Thãgbaa Thɔ̃thɔnaa Thɔ̃ 9
9
Sɔlɩ ha debi
(Th t t 22:6–16; 26:12–18)
1Sɩ mɔ̃kɛ Sɔl na‐n faanɩ bʋʋnɩkɛ a‐n bʋnɩ Kɔ̃tɩnɩ kpãkpãadarara da‐n kʋʋrna waˈ, a kɔɔ ɩɩrɛ jal gbõdaarɩ pa 2a gba sɛbɛ a jalna a ˈlaara Juifisɔɔ Thãgba fʋɔr cɔsɔraakɛ hanɩ Damasɩ, ado kona wɛ, a khɛra wɛ, a hale dɩ wa‐n kpa Kɔ̃tɩnɩ hʋra, a fʋlɛ wɩra a li a jalna Jerujalɛm.
3Sɩ mɔ̃kɛ a kɔɔ hanɩ hʋɛra da‐n wɔrɔ̃ Damasɩ, le dahɩrɛ kɔɔ the ƴũ dapaara, a carã a diirəə. 4Dɩ a təəre ji thʋnɔ, sɩ a nɩɛrɛ nʋɔ dɩɩ sʋʋraa: Sɔl, Sɔl, mɔ̃gɩdo dɩ fa‐n kpoo mar mɛ̃? 5Dɩ birsee: Kɔ̃tɩn, fɛr amɛ gɩ? Dɩ Kɔ̃tɩn birsee: Mɛr dʋɔn Jejuukɛ fɩ‐n kpooronɩ. 6Sɩ ɩrɛ lona dɩɩra, dɩ le wa so far gɩrɛ fɩ teenanɩ fɩ cʋʋ. 7Tɩbɩlaakɛ n kɔɔ jalanaanɩ kha jɩɩlɛ a ˈwɩɩ kɩrkɩrkɩr, wɩ kɔɔ nɩrɛ wire wer, sɩ wa yɩ tibiləˈ. 8Dɩ Sɔl kɔɔ pallɛ thɩɩra a ɩɩr da‐n hɩɩnnakɛ kirkirkir sɩ aa‐n yɩ thɩ̃aˈ, dɩ wɩ kɔɔ fʋʋrɛ nyɔ̃ɔ a kpaa jalna Damasɩ. 9Wire yẽther a cʋʋ sɩ aa‐n yaˈ, aa‐n kho dɩkoraˈ, aa‐n yɔ nyʋɔnaˈ.
10Sɩ kpãkpãadaar bɩɛl gɩ a ha Damasɩ da‐n do Ananɩasɩ. Dɩ Kɔ̃tɩn kɔɔ sʋʋraarɛ na thɩ̃ yɩr: Ananɩasɩ. Dɩ birsee: Kɔ̃tɩn, mɛr ha ʋ; 11dɩ Kɔ̃tɩn sʋʋraa: Ɩrɛ, jala hʋ kɔ̃tɩɩnaakɛ wɩ‐n wenɩ datelẽe a ƴaalɛ le Judasɩɩ cɔ tibilikɛ wɩ‐n wenɩ Sɔl, Tarsɩdaar gɩ. 12Dɩ hɩnɛ, Thãgba bɩɛllɔ a ha gɩrɛ, a yɩɛ na thɩ̃ yɩr dɩɩ do kũu bɩɛl gɩ dɩ wa‐n wɩɩ Ananɩasɩ, a lõ a dɛɛnaa nyɛ̃ɛ dɩ a na bir na yɩ. 13Dɩ Ananɩasɩ birsee: Kɔ̃tɩn, mɩ kɔɔ nɩɛrɛ tɩbɩla jɔɔ dɩ wa‐n mɩɩ kuunilee puu fɛʋʋkɛ a‐n cʋʋnɩ afɩ tɩɩ phusɔra Jerujalɛm; 14kɩɛr dakha a ˈlɛr hʋɛ bonɩ jidaar kɔ̃tɩnaa pa, a fʋlɛna dakha wɩrɛ fɛʋʋkɛ n fʋɔrɛ fɩnɩ. 15Sɩ Kɔ̃tɩn sʋʋraa: Jala, gɩdonɩ kuunikɛ dʋɔn ɩ̃ thɔ̃daarɩkɛ mɩ phiirni dɩ na gba ɩ̃ i na jalna ca kpalala, na fãgadarara, na Ɩjɩrayɛl bɩsanana; 16sɩ mɛrɛ, ma nɩɩraarɛ bʋɔ fɛʋʋkɛ a na gaarnɩ, gɩ do ɩ̃ i dɔ nɔɔ.
