Thãgbaa Thɔ̃thɔnaa Thɔ̃ 26
26
Pol so hɛl kɛ̃kɛrɛ̃ thɩmɩɩ Agɩrɩpaa ƴɛra
1Dɩ Agɩrɩpa so Polla: Wɩ ha fɛr hʋɛ dɩ fa mɩɩ afɩ so hɛl kɛ̃kɛrɛ̃ thɩmɩɩ. Dɩ Pol ˈlaa nyɔ̃ɔ da‐n mɩɩ ɔɔ so hɛl kɛ̃kɛrɛ̃ thɩmɩɩ thaa ayɩ:
2Agɩrɩpa fãgadaar, mɩ yɩɛrɛ dɩɩ do ɩ̃ nɔbɔ gɩ dɩ ma‐n kɛ̃kɛrɛ̃ na hɛl afɩ ƴɛra nɩ̃ ɩ̃ so fɛʋʋkɛra Juifisɔ pɛ marnɩ gɩrɛ, 3gɩdonɩ fɩ jɩɛ jɩ bɔɔbɔɔbɔɔ Juifisɔɔ mama fɩl fɛʋ na awɩ thɩ̃ banasɔ; gɛr gɩ mɩ‐n bɩɛl fɛr dɩ fa pɛ mɩ nũu na ha fʋrɛ.
4A fʋna caca fʋ paar ɩ̃ daɓol dĩi bɔɔ, Juifisɔ fɛʋ jɩrɛ mɔ̃ ɩ̃ fɩl hanɩ gɩdonɩ Jerujalɛm mɩ kɔɔ ha ɩ̃ caa thɩ̃thɩɩn. 5Wɩ kɔɔ mãa jɩ mar kɛkɛkɛ, ado wɩ‐n ƴaalɛ wɩ so sobɔr, dɩ mɛr dɔ ʋrɛ kɔɔ hananɩ jɔfʋ bʋ dʋ fɩlɛ a ɓã wɛkɛra hanɩ awɩ ƴɛra kpɩɩ, kɛ n jɩɛnnɩ hɩɩn bɔɔbɔɔ asɩ Thãgba fʋɔr fɩl.#Th t t 23:6; Fili 3:5 6Sɩ nɛnɛ̃ wɩ‐n kɩɩlna mɛr gɩrɛ, gɩdonɩ mɩ hananɛ nũ pɛrɛ ʋlfɛrɛraakɛ Thãgba kɔɔ ʋlfɛnanɩ asɩ mama thɩ kɔ̃tɩ̃sɔ, 7ʋlfɛrɛɛkɛ asɩ ca yʋɔr yenyɔ n yɩrrɔnɩ dɩ wa‐n fʋɔr Thãgba dɩtɩnɔ na dɩwɩlʋ, dɩ wa‐n pɩɛrna mɔ̃ ʋlfɛrɛɛlera na danɩ na ha oti. Fãgadaar, ga nũ pɛɛlera dɔ kɩrʋ Juifisɔ pɛ marnɩ sor gɩrɛ. 8Mɔ̃gɩdo dɩ na‐n pɛr haar dɩ Thãgba na cʋʋrɛ khe dɩ wa ɩɩr na the khirera ga?
9Ado mɛrra kɔɔ gɩ, mɩ kɔɔ kpɩɛrɛ sa bãba a cʋʋ thɩ̃ɛ jɔɔ gɩ kʋɛara Najarɛtɩ Jejuu i.#Th t t 8:3; 22:4–5 10Thale mɩ kɔɔ cʋʋ Jerujalɛm. Mɛrɛɛ thɛthɛ khaanɛ tɩɩ phuusɔ jɔɔ khaɩra, gɩdonɩ mɛ̃ mɩ kɔɔ bɩɛl hʋɛ bonɩ jidaar kɔ̃tɩnaa pa; dɩ ɔbɔɔkɛ wɩ yɩnɩ wɩ kʋrɛ wɩ, mɩ kɔɔ ture ayɩ: Gɩ hana mɛ̃. 11Mɩ‐n kɔɔ heen wer sor Juifisɔɔ Thãgba fʋɔr cɔra bɔɔ fɛʋ, dɩ ma‐n yɩrna wɩ wɩ kʋɛa Jejuu i. Sɩ gɩdonɩ nĩkhii thʋnɛ ka mɩ, mɩ‐n kɔɔ kpoo warɛ na wɩrɛ hanɩ bə̃ kpɩɩrarakɛ.
