Galasɩdara 3
3
So hɛl ˈlɛr ha pɛrɛra
1Nɛr Galasɩ də̃bələ amɛ ka li ninakɛ tɔr? Nɛrɛɛkɛ wɩ mɩɛnɩ casɩ Jeju Kirisitii thɩr kpa dɩɩ ho nɛr tʋɔr yire. 2Thɩ̃ bɩɛl dɩbara hale mɩ‐n ƴaalnɩ ɩ̃ jɩ nar: Jɔfʋ thɔ̃ cʋʋrɛra nɩ kɔɔ ˈlɛ Thu Phuu yaa, ha pɛ thɩmɩɩrraakɛ nɩ kɔɔ nɩnɩ gɩ? 3Ãyaal dɩ nɩ thʋ̃ də̃bəəl mɛ̃, a ka ˈli fʋʋr na Thu Phuu sɩ na‐n ƴaal nɛnɛ̃ nɩ pɩɩr na anɩ thɛthɛɛ fãgaa? 4Gɩ do khaar nɩ thʋ̃ gaar bʋɔ thale bɛɛ? Dɩ gɩ hor khaar khʋʋra gɩ‐n jalna. 5Dɩ ʋrɛɛkɛ n hana nɩnɩ Thu Phuu, kɛ n cʋɛnɩ dakha nɔ kpaa thɩ̃ɛ anɩ thɩ̃thɩɩn, jɔfʋ thɔ̃ cʋʋrɛra gɩ the yaa, ha pɛ thɩmɩɩ nɩɩrra gɩ? 6Mee gɩ kherere Thãgbaa sɛbɛra ayɩ: “Abɩraham kɔɔ pɛr Thãgba haar dɩɩ do gɛr Thãgba hɩɩn sa wɩɩ tɩɩ sarʋ.”#Jən 15:6; Rɔm 4:3
7Nɩ jɛ gɩ do wɩrɛ hananɩ ha pɛrɛ Thãgbara wɛr dɔ Abɩrahamɩ bɩsãsɔ.#Rɔm 4:16 8Mɔ̃ Thãgbaa sɛbɛ kɔɔ ˈlaanɩ yɩɛ dɩ Thãgba na cʋʋrɛ sor dɩ ga‐n hɛl ca kpalala ha pɛrɛra, gɛr gɩ dɩɩ kɔɔ mãa mɩɩrɛ tutugo bʋɔ Abɩrahamna ayɩ: “Fɛr na dɔ nɔɔ dɩ tibil caar fɛʋ na ˈlɛ bɔnanɛ.”#Jən 12:3 9Dɩ mɛ̃ wɩrɛ fɛʋʋkɛ n pɩɛrnɩ haar n ˈlɛ bɔnanɛ na Abɩraham ha pɛdaar.
Taarɛ na puno na ˈlɛ jɔfʋ hɩɩnɛna ga
10Gɩdonɩ wɩrɛ fɛʋʋkɛ n bɔnɩ dɩ wa‐n yɩrna jɔfʋ thɔ̃ cʋʋrɛ, sʋɔn n ˈli wer; gɩdonɩ gɩ kherere Thãgbaa sɛbɛra ayɩ: “Sʋɔn n ˈle tibil wo tibilikɛ na‐n hɩnɛnɩ da‐n nɩna nũu gɩrɛra fɛʋʋkɛ sɔnɩ jɔfʋ sɛbɛra ga.”#Dət 27:26 11Wo, tibil bɩɛllakɛ na ˈlɛ so hɛllɛ Thãgbaa ƴɛra jɔfʋra ga, dɩ sobɔr gɩ, gɩdonɩ gɩ kherere wo ayɩ: “Ʋrɛ Thãgba hɛllɔnɩ sor dɩɩ do ha pɛrɛ dɔ nɔɔ, ɔr na hana yire.”#Aba 2:4 12Dɩ jɔfʋ na ha kha dɩkha na ha pɛraˈ, sɩ Thãgbaa sɛbɛ sor ayɩ: “Ʋrɛɛkɛ na‐n cʋɛnɩ gɩrɛ jɔfʋ sonɩ, a na hana garɛ yire.”#Lev 18:5 13Kirisiti birse ser sɔ̃ ˈlirrə jɔfʋra, gɩdonɩ sɛr dɔ nɔɔ dɩ firo ˈlɛ sʋɔn, gɩdonɩ gɩ kherere Thãgbaa sɛbɛra ayɩ: “Sʋɔn gɩ do tibil wo tibilləəkɛ wɩ‐n juni kʋkʋ thɩrʋra.”#Dət 21:23 14Dɩ mɛ̃ bɔnanɛɛkɛ Abɩraham kɔɔ ˈlɛnɩ na do dakha ca kpalaada, dɩ Jeju Kirisitira gɩ‐n the, dɩ dakha ha pɛrɛra sa ˈlɛ Thu Phuukɛ Thãgba kɔɔ ʋlfɛna sɩnɩ.
