Thãgbaa Thɔ̃thɔnaa Thɔ̃ 4
4
Mɔ̃ wɩ khaannɩ Pɩɛr na Jã khaɩra
1Ɔbɔɔkɛ Pɩɛr na Jã hanɩ dɩ wa‐n mɩɩna tɩbɩla, bonɩ jidara na Thãgba fʋɔr cɔ kɔ̃tɩ̃ gardɛɛ kʋmãda, na wɩrɛ n yɛnɩ khi ɩɩrɛ na halaˈ pɔr. 2Gɩ puu warɛ gɩdonɩ wɩ‐n dɩɩrɛ tɩbɩla dɩ wa‐n mɩɩna aa: Jeju kɔɔ ɩɩrɛ a the khirera, gɛr nɛna dɩ khe na ɩɩrɛ na the khirera. 3Dɩ wɩ fʋlɛ wɛr a to khaɩra phaphapha dɩɩ n wɩl, gɩdonɩ dɩɩ ˈlire dʋɔrɛ pɩ. 4Sɩrakɛ tibil jɔɔle kɔɔ pɛnɩ thɩmɩɩrɩle nũu kɔɔ pɛrɛ haar, dɩ konaa nɔ daan gbɩlanɩ taamɔɩ.
Pɩɛr na Jã Juifi kɔ̃tɩnaa ƴɛra
5A dɩɩ wɩl, tɩbɩlaa kɔ̃tɩ̃sɔ, na kɔ̃tɩnasɔ, na jɔfʋ dɩɩrdarasɔ kɔɔ gbɛbɩrɛ kha Jerujalɛm, 6na An gbõdaar, na Kaɩfɩ, na Jã, na Alesãdɩɩr, na wɩrɛ fɛʋ dɔnɩ gbõdaraa too. 7Dɩ wɩ kpar Pɩɛr na Jã a pɔna awɩ thɩ̃thɩɩn a bule wi aa: Amɛɛ fãga, agɩbo amɛɛ i nɩ‐n cʋʋna thɩ̃ɛɛkɛra? 8Dɩ le Pɩɛrɩkɛ henəni Thu Phuu so war: Nɛr tɩbɩlaa kɔ̃tɩ̃sɔ na nɛr kɔ̃tɩnasɔ, 9mɔ̃kɛra nɩ‐n bule sini nĩ bɔ cʋʋrɛraakɛ sɩ kɔɔ cʋʋnɩ gbãgbarʋraakɛ na mɔ̃ gɩ fʋnɩ sɩ dɩ kpɛɛ, 10nɛrɛ fɛʋ nɩ jɩɛ jɩ na Ɩjɩrayɛldara fɛʋ, dɩ Najarɛtɩ Jeju Kirisiti, ʋrɛɛkɛra nɩ kɔɔ kpanɩ kʋkʋ thɩrʋra sɩ dɩ Thãgba ɩɩrʋʋ dɩ the khirera, ɔɔ i dɔ kɩrʋ dɩ kuunikɛ hanɩ gɩrɛ kɩɛr ba hana tomɩ kheu. 11Jeju dɔ ʋrɛ Thãgbaa sɛbɛra sonɩ ayɩ:
“Bokaarɩkɛ nɛr cɔ mɛ kɔɔ bonɩ,
sɩ a debire a do go tɩdaa.”#Khɩ 118:22
12Taarɛ na hale tibil kpɩɩ pa ga, gɩdonɩ i kpɩɩ na hakɛ thɩɩra tɩbɩlaa thɩ̃thɩɩn kɛ dɔnɩ gɛr na taa saˈ.
