Rɔmdara 7
7
Mɔ̃ wɩ gbanɩ her a mɩɩna mɔ̃ jɔfʋ hanɩ
1Nɛr omɩnaakɛ dɔnɩ jɔfʋ jɩna mɩ‐n mɩɩna, na jɩ dɩɩ do bɔɔ fɛʋʋkɛ tibil hananɩ yire gɛr jɔfʋ n punonaa dɩbara gaa? 2Mɛ̃ jɔfʋ n li khɛr na ɔɔ ko bɔɔ fɛʋʋkɛ kuun hananɩ yire, sɩ a kuun khi pɩ, khɛr n ther jɔfʋraakɛ lieni kha na ɔɔ ko. 3Sɩ ado bɔɔkɛ ɔɔ ko hananɩ yire, gɛr khɛr biro a ma kũu kpɩɩ, kũu kpɩɩ ƴaaldaar wa‐n we khɛrɩle; sɩ ado ɔɔ ko khe, khɛrɩle na ha kha dɩkha na jɔfʋ bã, a a debi do kũu kpɩɩ khɛr ga do kũu kpɩɩ ƴaaldaar a doaˈ. 4Mɛ̃ gɩ ha na nɛrɛ ɩ̃ omisɔ; nɛrɛ dakha nɩ kɔɔ khire jɔfʋdaara dɩɩ the anɩ bɩɛl dora na Kirisiti nɩ fi nɩ do tɩɩ kpɩɩda, ʋrɛɛkɛ kɔɔ ɩrɛnɩ a the khirera gɩ, sɩ puno sa‐n se be Thãgbara. 5Gɩdonɩ ɔbɔɔkɛ sɩ‐n kɔɔ ɩɩrnɩ a ho tibil ba, sopugoo ƴaalɩkɛ jɔfʋ cʋʋnɩ dɩɩ hale n kɔɔ dor thɔma asɩ tomɩ ɓãsɔra dɩɩ do khir gɩ‐n ɩna sar. 6Sɩ nɛnɛ̃ sɩ ther jɔfʋraakɛ kɔɔ le sɩnɩ mɔ̃ sɩ khini gɩrɛraakɛ kɔɔ fɔ sɩnɩ ɩɩrɔ, gɩ do nɔɔ sa‐n do thɔma Thãgbara na fɩl phaakɛ Thu Phuu n thɔɔna sɩnɩ, ga ha mɔ̃ datɩ̃ɩ hanɩ kɛ dɔnɩ jɔfʋʋdaakɛ kherenenaˈ.
Gɩrɛ jɔfʋ n cʋʋnɩ
7Dɩ mɔ̃ sa so gɩrɛ? Jɔfʋ dʋɔn sopugo ya? Kpɩɩrakaˈ. Sɩ jɔfʋ cʋɛ mɩ dɩ ɩ̃ jɩ thɩ̃ doo n dɔnɩ sopugo; gɩdonɩ ma kɔɔ jɩ thɩ̃ doo n dɔnɩ ha pɩɛrɛ ado jɔfʋ na kɔɔ so ayɩ, fa‐n pɩɛr hara gaaga.#Thɩɩ 20:17; Dət 5:21 8Dɩ jɔfʋ dor nɔɔ dɩ sopugo yɩrɔ hʋɛ a cʋʋ ha pɩɛr caar fɛʋ dɩɩ ɩɩr mar, gɩdonɩ ado jɔfʋ na halaˈ, ga dor thɩ̃ khire sopugo do. 9Mɛrɛ mɩ kɔɔ hananɛ yire bɔɔraakɛ ma kɔɔ hananɩ jɔfʋ paˈ, sɩ ɔbɔɔkɛ jɔfʋ ɩnɩ, gɛr sopugo ɩɩrɔ vuu dɩɩ do mɩ khire. 10Dɩ jɔfʋʋkɛ dɔnɩ yi ˈlaadaa fire a do mar khi ˈlaadaa. 11Gɩdonɩ sopugo yɩrɛ hʋɛ da‐n fɩɩl mɩ dɩɩ do jɔfʋʋ pa gɩ the, dɩ a gbaar jɔfʋʋlera a kʋna mɩ.#Jən 3:13
12Thãgbaa jɔfʋsɔ wer phure, dɩ jɔfʋ fɛʋ bɩɛlbɩɛl phure, a sar, a bɔrna. 13Dɩ gɩrɛ bʋɔnɔnɩ fire a do mar khir kɛ? Kpɩɩrakaˈ, sɩ sopugo gɩ; mɛ̃ sopugo nɩna mɔ̃ a jɩɩnɩ do sopugo mɔ̃ a gbanɩ gɩrɛ bʋɔnɔnɩ dɩɩ fi do mar khir; mɛ̃ jɔfʋ do nɔɔ dɩ sopugo debi a jɩɩ puuro a pɛr.
