Thãgbaa Thɔ̃thɔnaa Thɔ̃ 7
7
Etɩɛnɩ thɩmɩɩ
1Dɩ gbõdaar bulee: Sobɔr gɩ bɛ? 2Dɩ Etɩɛn birsee: Nɛr omɩna na thɛ, nɩ pɛ nũu. Thãgbaakɛ hɩnanɩ i dʋbɩrɛ kɔɔ nɛna dɩbara asɩ mama thɩ kɔ̃tɩ̃ Abɩraham ɔbɔɔkɛ a kɔɔ hanɩ Mejopotamɩ, sɩ dɩ aa kɔɔ too Karã paˈ, dɩ a kɔɔ sʋʋraarɛ ayɩ:#Jən 12:1 3“Thɛ afɩ dʋɔ na afɩ too pa a jala dɩɩraakɛ ma nɩ farnɩ.” 4Dɩ mɛ̃ a the Kalde dɩɩra a jal too Karã. Dɩ le ɔbɔɔkɛ ɔɔ thɩ kɔɔ khini, Thãgba kɔɔ tiire a kana dɩɩraakɛ nɩ hanɩ gɩrɛ;#Jən 11:31; 12:4 5sɩ aa kɔɔ haa dɩɩraale paarɩkɛ na dɔnɩ ɔɔda ga, dɩ aa kɔɔ yɩrakɛ nɛ laasɛ paar fɩɩʋaˈ, sɩ a kɔɔ ʋlfɛnaanɛ dɩ ɩna haarɛ na ɔɔ məlikɛ na kpaanɛnɩ, sɩrakɛ dabɔɔle aa kɔɔ hana bɩsaan paˈ.#Jən 12:7; 13:15; 15:18; 17:8 6Thakɛ Thãgba kɔɔ mɩɩ ayɩ: “Afɩ məl na toore dɩ kpɩɩra dɩ wa pɛ wɛr dee paar wa‐n kpoo war gɩ dana yɛna taanã.”#Jən 15:13–14 #Thɩɩ 3:12 7Sɩ Thãgba sor ayɩ: “Ca kpalaakɛ na cʋɛ wɩnɩ dɩ wa do dea, mɛr na kɩlɛna wɩ; a gele pɩ, wa ther le wa‐n do mar thɔma kɛ kɩɛr paarɩkɛ.” 8Agɩpɩ Thãgba kɔɔ haarɛ nɔ bɩɛl ʋlfɛrɛɛkɛ dɔnɩ khʋ̃ kurre, dɩ mɔ̃ Abɩraham kɔɔ kɔnɩ Ɩjakɩ, a kɔɔ kuruure khʋ̃ʋ wire makõther wirera; dɩ mɛ̃ Ɩjakɩ kɔɔ cʋʋ na Jakɔbɩ, dɩ Jakɔbɩ cʋʋ oti na asɩ mama thɩ kɔ̃tɩ̃sɔ yʋɔr yenyɔ.#Jən 17:10–14; 21:2–4; 25:26; 29:31—35:18
9Sɩ gbugi kɔɔ fʋrɛ asɩ mama thɩ kɔ̃tɩ̃sɔ Jojɛfɩra dɩ wɩ fʋʋ dolõ dɩ wɩ jalnaa Ejipiti.#Jən 37:11, 28; 39:2, 21 10Sɩ Thãgba kɔɔ hanaanɛ kha a tagʋʋ ɔɔ bɔ gaarra fɛʋ sa haa kpɛsɛrɛ Faarɔ̃ɔ ƴɛra, kɛ dɔnɩ Ejipiti fãgadaar, a cʋʋnaa dɩ da Faarɔ̃ haar dɩ a pɩɛraarɛ dɩ do gobanɛr le Ejipiti na ɔr Faarɔ̃ɔ cɔdarara fɛʋ.