Rɔmdara 3
3
Gɩrɛ Juifi dʋʋr hananɩ
1Anye Juifi dʋʋr n hana? Dɩ anyee bɔ ca khʋ̃ kurre n taa? 2Thɩ̃ɛ gɩ wer waa gel. Caca thɩ̃ɛ gɩdonɩ Juifisɔ Thãgba kɔɔ dʋ ɔɔ so nyɔ̃kɔɔ. 3Dɩ mɔ̃, ado ɩkhasɔ wɛrra na kɔɔ pɛr haaraˈ, mɔna wa pɛrnɩ haaraˈ na kʋɛrɛ Thãgbaa sobɔdaar do ya? 4Kpɩɩrakaˈ. Tɩbɩla fɛʋ donɩnakɛ sõsodara, sɩ Thãgba wer sobɔ sodaarra a do, dɩ gɩ har mɔ̃kɛ gɩ kherenɩ ɔɔ sɛbɛra ayɩ:
“Wa yɩ fɛr dɩ fa telẽ afɩ thɩmɩɩra,
fɛr na‐n dɔ hʋ hanadaar kɩɩlɛlaakɛ wa‐n kɩɩlna fɩnɩ.”#Khɩ 51:4
5Dɩ ado asɩ fɩl gõgolõ na‐n nɛna mɔ̃ Thãgba sarnɩ, anye sa so ˈlo? Dɩ ado Thãgba gbana sɛr nɩ̃khii ga dor ɔɔda na saraa gaa? Tibiile mɩ mɩɩ gɩrɛ wer. 6Ga ha thale kpɩɩrakaˈ. A gɩ ha thale, mɔ̃ Thãgba na kɩɩlna tɩbɩla fɛʋ thɩɩra?
7Gɩdonɩ ado ɩ̃ sõso dɔ nɔɔ dɩ Thãgbaa sobɔ jɩɩ yɩr, a cʋʋna dakha dɩ ɔɔ i dʋbɩrɔ, mɔ̃ na dɔ nɔɔ dɩ wa kɩɩlna mɩ sopugoda dʋʋrra? 8Anye na tɔna sɩ dɩ sa so nayɩ, sa‐n cʋɛ puure ga‐n ɩna bɔa? Thale asɩ i kʋɛdara n mɩɩ aa, sɩ sor. Wɩrɛ n mɩanɩ thale, sor na heen wer a na teena wɩ.
Tɩbɩla ɓibii sopugodaar do
9Dɩ mɔ̃ gɩ ha? Sɛr Juifisɔ sɩ baar wɩ̃ tibil ya? Kpei. Sɩ kɔɔ ˈlire yɩ gar dɩ Juifisɔ a gbana wɩrɛ na dɔnɩ Juifisɔaˈ, fɛʋ sopugo n pɔtɔrɔnɛ wɩ. 10Dɩ gɩ har mɔna gɩ kherenɩ Thãgbaa sɛbɛra ayɩ:
“Tibilikɛ saranɩ na halaˈ, bɩɛllakɛ na halaˈ;#Khɩ 14:1–3; 53:1–3
11tibilikɛ jɛnɩ fɩlɛ na halaˈ,
tibil bɩɛl na hale dɩ ƴaal Thãgba ga.
12Fɛʋ faarɛ hʋɛ sa debi do tɩɩ kʋɛsʋsɔ ɓibi;
bɩɛl na halerakɛ dɩ cʋʋ thɩ̃ bʋɔaˈ,
bɩɛl ˈlẽˈlenakɛ na halaˈ.
