Rɔmdara 6
6
Khir sopugora na yi hananɛɛkɛ thɛnɩ Kirisitira
1Dɩ mɔ̃ sa so gɩrɛ? Sa‐n cʋɛ sopugo bɔ jɩɩrra na‐n jɩɩ jɔr ya? 2Kpɩɩrakaˈ. Sɛrkɛ khenɩ sopugo cʋʋrɛra, anyee yi ca sa hana sopugo cʋʋrɛra ˈlo? 3Na jɩ dɩɩ do sɛrɛ fɛʋʋkɛ wɩ kɔɔ kpɛɛnɩ nyʋɔnɔ bɩɛl dʋʋrra nakha Jeju Kirisiti, bɩɛl dʋʋrra nakha ɔɔ khi wɩ kɔɔ kpɛɛ saa? 4Mɛ̃ gɩ yɔ kpɛɛrɛ dʋɔn wɩ dʋ sɛr kha na ɔr mɔ̃ sɩ khini kha, dɩ mɔ̃kɛ Thɩrɛɛ fãga kɔɔ ɩɩrnɩ Kirisiti dɩ the khirera, sɛrɛ dakha yi phaara sa‐n ɩɩrna oti.#Kol 2:12
5Gɩdonɩ ado sɩ debire a do kha bɩɛl na ɔr khirraakɛ hɔnɩ ɔɔda, sa debire dakha a na do bɩɛl na ɔr ɔɔ khi ɩɩrra. 6Sɩ jɩ gɛr dɩ tɩɩ tɩ̃ dʋʋrɩkɛ sɩ kɔɔ donɩ wɩ kɔɔ kpaarɛ kʋkʋ thɩrʋra nakha Kirisiti, gɩ do nɔɔ asɩ mɛrɛ puurə n kʋkʋʋl, dɩ mɛ̃ sa do sopugoo deesɔ bã. 7Gɩdonɩ ʋrɛ khenɩ a ther sopugoo nyɔ̃kɔɔ. 8Dɩ ado sɩ kɔɔ khire ger nakha Kirisiti, sɩ jɩrɛ dɩ sa hananɛ kha yire na ɔr. 9Gɩdonɩ sɩ jɩrɛ dɩ Kirisiti kɔɔ ɩɩrɛ a the khirera dɩ khir na punoo bã. 10Khirikɛ a kɔɔ khini sopugo a kɔɔ khiro babɩɛl dɩbara dɩɩ do gɩ daan, sɩ yireekɛ a hananɩ nɛnɛ̃ Thãgbara a hana gɩ. 11Mɛ̃ gɩ, nɛrɛ dakha, na‐n hɩnɛ dɩbara mɔ̃ nɩ donɩ khe sopugo cʋʋrɛra sa do yidara Thãgbara dɩɩ the anɩ bɩɛl dora na Jeju Kirisiti.
12Na‐n do sopugo na‐n puno anɩ tomɩ khinəəkɛ nɩ nɩɩ nũu na‐n cʋʋ gɩrɛ n kʋɔnɩ thueəˈ. 13Na‐n gba anɩ tomɩ ɓãsɔ ˈlo a faa sopugo cʋʋrɛra gɩ do fɩl gõgolõ thɔ̃ dodaa ga; sɩ nɩ faa anɩbara Thãgbara mɔ̃kɛ nɩ donɩ wɩrɛ khenɩ sa ɩɩr a the khirera, nɩ gba anɩ tomɩ ɓãsɔ a na hana Thãgba a na‐n cʋʋna gɩrɛ saranɩ. 14Gɩdonɩ sopugo na‐n pɔtɔrɔ nɩ bã, gɩdonɩ ga do jɔfʋra nɩ ha ga, sɩɩ do Thãgbaa bɔ jɩra gɩ.
15Dɩ mɔ̃ ga ha? Sa‐n cʋɛ sopugo gɩdonɩ ga do jɔfʋra sɩ ha ga sɩɩ do bɔ jɩɩrra gɩ ya? Kpɩɩrakaˈ. 16Na jɩ dɩɩ do a fɩ faa afɩbara tibillə a do dee fa‐n nɩɩ nũu, ga do ʋrɛɛkɛɛ nũ fɩ‐n nɩnɩ ɔɔ dee fɩ doaa, a sopugo fɩ‐n nɩ nũu khirrə ga jalna fɩ, a Thãgba fɩ‐n nɩ nũu sor a na hɛl far. 17Thãgba hɩna fʋɔrɛ. Nɛrɛɛkɛ mamara kɔɔ dɔnɩ sopugoo deesɔ, nɩ bire a nɩ nũu na haar fɛʋ dɩɩr caaraakɛ nɩ kɔɔ ˈlɛnɩ. 18Nɛnɛ̃ Thãgba birse ner sopugo dee dʋʋrra dɩ nɩ debi a do Thãgbaa deesɔ dɩ na‐n cʋʋ gɩrɛ saranɩ. 19Tibiile mɩ mɩɩ gɩdonɩ ka nɩ hanɩ gɩrɛ nɩ yɔɔrɛ; mɔ̃ nɩ kɔɔ faanɩ anɩ tomɩ ɓãsɔ a do dea thɩ̃ bise cʋʋrɛra na sopugora gɩ jɩɩ jɔr, nɛnɛ̃ nɩ faa anɩ tomɩ ɓãsɔ ɔmɛ̃ a dɔ Thãgbaa deesɔ a na cʋɛ gɩrɛ saranɩ a dana kpɩɩ leere. 20Gɩdonɩ ɔbɔɔkɛ nɩ kɔɔ donɩ sopugoo deesɔ na ha kha dɩkha na fɩl sarʋaˈ. 21Gɩmɔ̃ dɔ khor nɩ kɔɔ ˈlɛrnɩ ɔbɔɔraalera? Gɛr dɔ gɩrɛ cʋɛnɩ dɩ yicuru na‐n fʋ nɩ nɛnɛ̃kɛ, gɩdonɩ ga khu pa dʋɔn khir. 22Sɩ nɛnɛ̃kɛ Thãgba birse ner sopugo dee dʋʋrra a cʋʋ nɩ dɩ nɩ do ɔɔ deesɔ, dɩ kpɩɩ leere dʋɔn anɩda sɩ khu paar n do yire khorr. 23Gɩdonɩ lɩmɩnɛɛkɛ sopugo n lɩmɩnɩ khir gɩ, sɩ khaardaakɛ Thãgba n ˈlaanɩ pɔɩ, gɛr dʋɔn yire khorr, kɛ hanɩ Jeju Kirisiti asɩ Kɔ̃tɩna.
Currently Selected:
Rɔmdara 6: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
