Galasɩdara 4
4
Dee dʋʋr agɩbo bikũu dʋʋr
1Gɩrɛ mɩ sonɩ dʋɔn wɔɔ, ɔbɔɔkɛ thɩ̃ hɩn donɩ bɩsaan, gɛr aa‐n har kpɩɩ na deaˈ, sɩɩ dorakɛ ɔr dʋɔn kɔ̃tɩn thɩ̃ɛ fɛʋra; 2sɩ wɩrɛɛkɛ n hɩnɛɛnɩ na kɔ̃tɩnasɔɔ nyɔ̃kɔɔ a‐n ha, phaphapha bɔɔkɛ thɩrɛ pɛrnɩ n dã. 3Sɛrɛ dakha mɛna gɩ ha sar, ɔbɔɔkɛ sɩ kɔɔ honɩ bɩsana, sɩ kɔɔ dor dea dɩɩrɛraakɛ na dɔnɩ bɔ taa dɩɩraˈ, kɛ dɔnɩ thɩ̃ tinəneeda. 4Sɩ ɔbɔɔkɛ bɔɔ kɔɔ danɩ, Thãgba kɔɔ thɔnanɛ ɔɔ Bikuun, khɛr kɔɔ kɔnaa, jɔfʋ hʋɛra wɩ kɔɔ kʋ̃ɔ, 5dɩ mɛ̃ a na puno na birse wɩrɛ hanɩ jɔfʋ hʋɛra, gɩ do nɔɔ a gba sɩ sɩ do ɔɔ bikuunsɔ.#Rɔm 8:15–17 6Dɩ gɩdonɩ bikona ha nɩ, Thãgba thʋɔn ɔɔ Bikuuni Thu dɩ lõ anɩ hara da‐n wɩɩ: Aba; kɩrʋ dʋɔn: Thɩrɛ. 7Mɛ̃ gɩ fa do dee bã, sɩ bikuun fɩ do, dɩ ado bikuun fɩ do, fɛr dʋɔn thɩ̃ hɩn, dɩɩ do Thãgba dɔ nɔɔ.
Polɩ dɛ Galasɩdaraa khi birrə
8Mamara na kɔɔ jɩnɩ Thãgba ga, nɩ kɔɔ dor dea dɩkhasɔraakɛ na dɔnɩ thãgba ga. 9Sɩ nɛnɛ̃ nɩ jɩrɛ Thãgba, dɩrakɛ Thãgba ka kɔɔ jɩ nɩ, sɩ mɔ̃ gɩ fʋ dɩ nɩ bir kɛr na‐n bir dɩɩrɛraalera na‐n taanɩ bʋɔaˈ, kɛ n kɔnɩ bʋɔ; anye hale dɩ nɩ ƴaal nɩ birə dɔ gar dea wo? 10Nɩ hananɛ pərre wi hɩɩnɛnasɔ, na porasɔra, na bɔɔsɔra, na yɛnasɔra. 11Maar fʋ mɛr dɩ agakpaana ɩ̃ thɔ̃ɔkɛ mɩ kɔɔ donɩ jɔɔ nɛrɛra ga dor mɔlɔ gɩ. 12Mɩ‐n phʋʋr nɛr omɩna, nɩ hana mɔ̃kɛ mɩ hanɩ, gɩdonɩ mɛrɛ dakha mɩ har mɔ̃kɛ nɩ hanɩ. 13Na kɔɔ cʋʋ mɩ puure fɩɩʋrakaˈ; nɩ jɩrɛ dɩ caca bɔɔkɛ mɩ kɔɔ mɩɩ nɩnɩ tutugo bʋɔɔ thɩmɩɩ, ɩ̃ tomɩ sɩ kɔɔ dɔ nɔɔ. 14Ɩ̃ kho kɔɔ do narɛ nɩwɛ, sɩ na kɔɔ ƴʋɔn maˈ, ma kɔɔ yaa nɩ dakha woaˈ; nɩ kɔɔ tee mer dɩ ɩ̃ ho Thãgbaa thɔ̃thɔ̃daar thu a ho Jeju Kirisiti. 15Kana ga kãka caalera jal gɩrɛ kper? Gɩdonɩ mɩ‐n mɩɩrɛ anɩda ayɩ: Ado hʋɛ kɔɔ harrɛra ga dor na kɔɔ tire anɩ yi a na ha mɩ. 16Mɩ debire do nar lãlaardaar nɛnɛ̃ sobɔrraakɛ mɩ‐n so narnɩ yaa? 17Gbɛ̃gbɛrɛ̃ ca gele tibil ca wele hana narnɩ, ga do gbɛ̃gbɛrɛ̃ bʋɔ ga, wɩ‐n ƴaalɛ ɩnɩ‐n lea sɩ kha nɩ bir nɩ ma wɩ. 18Gbɛ̃gbɛrɛ̃ hananɛ wer bɔɔ fɛʋ thɩɛnaakɛ bʋɔnɔnɩ, gɩ bɔrɛ, sɩ ga‐n do bɔɔkɛ mɩ hanɩ kha na nɛrɛ dɩbara ga.