13Awɩ nɔ hor mɔ̃ wɩ‐n phuuni kaa,
wɩ gbaar awɩ delẽbi dɩɩ do fɩɩldaa,
thɩmɩɩrɩkɛ n thɛnɩ awɩ nɔfara sikor kpalʋ gɩ.#Khɩ 5:9; 140:3
14Tɩɩ nɩɩrɛ na thɩmɩɩ ƴʋ̃ɔ hi wer nɔɔ.#Khɩ 10:7
15A wa ca vuu dɩɩ do tibil wɩ yɩ ɩnɩ‐n kɔ;#Eja 59:7–8
16awɩ ka pa fɛʋ, ʋʋnɛ na gaarɛ gɩ‐n pɛ;
17wa jɩ hʋɛɛkɛ n ˈlaanɛnɩ ha ɩɩ kpɩɩrakaˈ,
18Thãgba maar na ha awɩ hara ga.”#Khɩ 36:1
19Sɩ sɩ jɩrɛ dɩ gɩrɛɛkɛ jɔfʋ sonɩ wɩrɛ hanɩ jɔfʋra a so, dɩ tibil bɩɛllakɛ na yɩ nɔ ha paaraˈ, sɩ gɩ do tɩbɩla fɛʋ sor heen wer Thãgbaa ƴɛra. 20Gɩdonɩ sor na hɛl tibil bɩɛllalakɛ jɔfʋ thɔ̃ cʋʋrɛra ga, gɩdonɩ jɔfʋ n ka ɩna sopugo jɩɩr.#Khɩ 143:2; Gal 2:16
So hɛllɛ Jeju Kirisitii ha pɛra
21Sɩ nɛnɛ̃ mɔ̃ Thãgba na hɛlnɩ tɩbɩlala sor, sɩ ga do jɔfʋra gɩ thaˈ, gɩ yɩrrɛ; jɔfʋra na Thãgbaa bobonasɔ kɔɔ mɩa gɩ, 22dɩ Thãgbaa so hɛlla tɩbɩlaakɛ n pɩɛrnɩ Jeju Kirisiti haar sorra n hɛllɔ, sɩ wɩrɛ fɛʋʋkɛ n pɩɛrnɩ haar na ˈlɛ, gɩdonɩ dɩɩdɩɩ hɩɩn paar na halaˈ.#Gal 2:16 23Tɩbɩla ɓibi dʋɔn puu cʋʋdara a ˈlee i dʋbɩrɛɛkɛ dɔnɩ Thãgbaada. 24Sɩ khaar sor na hɛl war ɔɔ bɔ jɩra gɩ the birsereraakɛ Jeju Kirisiti birse wini. 25Dɩ ɔr Thãgba gba a jinə bonɩɛ dɩ ɔɔ tɔmɩ̃ na do sopugo hɛldaa wɩrɛraakɛ n pɩɛrnɩ haar, gɩ nɩna ɔɔ fɩl sar, gɩdonɩ aa kɔɔ therna sopugookɛ tɩbɩla kɔɔ cʋʋnɩ mamara ɔɔ ha fʋ bɔra ga. 26Sɩ a ƴaalɛ a nɩna ɔɔ fɩl sar nɛnɛ̃ bɔɔraakɛ, gɛr na nɛna dɩ ɔr dɔ ʋrɛ saranɩ da‐n hɛl ʋrɛ n pɩɛrnɩ Jeju haar sor.
27Dɩ kana gɩrɛ tibil na məbironi ha? Ga halaˈ. Anye dɔ nɔɔ? Jɔfʋ thɔ̃ cʋʋrɛ dɔ nɔɔ ya? Kpei. Ha pɛrɛra gɩ the. 28Gɩdonɩ sɩ yɩ gɛr dɩ ha pɛrɛ dɔ nɔɔ dɩ tibil n ˈlɛrɔ so hɛllɛ, ga do jɔfʋ thɔ̃ cʋʋrɛra ga. 29Dɩ Thãgbara, Juifisɔɔ Thãgba a ba do dɩbara ya? Ga do ca kpalaa Thãgba a do dakha gaa? Ɔɔ, ca kpalaa Thãgba a do dakha. 30Gɩdonɩ Thãgba bɩɛlla a do, dɩ cʋʋ sor dɩ ga‐n hɛl khʋ̃ kurdarara dɩɩ the awɩ ha pɛra, dɩ cʋʋ sor dɩ ga‐n hɛl wɩrɛraakɛ na kuroni khʋ̃aˈ, dɩɩ do ha pɛrɛ dɔ nɔɔ.#Dət 6:4; Gal 3:20 31Dɩ ha pɛrɛ ba dor nɔɔ dɩ sɩ cʋʋrɔ jɔfʋ dɩɩ debi a do mɔlɔ thɩ̃ɛ ya? Kpɩɩrakaˈ. Jɔfʋ sɩ ka jɩɩ cʋʋ dɩɩ do jɔfʋ.
Currently Selected:
Rɔmdara 3: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