So gʋʋrdara pɩɛrɛ tutugo bʋɔɔ thɩmɩɩkɛ wɩ mɩɩnɩ fɛʋ
13Mɔ̃ wɩ yɩnɩ Pɩɛr na Jãa ˈla, nʋɔ kpaa wɛr gɩdonɩ wɩ jɩrɛ dɩ tɩbɩla wɛɛkɛ na jɛnɩ sɛbaˈ dɩ wɩ har dakha mɔ̃ tibil ba hanɩ; wɩ jɩrɛ dakha dɩ wɛr dɔ wɩrɛ kɔɔ hanɩ kha na Jeju. 14Sɩ mɔ̃ wɩ yɩnɩ kuunikɛ khoo kɔɔ kpɛɛnɩ dɩ jɩɩlna Pɩɛr na Jã, wa puno so thɩ̃aˈ. 15Sɩ so gʋʋrdaraale kɔɔ so warɛ wɩ thɛ bɔɔ gbe, agɩpɩ wɩ mar a gʋʋr kha awɩ ha ayɩ: 16Anye sa ka na cʋʋ tɩbɩlaakɛra ya fɛ? Gɩdonɩ Jerujalɛmdara ɓibi jɩrɛ dɩ wɛr kɔɔ cʋɛ nɔ kpaa thɩ̃ kɔ̃tɩ̃ɩkɛ, dɩ sa puno na yɩ bana paar bã. 17Sɩ mɔ̃ ga fʋnɩ sɩɩ do ga kpaar jɔɔ tɩbɩlaa pa bã, sɩ phərəne wi dɩ wa‐n gba ga iikɛra a na mɩɩ tɩbɩla ˈlo bã. 18Dɩ le wɩ kɔɔ we wɩ a pɩɛr wɩ sa kpãkpãa war dɩɩ khɩɩr ka ayɩ, wa‐n gba Jejuu i a na mɩɩ a na dɩɩrna tɩbɩla kpɩɩrakɛ bã. 19Dɩ Pɩɛr na Jã birse wi: Gɩ telene Thãgbaa ƴɛra dɩ sa nɩ Thãgba nũu yaa, sɩ nɛ nɛrɛ nũu, ner n ka kpɩɛrɛ hɩnɛ. 20Gɩdonɩ sa puno na pɩrrɔ gɩ do sa mɩɩ gɩrɛ sɩ yɩnɩ a nɩɛna gaaga. 21Ɔbɔɔkɛ wɩ birni phərə wi wo, wɩ faa wɛr gɩdonɩ wa jɩ mɔ̃ wa heen wɩnɩ sor tɩbɩlaa ƴɛra ga, gɩdonɩ tɩbɩla fɛʋ n dʋbɩrɛ Thãgbaa i gɩrɛraakɛ kɔɔ cʋɛnɩ. 22Gɩdonɩ kuunikɛ ˈlɛnɩ nɔ kpaa kho kpɛɛrɛɛle kɔɔ hananɛ yɛna kpalanyɔ na dɛbɩrɛ.
Ha pɛdaraa Thãgba bɩɛl
23Ɔbɔɔkɛ wɩ faa wɩnɩ pɩ, Pɩɛr na Jã jaal awɩ too pa a mɩɛ wɩ thɩ̃ɛ fɛʋʋkɛ bonɩ jidaar kɔ̃tɩna na kɔ̃tɩna kɔɔ so warnɩ. 24Ɔbɔɔkɛ wɩ nɩɛnɩ gele, wɩ ture kha nɔ bɩɛl sa bɩɛl Thãgba ayɩ: Kɔ̃tɩn, fɛrɛɛkɛ kɔɔ cʋɛnɩ ƴũ, na thɩɩ, na lanyʋɔn, na gɩrɛ fɛʋʋkɛ harɔnɩ bɩnɔ,#Thɩɩ 20:11; Neh 9:6; Khɩ 146:6 25fɛr kɔɔ cʋɛ asɩ mama thɩ kɔ̃tɩ̃ Davɩdɩ afɩ thɔ̃daar, dɩ mɩɩ dɩɩ the Thu Phuurə ayɩ:
“Mɔ̃gɩdo dɩ ca kpala ɩɩrna khʋ̃ɛ thaa jɔɔjɔɔ,
dɩ tɩbɩla na‐n kpɩɛr dakha kpɩɛrnɔɔkɛ dʋɔnnɩ mɔlɔdaa?#Khɩ 2:1–2
26Thɩɩ fãgadara pallɛ ɩɩr,
dɩ kɔ̃tɩnasɔ dakha kpa kha a gʋʋr,
sɩ wa‐n kɛ̃kɛrɛna Kɔ̃tɩn nakha ʋrɛ a phiirni.”