17Dɩ Ananɩasɩ jaal. Ɔbɔɔkɛ a danɩ cʋɔrra a dɛɛnaanɛ nyɛ̃ɛ sa sʋʋraa: Ɩ̃ omi Sɔl, Jeju Kɔ̃tɩnɩkɛra kɔɔ nɛna fɩnɩ ɔɔbara hʋɛra fɩ‐n ɩnɩ, ɔr thɔna mɩ ɩ̃ ɩna, fɩ bir fɩ yɩ fɩ hinə dakha Thu Phuu. 18Dɩ liir dapaara thɩ̃ɛɛkɛ hɔnɩ thɩ̃ khʋna thɩɩrɛ yinəna, dɩ a‐n jiir dɩɩ do a‐n yɩrɛ. 19Dɩ a ɩɩrɛ dɩ wɩ kpɛgʋʋ nyʋɔnɔ; dɩ ɔbɔɔkɛ a‐n khonɩ dɩkor a bire ˈlɛ ɔɔ fãga.
Sɔl mɩɩrɛ tutugo bʋɔɔ thɩmɩɩ Damasɩ
Dɩ a kɔɔ toore le na kpãkpãadaraakɛ hanɩ Damasɩ a pʋɔr gbe. 20Dɩ dapaara a mar da‐n mɩɩ Jejuuda Juifisɔɔ Thãgba fʋɔr cɔnana dɩ so dɩ yɩ: Jeju dʋɔn Thãgbaa Bikuun. 21Dɩ wɩrɛ fɛʋʋkɛ n nɩɛnɛnɩ, nʋɔ kɔɔ kpaa wɛr dɩ wa‐n so aa: Ga do ɔr dʋɔn ʋrɛɛkɛ n kɔɔ hərəneni wɩrɛɛkɛ n fʋɔrɛnɩ Jeju Jerujalɛm dɩɩra gaa? Dɩ ga do a‐n kɔɔ ɩnɛnakɛ a fʋlɛ wɩ a li a jalna bonɩ jidaar kɔ̃tɩnaa pa gaa? 22Sɩ Sɔl n ˈlɛr fãga dɩ a‐n pɛr, da‐n pɛna dakha Juifisɔɔkɛ hanɩ Damasɩ yicuru, da‐n jɩɩ mɩɛ wɩ dɩ Jeju dʋɔn Kirisiti.
Sɔl taarɛ Juifisɔɔ nyɔ̃kɔɔ a jal Jerujalɛm
23Sɩ ɔbɔɔkɛ ga pʋɔrnɩ gbe, Juifisɔ kɔɔ gʋʋrɛ kha sɩ wɩ kʋʋ.#2 Kor 11:32–33 24Sɩ Sɔl kɔɔ nɩɛrɛ mɔ̃ wa nʋɔnɩ, dɩ wɩ‐n pɩɛrɛrakɛ lõfonɔɔ dɩtɩnɔ na dɩwɩlʋ wɩ kʋʋra. 25Sɩ dɩtɩnɔ kpãkpãadara kɔɔ gbaarɛ a gbũ kpʋʋnɔ, a gbunə dɩ khiru sortoto.
26Ɔbɔɔkɛ Sɔl danɩ Jerujalɛm, a dor bʋɔ sɩ ɩnɩ‐n gbɛbɩna kpãkpãadara; sɩ tɩbɩla fɛʋ n maarɛ, wa‐n pɛr haar kpãkpãadaar a doaˈ. 27Sɩ Barnabasɩ kɔɔ kpaarɛ jalna thɔ̃thɔnaa pa, a mɩɛ wɩ mɔ̃ Sɔl kɔɔ yɩnɩ Kɔ̃tɩn hʋɛra dɩ mɩgʋʋ thɩ̃ɛ, na mɔ̃kɛ a kɔɔ mɩɩnɩ Jejuuda na ˈlar Damasɩ dɩɩra. 28Dɩ le a too Jerujalɛm dɩ bɩnɔ na wɛr da‐n kpaarna wɩ da‐n mɩɩ Kɔ̃tɩnɩda na ˈlar. 29A‐n mɩɩrɛ dakha na Juifisɔɔkɛ n mɩanɩ gɩrɛkɩ thɩmɩɩr da‐n yɩrna wɩ wɩ yɛ kɩrʋ, sɩ we wer, wɩ‐n ƴaalɛ wɩ kʋʋ. 30Sɩ omɩna kɔɔ nɩɛrɛ a kpaa jalna Sejare a cʋgʋʋ dɩ jal Tarsɩ.
