Efɛjɩdara 2
2
Thãgbaa bɔ jɩ dɔ nɔɔ dɩ tibil n ˈlɛ taarɛ
1Anɩ dɩ pa na anɩ sopugo dor nɔɔ dɩ nɩ kɔɔ khi mamara;#Kol 2:13 2dabɔɔlera nɩ kɔɔ ha garnɩ dɩ na‐n kpaan na fɩlɛɛkɛ dɔnɩ thɩɩkɛɛda, dɩ na‐n nɩ nũu ʋrɛraakɛ dɔnɩ kɔ̃tɩn fãgadarasɔraakɛ dɔnɩ thudaakɛ hanɩ jɩɛra le ƴũ, kɛ dɔnɩ ʋrɛ n dɔnanɩ gɩrɛ nũ nʋʋrdara thɔma. 3Sɛrɛ fɛʋ dakha thalera sɩ kɔɔ ha dɩ sa‐n kɔɔ ɩɩr mɔ̃kɛ asɩ tibil do pa n ƴaalnɩ, dɩ sa‐n cʋʋna dakha gɩrɛ n kɔnɩ asɩ tomɩ na asɩ kpɩɛr thue, dɩ asɩ ti parakɛ Thãgbaa nɩ̃khi too sɩ too ɩkhasɔɔ kha.
4Sɩ Thãgbaakɛ ɔɔ bɔ dona na wabɩnɩ kpãkpalã ga, na ɔɔ naʋ kɔ̃tɩ̃ɩkɛ a kɔɔ na sɩnɩ, 5sɩɩ dorakɛ sɛr dɔ wɩrɛ kɔɔ khenɩ dɩɩ do asɩ dɩ pa dɔ nɔɔ a bire ha sɩ yire na Kirisiti. Thãgbaa bɔ jɩ dɔ nɔɔ dɩ nɩ ˈlɛ taarɛ. 6A kɔɔ ɩɩr sɛr kha dɩ sɩ gbɛbɩ too Thãgbaa dʋɔ nakha Kirisiti, dɩɩ the asɩ bɩɛl dora na Jeju Kirisiti. 7Gɩ do nɔɔ a nɩna bɔɔraakɛ n ɩnanɩ mɔ̃kɛ ɔɔ bɔ jɩ thʋnɩ wabɩ, dɩɩ the bɔɔraakɛ a bɔ sarnɩ dɩɩ do Jeju Kirisiti dɔ nɔɔ. 8Gɩdonɩ Thãgbaa bɔ jɩra nɩ kɔɔ ˈlɛ taarɛ dɩɩ the ha pɛrɛra, ga do anɩ pa gɩ thaˈ, Thãgbaa khaarda gɩ. 9Məbi paar na ha liir tibil n məbiroəˈ, gɩdonɩ ga do anɩ dɩkha cʋʋra gɩ thaˈ. 10Gɩdonɩ sɛr dɔ Thãgbaa nyɛ̃ thɔ̃; a kɔɔ ti ser dɩɩ do Jeju Kirisitii pa gɩ the, sa‐n cʋɛ thɔ̃ bʋɔɔkɛ a kɔɔ maanɩ gbɛbɩrɛ sa‐n cʋɛ.
Mɔ̃ Juifisɔ na ca kpala birni kũu kha na Thãgba
11Gɛr gɩ nɩ jɛna gɩrɛ nɩ kɔɔ donɩ mamara, nɛr kɔɔ dɔ ca kpalaakɛ Juifisɔ n hɩɩnnɩ mɔ̃ na donɩ khʋ̃ kurdara ga, sɩɩ do mɔ̃ wɩ donɩ khʋ̃ kurdara jɩɩn gɩɩkɛ tibil nyɛ̃ɛ pɛrnɩ. 12Ɔbɔɔraalera na kɔɔ hana Kirisitaˈ, na kɔɔ hana lõ paar Ɩjɩrayɛldaraa thɩ̃thɩɩnaˈ, nɩ kɔɔ dor kpakpala nɔ bɩɛl ʋlfɛrɛraakɛ kɔɔ ʋlfɛnɛnɩ, na kɔɔ hana nũ pɛraˈ, na kɔɔ hana Thãgba thɩɩraakaˈ. 13Sɩ nɛnɛ̃ dɩphã nɛrkɛ kɔɔ hʋnɔnɛnɩ mamara, Kirisitii tɔmɩ̃ cʋʋ nɛr dɩ nɩ tɔ wɔrɔ̃ gɩrɛ, dɩɩ the anɩ bɩɛl dora na Jeju Kirisiti. 14Gɩdonɩ ɔr dʋɔn asɩ ha ie, ɔrkɛ cʋɛnɩ Juifisɔ na ca kpala dɩ wɩ do bɩɛl, mɔ̃ a wɩɛlnɩ laarɛɛkɛ dɔnɩ gʋʋkɛ lea wɩnɩ kha. 15Ɔɔ tomɩ a gba a kʋkʋʋlna jɔfʋ na gɩrɛ jɔfʋ n yɩnɩ foo gɩ cʋɛ, na sɔsɔɔkɛ gɩ hananɩ, a cʋʋrɛ mɛ̃ gɩ do nɔɔ caar yenyɔɔle n gbɛbɩ wɩ do tɩɩ pha bɩɛl, gɩ do thale dɔ ha ɩɩ a pɛrnɩ.#Kol 2:14 16Ɔɔ khi kʋkʋ thɩrʋra a kʋna laarɛ, a cʋʋna dakha caar yenyɔ dɩ wɩ bir kũu kha na Thãgba a do tomɩ bɩɛl.#Kol 1:20 17A kɔɔ ɩnɛ a mɩɩ tutugo bʋɔɔkɛ dɔnɩ ha iedaa nɛrɛraakɛ hʋnɔnɛnɩ na Thãgba, na wɩrɛraakɛ wɔrɔnɛnɩ.#Eja 57:19 18Ɔr dɔ nɔɔ dɩ sɛrɛ bɩɛlbɩɛl yɩ lõ paar Thɩrɛra na Thu Phuu bɩɛl. 19Gɛr gɩ dɩphã na do kpakpala na hʋ ka bã, sɩ bɩɛl nɩ do na tɩɩ phuusɔ a dona Thãgbaa cɔ too. 20Nɛr dɔ cʋɔrɩkɛ mɛnɩ, sɩ thɔ̃thɔna na Thãgba tukɩr tidara kɔɔ kpɛa gʋʋ ɓo, dɩ Jeju Kirisitii thɛthɛ dɔ go tɩ bokaar. 21Bɩɛl dʋʋr na ɔr thɛthɛ na dɔ nɔɔ dɩ cʋɔrra fɛʋ na cõcool na khɔ̃ a na do cɔ phuu Kɔ̃tɩnna. 22Bɩɛl dʋʋrrara na ɔr wɩ gba nɩ a ɓaan a gbɛbɩ mɩ dɩ nɩ do cʋɔr Thãgbara, kɛ Thu Phuu n cɔrɔnɩ.
Currently Selected:
Efɛjɩdara 2: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
