Rɔmdara 15
15
Gɩ teenanɛ sa‐n cʋɛ gɩrɛ na danɩ haanna, ga do asɩda sa‐n kpɩɛrna ga
1Sɛrɛɛkɛ tɩɛnnɩ ha pɛrɛra sɩ teenanɛ sa‐n bulo wɩrɛ na tɩɛnnɩ ha pɛrɛra ga, sɩ sa‐n kpɩɛrna gɩrɛ na dãa sarnaˈ. 2Dɔ sɛrɛ fɛʋ bɩɛlbɩɛl na‐n cʋʋ gɩrɛ na danɩ asɩ ˈwalãkha tibillə, kɛ na dʋɔraanɩ thɩ̃ bʋɔ, gɩ cʋʋ khɔ̃ pɛrɛ ga‐n hale. 3Gɩdonɩ Kirisiti dakha na kɔɔ ƴaal gɩrɛ daaraanɩ dɩbara ga, sɩ gɩ har mɔ̃kɛ gɩ kherenɩ Thãgbaa sɛbɛra ayɩ: “Nɩɩrɛɛkɛ nɩnɩra kɔɔ nɩɩr fɩnɩ kɔɔ heen mer.”#Khɩ 69:9 4Dɩ gɩrɛ fɛʋʋkɛ kɔɔ kherenenɩ mamara gɩ kɔɔ kherere gɩ dɩɩr sɩ thɩ̃ɛ, dɩ ha fʋrɛ na ha faarɛɛkɛ Thãgbaa sɛbɛ n ˈlaanɩ na dor nɔɔ dɩ sa hana nũ pɛrɛ. 5Dɔ Thãgbaakɛ ha fʋrɛ na ha faarɛ n thernɩ n cʋʋ nɛrɛ fɛʋ bɩɛlbɩɛl nɩ hana kpɩɛr bɩɛl, gɩ ha mɔ̃kɛ Jeju Kirisitiida hanɩ; 6dɩ mɛ̃ na hana kha bɩ̃ bɩɛl, na nɔ bɩɛl, na‐n khɩɩna Thãgbaakɛ dɔnɩ asɩ Kɔ̃tɩ̃ Jeju Kirisitii Thɩ.
Mɔ̃ tutugo bʋɔɔ thɩmɩɩ donɩ dakha wɩrɛ na dɔnɩ Juifisɔaada
7Dɩ gɛr gɩ na‐n tea kha bɩɛlbɩɛl mɔ̃kɛ Kirisiti kɔɔ tee nɩnɩ gɩ cʋʋ Thãgbaa i gɩ dʋbɩrɔ. 8Gɩdonɩ mɩ sor ayɩ: Kirisiti debire a do thɔ̃daar Juifisɔraakɛ n kuroni khʋ̃ʋ, gɩ nɩna Thãgbaa sobɔdaar do, mɔ̃kɛ a‐n cʋʋnɩ gɩrɛ a kɔɔ ʋlfɛnanɩ asɩ mama thɩ kɔ̃tɩ̃sɔ, 9ca kpala dakha na‐n khɩɩ Thãgba ɔɔ bɔ donana, gɩ ha mɔ̃kɛ gɩ kherenɩ Thãgbaa sɛbɛra ayɩ:
“Gɛr gɩ dɩ ma khɩɩ fɩ ca kpalaa thɩ̃thɩɩn,
afɩ i dʋbɩ nɩ ma khɩ̃.”#2 Sam 22:50; Khɩ 18:50
10Dɩ gɩ sor wo ayɩ:
“Ca kpala na‐n kãkanɛ kha na ɔɔ too.”#Dət 32:43
11Wo:
“Nɛr ca kpala fɛʋ, na‐n khɩa Kɔ̃tɩn;
dɔ tibil caar fɛʋ na‐n khɩsʋʋ.”#Khɩ 117:1
12Wo Ejaɩ sor dakha ayɩ:
“Ɩjaɩɩ məl ʋkha na ɩnɛ,
a na ɩɩrɛ na gba fãga ca kpalala,
dɩ ɔr dɔ ʋrɛ ca kpala na pɛrnɩ haar.”#Eja 11:10
13Thãgbaakɛ nũ pɛrɛ n theronɩ n cʋɛ daʋ na ha ɩɩ fɛʋ gɩ hi anɩ hara, gɩ the anɩ ha pɛraakɛ nɩ hananɩ ɔrra, gɩ do nɔɔ Thu Phuu n cʋʋ nũ pɛrɛɛkɛ nɩ hananɩ ɔrra gɩ thʋ̃ gɩ kãasɩ.
Gɩrɛ dɔnɩ nɔɔ dɩ Pol khere sɛbɛɛkɛ sɩ aa mʋ̃ dɩkhara ga
14Ado mɛr gɩ, ɩ̃ omisɔ, mɩ jɩrɛ tue gɩrɛraakɛ dɔnɩ anɩda, gɛr dʋɔn mɔ̃ nɩ hananɩ bɔ cʋʋrɛ ka, a hanana jɩɩr ɓibi, a hanana punone a na dɩɩrna khasɔ. 15Sɩrakɛ ɩ̃ sɛbɛraakɛ mɩ khere narnɩ paarsɔ hale mɩ ˈlanɩ a mɩɩ nɩ thɩ̃ɛ casɩ, gɩ cʋʋ nɩ nɩ hana jɩnanɛ thɩ̃ ɩkhara, dɩ mɩ kherere thakɛ dɩɩ the bɔ jɩɩrraakɛ Thãgba jɩ mɩnɩ bʋɔra, 16dɩ ma do Jeju Kirisitii thɔ̃daar ca kpalala; Thãgbaa tutugo bʋɔɔ thɩmɩɩ mɩɩrɛ dʋɔn ɩ̃ gbõdaar thɔ̃ɔkɛ mɩ‐n cʋʋnɩ, dɩ mɛ̃ ca kpala na ho bonɩ ji thɩ̃ɛɛkɛ danɩ Thãgba haar, kɛ Thu Phuu leenɩ kpɩɩ dɩɩ do ɔɔda.