#Jən 41:39–41 11Sɩ kɔmɛr kɔɔ jire Ejipiti dɩɩra fɛʋ na Kanãa dɩɩra. Dɩ bɔ gaarɛra kɔ̃tɩnɛ ka dɩ asɩ mama thɩ kɔ̃tɩ̃sɔ na‐n kɔɔ yɩ dɩkoraˈ.#Jən 42:1–2 12Dɩ Jakɔbɩ kɔɔ nɩɛnɩ dɩ wɩ yɩ dɩkor har Ejipiti; cacara asɩ mama thɩ kɔ̃tɩ̃sɔ a thɔ̃. 13Sɩ gɩrɛ na pɩɛrnɩ balanyɔ, gɛr Jojɛfɩ kɔɔ cʋʋrɔ ɔɔ õkuunsɔ dɩ wɩ jɩɩ, dɩ gɛr Faarɔ̃ jɩrɔ dɩphã thɩ̃ doo ca Jojɛfɩ donɩ.#Jən 45:1, 16 14Agɩpɩ dɩ Jojɛfɩ thɔ̃ a kpa ɔɔ thɩ Jakɔbɩ na ɔɔ cɔdara fɛʋ; wɩ kɔɔ daan tɩbɩla kpalãther yʋɔr yemɔɩ.#Jən 45:9–10, 17–18; 46:27 15Dɩ Jakɔbɩ ɩɩrɛ jal Ejipiti; le a khi na asɩ mama thɩ kɔ̃tɩ̃sɔ dakha.#Jən 46:1–7; 49:33 16Dɩ wɩ uul wi a jalna Sɩsɛm a dʋ kaarraakɛ Abɩraham kɔɔ thenɩ na war Emɔɔr bikuunsɔra Sɩsɛm dɩɩra.#Jən 23:3–16; 33:19; 50:7–13; Joj 24:32 17Sɩ bɔɔkɛ Thãgba na cʋʋnɩ gɩrɛɛkɛ a kɔɔ ʋlfɛnanɩ Abɩraham n thɔɔnɩ, tɩbɩlaale hanɩ Ejipiti lerre dɩ wa‐n pɛr;#Thɩɩ 1:7–8 18dɩ gɩ kɔɔ jaal a dã Ejipiti fãgadaar kpɩɩkɛ na kɔɔ jɛnɩ Jojɛfɩ kpɩɩaˈ. 19Fãgadaarɩle kɔɔ hananɛ fɩɩlɛ jɔɔ asɩ toora da‐n hʋɔlna asɩ mama thɩ kɔ̃tɩ̃sɔra a thʋ̃ yɩna, wɩ dɔna awɩ bisɔ na faa wa‐n sɩ war wɩ toaˈ.#Thɩɩ 1:10–11, 22 20Dɩ ga bɔɔlera wɩ kɔɔ kɔ̃ Mʋɩjɩ, a kɔɔ ɓʋɔn Thãgbara ka. Pora yẽther ɔɔ thɩ na ɔɔ nɩ kɔɔ fʋrɔɔ,#Thɩɩ 2:2 21sɩ ɔbɔɔkɛ wɩ kɔɔ dʋnaanɩ faa, Faarɔ̃ɔ bikhɛr kɔɔ gbaanɛɛ haan dɩ ho ɔɔ bikuun.#Thɩɩ 2:3–10 22Dɩ wɩ kɔɔ dɩɩrɛ Mʋɩjɩ Ejipitidaraa kpɛsɛ fɛʋ; a kɔɔ hananɛ fãga thɩmɩɩrra na thɔmana.
