Thãgbaa Thɔ̃thɔnaa Thɔ̃ 8
8
Mɔ̃ Sɔl n kpoonɩ we gbɛbɩdarara
1Dɩ ga bɔɔle kpoo kɔ̃tɩ̃ɩ ɩɩrɛ Jerujalɛm we gbɛbɩdarara, dɩ wɛr fɛʋ kɔɔ bɩ̃bɩlã a lõ Jude khʋra na Samarɩ sa sɩ thɔ̃thɔnaa ha. 2Dɩ wɩrɛ n cʋɔnnɩ Thãgba kɔɔ dʋrɛ Etɩɛn sɩ wɩ kɔɔ bɩɩrɛ dakɔ̃tɩ̃ɩ. 3Sɩ Sɔl hor a na hərəre we gbɛbɩdara, dɩ jal cɔnana dɩ fʋlɛ kona na khɛra da‐n to khaɩra.#Th t t 22:4–5; 26:9–11 4Dɩ wɩrɛ kɔɔ bɩ̃bɩlanɛnɩ n jaal paar wo paar dɩ wa‐n mɩɩ tutugo bʋɔɔ thɩmɩɩ.
Filipii Samarɩ jal na dɔdɔɔ Sɩmɔ̃ɔda
5Sɩ Filipi kɔɔ jaal Samarɩ dɩ bɩnɔ a mɩɩ wɩ Kirisitii thɩmɩɩ. 6Dɩ tibil jɔ kɔɔ gbɛbɩrɛ kha na bɩ̃ bɩɛl a tu gɩrɛ Filipi n so warnɩ, gɩdonɩ wɩ‐n nɩɛrɛ a yɩna nɔ kpaa thɩ̃ɛɛkɛ a‐n cʋʋnɩ. 7Gɩdonɩ kɔ̃tɛɛbiisɔ n hulene dɩɩ khɩɩr ka sɩ dɩ wa‐n the tibil jɔjʋɔraakɛ wɩ kɔɔ harnɩ, dɩ gbãgbara jɔɔjɔɔ na nɛ kʋɛdara n kɔɔ kpɛɛrɛ; 8dɩ da kɔ̃tɩ̃ɩ har dɩɩraale.
9Sɩ kũu bɩɛl gɩ dɩ wa‐n wɩɩ Sɩmɔ̃, a kɔɔ hale da‐n cʋʋ ɔɔ dɔdɔɔ thɔ̃ dɩɩ cʋʋ Samarɩdara dɩ wa‐n kpise dɩ so war dɩ yɩ, ɩnɩ hananɛ punone ka. 10Tɩbɩla fɛʋ, tɩɩ pɔɩsɔ, na tɩɩ kɔ̃tɩna kɔɔ kpaaraarɛ dɩ wa‐n sona ayɩ: Ʋrɛ or Thãgbaa fãga gɩ a wabɩ ka. 11Wɩ‐n kɔɔ kpaaraarɛ gɩdonɩ gɩ maanɛ a‐n cʋʋnɩ tɩbɩla dɩ wa‐n kpise ɓoɓo ɔɔ dɔdɔɔ thɔna. 12Sɩ ɔbɔɔkɛ wɩ kɔɔ pɛrnɩ Filipiikɛ n mɩanɩ Thãgbaa fãgadaar doda na Jeju Kirisitii tutugo bʋɔɔ thɩmɩɩ haar, wɩ kɔɔ kpɛɛ wɛr nyʋɔnɔ kona na khɛra. 13Sɩmɔ̃ɔ thɛthɛra dakha kɔɔ pɛrɛ haar; ɔbɔɔkɛ wɩ kɔɔ kpɛgʋʋnɩ nyʋɔnɔ pɩ, a‐n kpaarɛ kha na Filipi da‐n yɩna jẽ kɔ̃tɩnasɔ na nɔ kpaa thɩ̃ɛɛkɛ n cʋɛnɩ, dɩ nʋɔ kɔɔ kpagʋʋrɛ.
14Ɔbɔɔkɛ thɔ̃thɔnaakɛ hanɩ Jerujalɛm nɩɛnɩ dɩ Samarɩdara kɔɔ pɛr Thãgbaa thɩmɩɩ haar, wɩ kɔɔ thɔ̃ warɛ Pɩɛr na Jã. 15Dɩ weleele jaal a bɩɛl Thãgba pɛ war wɩ ˈlɛ Thu Phuu. 16Gɩdonɩ Thu Phuu na kɔɔ gbũ a lõ wer bɩɛlla paˈ; Jeju Kɔ̃tɩnɩ i dɩbara wɩ gba a kpɛɛna wɩ nyʋɔnɔ. 17Dɩ le Pɩɛr na Jã kɔɔ dɛ̃ɛ war nyɛ̃ɛ dɩ wɩ ˈlɛ Thu Phuu.
18Ɔbɔɔkɛ Sɩmɔ̃ yɩɛnɩ dɩ thɔ̃thɔnasɔɔ nyɛ̃ dɛ̃ɛ n ˈlaarɛ Thu Phuu, a gbaar war a pɔna ha wɩ sa so: 19Nɩ ha mɩ puno caarɩkɛra dakha, a mɩ dɛ̃ɛ ntɛra nyɛ̃ɛ mer a ˈlɛ Thu Phuu. 20Sɩ Pɩɛr sʋʋraa: Fɛrɛ na afɩ warra fa jal bu paar thʋ̃bɔr, gɩdonɩ fɩ kpɩɛrɛ fa ther Thãgbaa khaarda na war. 21Fa hana kɩɛr hʋɛ dɩ dɩkha gɩ ga thɩnaakaˈ, gɩdonɩ fa hana bɩ̃ bʋɔ Thãgbara ga. 22A fɩ jɩ deba bɩ̃ kpalʋʋkɛ fɩ hananɩ sa bɩɛlnɛ Kɔ̃tɩn, agakpaana a na faarɛ kpɩɛrɛɛkɛ fɩ kɔɔ kpɩɛrnɩ afɩ hara; 23gɩdonɩ mɩ yɩɛrɛ dɩ afɩ bɩ̃ kpallɛ a puuro ka, dɩ sopugo li fer dakha a ɩɩrɔ. 24Dɩ Sɩmɔ̃ birse: Nɛrɛɛ thɛthɛ n ka bɩɛlnɛ Kɔ̃tɩn na pɛ mar dɩ thɩ̃ɛɛkɛra nɩ sonɩ na dã maˈ.
