɩdonɩ sa‐n jɩɩ jɩ mɔ̃ sa bɩɛlnɩ na gɩrɛ teananɩ bɩɛlaˈ, sɩ Thu Phuu thɛthɛ har da‐n phʋʋr Thãgba na ˈwɩɩrɛɛkɛ na hanɩ mɩɩrɛra ga. 27Dɩ ʋrɛɛkɛ n bəəreni tibili bɩ̃ dɩ jɩ, ɔr jɩɛn gɩrɛ dɔnɩ Thu Phuu kpɩɛrnɔ, gɩdonɩ mɔ̃ Thãgba tuni a‐n phʋʋr Thãgba da‐n pɛr tibil phuusɔ.
28Sɩ jɩrɛ dɩ Thãgba n cʋɛ dɩ thɩ̃ɛ fɛʋ n kpalmã dɩɩ fi, a do dabʋɔ wɩrɛraakɛ n naanɛɛnɩ, kɛ dɔnɩ wɩrɛ a kɔɔ wenɩ mɔ̃ ɔɔ ƴaal hanɩ. 29Gɩdonɩ wɩrɛ a kɔɔ maanɩ jɩɩr a kɔɔ mãa phiir war dɩ wa debi na ha mɔ̃ ɔɔ Bikuun hanɩ, gɩ do mɛ̃ Bikuunile do cacadaar omɩna bərəəmna. 30Dɩ welela a kɔɔ maanɩ phiire, wɛr dɔ wɩrɛ a wenɩ, dɩ wɩrɛra a wenɩ wɛr dɔ wɩrɛ sor hɛllɔnɩ, dɩ wɩrɛ a hɛllɔnɩ sorra wɩ lʋʋn dakha ɔɔ i dʋbɩra.
Jeju Kirisitiida n nɛna sɩ mɔ̃ Thãgbaa naʋ kɔ̃tɩnɩ sɛrɛra
31Dɩ thɩ̃ɛ hanɩ thakɛ anye sa so ˈlo? Ado sɛr Thãgba hana amɛ na punone na ma sar? 32Ɔrkɛ na kɔɔ tɔnanɩ ɔɔ Bikuunaˈ sɩɩ do a fagʋʋrɛ sɛrɛ fɛʋʋ sora, dɩ mɔ̃ ga fʋ sɩɩ do aa ka ha sɩ thɩ̃ɛ fɛʋ khaar a ɓaana? 33Amɛ na pɩɛr wɩrɛ Thãgba phiirni sor? Mee Thãgba n hɛla sor. 34Dɩ amɛ na heene tibil sor? Wa bɩɛl na halaˈ. Jeju Kirisiti ka kɔɔ khire sɩ ga do gele gɩ koaˈ, a ɩɩrɛ a the khirera, a ha dakha gɩrɛ Thãgbaa nyɔ̃bɔra, da‐n phʋʋr Thãgba da‐n pɛ sar. 35Dɩ amɛ na lea sɩ na Kirisitii naʋʋkɛ a‐n na sɩnɩ? Bɔ gaarɛ na punone ya? Sɩ nɩwɛ, agɩbo kpoore, sɩ kɔmɛr, sɩ bʋɔ, sɩ khi phuronaa, sɩ bajɩna? Kpɩɩrakaˈ. 36Sɩ gɩ har mɔ̃kɛ gɩ kherenɩ Thãgbaa sɛbɛra ayɩ:
“Fɛr dɔ nɔɔ dɩ sɩ too khikhi togʋʋ dɩwɩlʋ koo;
wɩ‐n hɩɩn sɛr mɔ̃ sɩ donɩ banaakɛ wa kʋʋrnɩ.”#Khɩ 44:23
37Sɩ thɩ̃ɛ fɛʋraakɛ sɩ kəə garɛ fĩi dɩɩ the ʋrɛ kɔɔ naan sɩnɩɩ pa. 38Gɩdonɩ mɩ jɩɛ jɩ tue dɩ thɩ̃ɛ na hale a na puno na lee sɩ kha na ɔɔ naʋaˈ: A khir gɩ, a yi hananɛ gɩ, a thɔ̃thɔ̃daar thusɔ wɛ, a fãga hɩ̃darasɔ wɛ ƴũ, a thĩɛɛkɛ hanɩ nɛnɛ̃ gɩrɛ gɩ, a gɩrɛ na ɩnanɩ gɩ, 39a punoneekɛ thɛnɩ ƴũ a tɩɛr gɩ, thɩ̃ bɩɛl na halerakɛ thĩ tinəne fɛʋra a na puno kpɩɩrakɛ a na lee sɩ na Thãgbaa naʋʋkɛ a na sɩnɩ dɩɩ the Jeju Kirisiti asɩ Kɔ̃tɩ̃ɩ pa ga.
Currently Selected:
Rɔmdara 8: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
