Rɔmdara 2
2
Mɔ̃ Thãgba na kɩɩlnanɩ tɩbɩla fɛʋ
1Dɩ fa hananakɛ thɩ̃ɛ a na ther bã, a fɩ harakɛ mɔ̃, fɛrkɛ n ˈlaanɛnɩ dɩ fa‐n yɩ haanɩda; gɩdonɩ mɔ̃ fɩ‐n ˈlaanɩ dɩ fa‐n yɩ haanɩda, dɩbara fɩ‐n heen sor, gɩdonɩ mɔ̃ fɩ‐n ˈlaanɩ fa‐n yɩɛ awɩ khara fɩ‐n cʋʋ fer.#Mat 7:1; Lu 6:37 2Sɩ jɩrɛ dɩ Thãgbaa kɩɩlɩkɛ a na kɩɩlnanɩ wɩrɛ n cʋɛnɩ thɩ̃ɛ thale gɩ teere kha. 3Fɩ‐n kpɩɛrɛ dɩ fɛrkɛ n ˈlaanɛnɩ dɩ fa‐n yɩ wɩrɛ n cʋɛnɩ thɩ̃ɛ thaleeda, sɩɩ do dakha awɩ khara fɩ‐n cʋʋ fa fuure Thãgbaa kɩɩlla gaa bɛ? 4Agɩbo mɔ̃ a buloni haar, a hanana jʋʋrɛ na ha fʋrɛ dɩɩ thʋ̃ kar, fa gbarakɛ dɩɩ do far thɩ̃aˈ, sɩ fa‐n ka jɩ dɩ Thãgbaa ha bulola n tɔ fɩ dɩ ga‐n pɛ ha debirera ga. 5Sɩ mɔ̃ afɩda khɩɩrnɩ dɩ fa‐n tu ha debiraˈ, Thãgbaa nɩ̃khi fɩ‐n kpa fa‐n thɩɩn gɩ dana nɩ̃khi wire, kɛ dɔnɩ wireekɛ Thãgbaa kɩɩl telẽ na ɩɩrnɩ, 6dɩ na lɩmɩ tɩbɩla fɛʋ bɩɛlbɩɛl mɔ̃ ntɛɛ thɔ̃ hanɩ.#Khɩ 62:12; Sokp 24:12 7Yire khorr a na ha wɩrɛɛkɛ n yɩranɩ dɩ wa‐n cʋʋ bɔɔ, dɩ wa‐n ƴaalna i dʋbɩrɛ na cʋʋrɩkɛ thɛnɩ Thãgbaa pa, na gɩrɛɛkɛ na dɔnɩ dakʋɛnaa ga. 8Sɩ nɩ̃khii na ha helle a na lɩmɩ wɩrɛ dɔnɩ dɩbara nadara dɩ wɩ ka na bo sobɔr sɩ na tu dapuu. 9Bɔ gaarɛ na ha dɩr na dɔ tɩbɩla ɓibiikɛ n cʋɛnɩ puureeda, Juifisɔ na dɔ cacadara, agɩpɩ wɩrɛ na dɔnɩ Juifisɔaˈ. 10I dʋbɩrɛ, na cʋʋr, na ha ɩɩ na dɔ tibil wo tibilikɛ n cʋɛnɩ bɔɔda, Juifisɔra na dɔ cacadara, agɩpɩ wɩrɛ dakha na dɔnɩ Juifisɔaˈ. 11Gɩdonɩ Thãgba na‐n hɩɩn tɩbɩla dɩɩdɩaˈ.#Dət 10:17
12Ca kpala fɛʋʋkɛ n cʋɛnɩ sopugo sɩ wa jɩ Mʋɩjɩɩ jɔfʋaˈ, wa bũburone na jɔfʋ ˈleerera; sɩ Juifisɔɔkɛ hananɩ jɔfʋ sɩ wa‐n cʋʋ sopugo, gɩrɛ jɔfʋra n sonɩ na kɩlɛna wɩ. 13Gɩdonɩ ga do wɩrɛ n pɛnɩ jɔfʋ nũu dɔ tɩɩ sara Thãgbara ga, sɩ wɩrɛ n cʋɛnɩ gɩrɛ jɔfʋ sonɩ sor na hɛllɔ. 14Ca kpalaakɛ na hananɩ Mʋɩjɩɩ jɔfʋaˈ, sɩ awɩ ti para wɩ‐n cʋʋrɛ gɩrɛ jɔfʋ sonɩ, wa hana jɔfʋ weraˈ, sɩ awɩ thɛthɛ dɔ awɩ jɔfʋ. 15Wɩ‐n nɩnanɛ dɩ gɩrɛ jɔfʋ n ƴaalnɩ gɩ kherere awɩ hara, dɩ thalera awɩ kpɩɛrnɔ n nɩrɔ gɩ har, gɩdonɩ awɩ kpɩɛr n so warɛ aa, dapuu ha gɩrɛ aa, dabʋɔ ha gɩrɛ. 16Gɛr na yɩra wireekɛ Thãgba na pɛrnɩ Jeju Kirisiti da kɩɩlna tɩbɩla awɩ thɔnaakɛ wɩ cʋʋnɩ wolonena, dɩ ga har mɔ̃kɛra tutugo bʋɔɔkɛ mɩ‐n mɩɩnɩ sonɩ.
