Galasɩdara 5
5
Jɩɩlɛ kɩbɩ wa dʋʋrra
1Wa dʋʋrra Kirisiti kɔɔ birse si, gɛr gɩ nɩ fɔ gɩ ma, na‐n do dee dʋʋr n bir gɩ ˈli ni bã. 2Nɩ hɩnɛ mɛr Pol mɩ so narɛ ayɩ, ado na kur khʋ̃ʋ ga dor Kirisiti na taa nɩ bʋɔ bã. 3Dɩ mɩ‐n kpãkpãa narɛ wo ayɩ, ado tibil kur khʋ̃ʋ, jɔfʋ ntɛ yɩ ɩna‐n hɩɩnɛ fɛʋ. 4Nɩ leere na Kirisiti nɛrɛ fɛʋʋkɛ n ƴaalɛnɩ sor n hɛla nar jɔfʋ cʋʋrɛra, nɩ ˈleere dakha Thãgbaa bɔ jɩ. 5Ado se wer so hɛl nũ pɛrɛ sɩ‐n pɩɛr, kɛ Thu Phuu na cʋʋnɩ dɩ sa ˈlɛ ha pɛrɛra. 6Gɩdonɩ a fɩ ha Jeju Kirisitira a fɩ kurre khʋ̃ʋ yo, a fa kur khʋ̃a yo, ga‐n cʋʋ thɩ̃aˈ, sɩ ha pɛrɛɛkɛ hananɩ naʋʋkɛ n cʋɛnɩ thɩ̃ɛ, gɛr dɔ thɩ̃ɛ.
7Nɩ kɔɔ car waa gel, sɩ amɛ jɩlɛ nɩ a pɩɛr nɩ na‐n nɩ sobɔr nũə? 8Kpɩɛr ca gele na the ʋrɛraakɛ kɔɔ wɛ nɩnaˈ. 9Tabɩɩr fɩɩʋ n cʋʋrɛ buru mɩ̃ boloo fɛʋ dɩɩ bʋ̃.#1 Kor 5:6 10Mɩ hana narɛ ha pɛrɛ Kɔ̃tɩnna, dɩ na hana kpɩɛr kpɩaˈ, sɩ ʋrɛɛkɛ nyanyaanɛ nɩnɩ ado a ha mɔnakɛ, sɩ sor na heenuune. 11Sɩ ado me wer omɩna, ado ɩ̃ Thãgba thɩmɩɩ mɩɩra mɩ yɩ wa‐n kuro khʋ̃ʋ, anyera ma‐n yɩ kpoore ˈlo? Gɩdonɩ Kirisitii kʋkʋ thɩr thɩmɩɩkɛ n dɔnɩ nɛ baradaa, gɩ bure mɛ̃. 12Dɩ wɩrɛra n pɩɛrnɩ nyanyaanɛ anɩ thɩ̃thɩɩn wɩ yɩra kuro kpɔ#5:12 Kpɔ kurre: Polɩ bɔɔ thɩ̃ɛ gɩɩkɛ ɩkhaa thɩldaar kɔ̃tɩ̃sɔ n kɔɔ cʋʋnɩ. khorr.
13Omɩna wei, wa dʋʋrra Thãgba kɔɔ we nɩ, sɩ na‐n gba wa dʋʋrra a phiro sɩ na cʋʋ gɩrɛɛkɛ anɩ tibil do pa n ƴaalnaˈ, sɩ nɩ ka dɔ kha dea bɩɛlbɩɛl naʋra. 14Gɩdonɩ jɔfʋ fɛʋ, thɩmɩɩ nɔ bɩɛllaakɛ gɩ ha ayɩ: “Fa‐n na afɩ ˈwalãkha tibil mɔ̃kɛ fɩ‐n nanɩ afɩbara.”#Lev 19:18 15Sɩ ado nɩ‐n dʋɔnɛ kha a na phʋʋna khasɔ, na‐n jɩɛ hɩɩn na‐n kʋɛ khasɔa koe.
Gɩrɛ dɔnɩ tibili tibil do pada na Thu Phuu biikɛ a‐n senɩ
16Gɛr gɩ dɩ ɩ̃ so nar ayɩ: Na‐n jala mɔ̃kɛ Thu Phuu n so narnɩ, ga cʋʋ nɛr dɩ na cʋʋ gɩrɛ anɩ tibil do pa n ƴaalnaˈ. 17Gɩdonɩ gɩrɛ tibili tibil do pa n ƴaalnɩ, ga‐n ˈli kha fɩɩʋrakɛ na gɩrɛ Thu Phuu n ƴaalnaˈ; dɩ gɩrɛɛkɛ Thu Phuu n ƴaalnɩ, ga‐n ˈli kha fɩɩʋrakɛ na gɩrɛ tibili tibil do pa n ƴaalnaˈ; wɛr yenyɔ wɩ‐n kɛ̃kɛrɛnɛ kha, dɩ gɛr gɩ na‐n puno na cʋʋ gɩrɛɛkɛ nɩ pɛrnɩ haaraˈ.#Rɔm 7:15–23 18Sɩ ado Thu Phuuda nɩ‐n pɛ nũu jɔfʋ na puno naˈ.
19Dɩ gɩrɛra tibili tibil do pa n cʋʋnɩ gɩ yɩrrɛ gbelẽ gbelẽ, gɛr ha gɩrɛ: Bɔdɛl cʋʋrɛ, thɩ̃ bise cʋʋrɛ, dakhaba cʋʋrɛ, 20thɩl jir, dɔɔrɛ, tɩɩ laarɛ, kɩla, gbugi, nĩkhii, dɩbara na kɛ̃kɛrɛnɛ, dɩɩdɩɩ leere, thʋ̃ kha, 21ha pɩɛrɛ, ta laarɛ, gbõgolõ dɩko khor, na yɛ̃ thɩ̃sɔɔkɛ n hɔnɩ kha na gɩrɛra. Mɩ maanɛ dɩ ma‐n so nar gɩrɛ mɔ̃kɛra mɩ kɔɔ sonɩ, dɩ wɩrɛ n cʋɛnɩ ga thɩ̃sɔɔkɛ wa lõ Thãgba fãgadaarɩ dʋɔaˈ.
22Sɩ beekɛ Thu Phuu n senɩ dʋɔn: Naʋ, daʋ, ha ɩɩ, ha fʋrɛ, ha bulo fɩlɛ, bɔ cʋʋrɛ, sobɔ cʋʋrɛ, 23hɛlɛlɛ fɩlɛ, dɩbara fʋrɛ; jɔfʋ na hale dɩɩ pɩɛr ga thɩ̃sɔɔkaˈ. 24Dɩ wɩrɛ hanɩ Jeju Kirisitira wɩ gbaar tibili tibil do pa na gɩrɛ na‐n kʋɔnɩ thue kpãkpalã ga, na dakha ɔɔ ƴaal a kpa kʋkʋ thɩrʋra. 25Dɩ Thu Phuu donɩ ʋrɛ n hana sɩnɩ yire, sa‐n ɩrɛ mɔ̃kɛ Thu Phuurə n so sarnɩ. 26Sa‐n ƴaal mɔlɔ i ka thɩ̃ɛ ga‐n ɩna sar nãbɛɛrɛ, sa‐n gba kha gbugisɔaˈ.
Currently Selected:
Galasɩdara 5: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