23Ɔbɔɔkɛ a danɩ yɛna kpalanyɔ, ɔɔ omisɔ Ɩjɩrayɛldaraa thu fʋʋrɛ dɩ ƴaal a jala a yɛ wɩ;#Thɩɩ 2:11–15 #Thɩɩ 18:3–4 24dɩ mɛ̃ a yɩ bɩɛlɩkɛ wɩ‐n hʋɔlɔnɩ dɩ teeraa, a bɩɩr Ejipitidaar a kʋ a tiir helu. 25A kɔɔ kpɩɛrɛ dɩ ɔɔ omisɔ na jɩrɛra dɩ ɔr Thãgba na gba na taana wɩ, sɩ wɛr wa kɔɔ jaˈ. 26Ga cʋɔ wi, a yɩrɛ tɩbɩla yenyɔ awɩ ha dɩ wa‐n ke kha, dɩ do bʋɔ sɩ ɩnɩ‐n gʋʋr wɩ thɩmɩɩrra a so war: Nɛrɛ, omɩna ha nɩ, mɔ̃gɩdo dɩ na‐n hʋɔl khasɔ thakɛ? 27Sɩ ʋrɛɛkɛ n hʋɔlɛnɩ ɔɔ ˈwalãkha tibiləəle bor sa so: Amɛ pɛ far kɔ̃tɩɩnɛna na so gʋʋrdaar sɛrɛra? 28Fɩ‐n ƴaalɛ fɩ kʋ mɩ wo mɔ̃ fɩ kʋnɩ Ejipitidaar de ya? 29Mɔ̃ Mʋɩjɩ nɩɛnɩ ga thɩmɩɩle a fuure jal too Madɩ̃adaraa dʋɔ, dɩ le a kɔ̃ kuuminə yenyɔ.
30A yɛna kpalanyɔ ka, Thãgbaa thɔ̃thɔ̃daar thu bɩɛl kɔɔ gbaar dɩbara a nɩnaa Sɩnaɩ gɔ̃gɔ̃ bəənnə thɩr bu dɔlɩnanɛna.#Thɩɩ 3:1–10 31Mɔ̃ Mʋɩjɩra yɩɛnɩ nʋɔ kpagʋʋrɛ thɩ̃ nɩrɔrɛraale, dɩ mɔ̃ a tɔnɩ dã ɩnɩ‐n hɩɩn, a nɩɛrɛ Kɔ̃tɩnɩ nɔ dɩɩ so ayɩ: 32“Mɛr dʋɔn afɩ mama thɩ kɔ̃tɩ̃sɔɔ Thãgba, Abɩrahamɩ Thãgba, Ɩjakɩɩ Thãgba, na Jakɔbɩɩ Thãgba.” Dɩ Mʋɩjɩ na‐n jẽ aa‐n ˈla dɩ hɩɩnaˈ. 33Dɩ Kɔ̃tɩn sʋʋraa: “Fʋrɛ nɛfaa gɩdonɩ paarɩlera fɩ jɩɩlnɩ, thɩ phuu gɩ. 34Mɩ jɩɛ yɩ ɩ̃ tookɛ hanɩ Ejipitii bɔ gaar, mɩ nɩrɛ dakha awɩ se dɩ mɩ gbune gɩrɛ ɩ̃ taa wɩ. Nɛnɛ̃ dɩphã ma thɔ̃ fɛr fɩ jal Ejipiti.” 35Mʋɩjɩɩkɛra wɩ kɔɔ bonɩ sa so ayɩ, amɛ pɩɛraa kɔ̃tɩɩnɛna na so gʋʋrdaar ya? Ɔr gɩɩkɛ Thãgba thɔnɩ dɩ do kɔ̃tɩn na taadaar, sɩ thɔ̃thɔ̃daar thuukɛ kɔɔ gbaannɩ dɩbara a nɩnaa bullə gɩ the.#Thɩɩ 2:14 36Ɔr kɔɔ kpa wɩ a thena sɩ a kɔɔ cʋʋrɛ ma kʋ thɩ̃ɛsɔ, na nɔ kpaa thɩ̃ɛsɔ Ejipiti dɩɩra na lanyɔ̃ sɩɛra, na bəənnə yɛna kpalanyɔ.#Thɩɩ 7:5; 14:21; Ther 14:33 37Ɔr dɔ Mʋɩjɩɩkɛra kɔɔ sɔnɩ Ɩjɩrayɛl bɩsanana ayɩ: “Thãgba na tire bɩɛl anɩ omisɔra dɩ na do Thãgbaa bobon ɩ̃ kha dɩ na ha nɩ.”