Galasɩdara 1
1
Fʋɔrɛ
1Mɛr Pol thɔ̃thɔn, sɩ ga do tɩbɩla kɔɔ pɛ maraˈ, dɩ tibili pa gɩ the woaˈ, sɩ Jeju Kirisitii pa gɩ the, na Thãgba Thɩrɛɛ pa kɛ kɔɔ ɩrɛɛnɩ khirera; 2mɛrɛ na omɩna fɛʋʋkɛ sɩ hananɩ kha thɔna sɛbɛɛkɛ Galasɩ we gbɛbɩdarara. 3Thãgba asɩ Thɩ na Jeju Kirisiti Kɔ̃tɩn, n hana nɩ ha ɩɩ a jɛ nɩ dakha bʋɔra. 4Ɔr dɔ ʋrɛ kɔɔ ˈlaanɛnɩ dɩbara asɩ sopugosɔra a puno a ti si nɛnɛ̃ bɔ puurəəkɛ mɔ̃ Thãgbaakɛ dɔnɩ asɩ Thɩ tuni; 5ɔɔ i n dʋbarɔ na jala waa khorr vʋ̃ʋ. Amɛn.
Tutugo bʋɔ na ha yenyɔaˈ
6Nʋɔ kpaa mɛr mɔ̃kɛ nɩ faanɩ dapaara ʋrɛɛkɛ kɔɔ wɛ nɩnɩ dɩɩ the Kirisitii bɔ jɩra, sa bir kɛr na‐n hɩɩn tutugo bɔ kpɩɩ, 7sɩɩ dorakɛ tutugo bɔ kpɩɩ na halaˈ; sɩ tɩbɩla haanle dɩ wa‐n bũburõ ni kpɩɛrɛ, dɩ wɩ‐n ƴaalɛ ɩnɩ‐n deba Kirisitii tutugo bʋɔ. 8Dɩ ado sɛrɛɛ thɛthɛ gɩrakɛ, dɩ ado Thãgbaa thɔ̃thɔ̃daar thu gɩɩkɛ thɛnɩ ƴũ n mɩa nar tutugo bʋɔ dɩɩ ha kpɩɩ na gɩrɛɛkɛ sɩ kɔɔ mɩɩnɩ, dɔ sʋɔn n ˈlii. 9Sɩ kɔɔ mãa sor, sɩ dɩ mɩ birrakɛ ma‐n ˈloro gɩrɛ wo, ado tibil na mɩɩ nɩ tutugo bʋɔ dɩɩ ha kpɩɩ na gɩrɛɛkɛ nɩ kɔɔ ˈlɛnɩ, dɔ sʋɔn n ˈlii.
10Dɩ nɛnɛ̃ tɩbɩla mɩ‐n ƴaal wa‐n khɩa mɩ yaa, Thãgba mɩ‐n ƴaal a na‐n khɩa mɩ? Agɩbo tibil mɩ‐n ƴaal ɩ̃ da haar kã? A ma ƴaal ˈlo ma‐n da tɩbɩla haar ma do Kirisitii deaˈ.
Mɔ̃ Thãgba kɔɔ phiirni Pol
11Mɩ so narɛ gɩrɛ omɩna, dɩ tutugo bʋɔɔkɛ mɩ kɔɔ mɩɩnɩ, ga do tibildaa ga; 12gɩdonɩ ga do tibili pa mɩ kɔɔ ˈlɛ ga, dɩ tibil kɔɔ dɩrɛ mɩ woaˈ, sɩ Jeju Kirisitii nɩrɔra mɩ kɔɔ ˈlɛ gɩ. 13Gɩdonɩ nɩ kɔɔ nɩrɛ mɔ̃kɛ ɩ̃ fɩl kɔɔ hanɩ mamara ɔbɔɔkɛ mɩ‐n kɔɔ fʋɔrnɩ Juifi Thãgba fʋɔrɛ, dɩ ma‐n kpoo gbõgolonena Thãgbaa we gbɛbɩdarara dɩɩ ho ma hərə wer,#Th t t 8:3; 22:4–5; 26:9–11 14na mɔ̃kɛ mɩ‐n kɔɔ fʋɔrnɩ Juifi Thãgba fʋɔrɛ a jɔ tibil jɔjʋɔɔkɛ dɔnɩ ɩ̃ ˈwalãkhasɔɔkɛ sɩ donanɩ kha ca bɩɛl, na mɔ̃ mɩ kɔɔ hananɩ dakha gbɛ̃gbɛrɛnɛ ɩ̃ mama thɩ kɔ̃tɩ̃sɔɔ sora.#Th t t 22:3
15Sɩ Thãgbaakɛ kɔɔ thɩnɛ mɩnɩ kpɩɩ ɩ̃ nɩɩ kɔ̃lora a we mɩ dakha ɔɔ bɔ jɩra, dɩ ɔbɔɔkɛra gɩ kɔɔ daaraanɩ haar,#Th t t 9:3–6; 22:6–10; 26:13–18 16a gbaar ɔɔ Bikuun a nɩna mɩ ɩ̃ gbaanɛɛ na mɩa ca kpala, gɛr gɩrakɛ dapaara ma kɔɔ therna tibiləˈ, 17dɩ ma kɔɔ jal dakha Jerujalɛm a yɩ wɩrɛ kɔɔ kʋlɛ mɩnɩ ƴɩɛ a do thɔ̃thɔna ga, sɩ Arabɩ mɩ kɔɔ jal, agɩpɩ dɩ ɩ̃ kɛr bir Damasɩ wo.
18A yɛna yẽther ka, gɛr mɩ kɔɔ jaal Jerujalɛm sɩ jɩ kha na Pɩɛr, dɩ mɩ kɔɔ cɔr le ɔɔ pa wire yʋɔr yemɔɩ;#Th t t 9:26–30 19sɩ tɩɩ kpɩɩsɔɔkɛ dɔnɩ thɔ̃thɔna ma yɩ bɩɛllakɛ saagado Jakɩ Kɔ̃tɩnɩ õkuun gaaga. 20Gɩrɛ mɩ khere narnɩ gɩrɛ Thãgbaa ƴɛra gɩ, ma sõsoaa koe.
21Sɩ a gɩ pɩrɔ, mɩ gbaar jal Siri dɩɩra na Silisi dɩɩra. 22Sɩ Jude we gbɛbɩdaraakɛ hanɩ Kirisitira na kɔɔ to mar yirəˈ; 23dɩbarara wɩ nɩɛ ayɩ: Ʋrɛɛkɛ n kɔɔ kpoone sarnɩ mamara hale nɛnɛ̃ da‐n mɩɩ ha pɛrɛɛkɛra a‐n mɩɩ ha pɛrɛɛkɛra a‐n kɔɔ yɩrnanɩ kʋɛrɛ; 24dɩ wɩ‐n kɔɔ khɩɩrɛ Thãgba ɩ̃ sora.
Currently Selected:
Galasɩdara 1: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
