Galasɩdara 2
2
Kpa jɛrɩkɛ kɔɔ hanɩ Jerujalɛm
1A yɛna yʋɔr yenã ka, mɩ bire jal Jerujalɛm nakha Barnabasɩ, dɩ mɩ kɔɔ kpar dakha Tɩtɩ dɩ sɩ ha kha.#Th t t 11:30; 15:2 2Sɩ thɩ̃ nɩrɔrɛɛkɛ thɛnɩ Thãgbara mɩ kɔɔ yɩ, gɛr gɩ dɩ ɩ̃ kɔɔ jal. Dɩ mɩ kɔɔ gbaar tutugo bʋɔɔkɛ mɩ‐n mɩɩnɩ ca kpala a mɩɛ wɩ dɩ wɩ hɩɩn; sɩ wɩrɛ dɔnɩ yʋʋ wɛr mɩ kɔɔ mɩɩ hɛllɩ, agado mɛ̃ gaa, ga hor thɔmaakɛ mɩ kɔɔ cʋʋnɩ, na gɩrɛ mɩ hanɩ cʋʋrɔ gɩrɛ, na dor mɔlɔ thɔma. 3Dɩ Tɩtɩɩkɛ sɩ kɔɔ hananɩ kha Gɩrɛkɩ gɩ, sɩ tibil na kɔɔ fɛrɛɛrakɛ a kuro khʋ̃aˈ. 4Dɩ ka kpɩɛrɛɛle the, wɩrɛ n yɛnɩ omɩna hanɩɩ pa gɩ, kɛ kɔɔ wolonenɩ a lõ asɩ thɩ̃thɩɩn dɩ wa‐n gɩɩl asɩ waʋ do Jeju Kirisitira, dɩ awɩ ƴaal dʋɔn sɩ birə dɔ dea. 5Sɩ sa kɔɔ tha thʋnɔ a ˈlarrakɛ sa tu awɩda fɩɩʋaˈ, gɩ do nɔɔ tutugo bʋɔ na‐n jalna ɔɔ sobɔra ƴɛrr anɩ thɩ̃thɩɩn. 6Wɩrɛ wɩ‐n hɩɩnnɩ dɩ wɛr dɔ yʋʋ, a wɩ kɔɔ har mɔ̃ wɩ hanɩ yo, ga do gele mɩ‐n hɩɩnaˈ, Thãgba na‐n hɩɩnnɩ tɩbɩla dɩɩdɩaˈ, wɩrɛ wɩ‐n hɩɩnnɩ dɩ wɛr dɔ yʋʋ, wa hana dakpɩɩ na dɛbɩ ɩ̃ dɩɩrra ga.#Dət 10:17 7Sɩ mɔ̃ wɩ kanɩ yɩɛ dɩɩ do mɛr Thãgba pɛr ma‐n mɩa tutugo bʋɔɔ thɩmɩɩ wɩrɛraakɛ na dɔnɩ Juifisɔaˈ, mɔ̃ Thãgba pɛrnɩ Pɩɛr a na‐n mɩa Juifisɔra, 8gɩdonɩ ʋrɛra hananɩ Pɩɛr punone dɩ do thɔ̃thɔn Juifisɔra, ɔrra dakha hana mɩ punone dɩ ɩ̃ do thɔ̃thɔn ca kpalala, 9dɩ mɔ̃ wɩ yɩnɩ bɔ jɩɩrɩkɛ Thãgba jɩ mɩnɩ bʋɔra hanɩ, Jakɩ na Sefasɩɩkɛ n dɔnɩ Pɩɛr, na Jã, kɛ wɩ‐n hɩɩnnɩ dɩ wɛr dɔ thɩkara, wɩ kɔɔ fʋɔrɛ mɛrɛ na Barnabasɩ bɩɛl do fʋɔrʋʋ, mɔ̃ sɩ donɩ kha kũu bɩnɔ, sɩ puno sa‐n jal ca kpalaa pa, sɩ wɛr wa‐n jal Juifisɔɔ pa. 10Gɩrɛ wɩ so sarnɩ dɩbara dʋɔn sa‐n jɛna nɩ bɔdara, dɩ mɩ kɔɔ ture na haar fɛʋ dɩ ma‐n cʋʋ.