#Dət 8:15, 18 38Ɔr dʋɔn ʋrɛɛkɛ kɔɔ hanɩ Ɩjɩrayɛlɩ pa bɩɛl jɛʋ bəənnə, kɛ dɔnɩ ʋrɛɛkɛ Thãgbaa thɔ̃thɔ̃daar thu kɔɔ mɩɩnanɩ nakha asɩ mama thɩ kɔ̃tɩ̃sɔ Sɩnaɩ gɔ̃gʋɔna, ɔr kɔɔ gbaan yi thɩmɩaakɛ a ˈlɛnɩ a ha sɩ.#Thɩɩ 19:1—20:17; Dət 5:1–33 39Sɩ asɩ mama thɩ kɔ̃tɩ̃sɔ kɔɔ bʋʋrɛ nũ nɩɩr sa yɩ a tɔ nɩ jala pal, sɩ awɩ ha bir ha Ejipiti dɩ wɩ kɔɔ sor Aarɔna: 40“Cʋɛ sar thãgbasɔɔkɛ na kʋlɛ sɩnɩ ƴɩɛ, gɩdonɩ Mʋɩjɩɩkɛ te sɩnɩ Ejipiti dɩɩra a thena sa jɩ gɩrɛɛkɛ danaanaˈ.”#Thɩɩ 32:1 41Dɩ dawiile wɩ kɔɔ cʋʋrɛ na bi thɩl a jiro bonɩɛ, sɩ dɩ wa‐n kãka awɩ nyɛ̃ thɔnaalera wɩ kɔɔ cʋʋnɩ.#Thɩɩ 32:2–6 42Le Thãgba fi khiru a pɛ war sa sɩ war dɩ wa‐n fʋɔr ƴepələ̃be ƴũ, mɔna gɩ kherenɩ Thãgbaa bobonaa sɛbɛra ayɩ:
“Nɛr Ɩjɩrayɛl ca fɛʋ,
mɛrra nɩ jinə nʋma bonɩɛ
ɔbɔɔkɛ nɩ kɔɔ hanɩ bəənnə yɛna kpalanyɔ ya?#Amɔ 5:25–27
43Nɛr kɔɔ gbaan Mɔlɔkɩ thɩlɩ kẽkẽ wa,
na Rãfã thɩlɩ ƴepələ̃bi,
ga thɩlsɔɔkɛra nɩ kɔɔ mɩnɩ dɩ na‐n fʋɔr.
Gɛr ma fʋlɛ nar na jalna Babɩlɔn billo.”
44Asɩ mama thɩ kɔ̃tɩ̃sɔ kɔɔ hananɛ sobɔ so jɩ waa bəənnə, mɔ̃kɛ ʋrɛɛkɛ kɔɔ mɩananɩ Mʋɩjɩ a sʋʋraa, a cʋɛ gɩ ha mɔ̃ a kɔɔ yɩɛnɩ.#Thɩɩ 25:9, 40 45Agɩpɩ asɩ mama thɩ kɔ̃tɩ̃sɔ kɔɔ gbaar waakɛ wɩ kɔɔ ˈlɛnɩ, a jalna kha Jojue ɔbɔɔkɛ wɩ lonɩ dɩɩsɔraakɛ wɩ gbanɩ ca kpalalaakɛ Thãgba kɔɔ weelenɩ faa.#Joj 3:14–17 46Liir gɩ kɔɔ too a dana Davɩdɩɩkɛ Thãgba jɩnɩ bʋɔraa bɔɔ, kɛ dɔnɩ ʋrɛ kɔɔ bɩɛlnɛnɩ ado a na yɩrɛ cʋɔr na ha Jakɔbɩɩ Thãgba.#2 Sam 7:1–16; 1 Kur 17:1–14 47Dɩ Salomɔ̃ ɔɔ bikuun kɔɔ thɛ cʋɔr a haa,#1 Fãg 6:1–38; 2 Kur 3:1–17 48sɩrakɛ Kəkəədaar na‐n cɔ cʋɔrraakɛ tibil nyɛ̃ɛ mɩnaˈ, mɔ̃kɛ Thãgbaa bobon kɔɔ sonɩ ayɩ:
49“Thãgbara ƴũ dʋɔn, mɛr Thãgbaa fãga too pa,
dɩ thɩɩ do ɩ̃ nɛ jəəda.
