Thãgbaa Thɔ̃thɔnaa Thɔ̃ 27
27
Pol jaal Rɔm
1Ɔbɔɔkɛ wɩ kɔɔ gʋʋrnɩ sa yɩ sɩ lona bato a jala Ɩtalɩ, wɩ gbaar Pol na wɩ̃ khaɩdara a pɛ Juliyusii nyɔ̃kɔɔ; ɔr dɔ sɔrasɛ tamaa kɔ̃tɩ̃ Ogusitii sɔrasɩsɔra. 2Sɩ kɔɔ gbaar batookɛ thɛnɩ Adɩramɩtɩ da‐n jal dɩɩraakɛ hanɩ Ajɩ lanyɔ̃ gẽgerena; dɩ mɛ̃ sɩ lõ jal, sɩ Arɩsɩtarkɩɩkɛ dɔnɩ Masedʋandaar, kɛ thɛnɩ Tesalonɩkɩ sɩ kɔɔ hana kha.
3Dɩ dɩɩ na wɩl dɩɩ do sɩ daan Sɩdɔ̃. Juliyusiikɛ n hɩnɛnɩ Pol na fɩl bʋɔ kɔɔ haarɛ hʋɛ dɩ jal ɔɔ kuunsɔɔ pa wɩ buluu. 4Dɩ sɩ the le a gba bato a kana Sɩpɩr yɔ dɩ gɛlʋ, gɩdonɩ jɩɛ thʋnɛ telẽ sɩ ka. 5Ɔbɔɔkɛ sɩ kɔɔ ɩɩrnɩ lanyʋɔnɩkɛ n celanɩ da‐n pɛ Silisi na Pãfɩlɩ dɩɩra, sɩ kɔɔ daan Mɩraakɛ dɔnɩ Lisi dɩ bɩɛl. 6Le sɔrasɛ tamaa kɔ̃tɩ̃ yɩ batookɛ thɛnɩ Alesãdɩɩrɩ da‐n jal Ɩtalɩ dɩ sɩ lõ.
7Sɩ kɔɔ jaal hɛlɛlɛ a cʋʋna wire jɔɔ; gɩ khɩɩ sarɛ ka dɩ sa lõ Kiniidi, gɩdonɩ jɩɛ na ha sɩ jalʋaˈ. Sɩ kɔɔ kananɛ tɩɛr Kɩrɛtɩ yɔ dɩɩ Salmɔn khʋra. 8Mɛna gɩ khe sar dɩ sɩ fʋ gẽgerẽ nʋɔ phaphapha a jal dã paarɩkɛ wɩ‐n wenɩ Bopɔɔr, ka Laje dɩɩ wɔrɔnɩ.
9Bɔ jɔjʋɔ kɔɔ kar sɩ dɩ jaal debi a puuro ka, gɩdonɩ bɔɔkɛ sopugo#27:9 Sopugo hɛl bonɩ ji bɔɔ: Gɛr dɔ bɔɔkɛ Juifisɔ n kɔɔ lini nʋɔ, lam khʋra gɩ. hɛl bonɩ ji bɔɔ kɔɔ kanɩ gɩ do. Gɛr gɩ dɩ Pol kpãkpãa war ayɩ: 10Kona, mɩ yɩɛrɛ dɩ asɩ jalla na nɩ sɛr na ka, dɩ ga dor thɩ̃ kʋɛrɛ na ka; ga do bato gɩ na thɩ̃ɛɛkɛ hanɩle bɩnɔ dɩbara ga, sɩ asɩ thɛthɛrakɛ dakha. 11Sɩ sɔrasɛ tamaa kɔ̃tɩ̃ kɔɔ pɛr ʋrɛ n cananɩ bato na bato hɩ̃daarɩ thɩmɩɩ nũu, sa ka bo Polɩda. 12Sɩ gɩdonɩ jɩɩl paarɩle na bɔr dɩ bato na tooro yʋʋrɔaˈ, ɩkhasɔ jɔɔ sor: Sɩ thɛ le a dɔ bʋɔ a dana Fenɩsɩ, Kɩrɛtɩ bato jɩɩl pa ka ˈweenenɩ gananɔ, dɩ le sa too yʋʋrɔ.