27Gɩdonɩ sobɔr gɩ dɩɩraakɛ Ɛrɔɔdɩ, na Pɔ̃sɩ Pɩlatɩ, na ca kpala, na Ɩjɩrayɛldara kɔɔ kpa kha a gʋʋr, sɩ wa‐n kɛ̃kɛrɛna afɩ thɔ̃daar phu Jeju, ʋrɛɛkɛra fɩ kɔɔ phiirni,#Mat 27:1–2; Mar 15:1; Lu 23:1, 7–11; Jã 18:28–29 28dɩ wa‐n cʋʋ gɩrɛɛkɛ fɛʋ afɩ nyɔ̃ na afɩ tu kɔɔ maanɩ pɛrɛ gɩ dana. 29Dɩ nɛnɛ̃ Kɔ̃tɩn, jɩɛ pɛ nũu awɩ phərə thɩmɩɩra sa ˈlaanɛ afɩ thɔ̃darasɔra ˈlar wa‐n mɩɩna afɩ so; 30hana wɩ punone wa‐n kpɛɛna khoosɔ, wa‐n cʋʋna nɔ kpaa thɩ̃ɛsɔ, na ma kʋ thɩ̃ɛsɔ na afɩ thɔ̃daar phu Jejuu i.
31Ɔbɔɔkɛ wɩ kɔɔ bɩɛlnɩ Thãgba pɩ, paarɩkɛ wɩ kɔɔ toonɩ gbugbuyore dɩ wɛr fɛʋ hinə Thu Phuu phi, a ma dɩ wa‐n mɩɩ Thãgbaa thɩmɩɩ na ˈlar.
Ha pɛdaraa bɩɛl do
32Tibil jɔjʋɔɔkɛ kɔɔ pɩɛrnɩ haar kɔɔ hananɛ bɩ̃ bɩɛl na kpɩɛr bɩɛl. Tibil bɩɛllakɛ na‐n so dɩ yɩ thɩ̃ɛɛkɛ ɩnɩ hananɩ ɩnɛr bɩɛl hɩna ga, sɩ wɩ kɔɔ bulle kha thɩ̃ɛ fɛʋ hɩ̃.#Th t t 2:44–45 33Thɔ̃thɔna n kɔɔ mɩɩrɛ sobɔ so jɩ thɩmɩɩr Jeju Kɔ̃tɩnɩ khi ɩɩrdara dɩɩ hana fãga, dɩ wɛr fɛʋ ˈlɛr bɔ jɩɩr dɩɩ kar. 34Tibil bɩɛl na ha awɩ pa dɩ ˈlee thɩ̃aˈ, gɩdonɩ wɩrɛ fɛʋʋkɛ hananɩ lɩɛ, a cɔna gɩ, wɩ‐n dolone dɩ wɩ gba thɩ̃ doora wɩ dolonɩɩ war a jalna dʋ thɔ̃thɔnaa nyɔ̃kɔɔ; 35dɩ wɩ gba tɩnɛ tɩbɩla fɛʋ bɩɛlbɩɛl mɔ̃ ntɛɛ thɩ̃ ɓɔr hanɩ.
36Kũu bɩɛl gɩ da‐n do Jojɛfɩ; Sɩpɩr yɔ dɩɩra wɩ kʋ̃ɔ, Levɩɩ ca a do, kɛ thɔ̃thɔna hanɩ ire Barnabasɩ, i kɩrʋ dʋɔn bubul tibil; ɔr hana lɩɛ, 37a dolõ a gba war a dʋ thɔ̃thɔnaa nyɔ̃kɔɔ.
Currently Selected:
Thãgbaa Thɔ̃thɔnaa Thɔ̃ 4: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
