Thãgbaa Thɔ̃thɔnaa Thɔ̃ 6
6
Tɩbɩla makonyɔɔkɛ wɩ phiirni a pɛr Thãgbaa thɔna
1Ga bɔɔlera mɔ̃kɛ kpãkpãadara n jɔrnɩ, Juifisɔɔkɛ n mɩanɩ gɩrɛkɩ thɩmɩɩr n hũhuune Ebirəsɔra, gɩdonɩ awɩ khikhɛrsɔ na‐n jɩɩ ˈlɛ thɩ̃ɛɛkɛ wɩ‐n tɩnɛnɩ wire fɛʋ bɔɔbɔaˈ. 2Dɩ yʋɔr yenyɔ we kpãkpãadara jɔɔ a so war ayɩ: Ga telẽ dɩ sa sɩrɔ Thãgbaa thɩmɩɩ sɩ sa‐n tɩnɛ dɩkɔaˈ. 3Gɛr gɩ omɩna, nɩ phire anɩ thɩ̃thɩɩn tɩbɩla makonyɔɔkɛ hananɩ i bʋɔ, a hinə dakha Thu Phuu na kpɛsɛrɛ, dɩ sa gba ga thɔ̃ɔkɛ na ha wɩ. 4Sɩ se wer sa‐n yɩrna Thãgba bɩɛlɛ na Thãgbaa thɩmɩɩ mɩɩrɛ.
5Ga thɩmɩɩle kɔɔ dar tibil jɔjʋɔ haar. Dɩ wɩ kɔɔ phiire Etɩɛn, tibilikɛ ha pɛrɛ na Thu Phuu hironi, na Filipi, na Pʋrokɔɔr, na Nɩkanɔɔr, na Tɩmɔ̃, na Parmenasɩ, na Nɩkola kpakpalɩkɛ fenɩ a do Juifi, Ãtɩyɔsɩ a the. 6Dɩ wɩ kpa wɛr a nɩna thɔ̃thɔna, dɩ wɛr ɔbɔɔkɛ wɩ kɔɔ bɩɛlnɩ Thãgba pɛ war, wɩ kɔɔ dɛ̃ɛ warɛ nyɛ̃ɛ.
7Sɩ Thãgbaa thɩmɩɩ har dɩ a‐n kpaar, dɩ kpãkpãadara na‐n jɔr dɩ wa‐n pɛr Jerujalɛm, dɩ bonɩ jidaar jɔjʋɔ kɔɔ nɩrɛ nũu ha pɛdaara.
Etɩɛnɩ fʋ
8Bɔ jɩ haar na fãga kɔɔ he Etɩɛnna dɩ a‐n cʋʋrɛ ma kʋ thɩ̃ɛsɔ na nɔ kpaa thɩ̃ɛsɔ tɩbɩlaa thɩ̃thɩɩn. 9Sɩ wɩ̃ tibilikɛ thɛnɩ Juifisɔɔ Thãgba fʋɔr paakɛ wɩ‐n wenɩ Waɩa, Sɩrɛn na Alesãdɩɩrɩ dɩra wɩ kɔɔ the, na Juifisɔɔkɛ thɛnɩ dakha Silisi nakha Ajɩ, wɩ kɔɔ ɩɩrɛ dɩ wa‐n bana thɩ̃ banaa na Etɩɛn. 10Sɩ wa kɔɔ puno a mar kpɛsɛrɛra na Thu Phuurəəkɛ n mɩanaanaˈ. 11Sɩ wɩ kɔɔ fɩɩlɛ tɩbɩla pɛr ayɩ wɩ yɛ, ɩnɩ kɔɔ nɩɛrɛ dɩ mɩɩ da‐n kpɛna Mʋɩjɩ na Thãgba. 12Dɩ mɛ̃ wɩ kɔɔ tɔ tɩbɩla, na kɔ̃tɩna, na jɔfʋ dɩɩrdara pɛr; agɩpɩ wɩ pɔr a fʋʋ a jalna so gʋʋrdaraa pa. 13Sɩ wɩ kɔɔ ƴaalɛ sõso so jɩdara dɩ wɩ so: Kuunikɛ na‐n sɩrɔ thɩmɩaakɛ a‐n mɩɩnɩ da‐n kpɛna pa phuukɛ na jɔfʋaˈ, 14gɩdonɩ sɩ nɩɛrɛ dɩ so: Najarɛtɩ Jejuulera na kʋɛrɛ paarɩkɛ sa a debi dakha asɩ mama fɩlɩkɛ Mʋɩjɩ kɔɔ ha sɩnɩ.
15Dɩ wɩrɛ fɛʋʋkɛ tɔɔnɩ so gʋʋrdaraa pa gaaraarɛ yire dɩ wa‐n hɩɩnʋʋ a yɩ ɔɔ ƴɛ dɩɩ ho Thãgbaa thɔ̃thɔ̃daar thuuda.
Currently Selected:
Thãgbaa Thɔ̃thɔnaa Thɔ̃ 6: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
