Rɔmdara 14
14
Fa‐n ˈlaa yɩ afɩ omiida ga
1Nɩ tea ʋrɛ na tɩɛnnɩ ha pɛrɛra ga, sɩ na‐n bana kha kpɩɛr hananɛnasɔ dɩɩdɩaˈ.#Kol 2:16 2Ʋ na hananɛ ha pɛrɛ a na‐n kho thɩ̃ɛ fɛʋ, sɩ ʋrɛ na tɩɛnnɩ ha pɛrɛra ga, ga dor fa haar or na‐n kho. 3Ʋrɛ n khɔnɩ thɩ̃ɛ fɛʋ a na‐n beesi ʋrɛ na‐n khɔnaa ga; dɩ ʋrɛ n khɔnɩ fa haar a na‐n ˈlaa na yɩ dɩɩ ʋrɛraakɛ n khɔnɩ thɩ̃ɛ fɛʋaˈ, gɩdonɩ Thãgba teaa. 4Amɛ fɛrkɛ do dɩ fa‐n kɩɩlna haanɩ thɔ̃daar? Ado a jɩɩlɛ, ado a jire, ɔɔ kɔ̃tɩ̃ gɩ ba, sɩ a na jɩɩlɛ gɩdonɩ Kɔ̃tɩn hananɛ punone a na fʋnaa.
5Ʋkha n tirore wi bɩɛl dɩɩ dʋʋraa wi kɔ̃tɩ̃ɩ a jɔ gɩ̃ wi fɛʋ, sɩ ʋ na‐n hɩɩnɛ wiresɔ gɩ dʋʋraa bɩɛl. Dɔ tɩbɩla fɛʋ bɩɛlbɩɛl n jɩɩ jɩ tue bɔɔbɔɔ awɩ hara ga kpɩɛrraale. 6Ʋrɛ n teronɩ wire dɩɩ ha kpɩɩ, a tirore ga‐n cɔ Kɔ̃tɩn; ʋrɛ n khɔnɩ a‐n khor ga‐n cɔ Kɔ̃tɩn, gɩdonɩ Thãgba a‐n fʋɔr sɩ da‐n kho; sɩ ʋrɛ n bɔnɩ khor, a‐n bor ga‐n cɔ Kɔ̃tɩn, dɩ ɔrra dakha Thãgbara a‐n fʋɔr. 7Gɩdonɩ tibil bɩɛllakɛ na‐n hana yire dɩɩ do ɔɔ thɛthɛɛda dɩbara ga, dɩ tibil na‐n khi dɩɩ do ɔɔ thɛthɛɛda dɩbara ga. 8Gɩdonɩ a sɩ hana yire, sɩ hana gɛr dɩɩ do Kɔ̃tɩnɩda, dɩ a sɩ khire Kɔ̃tɩnɩdara gɩ do; dɩ gɛr gɩ a yire sɩ hana, a sɩ khire yo, sɩ Kɔ̃tɩnɩdara sɩ do. 9Gɛr hɩna dɩ Kirisiti kɔɔ khi sa bir ɩɩr a the khirera dɩ mɛ̃ a na do Kɔ̃tɩn khɩ̃didarara na yidarara. 10Sɩ fɛrɛ, mɔ̃ dɔ kɩrʋ dɩ fa‐n kɩɩlna afɩ omi? Dɩ fɛrɛ wo, anyera fɩ‐n beesi afɩ omi? Mee sɛrɛ fɛʋ sa jaal na jɩɩl Thãgbara kɩɩl paar.#2 Kor 5:10 11Gɩdonɩ gɩ kherere Thãgbaa sɛbɛra ayɩ:
“Mɔ̃kɛ mɩ donɩ yidaar mɛ̃ ga ha, mɛr Kɔ̃tɩn sɔ,
nɛkhilə ɓibi na gulẽga marɛ,
dɩ delẽbe ɓibi na caan ɩ̃ Thãgba do.”#Eja 45:23
12Mɛ̃ tɩbɩla fɛʋ bɩɛlbɩɛl na mɩɩna Thãgba mɔ̃ awɩ thɛthɛɛda hanɩ.
Fa‐n cʋʋ afɩ omi a jəˈ
13Gɛr gɩ sa‐n ˈlaa na yɩ kha dɩɩ bɩɛlbɩɛl bã, sɩ asɩ ƴaal n ka dɔ sa‐n cʋʋ thɩ̃ɛ gɩ cʋʋ asɩ omi a bara a jəˈ. 14Mɔ̃ mɩ donɩ Jeju Kɔ̃tɩnɩda, mɩ jɩ gɛr a jɩna tue dɩ thɩ̃ bɩɛllakɛ na hale dɔnɩ dasãsɩnaa ga; sɩ ado tibil na hɩɩn thɩ̃ doo mɔ̃ gɩ donɩ thɩ̃ sãsɩnaa, thɩ̃ sãsɩnaana ga dʋʋraa ger. 15Ado gɩrɛ fɩ‐n khonɩ pɛr afɩ omina kpɩɛr nyanyaanɛ, ga do naʋ fɩ‐n jalna bã. Fa‐n do afɩ dakhona n cʋʋ ʋrɛ Kirisiti kɔɔ khironi a buəˈ.
16Na‐n do gɩrɛ dɔ narnɩ dabʋɔ n do nɔɔ tɩbɩla na‐n mɩɩrɔ dapuəˈ. 17Gɩdonɩ Thãgbaa fãgadaar do, ga do dɩko thɩmɩɩr gɩ na thɩ̃ yɔnanaˈ, sɩ fɩl sarʋ, na ha ɩɩ, na daʋ gɩ do, dɩɩ the Thu Phuurə. 18Ʋrɛ n dɔnɩ Kirisitii thɔ̃ na ga fɩl caale, ɔr n da Thãgba haar, dɩ tɩbɩla n khɩsʋʋrɛ dakha. 19Gɛr gɩ sa‐n ƴaalɛ gɩrɛ na ˈlaanɛnɩ ha ɩɩ, na gɩrɛ na cʋɛnɩ ʋ a khɔ̃ a na‐n pɛr ʋ n khɔ̃ a na‐n pɛr. 20Fa‐n kʋɛ Thãgbaa thɔ̃ dɩko pɩɛrʋʋra ga. Sobɔr gɩ wer thɩ̃ɛ fɛʋ phure, sɩ gɩ puurore tibillə ado a na kho dɩɩ debi a do nɛ bara bokaar. 21Gɩ bɔrɛ dɩ fa bo nʋʋn, na bona taan, na bona gɩrɛ fɛʋʋkɛ na cʋɛnɩ afɩ omi dɩ na bara, agɩbo a ji, agɩbo gɩ dʋʋraa yɔɔ paar. 22Ha pɛ ca ole fɩ hananɩ gelela, fɔrɔ gɩ do afɩda fɛrɛ na Thãgba. Gɩ‐n dar tibilləəkɛ hananɩ tu jɩɩr thɩɛnaakɛ a pɛrnɩ haar, sɩ ga‐n bir dɩɩ dʋʋraa so heene haarra ga. 23Sɩ ʋrɛ hananɩ baalɛ gɩrɛraakɛ a‐n khonɩ sor n heenuune, gɩdonɩ ɔɔ cʋʋ pa na the ha pɛrɛra ga. Dɩ mee gɩrɛ fɛʋʋkɛ na thɛnɩ ha pɛrɛra ga, sopugo gɩ.
Currently Selected:
Rɔmdara 14: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