Jɛkhure
13Sɩ jɩɛ kɔɔ ther wi phã paar nyɔ̃bɩlana da‐n phʋ̃ fɛlɛlɛlɛ, dɩ wɩ ka jɩna ɩnɩ punone dɩbara, a ɩɩr hal bato fʋ ther a ti sɩ dɩɩ fʋ Kɩrɛtɩ yɔ dɩ gẽgerẽ nʋɔ dɩ ga‐n jal. 14Ga pʋɔraˈ, sɩ jɛ kʋkʋʋlʋʋkɛ wɩ‐n wenɩ Erakɩlɔ̃ kɔɔ ɩɩrɛ yɔ dɩɩraale, 15a gba bato dɩ ga‐n jalna dɩ ga‐n puno dɩɩ telẽ jɩɛ bã, gɛr gɩ dɩ sɩ faa bɔ dʋʋr dɩɩ gba sɩ a jalna. 16Dɩ sɩ kana tɩɛr yɔ dɩ buurəəkɛ wɩ‐n wenɩ Kʋloda, ka sɩ ˈlɛnɩ punone gbe, mɔ̃ gɩ nɩ sɩnɩ mɛna sɩ sɩ marrɛ bato buu a gba pɛ batora. 17Ɔbɔɔkɛ wɩ khəini bato buu a pɛ batora, wɩ gbaar pɔ̃ɔ a parna bato dɩɩ ma. Gɩdonɩ maar fʋ wɛr dɩ agakpaana wa jaal na ti Sɩrtɩ gbalãkothɩnna, gɛr gɩ dɩ wɩ ti jɛ kɩ̃kɩɩn. Thale jɩɛ kɔɔ gba wɩ a jalna. 18Mɔ̃kɛ jɛkhureele n bɩɩr sɩnɩ na fãga mɛ̃, gɛr gɩ dɩ wɩ tiir thɩ̃ɛ ga dɩ wɩlla a dʋʋrna lanyʋɔnɔ; 19dɩ balãther wire, wɛr thɛthɛ gbaan bato thɩ̃ɛ na awɩ nyɛ̃ a dʋʋrna faa. 20Wire na ƴepələ̃be na kɔɔ yɩr wi jɔjʋɔraalaˈ; mɔ̃ jɛkhureele n be sɩnɩ na fãga mɛna sa‐n kpɩɛr sa taarɛ ˈlo bã.
Pol dʋɔn ʋrɛ n mɩanɩ thɩ̃ɛ
21Gɩ pʋɔrɛ sɩ tibil na kɔɔ kho dɩkoraˈ. Le Pol ɩɩr awɩ thɩ̃thɩɩn a jɩɩl a so war ayɩ: Kona, adora nɩ kɔɔ pɛr mɛr nũu ga dor sa kɔɔ the Kɩrɛtɩ yɔ dɩɩra a na yɩ nɩ caakɛ na thɩ̃ kʋɛ caakaˈ. 22Sɩ nɛnɛ̃ mɩ‐n bɩɛl nɛr, nɩ pɩɛr ˈlar gɩdonɩ tibil bɩɛl nɛrɛra na buəˈ, sɩ bato dɩbara na kʋɛa. 23Gɩdonɩ Thãgbaakɛ hɩna mɩnɩ dɩ ma‐n dʋʋraa thɔma, ɔɔ thɔ̃thɔ̃daar thu kɔɔ the marɛ dɩtɩnɔɔkɛ 24a so mar ayɩ: Pol; aa, ma‐n do maar n fʋ maˈ, dɔ ɩ̃ jal ɩ̃ jɩɩl Sejaarɩ ƴɛra aa, sɩ ɩ̃ hɩnɛ, Thãgba ha mɛr wɩrɛ fɛʋʋkɛ hanɩ batoraakɛ na mɛrɛ. 25Gɛr gɩ kona, nɩ pɩɛr ˈlar gɩdonɩ mɩ hananɛ tu jɩɩr Thãgbaa pa dɩ ga har mɔna a so marnɩ. 26Sɩ jɩɛ wer na gba sɛr na jalna yɔ dɩ bɩɛlla.
27Dɩtɩnɛ yʋɔr yenãdaara ɔbɔɔle sɩ‐n kpaar bababa Adɩrɩatɩkɩ lanyʋɔnɔ, dɩnɩ thɩ̃thɩɩn batodara ka jɩna sɩ‐n wɔrɔnɛ thɩɩ. 28Gɛr gɩ dɩ wɩ mɩɛ yɔ hulone a hɩɩn na pɔ̃ɔkɛ wɩ linəni ther a yɩɛ dɩɩ thɔɔ mɛtɛrɛ kpalanyɔ; a wɩ jal gbe wo, wɩ bire mɩɛ yɔ hulone a hɩɩn a yɩɛ dɩɩ thɔɔ mɛtɛrɛ kpelẽ yʋɔr. 29Sɩ maar fʋ wɛr agakpaana bato na thʋrɛ bokaar, gɛr gɩ dɩ wɩ dʋna bato fʋ thɛ yenã bato sɩkaar, gɩ fɔ bato gɩ jɩɩl sɩ wa‐n jɩ ʋmɔ̃ bɔɔ dɩɩ na wɩlnaˈ. 30Sɩ batodara kɔɔ ƴaalɛ wɩ faa bato sɩ wɩ caalɛ a gba bato buu a kpɛɛ nyʋɔnɔ, sɩ jaa wɩ‐n ƴaalɛ wɩ caalɛ sa cʋʋ dɩɩ ho wɩ yɛ, bato fʋ ther ɩnɩ‐n kpɛɛ ƴɛ kʋʋlɔ gɩ fɔ bato. 31Dɩ Pol sor sɔrasɛ tamaa kɔ̃tɩna na sɔrasɛsɔra ayɩ: Ado tibil yɩrɛ na too kɛ bato bɩnɔaˈ, na puno na yɩ taa paaraˈ. 32Le sɔrasɛ kuur pɛ̃ɛkɛ fɔnɩ bato buu a faa dɩɩ ji nyʋɔnɔ.
