Thãgbaa Thɔ̃thɔnaa Thɔ̃ 28
28
Pol Maltɩ yɔ dɩɩra
1Ɔbɔɔkɛ sɩ kɔɔ taanɩ pɩ, gɛr sɩ jɩrɔ dɩɩ do yɔ dɩɩlera wɩ‐n we Maltɩ. 2Dɩdaraale kɔɔ dona sɛr bʋɔ ka; wɩ kɔɔ kpa sɛr fɛʋ dɩ sɩ ɩɩr dɔ jɔjʋɔɔkɛ wɩ kɔɔ gbɔɔnɩ, gɩdonɩ thãgba n daan dɩ ɩɩr thʋ̃ kar. 3Dɩ Pol kɔɔ paalɛ sɔ̃sʋɔnɛ a pɛ dɔɔ, dɩ dɔ kporre tire dɔ̃phaanʋ dɩ the a maa nyɔ̃ɔ. 4Ɔbɔɔkɛ dɩdaraale yɩnɩ siile dɩ juu nyɔɔna, wɩ‐n mɩɩrɛ kha bɩɛlbɩɛl aa: Sobɔr gɩ, kuunikɛ tɩɩ kʋ gɩ, a taarɛ lanyʋɔnna wer pɩ, sɩ thãgbaakɛ wɩ‐n wenɩ dasarʋ na sɩɩraa da laˈ. 5Sɩ Pol jɛbɩrɛ siile dɔɔra sɩ aa kɔɔ nɩ khoo fɩɩʋrakaˈ. 6Dɩ tɩbɩlaale n pɩɛrɛ mɔ̃ ga bʋnɩna, agɩbo mɔ̃ a na təəni na ji na khi dapaara; sɩ ɔbɔɔkɛ wɩ pɩɛrnɩ ƴɛrr sɩ wa yɩ thɩ̃ɛ dɩɩ puurəə ga, wɩ debire kpɩɛrɛ wo a so aa: Dɩ thãgba haarakaa ya?
Pubiliyusii thɩɩ kho kpɛɛ
7Kɔ̃tɩ̃ bɩɛl hale ga yɔ dɩraalera dɩ wa‐n wɩɩ Pubiliyusi a hana lɩɛ; ɔr tea sɩ na fɩl bʋɔ dɩ sɩ too ɔɔ cɔ wire yẽther; 8sɩ khoo kɔɔ fʋrɛ Pubiliyusii thɩ, tomɩ kporre gɩ na khʋɔnɛ. Dɩ Pol lõ a yɩɩ a dɛɛnaa nyɛ̃ɛ sa bɩɛl Thãgba a pɩɛraa dɩ kpɛɛ. 9A gele ka pɩ, wɩ̃ khodaarsɔɔkɛ hanɩ yɔ dɩɩraale pɔr a kpɛɛ awɩ khosɔ. 10Wɩ‐n cʋ sɛr dɩɩ pho ka, dɩ ɔbɔɔkɛ sɩ‐n thenɩ le wɩ kɔɔ ha sɛr gɩrɛɛkɛ n ɓɔra sɩnɩ.
Pol daan Rɔm
11Ɔbɔɔkɛ sɩ toonɩ le dɩ pora yẽther ka, sɩ lʋʋn batookɛ wɩ‐n wenɩ thãgba bi ƴɔna, kɛ thɛnɩ Alesãdɩɩrɩ, kɛ kɔɔ tɔɔnɩ le yɔ dɩɩraale yʋʋrɔ. 12Mɔ̃ sɩ danɩ Sɩrakusi, sɩ kɔɔ toore le wire yẽther. 13Dɩ le sɩ kɔɔ jalna gẽgerẽ nʋɔ a dã Rejiyo. A ga dɩ wɩl, jɩɛ kɔɔ ther wi phã paar nyɔ̃bɩlana a gba sɩ, dɩ ga cʋʋ wire yenyɔ dɩɩ do sɩ daan dapaara Pujɔl, 14kãkɛ sɩ kɔɔ yɩnɩ omɩna, dɩ wɩ bɩɛl sɩ sɩ tɔɔ le a cʋɛ wire makonyɔ. Thale sɩ kɔɔ dã Rɔm. 15Dɩ ɔbɔɔkɛ omɩna nɩɛnɩ dɩ sɩ har hʋɛra, wɩ kɔɔ caan sɛr paarsɔɔkɛ wɩ‐n wenɩ Apiyusi ƴatɛ na Kpakpal cɔna yẽther; dɩ ɔbɔɔkɛ Pol hanɩ na yɩ wɩ a pɛrɛ ˈlar sa khɩɩ Thãgba.
16Ɔbɔɔkɛ sɩ danɩ Rɔm, wɩ har Pol hʋɛ a na‐n cɔ dɩbara na sɔrasɩ bɩɛlɩkɛ n hɩnɛɛnɩ.