17Fɛrkɛ yɛnɩ Juifi ha fɩ, dɩ fɩ bo dɩ fa‐n ɩɩ jɔfʋʋdara, dɩ fa‐n məbi Thãgbaada dʋʋrra, 18a jɩ dakha gɩrɛ Thãgba n ƴaalnɩ, jɔfʋ kɔɔ dɩɩr fɛr dɩ fɩ jɩ gɩrɛ bʋɔnɔnɩ kpɩɩ; 19fɛrkɛ yɛnɩ fa marrɛ fa‐n nɩrɔ yara hʋɛ, aa wo, dahɩrɛ fɩ do wɩrɛraakɛ hanɩ dabirəra, 20aa wo, də̃bələə dɩɩrdaar ha fɩ, na sikpuloosɔɔ dɩɩrdaar, gɩdonɩ jɔfʋra fɩ jɩɩ hana jɩɩr na gɩrɛ dɔnɩ sobɔr. 21Dɩ a mɛ̃ gɩ fɛrkɛ n dɩrɛnɩ wɩ̃ tibil, fa‐n dɩɩr afɩbara gaa? Fɛrkɛ n mɩanɩ dɩ fɩ yɩ wa‐n yuəˈ, fɛr n yuon? 22Fɛrkɛ n sɔnɩ dɩ fɩ yɩ, tibil na‐n ƴaal khɛ kpɩaˈ, tibil na‐n ƴaal kũu kpɩaˈ, fɛr n ƴaalɛ khɛ kpɩɩ? Fɛrkɛ n kpɛnɩ thɩla, fɛr n yuon thɩl du thɩ̃ɛɛ? 23Fɛrkɛ n məbəni Thãgbaa jɔfʋ hananɛna, fɛr n bɔ jɔfʋ hɩɩnɛ dɩ ga‐n kʋɛ Thãgbaa ii? 24Mɛ̃ gɩ khere Thãgbaa sɛbɛra ayɩ: “Nɛr Juifisɔra n cʋɛ dɩ ca kpala na‐n kʋɛ Thãgbaa i.”#Eja 52:5
Gɩrɛ n dɔnɩ khʋ̃ kur bʋɔ
25Sobɔr gɩ wer, khʋ̃ kurre bɔrɛ ado fa cʋʋ gɩrɛ jɔfʋ sonɩ, sɩ ado fa kʋɛ jɔfʋ afɩ khʋ̃ kur bire debi a ho fa kur khʋ̃aˈ. 26Ado ʋrɛ wa kurni khʋ̃aˈ na cʋʋ gɩrɛ jɔfʋ sonɩ, ga do Thãgba na‐n hɩɩnʋʋnɛ mɔ̃ a donɩ khʋ̃ kurdaaraa? 27Ʋrɛɛkɛrakɛ tomɩ nʋʋnnaakɛ na kuroni khʋ̃aˈ, sɩ da‐n cʋʋ gɩrɛ jɔfʋ sonɩ na heen fɩ sor fɛrkɛ hananɩ jɔfʋ sɛbɛ na khʋ̃ kurre sɩ fa‐n kʋɛ jɔfʋaa? 28Gɩdonɩ ga do Juifi dʋʋr tomɩrra wɩ‐n we Juifi dʋʋraˈ, dɩ khʋ̃ kurre ga do tomɩ khʋ̃ kurreekɛ wɩ soaˈ; 29sɩ Juifi dʋʋr, bɩnɔ gɩ ha, dɩ khʋ̃ kurre dʋɔn hadaa, a the Thu Phuu pa, ga do jɔfʋ sɛbɛra ga. Juifi ca olee khɩɩ na‐n the tɩbɩlala ga, sɩ Thãgbara gɩ‐n the.#Dət 30:6
Currently Selected:
Rɔmdara 2: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