33Ɔbɔɔkɛ dɩɩ n thɔɔnɩ wɩllɛ, Pol sor tɩbɩlala fɛʋ ayɩ wɩ khɔ dɩkor; a so warɛ wo: Wire yʋɔr yenã ha gɩrɛ nɩ̃ nɩ toonɩ pɩɛrɔ a bona dɩkor. 34Gɛr gɩ mɩ‐n phʋʋr nɛr, nɩ khɔ dɩkor gɩdonɩ gɛr na bulo ni dɩ na taa, gɩdonɩ tibil bɩɛllakɛ anɩ thɩ̃thɩɩnɩ yʋsũ na buəˈ. 35Ɔbɔɔkɛ a mɩɩnɩ thale pɩ, gɛr a gbaar buru a bɩɛl Thãgba a pɛr wɛr fɛʋʋ ƴɛra; agɩpɩ dɩ kur a ma da‐n kho. 36Dɩ fɛʋ kɔɔ pɛrɛ ˈlar a kho wer oti. 37Sɛrkɛ fɛʋ kɔɔ hanɩ bato bɩnɔɔle, sɩ kɔɔ har taanyɔ na kpalãther yʋɔr maadõ. 38Ɔbɔɔkɛ wɩ khonɩ dɩkor a hi, wɩ kɔɔ cʋʋrɛ bato dɩɩ haba, gɩdonɩ wɩ dʋʋrnanɛ bile#27:38 Bile: Gɛr dɔ Juifisɔɔ dɩko kɔ̃tɩ̃. A‐n hʋrɛ jɔ dɩ wɩ kʋʋl. Gɛr wɩ‐n cʋʋ buru. lanyʋɔnɔ.
Bato dɩbara kʋɛrɛ
39Ɔbɔɔkɛ dɩɩ wɩlnɩ, wa kɔɔ jɩ bəən bã, sɩ wɩ kɔɔ ˈlaarɛ yɩ paarɩkɛ nyʋɔn n lonanɩ thɩɩra, kɛ na dɔnɩ dahulõ paaraˈ; dɩ wɩ kɔɔ ƴaalɛ ɩnɩ‐n tɔna bato a jalana le ado ɩna punone. 40Dɩ wɩ kɔɔ thʋbɩrɛ bato fʋ thɛ a faa dɩɩ jal lanyʋɔnɔ, dɩ wɩ thʋbɩrɛ pɛ̃ɛkɛ wɩ kɔɔ gbanɩ a linə bato thɔɔdaasɔ, sa khəi ƴɛbʋ kɩ̃kɩɩn a pɛr jɩɛ batora gɩ gba bato gɩ jalna gɩ dana gẽgerẽ nʋɔra. 41Sɩ ɔbɔɔkɛ wɩ danɩ kãkɛ lanyʋɔn n caannɩ dɩ a‐n be kha, bato kɔɔ thʋnɔnɛ sa gɔ gbalãkothɩnna dɩ mɩ̃kaar mar kĩkĩkĩ ga‐n tutugəˈ; sɩ sɩkaar ma dɩ a‐n kʋɛ, nyʋɔn n cɩr gɩnɩ mɛna.
42Dɩ sɔrasɛsɔ ƴaalɛ wɩ kʋʋr khaɩdara, gɩdonɩ wɩ kpɩɛrɛ ʋkha na pher na fuu. 43Sɩ sɔrasɛ tamaa kɔ̃tɩ̃ɩkɛ ƴaalɛnɩ a taa Pol a pɩɛr wɛr wa‐n cʋaˈ. Dɩ a so warɛ ayɩ: Wɩrɛ jɛnɩ phɩɩr, wɛr n kɔɔ je nyʋɔnɔ caca a phɛ thɛ; 44sɩ wɩrɛ sɛnɩ n fɔ thɩra, agɩbo wɩ fʋ thɩ̃ɛɛkɛ hanɩ batora wa‐n phe; mɛ̃ wɛr fɛʋ dã thɩɩ pɔlpɔlpɔl.
Currently Selected:
Thãgbaa Thɔ̃thɔnaa Thɔ̃ 27: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