Mɔ̃ jɔfʋ na ʋlfɛrɛ hanɩ kha
15Omɩna wei, tibiile mɩ‐n mɩɩ gɩrɛ, a tɩbɩla yɛrɛrakɛ ʋlfɛ ʋlfɛrɛ, tibil na hale na puno na phii agɩbo a dɛbɩrɔ dɩkha ga. 16Sɩ Abɩraham ʋlfɛrɛɛle kɔɔ telẽ na ɔɔ məl, ga so ɔɔ məlsɔ dɩɩ ho wɩ jɔraˈ, sɩ bɩɛl gɩ so, gɩdonɩ Thãgbaa sɛbɛ sor ayɩ: “afɩ məl”, a thɩɛna gaa Kirisiti gɩ.#Jən 12:7 17Nɩ yɛ gɩrɛ mɩ‐n ƴaalnɩ ɩ̃ so: Nɔ bɩɛl ʋlfɛrɛɛkɛ Thãgba kɔɔ ˈlini ʋlfɛrɛ, jɔfʋʋkɛ pɩrɔnɩ kpaan yɛna taanã na kpelẽ yʋɔr na puno gi na phii, gɩ do gɛr cʋɛ ʋlfɛrɛɛle dɩɩ kʋkʋʋlaˈ.#Thɩɩ 12:40 18Gɩdonɩ ado jɔfʋ hɩɩnɛ na dɔ nɔɔ dɩ sa ˈlɛ gɩrɛ Thãgba thɩɩn sarnɩ, ga do ʋlfɛrɛra gɩ the bã, sɩ mee Thãgba kɔɔ ha gɛr Abɩraham dɩɩ do ʋlfɛrɛ dɔ nɔɔ.#Rɔm 4:14
19Sɩ jɔfʋ anyera gɩ hale? Wɩ pɩrɔrɛ ˈlaa dɩɩ do sopugo cʋʋrɛ dɔ nɔɔ, phaphapha məlleele n ɩ̃, ʋrɛɛkɛ ʋlfɛrɛɛle kɔɔ telenɩ; dɩ jɔfʋʋle thɔ̃thɔ̃daar thusɔ kɔɔ gbaan a dʋ thɩmɩɩ gʋʋrdaar nyɔ̃kɔɔ. 20Dɩ thɩmɩɩ gʋʋrdaar na‐n hale tɩɩ bɩɛlla ga, sɩ ado Thãgba wer gɩ, ɔr bɩɛl gɩ. 21Dɩ jɔfʋ n ba kɛ̃kɛrɛnanɛ Thãgbaa ʋlfɛsɔ yaa? Kpɩɩrakaˈ. Ado jɔfʋ kɔɔ hale dɩ wɩ ˈlaa dɩɩ ˈlaa yire, ga dor jɔfʋra so hɛllɛ na the bɔɔbɔɔ. 22Sɩ Thãgbaa sɛbɛ n nɩnanɛ dɩ tɩbɩla fɛʋ sopugoo nyɔ̃kɔɔ wɩ ha, dɩ mɛ̃ ga dor wɩrɛɛkɛ n pɩɛrnɩ haar n ˈlɛr ʋlfɛrɛ, ga‐n the ha pɛrɛraakɛ wɩ hananɩ Jeju Kirisitira.
Taarɛ dee dʋʋrra
23Ɔbɔɔkɛ ha pɛrɛ na kɔɔ ɩnɩ paˈ, jɔfʋ khaɩdara sɩ kɔɔ do, sa‐n pɩɛrna ha pɛrɛɛkɛ na yɩranɩ phubi. 24Mɛ̃ jɔfʋ kɔɔ do thɔthɔɔkɛ na thɔɔ sɩnɩ na dana Kirisiti, sor n puno gɩ hɛl sar ha pɛrɛra. 25Dɩ ha pɛrɛ ɩnɩ sa ha kha dɩkha na thɔthɔɔdaarɩle ˈlo bã. 26Gɩdonɩ nɛrɛ fɛʋ Thãgbaa bikona nɩ do ha pɛrɛraakɛ nɩ hananɩ Jeju Kirisitira; 27nɛrɛ fɛʋʋkɛ wɩ kpɛɛnɩ nyʋɔnɔ bɩɛl dʋʋrra nakha Kirisiti, Kirisitira nɩ to. 28Juifi dʋʋr na hale dɩ wɩrɛ na dɔnɩ Juifisɔ waa ga; dee na hale dɩ waɩ ga; kuun na hale dɩ khɛr ga; gɩdonɩ nɛrɛ fɛʋ bɩɛl nɩ do Jeju Kirisitira. 29Dɩ ado Kirisitiida nɩ do, ga dor nɛr dʋɔn Abɩrahamɩ məlsɔ, dɩ thɩ̃ hɩna hanɩ mɔ̃kɛ ʋlfɛrɛ sonɩ.
Currently Selected:
Galasɩdara 3: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