17Dɩ gɛr gɩ mɩ hananɛ gɩrɛ ma məbironi Thãgbaa ƴɛra dɩ gɩ ther ɩ̃ bɩɛl dora na Jeju Kirisiti. 18Gɩdonɩ ma ˈla na mɩɩ thɩ̃ kpɩaˈ, sɩ gɩrɛ Kirisiti gba mɩnɩ da‐n cʋʋna ca kpala na‐n nɛ nũu gɩ, gɩ the ɩ̃ thɩmɩɩra, na ɩ̃ thɩ̃ cʋʋra, 19na fãgaakɛ yɩranɩ nɔ kpaa thɩ̃ cʋʋrɛra, na ma kʋ thɩ̃ cʋʋrɛra, na Thu Phuu fãgara; mɛ̃ mɩ kɔɔ fʋ Jerujalɛm a mɩɩ Kirisitii tutugo bʋɔɔ thɩmɩɩra jɔɔ a finə a ba dana Iliri. 20Dɩ gɩrɛ mɩ‐n ƴaalnɩ kɔɔ dʋɔn ma‐n mɩa tutugo bʋɔɔ thɩmɩɩ ka wa kɔɔ nɩnɩ Kirisitii i paˈ, dɩ mɛ̃ ma dɛbɩ tɩɩ kpɩɩ go kpɛɛra ga. 21Sɩ gɩ ha mɔ̃kɛ gɩ kherenɩ Thãgbaa sɛbɛra ayɩ:
“Wɩrɛraakɛ ɔɔda na kɔɔ mɩɩnɩ kpɩɩaˈ, wa yɩɩrɛ,
dɩ wɩrɛ na kɔɔ nɩɛnɛnaˈ, wa jɩrɛ kɩrʋ.”#Eja 52:15
Mɔ̃ Pol ƴaalnɩ a jal Rɔm dɩɩra
22Gɛr dɔ gɩrɛ kɔɔ pɩɛrɛ mɩnɩ bɔ jɔjʋɔra dɩ ma kɔɔ pɔ anɩ pa ga.#Rɔm 1:13 23Sɩ nɛnɛ̃ ma hana paarɩkɛ ma doronɩ thɔma bəənnəəkɛ bã; sɩɩ do yɛna jɔrɛ gɩrɛ mɩ kɔɔ ƴaalnɩ ɩ̃ pɔ anɩ pa, 24ɔbɔɔkɛ ma‐n kanɩ Esɩpanyɩ. Mɩ pɛrɛ haar ɩ̃ yɛ nɩ a ma ka, dɩ mɩ nar ɩ̃ tɔɔ ɓo gbe anɩ pa a he, sɩ nɩ thɔɔ mɩ.
25Sɩ nɛnɛ̃ Jerujalɛm mɩ‐n jal gɩrɛ ɩ̃ bulnə tɩɩ phuusɔ.#1 Kor 16:1–4 26Gɩdonɩ wɩrɛ hanɩ Masedʋan na Akaɩ gɩ kɔɔ da warɛ haar dɩ wɩ pɛ thɩ̃ɛ gɩ bul bɔdaraakɛ hanɩ tɩɩ phuusɔɔ thɩ̃thɩɩn Jerujalɛm. 27Gɩ kɔɔ da warɛ haar bɔɔbɔɔ, dɩrakɛ thɩ̃ɛ gɩɩkɛ wɩ teenanɩ wɩ cʋɛ, gɩdonɩ ado wɛr ca kpala Juifisɔɔ pa wɩ ˈlɛ thu thɩ̃ɛ, wɩ teenanɛ dakha wa‐n bulo wi na nɛnɛ̃ bɔɔkɛɛ thɩ̃sɔ.#1 Kor 9:11 28A mɩ ˈli pɩr ga thɔ̃ɔle a ˈli gbaar khaardaale a dʋ wɩ nyɔ̃kɔɔ, gɛr ma jaal Esɩpanyɩ, sɩ anɩ pa ma the sɩ na ka. 29Mɩ jɩrɛ ado ma pɔ anɩ pa Kirisitii bɔna ma pɔna nyɔ̃kor hire phi.
30Omɩna, asɩ Kɔ̃tɩ̃ Jeju Kirisitii i na naʋʋkɛ Thu Phuu n ˈlaanɩ mɩ gba, dɩ ma‐n phʋʋrna nɩ dɩ na kɛ̃kɛrɛ̃ na‐n ɓã mɩ anɩ Thãgba bɩɛllaakɛ nɩ‐n bɩɛlnɩ dɩ na‐n pɛ mar, 31gɩ do nɔɔ a taa mɩ Jude ha pɛ ˈleedaraa nyɔ̃kɔɔ, dɩ mɛ̃ dakha wo khaardaakɛ mɩ‐n jalnanɩ gɩrɛ Jerujalɛm tɩɩ phuusɔ n tee gɩ na daʋ, 32gɩ do nɔɔ, ado Thãgba tuur gɩ ɩ̃ dã anɩ pa na daʋ, ɩ̃ ˈlɛ nar dakha hɩɩrɛ.
33Thãgbaakɛ ha ɩɩ n thernɩ n hana kha na nɛrɛ fɛʋ. Amɛn.
Currently Selected:
Rɔmdara 15: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