25Ɔbɔɔkɛ Pɩɛr na Jã kɔɔ mɩɩnɩ sobɔ so jɩ thɩmɩɩr Kɔ̃tɩnɩ sora dɩɩ pɩ, a mɩɩna Kɔ̃tɩnɩ so pɩ sa kɛr wa‐n bir Jerujalɛm, tutugo bʋɔɔ thɩmɩɩra wɩ‐n mɩɩ Samarɩ dɩɩsɔra jɔɔjɔɔ.
Filipi na Etiyopi kʋ̃bʋʋ
26Kɔ̃tɩnɩ thɔ̃thɔ̃daar thu kɔɔ sor Filipira ayɩ: Ɩrɛ, jala nyɔ̃bɩlã gɛllɔ wi phã paar hʋɛraakɛ thɛnɩ Jerujalɛm a jal Gaja, kɛ dɔnɩ bə hʋɛ. 27Dɩ ɩɩr jal. Dɩ hɩnɛ, Etiyopidaar gɩ a do kʋ̃bʋʋ. Kãdasɩ Etiyopi khɛ fãgadaarɩ tibil kɔ̃tɩ̃ɩkɛ n hɩnɛnɩ ɔɔ dako thɩ̃sɔ gɩ, a jal Jerujalɛm a fʋɔr Thãgba, 28sɩ da‐n kɔ̃ a too ɔɔ gãgo hotorora da‐n so Ejaɩ Thãgbaa bobonɩ sɛbɛ. 29Dɩ Thu Phuu so Filipira: Jala caanɛ gãgo hotoroole. 30Dɩ Filipi ca dã a nɩɛ mɔ̃kɛ a‐n sonɩ Ejaɩ Thãgbaa bobonɩ sɛbɛra, a bulee aa: Fɩ jɩrɛ sorɩkɛ fɩ‐n sonɩ kɩrʋ ya? 31Dɩ birsee: Mɔ̃ ma fʋ sɩ na jɩ kɩrʋ saagado tibil haanle a mɩɛ ma? Dɩ mɛ̃ a bɩɛl Filipi dɩ lõ dɩ wɩ too kha. 32Paarɩkɛ a‐n kɔɔ sonɩ Thãgbaa sɛbɛrara dʋɔn:
“Wɩ kɔɔ kpaarɛ mɔ̃ wɩ‐n kpanɩ banaa na jalna kʋ paar.
Dɩ mɔ̃kɛ bana bii n pɩrnɩ pɔbɩ ʋrɛɛkɛra n khabaanɩ suune,
mɛ̃ dakha a kɔɔ ha, aa kɔɔ əl nʋɔaˈ.#Eja 53:7–8
33Wɩ kɔɔ sukpuruure, wa kɔɔ kɩɩlnaa dɩɩ telãˈ,
amɛ na jɛ ɔɔ məl?
Gɩdonɩ wɩ kɔɔ hɛlʋʋlɛ thɩɩraakɛ.”
34Dɩ kʋ̃bʋʋle bule Filipi: Sɔ mar, amɛ Thãgbaa bobonɩle n so? Ɔɔ dɩbara a‐n so yaa, ʋkha kpɩɩ a‐n so? 35Dɩ le Filipi gba paarɩlera a‐n sonɩ a ma da‐n mɩɩnaa tutugo bʋɔɔkɛ dɔnɩ Jejuuda. 36Dɩ mɔ̃kɛ wɩ‐n jalnanɩ hʋɛ wɩ daan nyʋɔn. Dɩ kʋ̃bʋʋle bulee: Hɩnɛ, nyʋɔn hakɛ. Thɩ̃ɛ hale na pɩɛr mɩ ma‐n kpɛɛ nyʋɔnɔaa ya? [ 37Dɩ Filipi birsee: Ado fɩ pɛr haar na afɩ bɩ̃ fɛʋ fɩ punone ˈlɛ. Dɩ birsee: Mɩ pɛrɛ haar dɩ Jeju Kirisiti dʋɔn Thãgbaa Bikuun.] 38Dɩ cʋʋ gãgo hotoro dɩɩ jɩɩl dɩ wɛr yenyɔ gbũ nyʋɔnɔ, dɩ Filipi kpɛgʋʋ nyʋɔnɔ. 39Dɩ ɔbɔɔkɛ wɩ kɔɔ thenɩ nyʋɔnɔ, Kɔ̃tɩnɩ Thu gbaar Filipi a jalna dɩ kʋ̃bʋʋle na yɩɩ bã, sɩ a gbaar ɔɔ hʋ na kãkar da‐n kɔ̃. 40Sɩ Filipi wer, wɩ yɩɩrɛ foo Ajɔtɩ. Agɩpɩ dɩ mɩɩ Thãgbaa thɩmɩɩ dɩɩ fɛʋraakɛ a‐n kpãsɛnɩ a jalna waa a dana Sejare.
Currently Selected:
Thãgbaa Thɔ̃thɔnaa Thɔ̃ 8: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
