Thãgbaa Thɔ̃thɔnaa Thɔ̃ 10
10
Kɔrnɛɩɩ ha debi
1Tibil bɩɛl kɔɔ har Sejare dɩ wa‐n wɩɩ Kɔrnɛɩ. Sɔrasɛ tamaa kɔ̃tɩ̃ a do sɔrasɛsɔraakɛ wɩ‐n wenɩ Ɩtalɩdara. 2Tibil gɩɩkɛ n cʋɔnnɩ Thãgba da‐n manaa na ɔɔ cɔdara fɛʋ; a‐n ˈlaarɛ thɩ̃ɛ jɔɔ da‐n ha tɩbɩla da‐n bɩɛlna Thãgba wire wire. 3Wi bɩɛl wi gaara a yɩrɛ thɩ̃ɛ gbelẽ gbelẽ; Thãgbaa thɔ̃thɔ̃daar thu gɩ da‐n lõ ɔɔ cɔ sa sʋʋraa aa: Kɔrnɛɩ, 4da‐n hɩɩnʋʋ kirkirkir sɩ maar fʋʋ dɩ birse: Anye gɩ ya Kɔ̃tɩn? Dɩ Thãgbaa thɔ̃thɔ̃daar thu sʋʋraa: Afɩ Thãgba bɩɛl na afɩ thɩ̃ ˈlaa tɩbɩlala jʋʋnɛ a thʋ Thãgba da‐n jɩna gɩ. 5Thɔna nɛnɛ̃ kona Jope wɩ so Sɩmɔnaakɛ wɩ‐n wenɩ Pɩɛr a ɩ̃. 6Sɩmɔ̃ lo kʋdaarɩ cɔ a‐n cɔ, kɛ hanɩ lanyɔ̃ nʋɔra. 7Ɔbɔɔkɛ Thãgbaa thɔ̃thɔ̃daar thuukɛ n mɩanaanɩ jalnɩ na pɩ, Kɔrnɛɩ wer ɔɔ thɔ̃darasɔ yenyɔ na ɔɔ sɔrasɩ bɩɛlɩkɛ n cʋɔnnɩ Thãgba, kɛ dɔnɩ bɩɛl wɩrɛraakɛ dɔnɩ ɔɔ totoo; 8ɔbɔɔkɛ a gbanɩ mɩɛ wɩ fɛʋ pɩ, a thɔ̃ wɛr Jope.
9A dɩɩ wɩl, ɔbɔɔkɛ wɩ hanɩ hʋɛra dɩ wa‐n wɔrɔ̃ dɩɩle, Pɩɛr kɔɔ jʋʋnɛ nãsʋrɔ ʋlkhɔɔ a bɩɛl Thãgba. 10Kɔmɛr kɔɔ fʋʋrɛ dɩ ƴaal a kho dɩkor, dɩ ɔbɔɔkɛ wɩ hanɩ wa‐n cʋʋraa dɩkor, a yɩrɛ Thãgbaa thɩ̃ yɩr dɩɩ do daphuronaa, 11dɩɩ do thãgbara ƴũ khɛra dɩ yɩ thɩ̃ɛ dɩɩ ho kɩ̃kɩɩn phə̃kərə̃ə dɩ wɩ li li paar yenã dɩɩ gbũ dɩ a‐n thʋra thɩɩ, 12dɩ nɛbi kho thɩ̃ɛ, na nɛkɩɛr sɛ̃bi thɩ̃ɛsɔ fɛʋ, na wɩrɛ n puuloneni thɩɩra na ˈlominə harɔ. 13Dɩ a nɩrɛ nʋɔ dɩɩ sʋʋraa aa: Pɩɛr, ɩrɛ kʋrɛ a khɔ. 14Sɩ Pɩɛr birsee: Kpei Kɔ̃tɩn, gɩdonɩ ma‐n kɔɔ kho thɩ̃ sãsɩnanɛ dɩ gɩrɛ biseneni gɩ yuuəˈ. 15Sɩ a bire nɩ nʋɔra wo balanyɔ dɩɩ sʋʋraa: Gɩrɛ Thãgba yɩnɩ gɩ phure, fa‐n hɩɩn gɩ dɩɩ do far thɩ̃ sãsɩnanaˈ. 16Sɩ gɩ bire cʋʋ balãther, sɩ dapaara thɩ̃ɛɛle bire hal jʋʋn thãgbara ƴũ.