19Ɩ̃ bɩsãsɔ wei, anɩ wal birə gɩrɛ fʋ mɩ wo, phaphapha Kirisiti n jɩɩ ɩɩr anɩ bɩnɔ. 20Mɩ narra a ho wɩ yɛ nɛnɛ̃ ɩ̃ birə hana anɩ pa a jɛ mɔ̃ ma mɩɩnɩ, gɩdonɩ ma thʋ̃ jɩ gɩrɛ ma cʋʋnɩ anɩdarara bã.
Agaar na Saraada
21Nɩ sɔ mar, nɛrkɛra n ƴaalɛnɩ nɩ birə hana jɔfʋra, na nɩ gɩrɛ jɔfʋ sonaa? 22Mee gɩ kherere ayɩ: Abɩraham kɔɔ hananɛ bikona yenyɔ, bɩɛl do deekhɛrɩ bi, bɩɛl do wa khɛrɩ bi.#Jən 16:15; 21:2 23Sɩ deekhɛrɩ bi wer, birə gɩ dɩ wɩ kɔ̃ mɔ̃ wɛ n kɔnɩ; sɩ wa khɛr wer, Thãgbaa ʋlfɛ bi a kɔ̃. 24Thɩ̃ɛɛle sokpaa gɩ, gɩdonɩ khɛra yenyɔɔle n nɛna nɔ bɩɛl ʋlfɛrɛ yenyɔ. Agaar n nɛna mɔ̃ ʋlfɛ bɩɛl hanɩ, kɛ dɔnɩ Sɩnaɩ gɔ̃gʋ̃ɔɔda, ɔr kɔna dee bi. 25Gɩdonɩ Agaar hʋɔn Sɩnaɩ gɔ̃gʋ̃ɔɔkɛ hanɩ Arabɩ dɩɩra, a hona dakha nɛnɛ̃ Jerujalɛmkɛ gɩrɛ, kɛ hanɩ dee paar na ɔɔ bɩsãsɔ. 26Sɩ ƴũ Jerujalɛm waʋ gɩ, dɩ ɔr dɔ asɩ nɩ. 27Gɩdonɩ gɩ kherere Thãgbaa sɛbɛra ayɩ:
“Na kãkanɛ fɛr kʋ̃ʋbʋʋkɛ na kɔɔ kɔnanɩ bəˈ,
mana na bɛna hulẽbe, fɛrɛɛkɛ wallɛ na kɔɔ fʋnɩ kpɩɩaˈ,
gɩdonɩ khɛrɩkɛ wɩ faanɩɩ bisɔ jɔrɛ ka,
a ka jɔ khɛr ʋrɛ hananɩ kuun.”#Eja 54:1
28Sɩ ado nɛr wɛ omɩna, nɛr dʋɔn ʋlfɛ bɩsana ljakɩɩ kha. 29Dɩ mɔ̃kɛ gɩ kɔɔ hanɩ dɩɩ do biikɛra wɩ kɔnɩ wɛɛ kha n kɔɔ kpoone ʋrɛraakɛ wɩ kɔnɩ dɩɩ do Thu Phuu pa gɩ the, mɛna gɩ ha gɩrɛ nɩ̃.#Jən 21:9 30Sɩ anye Thãgbaa sɛbɛ so ayɩ: “Wea deekhɛr na ɔɔ bikuun a faa, gɩdonɩ deekhɛrɩ bi na do thɩ̃ hɩnaˈ, sɩ wa khɛrɩ bi na dɔ thɩ̃ hɩn.”#Jən 21:10 31Gɛr gɩ omɩna wei, sa do deekhɛrɩ bisɔaˈ, sɩ wa khɛrɩ bisɔ sɩ do.
Currently Selected:
Galasɩdara 4: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
