Thãgbaa Thɔ̃thɔnaa Thɔ̃ 5
5
Ananɩasɩ na Safɩra
1Sɩ kũu bɩɛl gɩ dɩ wa‐n wɩɩ Ananɩasɩ, na ɔɔ khɛr Safɩra a dolõ lɩɛ. 2Sɩ a kɔɔ gʋʋrɛ kha na ɔɔ khɛr sa ti war sa gba dakuruukɛ sənɩ a dʋ thɔ̃thɔnaa nyɔ̃kɔɔ. 3Dɩ Pɩɛr bulee: Ananɩasɩ, mɔ̃gɩdo dɩ Satã kɔɔ hi fi bɩnɔ dɩ fɩ kur sõsor a pɛ Thu Phuurə a ti lɩɛɛkɛ fɩ dolonɩɩ war? 4Fa kɔɔ dolõ gɩnɩ paˈ, ga do afɩda gɩ kɔɔ doaa? Dɩ fɩ dolonɩ pɩ, war na kɔɔ do afɩda gaa? Sɩ mɔ̃ gɩ fʋ sɩ dɩ kpɩɛr caarɩkɛ kɔɔ lõ fɩ haar dɩ fɩ cʋʋ mɛ̃? Ga do tɩbɩla fɩ kɔɔ kur sõsor a paˈ, sɩ Thãgba gɩ. 5Ɔbɔɔkɛ Ananɩasɩ nɩɛnɩ thɩmɩaale a jire khi. Dɩ maar fʋlɛ mɩrɛ fɛʋʋkɛ nɩɛnɛnɩ dɩɩ ka. 6Sɩ daɓola ɩɩrɛ a gbaa li a jalna dʋ.
7A bɔɔ ka gbe, ɔɔ khɛr pɔr lõ sɩ aa kɔɔ jɩ gɩrɛ kɔɔ dananaˈ, 8dɩ Pɩɛr bulee: Sɔ mar, thakɛ nɩ kɔɔ dolõ lɩɛ gerɩɩ? Dɩ birse: Ɔɔ, thale gɩ. 9Dɩ Pɩɛr sʋʋraa: Mɔ̃gɩdo dɩ nɩ gʋʋr nɔ bɩɛl sɩ nɩ fifilə Kɔ̃tɩnɩ Thu nɩ hɩɩn? Fa yɩ gaa, wɩrɛ dɔnɩ afɩ ko har lõfonɔɔ wa‐n ɩ̃, wa gba fɛr fer, na thena dakha. 10Dɩ dapaara dɩ ji ɔɔ ƴɛra a khi; ɔbɔɔkɛ daɓola na lonɩ dɩɩ do a khire pɩ, dɩ wɩ gbaa jalna dʋ ka wɩ dʋnɩ ɔɔ ko. 11Dɩ maar fʋlɛ we gbɛbɩdara fɛʋ dɩɩ ka na wɩrɛ fɛʋʋkɛ nɩɛnɛnɩ ga thɩmule.
Nɔ kpaa thɩ̃ɛ jɔɔ
12Dɩ thɔ̃thɔna n kɔɔ cʋʋrɛ ma kʋ thɩ̃ɛ na nɔ kpaa thɩ̃ɛsɔ jɔɔ tɩbɩlaa thɩ̃tɩɩn, sɩ wɛr fɛʋ n gbɛbɩrɛ kha na bɩ̃ bɩɛl paarraakɛ hɔnɩ jɛ̃bɛrɛ̃ɛkɛ wɩ‐n wenɩ Salomɔ̃ɔda. 13Sɩ tibil bɩɛl ɩkhasɔra na‐n ˈla wɩ gbɛbɩna waˈ, sɩ tɩbɩla fɛʋ n khɩɩ wɛr dakɔ̃tɩ̃ɩ. 14Dɩ tibil jɔjʋɔ, kona na khɛraakɛ n pɩɛrnɩ Kɔ̃tɩn haar jɔrɛ dɩ wa‐n pɛr. 15Dɩ wɩ‐n gbaar khodara dɩ wɩ pɛ khodaar gbadaara na jɔna a na der hʋɛra, dɩ mɔ̃kɛ Pɩɛr na‐n kanɩ ɔɔ jəərrakɛ na‐n jire ɩkhasɔra. 16Dɩ tibil jɔjʋɔɔkɛ thɛnɩ Jerujalɛm dɩ khuirə car dɩ wa‐n pɔ war; dɩ wɩ gbaar khodara na wɩrɛɛkɛ kɔ̃tɛɛbii n hʋɔlɔnɩ a pɔna, dɩ tɩbɩla fɛʋʋ kho n kɔɔ kpɛɛrɛ.