17Sɩ mɔ̃kɛ Pɩɛrɩ kpɩɛr nyanyaanɩ da‐n bule ɔɔbara, anye dʋɔn Thãgbaa thɩ̃ yɩrɩlee kɩr ya fɛ, hɩnɛ konaakɛ Kɔrnɛɩ thɔnɩ daan a jɩɩl lõfonʋɔra, dɩ wa‐n bule Sɩmɔ̃ɔ cɔ. 18Wɩ wer dɩ wa‐n jɩɩ bule ado liir Sɩmɔ̃ɔkɛ wɩ‐n wenɩ Pɩɛr n cɔ ger. 19Sɩ mɔ̃ Pɩɛr hanɩ da‐n kpɩɛrna Thãgbaa thɩ̃ yɩrɩle, Thu Phuu sʋʋraarɛ: Hɩnɛ, kona yẽther hakɛ dɩ wa‐n ƴaal fɩ. 20Ɩrɛ, gbuno nɩ jal kha, sɩ fa‐n baalɔaˈ gɩdonɩ mɛr thɔna wɩ. 21Dɩ mɛ̃ Pɩɛr gbũ a so konanaale: Nɩ hɩnɛ, mɛrra ha ʋ nɩ‐n ƴaalnɩ, anye dɔ kɩrʋ nɩ ɩ̃ kɛ? 22Dɩ wɩ birsee: Kɔrnɛɩ sɔrasɛ tamaa kɔ̃tɩ̃ɩkɛ dɔnɩ tibil sarʋ da‐n ma Thãgba, kɛ Juifi caar fɛʋ n mɩɩnɩ ɔɔda bɔ, ɔr thɔ̃thɔ̃daar thu kɔɔ khero gɩrɛ thɛnɩ Thãgbara ayɩ, a wɛ fɩ fɩ pɔ ɔɔ cɔ a nɩɛ afɩ thɩmɩɩ. 23Dɩ Pɩɛr kɔɔ kpa wɛr dɩ wɩ cɔ le. A dɩɩ kɔɔ wɩl, a ɩɩrɛ dɩ wɩ jal kha. Sɩ omi ɩkhaakɛ hanɩ Jope kɔɔ thɔɔ wɛr.
24A ʋ̃ dɩ wɩl, wɩ kɔɔ daan Sejare. Sɩ Kɔrnɛɩ wer ɔɔ too na ɔɔ kũu bɩnɔsɔ da‐n pɩɛrna wɩ. 25Ɔbɔɔkɛ Pɩɛr kɔɔ lonɩ, Kɔrnɛɩ ɩɩrɛ a caanʋʋ a gburõku ɔɔ ƴɛra a fʋɔrʋʋ. 26Sɩ Pɩɛr fʋʋrɛ a khəi dɩ ɩɩr sa sʋʋraa: Ɩrɛ, mee mɛrɛ dakha tibil ha mɩ. 27Sɩ mɔ̃kɛ Pɩɛr mɩɩnaanɩ sa lõ, a yɩrɛ tɩbɩla jɔɔ dɩ wɩ gbɛbɩ kha le. 28Dɩ so war: Nɩ jɩrɛ gɩ‐n sãsɩrɛ Juifira dɩ na too kha na tɩɩ kpalʋ, na dakha dɩ na lõ ɔɔ cɔ, sɩ Thãgba kɔɔ nɩ marɛ ayɩ, ga teena ma‐n ƴʋɔn tibil, agɩbo ma‐n hɩɩnʋʋ a do mar tɩɩ bisəˈ. 29Gɛr dɔ kɩrʋ nɩ thɔnɩ we mɩ dɩ ma hana dɩkha na so bã sa ɩ̃, dɩ nɛnɛ̃ mɩ‐n bule ner, anye dɔ kɩrʋ nɩ thɔnɩ we mɩ ɩ̃ ɩna?
30Dɩ Kɔrnɛɩ so: Wire yenã gɩ cʋʋ gɩrɛ nɩ̃, mɩ kɔɔ hanɩ ɩ̃ cɔ dɩ ma‐n bɩɛl Thãgba wi gaara, a na hɩɩn a yɩ tibil bɩɛl dɩ to kẽkẽ bulo dɩ a‐n hɩl dɩ jɩɩlna mɩ ƴɛ thɩ̃thɩɩn sa so ayɩ: 31Kɔrnɛɩ, Thãgba nɩɛrɛ afɩ bɩɛl a jɩnana dakha afɩ thɩ̃ ˈlaa. 32Gɛr gɩ thɔna Jope wɩ we Sɩmɔ̃ɔkɛ wɩ‐n wenɩ Pɩɛrɩkɛ n cʋɔnnɩ Sɩmɔ̃ lo kʋdaarɩ cɔ lanyɔ̃ nʋɔra. 33Dɩ dapaara mɩ thʋɔn we fɩ, dɩ mɔ̃ fɩ ɩnɩ thaa, gɩ bɔrɛ. Gɛr gɩ nɛnɛ̃ sɛr ha wɩrɛ fɛʋ kɩɛr Thãgbaa ƴɛra sɩ nɩɛ gɩrɛ fɛʋʋkɛ Kɔ̃tɩn so farnɩ fɩ mɩa sɩ.
