Efɛjɩdara 6
6
Thɩrɛ na nɩrɛ na awɩ bɩsãsɔɔda
1Bɩsana, anɩda Kɔ̃tɩnɩ ƴɛra dʋɔn, na‐n nɛ anɩ thɩ na anɩ nɩ nũu, gɩdonɩ gɛr telene.#Kol 3:20 2“Na cɔ afɩ thɩ na afɩ nɩ”, gɛr dɔ caca jɔfʋʋkɛ hananɩ ʋlfɛrɛ ayɩ:#Thɩɩ 20:12; Dət 5:16 3“Thɩ̃ɛ na bɔ farɛ fɩ hana dakha yire fɩ pʋɔr thɩɩra.” 4Sɩ nɛr thɛsɔ, na‐n cʋʋ thɩ̃ɛ gɩ thʋ̃ ga‐n fʋ anɩ bɩsãsɔ nɩ̃khiəˈ, sɩ na‐n haanɛ wɩ a na dɩrɛna wɩ, a na naarna wɩ mɔ̃kɛ Kɔ̃tɩn n ƴaalnɩ.#Kol 3:21
Kɔ̃tɩna na awɩ deesɔɔda
5Dea, na‐n nɛ nũu anɩ kɔ̃tɩ̃sɔraakɛ nɩ donanɩ kha tibil kɛ thɩɩra, na maar na jẽu, sɩ na‐n cʋɛ na ha bʋɔ gɩ ho Kirisitira nɩ‐n cʋʋ, 6sɩ ga‐n do awɩ ƴɛra dɩbara gɩ ho tɩbɩla nɩ‐n ƴaal nɩ da haaraˈ, sɩ mɔ̃kɛ nɩ donɩ Kirisitii deesɔɔkɛ n cʋɛnɩ gɩrɛ dɔnɩ Thãgbaa tuur na haar fɛʋ. 7Na‐n dɔ war thɔma na ha bʋɔ mɔ̃ gɩ donɩ Kɔ̃tɩnna nɩ‐n do, ga do tɩbɩlala ga; 8na‐n jɩnana dɩ tɩbɩla fɛʋ bɩɛlbɩɛl, a dee ntɛ do, a waʋ ntɛ do, a na ˈlɛr Kɔ̃tɩnna mɔ̃kɛ ɔɔ bɔ cʋʋ hanɩ.#Kol 3:22–25
9Sɩ nɛr kɔ̃tɩnasɔ, na‐n cʋɛ ɔmɛ̃ na anɩ deesɔ; nɩ sɛrɔ mɔ̃ nɩ‐n mɩɩ warnɩ thɩmɩɩ khena, na‐n jɩnana dɩ nɛrɛ na anɩ deesɔ Kɔ̃tɩ̃ bɩɛl nɩ hana dɩ hale ƴũ, aa‐n hɩɩn tɩbɩla dɩɩdɩaˈ.#Dət 10:17; Kol 3:25; 4:1
Thãgbaa bɩsãa ko ke thɩ̃
10Gɩrɛ sɛnɩ dɩphã dʋɔn wɔɔ, nɩ dɔ anɩ puno na‐n the anɩ bɩɛl dora na Kɔ̃tɩn na dakha ɔɔ fãga kʋkʋra. 11Nɩ gba Thãgbaa ko ke thɩ̃ fɛʋ a tɔ, a punone jɩlɛ kɩbɩ a na pɩɛrɛ Satãa fɩɩl thɔ̃ɔkɛ a‐n cʋʋnɩ. 12Gɩdonɩ ga do lãlaardaraakɛ dɔnɩ tɩbɩla sɩ‐n kɛ̃kɛrɛna ga, sɩ fãgadara sɩ‐n kɛ̃kɛrɛna, na punodara, na wɩrɛ dɔnɩ dabirə fãgadara kɛ, nakha kɔ̃tɛɛbi puusɔɔkɛ hanɩ thãgbara ƴũ. 13Gɛr dɔ kɩrʋ nɩ gba Thãgbaa ko ke thɩ̃ fɛʋ, dɩ ɔbɔɔkɛ wi puu na phanɩ nɩ puno nɩ pɩɛr lãlaardaar kɩ̃kɩ̃, a nɩ kɛ̃kɛrɛnɛnakɛ a dana khu paar sɩ nɩ bo nɩ jɩɩl kɩbɩ. 14Gɛr gɩ nɩ fɔ gɩ ma. Nɩ gba sobɔr gɩ do lophɛrɛ nɩ khɩmɩ pelela; nɩ gba fɩl sarʋ gɩ do kũkũ kɛɛ ther;#Eja 11:5; 59:17 15nɩ tɔ ha ie tutugo bʋɔɔ thɩmɩɩ mɩɩ ƴaalɛ gɩ do nɛfaa anɩ nɛra;#Eja 52:7 16bɔɔ fɛʋ nɩ gba ha pɛrɛ gɩ do tomɩ phɩdaakɛ na punoneni a na khiir puu cʋʋ hɩ̃daarɩ dɔ sõ fɛʋ; 17nɩ subo dakha taarɛ gɩ do the kpɩɛr, nɩ gbana dakha Thu Phuu bajɩnaakɛ dɔnɩ Thãgbaa so.#Eja 59:17 18Na‐n bɩɛlna Thãgba na‐n phʋʋrnaa anɩ bɩɛlla bɔɔ fɛʋ ga‐n the Thu Phuurə; na‐n jʋrɛna na yɩrrɛ, nɩ bɩɛlnɛ na pɛ tɩɩ phuusɔra fɛʋ, 19na mɛrɛra dakha dɩ ɔbɔɔkɛ ma‐n hanɩ nʋɔ ɩ̃ mɩɩ tutugo bʋɔɔ thɩ̃ gbullə, ɩ̃ yɩ thɩmɩɩrɩkɛ ma gbanɩ na mɩɩna na ˈlar, gɩ do gɩ yɩrrɛ casɩ. 20Ga tutugo bɔɔlera mɩ doro ʋrɛ wɩ pɛrnɩ sɩ dɩ ɩ̃ bir gbãga ha gɩrɛ khaɩra; nɩ bɩɛlnɛ na pɛ mar ɩ̃ puno ma‐n mɩɩ na ˈlar mɔ̃kɛ gɩ teenanɩ ma‐n mɩa.
Pɩpɩɩ fʋɔrɛ
21Tɩsɩkɩɩkɛ dɔnɩ omineekɛ mɩ‐n nanɩ, kɛ dɔnɩ sobɔ tibil Kɔ̃tɩnɩ thɔna, ɔr na mɩɛnɛ nɩ mɔ̃ thɩ̃ɛ fɛʋ hanɩ ɩ̃ pa na gɩrɛɛkɛ mɩ‐n cʋʋnɩ.#Th t t 20:4; 2 Tim 4:12#Kol 4:7–8 22Gɩrɛ mɩ thʋɔnaanɩ anɩ pa dʋɔn nɩ jɛ mɔ̃ thɩ̃ɛ hanɩ asɩ pa, gɩ cʋʋ nɩ nɩ faa haar.
23Ha ɩɩ, na naʋ, na ha pɛrɛ n thɛ Thãgba Thɩrɛɛ pa na Jeju Kirisiti Kɔ̃tɩnɩ pa a na dana omɩna fɛʋ. 24Wɩrɛ fɛʋʋkɛ n naannɩ asɩ Kɔ̃tɩ̃ Jeju Kirisiti na naʋʋkɛ na dɔnɩ dapɩnanaˈ, Thãgba na‐n jɛ wɩ bʋɔra.
Currently Selected:
Efɛjɩdara 6: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