Thɔ̃thɔnasɔɔkɛ wɩ fʋlɛnɩ
17Le gbõdaar na wɩrɛ fɛʋʋkɛ hanaanɩ kha, kɛ dɔnɩ wɩrɛ dɔnɩ bɩɛl na wɩrɛ n yɛnɩ khi ɩɩrɛ na halaˈ kɔɔ ɩɩrnanɛ gbugi, 18a fʋlɛ thɔ̃thɔna a to khaɩra. 19Sɩ dɩtɩnɔ Kɔ̃tɩnɩ thɔ̃thɔ̃daar thu bɩɛl kɔɔ pɔr a khɛr khaɩ loo, sa cʋʋ wɩ dɩ wɩ the sɩ dɩ so war: 20Nɩ jala jɩlɛ Thãgba fʋɔr cɔ kɔ̃tɩɩna a na mɩa tɩbɩla hʋ phaakɛɛ thɩmɩɩsɔ fɛʋ. 21Ɔbɔɔkɛ wɩ nɩɛnɩ gele, duuro phiphiphi wɩ kɔɔ lʋʋn Thãgba fʋɔr cɔ kɔ̃tɩɩna a ma dɩ wa‐n dɩɩr tɩbɩla.
Dɩ gbõdaar na wɩrɛ kɔɔ hanaanɩ kha kɔɔ pɔr a we so gʋʋrdara na Ɩjɩrayɛldaraa kɔ̃tɩ̃sɔ fɛʋ, sa thɔ̃ khaɩra wɩ kpa thɔ̃thɔna a pɔna. 22Ɔbɔɔkɛ tɩbɩlaakɛ wɩ kɔɔ thɔnɩ jalnɩ dã khaɩra, wa kɔɔ yɩ wɩ laˈ. Dɩ wɩ kɛrrɛ bir a mɩɛ wɩ thakɛ ayɩ: 23Sɩ yɩrɛ khaɩ cɔ loo dɩɩ jɩɩ khaan bɔɔbɔɔ, dɩ gardɛsɔrakɛ har lõfonɔɔ dɩ wa‐n bɛr, sɩ ɔbɔɔkɛ sɩ kɔɔ khɛrnɩ loo sa lõ, sa kɔɔ yɩ tibil bɩɛllakɛ bɩnɔaˈ. 24Ɔbɔɔkɛ wɩ nɩɛnɩ ga thɩmɩɩle, Thãgba fʋɔr cɔ kɔ̃tɩ̃ gardɛɛ kʋmãda na bonɩ jidaar kɔ̃tɩna na kɔɔ jɩ mɔ̃ wa kpɩɛrnɩ thɔ̃thɔnasɔɔdaraalaˈ, dɩ wa‐n bule khasɔ mɔ̃ thɩ̃ɛɛlera na hanɩ. 25Sɩ tibil bɩɛl pɔr a so war: Nɩ hɩnɛ, tɩbɩlaakɛ nɩ kɔɔ tonɩ khaɩra hale Thãgba fʋɔr cɔ kɔ̃tuna dɩ wa‐n dɩɩr tɩbɩla wo. 26Dɩ gardɛɛ kʋmãda na gardɛsɔ jaal a kpa wɩ na hɛlɛlɛ fɩlɛ a pɔna, gɩdonɩ mɔ̃ tɩbɩla na dʋʋrnɩ wɛr thɛthɛ na bokana, maar fʋ war. 27Ɔbɔɔkɛ wɩ pɔna wɩnɩ, wɩ jɩɩlɛ so gʋʋrdaraa ƴɛra. Dɩ gbõdaar bule wi thakɛ: 28Mee sɩ kɔɔ pɩɛr nɛr dɩɩ khɩɩr ka ayɩ: Na‐n gba ga iile a na dɩɩr tɩbɩla bã; sɩ nɩ hɩnɛ anɩ dɩɩrɩkɛ gɩrɛ kpaarɛ Jerujalɛm dɩɩra fɛʋ, dɩ nɩ‐n ƴaalɛ dɩ tibililee khi thɩmɩɩ na ˈli si.#Mat 27:25
29Dɩ Pɩɛr na thɔ̃thɔna birsee: Dɔ sɩ nɩ Thãgba nũu sɩ ka sɩ jɔ tɩbɩla. 30Asɩ mama thɩ kɔ̃tɩ̃sɔɔ Thãgba kɔɔ cʋʋrɛ Jeju dɩ ɩɩr a the khirera, ʋrɛɛkɛra nɩ kpanɩ thɩrʋra a kʋ; 31sɩ Thãgba kɔɔ ɩɩrʋʋrɛ a pɛ ɔɔ nyɔ̃bɔra dɩ do Kɔ̃tɩn na Taadaar, gɩ ha Ɩjɩrayɛldara ha debire na sopugo faarɛ. 32Sɛr dɔ sobɔ so jɩdara ga thɩ̃sɔraale na Thu Phuu dakha kɛ Thãgba n ˈlaanɩ wɩrɛraakɛ n nɩɛnɛɛnɩ nũu.