Pol mɩɩrɛ tutugo bʋɔɔ thɩmɩɩ Juifisɔra
17A wire yẽther ka, Pol wer Juifi kɔ̃tɩnasɔ, dɩ ɔbɔɔkɛ wɩ gbɛbɩnɩ kha a so warɛ thɩmɩaakɛ ayɩwɔɔ: Omɩna, ma kɔɔ cʋʋ tɩbɩla puurəˈ, dɩ ma dɩ asɩ mama thɩ kɔ̃tɩ̃sɔɔ fɩlla woaˈ, sɩ wɩ kɔɔ fʋ mɛr a to khaɩra Jerujalɛm sa gba mɩ ha Rɔmɛ̃sɔ. 18Dɩ ɔbɔɔkɛ wɩ kɔɔ bule mini thɩ̃ɛ pɩ, wɩ kɔɔ ƴaalɛla wɩ faa mɩ gɩdonɩ wa yɩ mar thɩ̃ɛɛkɛ teananɩ khirəˈ. 19Sɩ Juifisɔ n kɔɔ yɩrna mɛr dɩ ɩ̃ tha thʋnɔ sa yɩ: Foo dɩ thɩmɩɩrra Sejaarɩ pa ga dã, sɩrakɛ ga do sor mɩ hana dɩ ma‐n pɛ ɩ̃ cara ga.#Th t t 25:11 20Gɛr dɔ kɩrʋ dɩ ɩ̃ we nɩ ɩ̃ mɩɛ nɩ thɩmɩɩrɩkɛ, gɩdonɩ Ɩjɩrayɛl bɩsanaa nũ pɛ dɔ kɩrʋ dɩ wɩ li mi na jɔrkɔɔkɛ. 21Dɩ wɩ birsee: Sa kɔɔ ˈlɛ sɛbɛɛkɛ thɛnɩ Jude dɩɩra afɩ sora ga, dɩ omine gɩ a gba fɩ ɩna kɛ a mɩɩ thɩmɩɩ puu a pɛ faraˈ. 22Sɩ sɩ‐n ƴaalɛ sɩ nɩ afɩ nɔ sɩ jɩ gɩrɛɛkɛ fɩ‐n kpɩɛrnɩ, gɩdonɩ sɩ jɩrɛ dɩ paar fɛʋ tɩbɩla n kɛ̃kɛrɛnanɛ dɩɩr caakɛra hanɩ kpɩɩ.
23Dɩ wɩ dʋrɛ wire dɩ tɩbɩla jɔɔ pɔ ka a‐n cɔnɩ a yɩɩ. Dɩ Pol mɩɩ wɛr Thãgbaa fãgadaar doda dɩ wɩ hɩɩn, a mɩɩna wɛr sobɔ so jɩ thɩmɩɩr a gbana Mʋɩjɩɩ jɔfʋ na Thãgbaa bobonasɔɔda dɩ yɩrna da‐n mɩɛ wɩ gɩrɛ dɔnɩ Jejuuda. Dɩ wɩ kɔɔ toore kha duuro a dana dʋɔrɔ. 24Dɩ ɩkhasɔ n ture gɩrɛɛkɛ a sonɩ, sɩ ɩkhasɔ na‐n tuəˈ.
Pol kpɩɛrnanɛ ca kpala
25Dɩ mɔ̃kɛ nʋɔ na‐n mãkha wɩnɩ kha ga dɩ wa‐n bɩlã, Pol so warɛ thakɛ dɩbara ayɩ: Gɩrɛɛkɛra Thu Phuu kɔɔ gbanɩ Ejaɩ Thãgbaa bobonɩ nɔ a mɩɩna anɩ mama thɩ kɔ̃tɩ̃sɔ, dor sobɔr waa gel ayɩ:
26“Jala tɩbɩlaakɛɛ pa a sɔ war ayɛ:
Na‐n nɩɛrɛ na anɩ nũ wer bɔɔbɔɔ, sɩ na jɩ kɩrʋaˈ;
na‐n hɩɩnɛ na anɩ yi wer bɔɔbɔɔ, sɩ na yɩ ga.#Eja 6:9–10
27Gɩdonɩ tɩbɩlaakɛɛ ha dibire;
wɩ sɔbɩrɛ awɩ nũ ka,
a khaan dakha awɩ yi,
a mɛ̃ gaa, ga hor wa yɩ gɛr na awɩ yi,
a na nɩɛna awɩ nũ,
a na jɩna kɩrʋ,
a na kɛr na bir mar
dɩ mɛr Thãgba na kpɛɛ wɩ.”
28Gɛr gɩ nɩ jɛna, dɩ Thãgbaa taakɛ ca kpalala a thɔna, dɩ wɛr na pɩɛn nũu. [ 29Ɔbɔɔkɛ a sonɩ gele, Juifisɔ n kʋɔn na thɩ̃ banaa jɔjʋɔ awɩ thɩ̃thɩɩn.]
Polɩ yɛna yenyɔ cʋʋ Rɔm dɩɩra
30Sɩ Pol toore yɛna yenyɔ biləni cʋɔrraakɛ a‐n lɩmɩnɩ; a‐n teere wɩrɛ fɛʋʋkɛ n pʋɔnnɩ dɩ wa‐n yɩɩ, 31da‐n mɩɩna war Thãgbaa fãgadaar doda, da‐n dɩɩrna gɩrɛ dɔnɩ Jeju Kirisiti Kɔ̃tɩnɩda na ˈlar, sɩ tibil na‐n pɩɛrʋaˈ.
Currently Selected:
Thãgbaa Thɔ̃thɔnaa Thɔ̃ 28: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
