Rɔmdara 5
5
Mɔ̃ Thãgba n hɛl sarnɩ sor
1Dɩ mɔ̃ Thãgba hɛl sarnɩ sor thakɛ dɩɩ do ha pɛrɛ dɔ nɔɔ, sɩ hananɛ ha ɩɩ na ɔr dɩɩ the Jeju Kirisiti asɩ Kɔ̃tɩna. 2Ɔr dɔ nɔɔ dɩ sɩ ba yɩrɔ ha pɛrɛra lõ paar bɔ jɩ caarraakɛ sɩ jɩɩlɔnɩ gɩrɛ kɩbɩ, dɩ sa‐n kãka nũ pɛrɛraakɛ sɩ hananɩ a na bul kha na Thãgbaa i dʋbɩ. 3Dɩrakɛ wo sɩ‐n kãkarɛ bɔ gaarɛra gɩdonɩ sɩ jɩrɛ dɩ bɔ gaarɛ n ɛna ha fʋrɛ, 4dɩ ha fʋrɛɛle na cʋɛ sɩ dɩ sa for a na bɩ̃, dɩ bɩɩnɩle n ˈlaanɛ nũ pɛrɛ. 5Dɩ nũ pɛrɛɛle na pɛ sar yicuruəˈ, gɩdonɩ naʋʋkɛ Thãgba na sɩnɩ gɩ və̃viəne a hi asɩ hara, dɩ Thu Phuu pa gɩ the, kɛ Thãgba ha sɩnɩ.
6Ɔbɔɔkɛ sa‐n kɔɔ yɩrɔnɩ fɛfɛɛ paar kpɩɩaˈ, gɛr Kirisiti khiro sɛr sopugodarara, bɔɔkɛ Thãgba pɛrnɩ danɩ. 7Dɩ fa tee tɩɩ sarʋʋ khi a na khi gɩ khɩɩrɛ, sɩ anaa ʋkha na ture a na tee tɩɩ bʋɔɔ khi a na khi. 8Sɩ yɛ gɩrɛ n nɛnanɩ mɔ̃ Thãgbaa naʋʋkɛ a na sɩnɩ hanɩ: Ɔbɔɔkɛ sɩ kɔɔ donɩ sopugodara ˈlo gɛr Kirisiti ka khiro asɩ sora. 9Dɩ mɔ̃ ga ka na ha gɩrɛ dɩphã ɔɔ tɔmɩ̃ hɛl sɩnɩ sor, gɩ do aa ka taa sɩ Thãgbaa nɩ̃khirə ga. 10Gɩdonɩ ado ɔbɔɔkɛ sɩ kɔɔ donɩ lãlaardara na Thãgba, ɔɔ Bikuuni khi cʋʋ sɛr dɩ sɩ bir kũu kha na Thãgba; dɩ mɔ̃ ga ka na ha gɩrɛ dɩphã sɩ birni kũu kha na Thãgba gɩ do Kirisitii yi na taa saˈ. 11Sɩ ga do gele gɩ dɩbara ga, sɩ dakha sɩ‐n kãkarɛ Thãgbara dɩɩ the asɩ Kɔ̃tɩ̃ Jeju Kirisitira ʋrɛɛkɛra sɩ ˈlɛrnɩ bir kuune dɩphã.
Mɔ̃ Adã na Kirisitiida hanɩ kha dɩɩdɩɩ
12Nɩ yɛ mɔ̃ gɩ hanɩ: Tibil bɩɛl dɔ nɔɔ dɩ sopugo ba lona thɩɩra, dɩ sopugorara khir the, dɩ khirrə mar tɩbɩla ɓibi, gɩdonɩ tɩbɩla ɓibi n cʋɛ sopugo.#Jən 3:6 13Sopugo kɔɔ ˈlire hakɛ thɩɩra sɩ dɩ jɔfʋ pɩɩrɔ ˈlaa, sɩ kãkɛ jɔfʋ na hanaˈ, sopugo therre na halaˈ. 14Dɩ a fʋna Adãa bɔɔ a dana Mʋɩjɩɩ bɔɔ khir n punone tɩbɩla fɛʋ, narakɛ wɩrɛ na kɔɔ cʋɛnɩ sopugo Thãgbara dɩɩ ho Adãada ga; dɩ Adana hʋɔn ʋrɛ na ɩnanɩ. 15Sɩ bʋɔraakɛ Thãgba n jɩnɩ tibil dɩɩ do khaardaa gɩ do, gɩ har kpɩɩ na sopugo. Gɩdonɩ tɩɩ bɩɛlɩ sopugo dor nɔɔ dɩ tɩɩ jɔjʋɔ khiir, sɩ bʋɔraakɛ Thãgba n jɩnɩ tibil na khaardaakɛ a‐n ˈlaanɩ pɔɩ dɩɩ do tɩɩ bɩɛlɩkɛ dɔnɩ Jeju Kirisiti dɔ nɔɔ, gɩ kɔ̃tɩnɛ a jɔ gele fĩi a ƴɛr a dã tɩbɩla fɛʋ. 16Thãgbaa khaarda na gɩrɛ tibili sopugo cʋʋnɩ gɩ har dɩɩdɩɩ: Sopugo bɩɛl dɩbara gɛr ɩrɛna kɩɩlʋ dɩ sor heen tɩbɩla gɩrɛ, sɩ sopugo jɔjʋɔɔkɛ tɩbɩla cʋʋnɩ sor ka hɛl warɛ dɩɩ do bɔ jɩ khaardaa dɔ nɔɔ. 17Ado tibil bɩɛlɩ sopugo do nɔɔ dɩ khir na‐n puno tɩbɩla fɛʋ dɩɩ the tɩɩ bɩɛllaalera, mɔ̃ gɩrɛ tɩɩ bɩɛlɩkɛ dɔnɩ Jeju Kirisiti kɔɔ cʋʋnɩ na thʋ̃ na ha? Gɛr dʋɔn wɩrɛ fɛʋʋkɛ ˈlɛnɩ Thãgbaa bɔ jɩ jɔɔ na khaardaakɛ dɔnɩ so hɛllɛ, na dor punodara awɩ yi hanana gɩ do Jeju Kirisiti dɔ nɔɔ. 18Gɛr gɩ mɔ̃kɛ tɩɩ bɩɛlɩ sopugo donɩ nɔɔ dɩ so heene dã tɩbɩla fɛʋ, ɔmɛna tɩɩ bɩɛlɩ fɩl sar thɔ̃ na cʋʋ tɩbɩla fɛʋ dɩ sor na hɛl war dɩ wa ˈlɛ yire. 19Mɔ̃kɛ tɩɩ bɩɛlɩ nũ nʋʋr cʋʋnɩ tɩbɩla jɔɔ dɩ wɩ do sopugodara, mɛ̃ tɩɩ bɩɛlɩ nũ nɩ na cʋʋ tɩbɩla jɔɔ dɩ sor na hɛl war. 20Jɔfʋ ˈlɔɔrɔrɛ gɩ cʋʋ sopugo gɩ jɔr, dɩ ka sopugo jɔrnɩ le Thãgbaa bɔ jɩ n jɩɩ jɔr. 21Mɛ̃ gɩɩ, mɔna sopugo punoni tɩbɩla fɛʋ da‐n ˈlaa khir, mɛ̃ Thãgbaa bɔ jɩ dakha hana punone dɩ ga‐n hɛl tɩbɩlala sor gɩ kpa sɩ gɩ pɛ yire khorra, gɩ do Jeju Kirisiti asɩ Kɔ̃tɩ̃ɩ pa gɩ the.
Currently Selected:
Rɔmdara 5: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