31Dɩ we gbɛbɩdaraakɛ hanɩ Jude fɛʋ, na Galile, na Samarɩ kɔɔ toore dɩphã na ha ɩɩ, a khɔ̃ dɩ wa‐n pɛr Thãgbaa hʋra, dɩ wa‐n ɩɩr dakha na maar Kɔ̃tɩnna, dɩ wɩ jɔrɛ dɩ wa‐n pɛr mɔ̃kɛ Thu Phuu ha warnɩ.
Enee khoo kpɛɛ
32Dɩ Pɩɛr n kpaarɛ paar fɛʋ; a jaal dakha a yɩ tɩɩ phuusɔɔkɛ hanɩ Lɩɩdɩ. 33Dɩ kũu bɩɛl kɔɔ halera dɩ wa‐n wɩɩ Ene, a phɩ̃ khoo a cʋʋna yɛna makõther, gbãgbarɛ kɔɔ gɩ. 34Dɩ Pɩɛr sʋʋraa aa: Ene, Jeju Kirisiti kpɛɛ fɛr, ɩrɛ, puro afɩ phɩ̃ pa. Dɩ dapaara dɩ pal ɩɩr. 35Dɩ ɔbɔɔkɛ Lɩɩdɩdara fɛʋ na wɩrɛ thɛnɩ Sarɔ̃ ɓɛlɛnɔ yɩnɩ gele, wɩ kɛrrɛ dɩ wa‐n kpa Kɔ̃tɩnna.
Tabɩtaa khi ɩɩr
36Dɩ kpãkpãadaar bɩɛl kɔɔ hale Jope dɩ wa‐n wɩɩ Tabɩta, sɩ da‐n do Dɔrkasɩ na gɩrɛkɩ thɩmɩɩr; bɔ cʋʋ tibil gɩ ka, da‐n ha bɔdara thɩ̃ɛ. 37Dɩ ga bɔɔlera khoo fʋʋrɛ dɩ khi. Dɩ ɔbɔɔkɛ wɩ hʋʋnɩ pɩ, wɩ gbaarɛ jʋʋnna lɩ̃gana a pɛ. 38Sɩ gɩdonɩ Lɩɩdɩ wɔrɔnɛ na Jope, dɩɩ do kpãkpãadara nɩɛrɛ Pɩɛr hale, wɩ thʋɔn tɩbɩla yenyɔ ɔrra wɩ jala phʋʋrɛɛ a na‐n pʋɔr sa pɔ ɩnɩ pa ga. 39Dɩ Pɩɛr ɩɩr dɩ wɩ jal kha. Dɩ ɔbɔɔkɛ a danɩ le, wɩ kpaarɛ jʋʋnna lɩ̃gana. Dɩ khikhɛrasɔ fɛʋ n bɩrɛ a pɔna wɔrɔnaa, dɩ wa‐n nɩnanaa dakha kẽkenasɔɔkɛ Dɔrkasɩ kɔɔ bɛbɩnɩ dabɔɔkɛ a kɔɔ hanɩ kha na wɛr. 40Sɩ Pɩɛr kɔɔ bɩlanɛ tɩbɩla fɛʋ dɩ wɩ thɩɩr, sɩ dɩ gulẽga a bɩɛl Thãgba sa fi a so khirera ayɩ: Tabɩta, ɩrɛ. Dɩ ɔɔ yɩ khɛr, dɩ ɔbɔɔkɛ a yɩnɩ Pɩɛr a ɩɩrɛ a too. 41Dɩ Pɩɛr fʋʋ nyɔ̃ɔ a khəi dɩ ɩɩr, sɩ agɩpɩ dɩ we tɩɩ phuusɔ na khikhɛra a kpaa a ha wɩ na yire. 42Dɩ thɩ̃ɛɛle kɔɔ kpaarɛ Jope fɛʋ dɩ tɩbɩla jɔɔjɔɔ kɔɔ pɛrɛ Kɔ̃tɩn haar. 43Sɩ Pɩɛr kɔɔ toore Jope Sɩmɔ̃ lo kʋdaarɩ cɔ a pʋɔr.
Currently Selected:
Thãgbaa Thɔ̃thɔnaa Thɔ̃ 9: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