34Le Pɩɛr gba thɩmɩa a mɩɛ wɩ ayɩ: Sobɔr gɩ, mɩ jɩrɛ dɩphã dɩ Thãgba na‐n hɩɩn tɩbɩla dɩɩdɩaˈ, #Dət 10:17 35sɩ tibil caarra fɛʋ, ʋrɛɛkɛ n maanɛɛnɩ da‐n cʋʋna gɩrɛɛkɛ saranɩ, ɔr n daaraa haar. 36Ɩjɩrayɛl bɩsanana a kɔɔ thɔna ɔɔ thɩmɩɩ, a mɩɛ wɩ ha ie tutugo bʋɔɔ thɩmɩɩkɛ thɛnɩ Jeju Kirisitiraakɛra dɔnɩ Kɔ̃tɩn tɩbɩlala fɛʋ. 37Nɩ jɩrɛ gɩrɛ kɔɔ dananɩ Jude dɩɩra fɛʋ, sɩ Galile gɩ kɔɔ tɔ̃tʋɔn ɔbɔɔkɛ Jã kɔɔ mɩɩnɩ yɔ kpɛɛ thɩmɩɩr pɩ. 38Thãgba kɔɔ har Najarɛtɩ Jejura Thu Phuu, a hanaa punone dɩ a‐n kpaarɛ paar wo paar da‐n cʋʋ bɔɔ, da‐n kpɛɛna wɩrɛ fɛʋʋkɛ hanɩ Satãa nyɔ̃kɔɔ, gɩdonɩ Thãgba kɔɔ hanaanɛ kha. 39Sɛr dɔ sobɔ so jɩdara thɩɛna fɛʋʋkɛ a kɔɔ cʋʋnɩ Juifisɔɔ dɩra na Jerujalɛmna, thɩrʋra wɩ kɔɔ kpaa dɩ khi. 40Sɩ Thãgba kɔɔ ɩɩrʋʋrɛ khirera wire balãther wirera sa cʋgʋʋ dɩ nɩna ɔɔbara, 41sɩ ga do tɩbɩla fɛʋra ga, sɩ sobɔ so jɩdararaakɛ Thãgba kɔɔ maanɩ phiire, kɛ dɔnɩ sɛrkɛ n kɔɔ khɔnɩ kha dɩkor dɩ sa‐n yɔna ɔbɔɔkɛ a kɔɔ ɩɩrnɩ a the khirera. 42Dɩ Jeju kɔɔ pɛ sar sɩ mɩa gɩ tɩbɩla a na kpãkpaanɔ ayɛ, Thãgbaa thɛthɛ kɔɔ phire ni dɩ ɩnɩ do yidara na khee kɩɩldaar. 43Dɩ Thãgbaa bobonasɔ fɛʋ kɔɔ mɩɩrɛ sobɔ so jɩ thɩmɩɩrɩkɛ a pɩɛraa ayɩ: Tibil wo tibilikɛ pɩɛnɩ haar, ɔɔ i na dor nɔɔ dɩ na ˈlɛrɔ sopugo faarɛ.
44Mɔ̃kɛ Pɩɛr hanɩ mɩɩrɔ, Thu Phuu kɔɔ gbune a lõ wɩrɛ fɛʋraakɛ n pɛnɩ thɩmɩɩrɩle nũu. 45Dɩ ha pɛdara fɛʋʋkɛ dɔnɩ khʋ̃ kurdaraakɛ kɔɔ pʋɔnnɩ na Pɩɛr, nʋɔ kɔɔ kpaa wɛr gɩrɛraakɛ Thãgba kɔɔ ˈlaanɩ Thu Phuu wɩrɛraakɛ dʋɔnnɩ ca kpala; 46gɩdonɩ wɩ nɩɛrɛ dɩ wa‐n mɩɩ thɩmɩɩ kpɩɩsɔ dɩ wa‐n khɩɩna Thãgba. 47Le Pɩɛr bir so: Amɛ na punone na tɔ̃ wɩrɛ ˈlɛnɩ Thu Phuu asɩ kha wa‐n kpɛɛ wɩ nyʋɔnɔa? 48Sɩ agɩpɩ dɩ so, wɩ kpɛa wɩ nyʋɔnɔ na Jeju Kirisitii i. Dɩ le wɩ bɩɛlɛɛ a tɔɔna nɩ wire gbe wo.
Currently Selected:
Thãgbaa Thɔ̃thɔnaa Thɔ̃ 10: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