14Sɩ jɩrɛ wer dɩ thudaa jɔfʋ do, sɩ mɛrɛ tibil ha mɩ na tomɩr dɩ ɩ̃ dona sopugoo dee. 15Ma jɩ ɩ̃ cʋʋ pa tɔrrakɛ mɔ̃ gɩ hanaˈ, ga do gɩrɛ mɩ‐n ƴaalnɩ ɩ̃ cʋɛ gɛr mɩ‐n cʋaˈ, sɩ gɩrɛ mɩ‐n laarnɩ khələlələ gɛr mɩ‐n ka cʋʋ.#Gal 5:17 16Ado gɩrɛ ma‐n ƴaalnɩ ɩ̃ cʋaˈ gɛr mɩ‐n cʋʋ, thale n nɛna dɩ mɩ ture dɩ jɔfʋ bɔrɛ. 17Dɩ a thɩɛna gaa ga do mɛr n cʋ ga, sɩ sopugookɛ hanɩ ɩ̃ hara n cʋɛ. 18Gɩdonɩ mɩ jɩrɛ thɩ̃ bʋɔ na ha ɩ̃ bɩnɔaˈ, a thɩɛna gaa ɩ̃ tibil do para; thɩ̃ bɔ cʋʋrɛɛ ƴaal wer har ɩ̃ hara, sɩ punone na halaˈ. 19Ma‐n cʋʋ thɩ̃ bʋɔɔkɛ mɩ‐n ƴaalnɩ ɩ̃ cʋaˈ, sɩ puureekɛ ma‐n kanɩ ƴaal ɩ̃ cʋaˈ dɩɩ do gɛr mɩ‐n cʋʋ. 20Dɩ ado ma cʋʋ gɩrɛ ma‐n ƴaalnɩ ɩ̃ cʋaˈ, ga do mɛr ɩ̃ cʋ ga sɩ sopugookɛ hanɩ ɩ̃ hara n cʋɛ. 21Gɛr gɩ gɩrɛ mɩ yɩnɩ ɩ̃ pa dʋɔn: A mɩ yɩ bɔɔ mɩ ƴaal ɩ̃ cʋʋ sɩ puure na‐n ha mɩ thɩ̃ thaa ga. 22Ado bɩnɔ wer gɩ, Thãgbaa jɔfʋ da marɛ haar ka, 23sɩ a mɩ gba na hɩɩn ĩ tomɩ ɓãsɔ dɩɩ do thɩ̃ kpɩɩ hale n kɛ̃kɛrɛnanɩ gɩrɛ ɩ̃ ha yɩnɩ dabʋɔ gɩ, dɩ thɩ̃ɛɛlera dʋɔn sopugoo jɔfʋ a pɛrnɩ dɩɩ ha ɩ̃ tomɩ ɓãsɔra dɩ ɩ̃ fi do dee. 24Pha, mɛr bɔ kʋ tibilikɛ, amɛ na taa mɩ na ti mi tomɩ khinənenaakɛ? 25Thãgba hɩna fʋɔrɛ, gɩdonɩ Jeju Kirisiti asɩ Kɔ̃tɩ̃ɩ pa taarɛ na the.
Gɛr gɩ, me wer haarra Thãgbaa jɔfʋʋ dee mɩ do, sɩ ɩ̃ tibil do para dee mɩ do sopugoo jɔfʋra.
Currently Selected:
Rɔmdara 7: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