Mɔ̃ Pol narnɩ Pɩɛr Ãtɩyɔsɩ dɩɩra
11Sɩ ɔbɔɔkɛ Pɩɛr kɔɔ pɔnɩ Ãtɩyɔsɩ, mɩ kɔɔ bor ɔɔda kpei ma mʋʋnaa ga, gɩdonɩ a heene sor dɩbara. 12Gɩdonɩ ɔbɔɔkɛ ɩkhaa tibilsɔɔkɛ thɛnɩ Jakɩɩ pa na kɔɔ pɔnɩ paˈ, ca kpala a‐n kɔɔ khona dɩkɔ, sɩ bɔɔkɛ wɩ danɩ, a‐n kɔɔ khona dɩkɔ, sɩ bɔɔkɛ wɩ danɩ, a‐n mə̃mə̃ləne dɩ tɔ dɩ khokhɩa, gɩdonɩ maar n fʋɔnɛɛ wɩrɛraakɛ n bɔnɩ dɩ wa‐n ɩɩ khʋ̃ kurrera. 13Dɩ wɩ̃ Juifisɔ phɛl a wolõ dɩ wa‐n cʋʋ, dɩ awɩ bɩnɛ yenyɔ fɩlla ba hal Barnabasɩ dɩ lʋʋn. 14Dɩ mɔ̃ mɩ yɩɛnɩ dɩɩ do wa‐n ɩɩr dɩɩ telẽ mɔ̃kɛ tutugo bʋɔɔkɛ dɔnɩ sobɔr hanaˈ, mɩ kɔɔ sor Pɩɛrra tɩbɩla fɛʋʋ ƴɛra ayɩ: Ado fɛrkɛ dɔnɩ Juifi hana ca kpalaa fɩl, sɩ fa hana Juifi fɩlaˈ, mɔ̃gɩdo dɩ fa‐n fɛrɛ ca kpala wɩ hanana Juifi fɩlɛ?
Ha pɛrɛra Juifisɔ na ca kpala na ˈlɛ taarɛ
15Ado se wer, Juifi dʋʋr wɩ kɔna sɩ, sa do sopugodara mɔ̃kɛ ca kpala hanaˈ. 16Sɩrakɛ sɩ jɩrɛ dɩ ga do jɔfʋ thɔ̃ cʋʋrɛra tibil na ˈlɛr so hɛllaˈ, sɩ ha pɛrɛ Jeju Kirisitira gɩ; sɛrɛ dakha sɩ kɔɔ pɛr Jeju Kirisiti haar sor n hɛla sar, gɩ the ha pɛrɛraakɛ sɩ hananɩ Kirisitira, ga‐n do jɔfʋ thɔ̃ cʋʋrɛra gɩ thaˈ, gɩdonɩ tibil bɩɛllakɛ na ˈlɛ so hɛllɛ jɔfʋ thɔ̃ cʋʋrɛra ga.#Khɩ 143:2; Rɔm 3:20, 22 17Sɩ mɔ̃ sɩ‐n yaalnɩ sor n hɛla sar Kirisitira, sopugodarara sɩ do ser, dɩ Kirisiti ba cʋɛ sɩ dɩ sɩ do sopugodara kã? Kpei. 18Gɩdonɩ ado mɩ bir na mɩ gɩrɛɛkɛ mɩ kɔɔ wɩɛlnɩ, ɩ̃ sopugodaar do mɩ‐n nɩna. 19Me wer, jɔfʋʋ sora mɩ khirore, gɩ do nɔɔ ɩ̃ hana yire Thãgbara. 20Wɩ kɔɔ kpa mɛr kʋkʋ thɩrʋra nakha Kirisiti, dɩ ga do mɛr gɩɩkɛ hananɩ yire gɩrɛ bã, sɩ Kirisitiikɛ hanɩ ɩ̃ bɩnɔ dɔ ɩ̃ yi; sɩ yireekɛ mɩ hananɩ gɩrɛ, ha pɛrɛra mɩ hana gɩ Thãgbaa Bikuunnaakɛ n naan mɩnɩ a ba faana dɩbara ɩ̃ sora. 21Ma bo bɔ jɩɩrɩkɛ thɛnɩ Thãgbara ga, gɩdonɩ ado jɔfʋra so hɛllɛ n the ga dor khaar Kirisiti kɔɔ khi pɔɩ.
Currently Selected:
Galasɩdara 2: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
