Efɛjɩdara 1
1
Fʋɔrɛ
1Mɛr Polɩkɛ dɔnɩ Jeju Kirisitii thɔ̃thɔn mɔ̃ Thãgba tuni, thɔna sɛbɛɛkɛ a ha tɩɩ phuusɔɔkɛ dɔnɩ sobɔ omɩnaakɛ Jeju Kirisiti hɩnɩ, dɩ wɩ ha Efɛjɩ.#Th t t 18:19–21; 19:1 2Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ a jɛ nɩ dakha bʋɔra.
Bɔna kɔ̃tɩ̃ɩkɛ thɛnɩ Jeju Kirisitii pa, kɛ ha pɛdara ˈlɛnɩ
3Thãgbaakɛ dɔnɩ asɩ Kɔ̃tɩ̃ Jeju Kirisitii Thɩ hɩna khɩɩrɛ, kɛ kɔɔ bɔna sɩnɩ na bɔna caar dɩɩdɩɩkɛ dɔnɩ thudaa, kɛ thɛnɩ ƴũ dɩɩ do Jeju Kirisiti dɔ nɔɔ. 4Thale Thãgba phiir si dɩɩ do Jeju Kirisitii pa gɩ the, sɩ aa kɔɔ ti thɩɩkɛ paˈ ayɩ, sɩ pho a ˈlea dɩ paar ɔɔ ƴɛra. Ɔɔ naʋra 5a kɔɔ mãa phiir sar dɩ sa dʋʋraa bɩsana, gɩ do Jeju Kirisitii pa gɩ the, mɔ̃kɛ gɩ kɔɔ daaraanɩ haar dɩ ƴaal, 6sɩ puno sa‐n khɩsʋʋ ɔɔ nɔ kpaa bɔ jɩ hananaakɛra a kɔɔ jɩ sɩnɩ dɩɩ do ɔɔ Bikuunikɛ a nanɩ dɔ nɔɔ. 7Ɔrra sɩ ˈlɛ birsere na sopugo faarɛ dɩɩ the ɔɔ tɔmɩna, a ha mɔ̃kɛ ɔɔ bɔ jɩ kɔ̃tɩ̃ɩkɛ#Kol 1:14 8ɔr Thãgba kɔɔ jɩ sɩnɩ jɔɔ hanɩ, a hanana sɩ kpɛsɛrɛ na jɩɩr fɛʋ. 9Ɔr cʋɛ sɩ dɩ sɩ jɩ ɔɔ tuurikɛ keranɩ, kɛ dɔnɩ ɔɔ ƴaal bɔɔkɛ a kɔɔ hananɩ ɔɔ hara kɛkɛkɛ, 10gɛr dʋɔn ado bɔɔ dã ɩna gbɛbɩrɛ gɩrɛ fɛʋ hanɩ ƴũ na thɩɩra dɩ ga do bɩɛl Kirisiti n do gar yʋʋ.
11Kirisiti dɔ nɔɔ dɩ Thãgba kɔɔ phiir si dɩ sa ha kpɩɩ mɔ̃ a kɔɔ maanɩ ƴaalɛ, gɩdonɩ ɔr n cʋɛ thɩ̃ɛ fɛʋ dɩ ga‐n ha mɔ̃ a‐n ƴaalnɩ gɩ hana, 12sɩ puno sa‐n khɩsʋʋ ɔɔ i dʋbɩ hanana, sɛrɛɛkɛ dɔnɩ wɩrɛ kɔɔ kʋlɛnɩ ƴɩɛ a hana nũ pɛrɛ Kirisitira. 13Nɛrɛ dakha nɩ kɔɔ pɛrɛ haar ɔrra ɔbɔɔkɛ nɩ kɔɔ nɩɛnɩ sobɔ thɩmɩɩrɩkɛ dɔnɩ tutugo bʋɔɔkɛ hananɩ taarɛ, dɩ ɔrra dakha dɔ nɔɔ dɩ Thãgba dʋ nar jɩɩnɩkɛ dɔnɩ Thu Phuukɛ a kɔɔ ʋlfɛnɩ ɩna ˈlaarɛ, 14ɔr dɔ barã paar gɩrɛraakɛ sa ˈlɛnɩ, a cʋʋ sɛr dɩ sɩ jɩ tue dɩ Thãgba na taarɛ dɩphã waa vʋ̃ʋ wɩrɛ a hɩnɩ, wɩ puno wɩ do wɩrɛ na‐n khɩsaanɩ ɔɔ i dʋbɩ hanana.
Mɔ̃ Pol bɩɛlnɩ Thãgba da‐n pɛ Efɛjɩdarara
15Gɛr gɩ mɛrɛ dakha mɔ̃kɛ mɩ nɩɛnɩ anɩ thɩmɩɩ ha pɛrɛraakɛ nɩ hananɩ Jeju Kɔ̃tɩnna, na anɩ naakɛ nɩ‐n nanɩ tɩɩ phuusɔ fɛʋ. 16Ma‐n pɩr Thãgba khɩɩrɛ kpɩɩ anɩdara ga. Mɩ‐n wer anɩ i dɩ ma‐n bɩɛlna 17asɩ Kɔ̃tɩ̃ Jeju Kirisitii Thãgbaakɛ dɔnɩ Thɩrɛɛkɛ hɩnanɩ i dʋbɩrɛ, a hana nɩ Thu Phuu a na‐n ha nɩ kpɛsɛrɛ a na‐n nɩnana nɩ nɩ jɩɩ jɩɩ; 18a phuo ni dakha yire nɩ jɩ mɔ̃ nũ pɛrɛɛkɛ a kɔɔ we narnɩ hanɩ, nɩ jɩna mɔ̃ ɔɔ nɔ kpaa thɩ̃ ɓɔ̃ɔkɛ a thɩɩnnɩ ɔɔ tɩɩ phusɔra hanɩ, 19nɩ jɩna dakha ɔɔ fãga kʋkʋʋkɛ hanɩle sɛr ha pɛdaraa ha, ga fãga caalera wabanɩ thale; 20gɛr a kɔɔ ɩɩrna Kirisiti dɩ the khirera a cʋʋnaa dɩ too gɩrɛ ɔɔ nyɔ̃bɔra le Thãgbaa dʋɔ,#Khɩ 110:1 21a kəə fãgadarara fɛʋ, na punodarara fɛʋ, na dakpɛna yʋʋsɔra fɛʋ, na kɔ̃tɩnasɔra fɛʋ, a kəəna thɩ̃ɛ wo thɩɛna fɛʋʋkɛ hananɩ ire dɩ wɩ we, ga do nɛnɛ̃ bɔɔraakɛ gɩ dɩbara ga, sɩ bɔɔraakɛ na ɩnanɩ dakha. 22Dɩ Thãgbara gbaar thɩ̃ɛ fɛʋ dɩ jəəro nɛɛ, a pɩɛraarɛ dɩ do yʋʋ we gbɛbɩdarara.#Khɩ 8:6#Kol 1:18 23We gbɛbɩdarara dɔ ɔɔ tomɩɩkɛ ɔɔ thɛthɛ hironi phi ɔrkɛ henɩ thɩɩkɛra a gbana ƴũ koo.
Currently Selected:
Efɛjɩdara 1: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