Anyee cɔ ca na the na ha mɩ, mɛr Kɔ̃tɩn sɔ,
agɩbo ka na dɔ paarɩkɛ ma hɩɩrnɩ?#Eja 66:1–2
50Ga do ɩ̃ nyɛ̃ cʋɛ gele fɛʋaa?”
51Nɛr dʋɔn nũ nʋʋrdaraakɛ n khaanɛnɩ haar a bo ha debire, wire fɛʋ nɩ‐n bana Thu Phuu. Mɔ̃kɛ anɩ mama thɩ kɔ̃tɩ̃sɔ kɔɔ cʋʋnɩ, mɛna nɩ‐n cʋʋ oti.#Eja 63:10 52Ʋmɔ̃ Thãgbaa bobon haanle anɩ mama thɩ kɔ̃tɩ̃sɔ na kɔɔ kpoorona? Wɩ‐n kɔɔ kʋʋrɛ wɩrɛ n kɔɔ sɔnɩ dɩ wɩ yɩ, Tu sarʋ na ɩnɛ, ʋrɛɛkɛra nɩ kɔɔ liirnanɩ gɩrɛ a kʋ, 53nɛrɛɛkɛ kɔɔ ˈlɛnɩ jɔfʋʋkɛ Thãgba kɔɔ pɛrnɩ ɔɔ thɔ̃thɔ̃daar thusɔ dɩ wɩ ˈlaa, sɩ na kɔɔ hɩɩn ga.
Etɩɛnɩ dʋʋr
54Mɔ̃ wɩ‐n nɩɛnɩ gele, gɩ‐n hel wer haar ka dɩ wa‐n dʋɔnaa nɔfaar. 55Sɩ Etɩɛn hinə Thu Phuu da‐n hɩɩn ƴũ kirkirkir, a yɩ Thãgbaa carbara na Jeju dɩ jɩɩl Thãgbaa nyɔ̃bɔra, 56dɩ so ayɩ: Nɩ hɩnɛ, mɩ yɩrɛ Thãgbaa dʋɔ dɩɩ khɛr, dɩ tibili Bikuun jɩɩl Thãgbaa nyɔ̃bɔra. 57Dɩ le wɩ hulẽ na nɔ kheu, a sɔbɩna nũ kana sa ɩɩr fɛʋ a wuurəə, 58a tʋɔrʋʋ thena dɩ khuirə, a dʋʋrʋʋ na bokana a kʋ. Daɓol bɩɛlɩkɛ wɩ‐n wenɩ Sɔl, ɔɔ kal ƴɔɔ so jɩdara kɔɔ thɩɩn awɩ kẽkẽsɔ. 59Dɩ mɔ̃kɛ wɩ‐n dʋʋrnɩ Etɩɛn na bokana, a bɩɛlɛ Thãgba thakɛ ayɩ: Jeju Kɔ̃tɩn, gba ɩ̃ thu. 60Agɩpɩ dɩ gulẽga sa hulẽ dɩɩ khɩɩr ka ayɩ: Kɔ̃tɩn, fa‐n gba ga sopugookɛ a kɩɩlna waˈ. Ɔbɔɔkɛ a mɩɩnɩ ga thɩmɩɩkɛ pɩ, a daarɛ da kɔ̃tɩ̃ɩ. Sɩ Etɩɛn kʋʋle dar Sɔlla wer ka.
Currently Selected:
Thãgbaa Thɔ̃thɔnaa Thɔ̃ 7: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