33Ɔbɔɔkɛ wɩ nɩɛnɩ ga thɩmɩɩle nɩ̃khii n lɩɛr wɛr dɩ wa‐n ƴaal wɩ kʋʋr wɩ. 34Sɩ jɔfʋ bʋ dʋdaar bɩɛlɩkɛ wɩ‐n wenɩ Gamalɩɛl, jɔfʋ dɩɩrdaar a do kɛ tɩbɩla fɛʋ n cʋnɩ, a ɩɩrɛ le so gʋʋrdaraa thɩ̃thɩɩn a ˈlaa hʋɛ wɩ dɔ tɩbɩlaale n the gbe. 35Agɩpɩ dɩ so war: Nɛr Ɩjɩrayɛldara, nɩ jɩɛ dʋ bʋrɛ gɩrɛ nɩ ƴaalnɩ cʋʋ tɩbɩlalaakɛ. 36Gɩdonɩ ga maan gɩraˈ, Tədasɩ kɔɔ ɩɩrnɩ ayɩ, tibil kɔ̃tũ ha nɩ; a kʋr tɩbɩla dɩ wɩ thɔɔ taanã. Sɩ wɩ kɔɔ kʋʋrɛ dɩ wɩrɛ fɛʋʋkɛ kɔɔ pɛnɩ ɔɔda nũu kɔɔ bɩ̃bɩlanɛ, bɩɛllakɛ na saˈ. 37A ɔɔda karɔ, Galile Judasɩ ɩɩrɛ ther bɔɔ a kʋr tɩbɩla dɩ wa‐n kpaaraa; ɔr dakha wɩ kɔɔ kʋʋrɛ, dɩ wɩrɛ fɛʋʋkɛ kɔɔ pɛnɩ ɔɔda nũu kɔɔ bɩ̃bɩlanɛ. 38Dɩ nɛnɛ̃kɛ mɩ so narɛ, na‐n bo na ɩɩ tɩbɩlalaakɛ bã; a nɩ jɩ, nɩ faa wɩ wɩ jal. Ado gɩrɛ wɩ ɩɩrnanɩ gɩrɛ, dɩ a thɔmaakɛ wɩ‐n cʋʋnɩ, tɩbɩlaa pa gɩ the, ga kʋɛrɛ. 39Sɩ ado Thãgbaa pa gɩ the, na puno na kʋɛ ga. A nɩ jɩ, nɩ jɩɛ hɩɩn na‐n kɛ̃kɛrɛna Thãgba ga. 40Dɩ mɛ̃ wɩ tu ɔɔ nɔ. Agɩpɩ wɩ wer thɔ̃thɔna a ciil wi, sa pɩɛr wɩ wa‐n bir a gba Jejuu i a na mɩɩ tɩbɩla bã, sa faa wɩ. 41Dɩ wɩ kɔɔ ther le so gʋʋrdaraa pa na daʋ gɩrɛraakɛ wɩ teenanɩ hʋɔlɛ gɩ do Jejuu i dɔ nɔɔ. 42Dɩ wire fɛʋ wa‐n sɩrɔ dɩɩrɛ, na Jeju Kirisitii tutugo bʋɔɔ thɩmɩɩ mɩɩrɛ Thãgba fʋɔr cɔ kɔ̃tɩɩna na cɔnanɔsɔaˈ.
Currently Selected:
Thãgbaa Thɔ̃thɔnaa Thɔ̃ 5: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