Pol mɩɩrɛ ɔɔ ha debida
(Th t t 9:1–19; 22:6–16)
12Gɛrra dɔ nɔɔ mɩ‐n kɔɔ jaalnɩ Damasɩ, gɩdonɩ bonɩ jidaar kɔ̃tɩna kɔɔ ha mɛr hʋɛ. 13Sɩ mɔ̃kɛ mɩ hanɩ hʋɛra, fãgadaar, ʋlkhɔɔ gɩ kɔɔ do, dɩ dahɩrɛ kɔɔ ther yũ a thʋ̃ carã a jɔ wi hɩrɛrɛ, a dii mar na wɩrɛ sɩ‐n kɔɔ jalnanɩ kha. 14Dɩ sɩ jiir fɛʋ thʋnɔ sɩ dɩ ɩ̃ nɩɛ wire dɩɩ so mar na ebirə thɩmɩɩr ayɩ: Sɔl, Sɔl, mɔ̃gɩdo dɩ fa‐n kpoo mar mɛna? Dɩbara fɩ‐n cʋʋ puure mɔ̃ na na‐n banɩ na gɔdaa na nɔɔ. 15Dɩ ɩ̃ birsee: Kɔ̃tɩn, fɛr amɛ gɩ? Dɩ Kɔ̃tɩn so: Mɛr dʋɔn Jejuukɛ fɩ‐n kpooronɩ. 16Sɩ ɩrɛ jɩlɛ. Mɛr gbaan dɩbara a nɩna fɩ. Mɩ thɩɩn fɛr fɩ do ɩ̃ thɔ̃daar na ɩ̃ sobɔ so jɩdaar gɩrɛraakɛ fɩ yɩnɩ mɛrɛra, na gɩrɛraakɛra fa yɩnɩ ɔbɔɔkɛ ma birni na gba dɩbara a na nɩna fɩ wo. 17Dɩ ma taa fɛr tɩbɩlaakɛɛ nyɔ̃kɔɔ na ca kpalaa nyɔ̃kɔɔ kɛ dɔnɩ wɩrɛ ma thɔ̃ farnɩ, 18fɩ khɛr wɩ yinə, wɩ the dabirəra wɩ lõ dahɩrɛra, wɩ the Satãa fãgara wɩ kɛr wɩ pɛ Thãgba haar, wɩ ˈlɛ sopugo faarɛ na awɩdaakɛ wa hɩnɩ wɩrɛɛkɛ Thãgba leenɩ kpɩɩ thɩ̃thɩɩn ha pɛrɛraakɛ wa hananɩ mɛrɛra.
Pol mɩɩrɛ ɔɔ thɔ̃da
19Dɩ gɛr gɩ, Agɩrɩpa fãgadaar, ma kɔɔ nʋʋr nũu thɩ̃ yɩrraale thɛnɩ Thãgbaa pa ga. 20Sɩ Damasɩdara mɩ kɔɔ mɩɩ ɓo, agɩpɩ dɩ ɩ̃ mɩɩ Jerujalɛmdara na Judedara fɛʋ nakha ca kpala, wɩ deba haar sa kɛra na kpa Thãgbara, a cʋɛ dakha thɔmaakɛ na nɛnanɩ dɩ wɩ debire haar.#Th t t 9:20, 28–29 21Gelela dɔ kɩrʋ dɩ Juifisɔ kɔɔ fʋ mɩ Thãgba fʋɔr cɔ kɔ̃tɩ̃ bɩnɔ a yɩrna mɩna wɩ kʋ. 22Sɩ Thãgba taa mɩ dɩ ɩ̃ hana yire a dana nɩ̃kɛ, dɩ ma‐n mɩɩ sobɔ so jɩ thɩmɩɩrɩkɛ tɩɩ mɔlɔsɔra na tɩɩ kɔ̃tɩnana, sɩ ma‐n golõ thɩ̃ bɩɛllaakɛrakɛ Thãgbaa bobona na Mʋɩjɩ kɔɔ sonɩ ayɩ ga daanaˈ; 23gɛr dɔ mɔ̃ Kirisiti na gaarnɩ bʋɔ sɩ na do cacadaarɩkɛ na kɔɔ ɩrɛnɩ na the khirera a na mɩɩ dahɩrɛɛda Juifisɔra na ca kpalala.#Eja 42:6; 49:6; 1 Kor 15:20
Pol yɩrnanɛ Agɩrɩpa a pɩɛr haar
24Mɔ̃kɛ Pol n mɩɩnɩ ɔɔ so hɛl kɛ̃kɛrɛ̃ thɩmɩɩ thakɛ, Fɛsɩtusi sor na nɔ kheu aa: Pol, yʋʋ kʋɛa fɩ, afɩ jɩ jɔjɔra kʋɛa fɩ yʋʋ. 25Dɩ Pol birsee: Fɛr, Fɛsɩtusi bʋɔ, yʋʋ na kʋɛ maˈ, sobɔ thɩmɩɩr na yʋ bɔ thɩmɩɩr mɩ ka ma‐n mɩɩ. 26Mɩ mɩɩrɛ Agɩrɩpa fãgadaar na ˈlar gɩdonɩ a jɩrɛ ga thɩ̃sɔɔle; gɩdonɩ mɩ jɩrɛ dɩ thɩ̃ bɩɛl na hale aa jɩnaa ga, gɩdonɩ ga do gelela kɔɔ wolone dã ga. 27Fɩ pɛrɛ Thãgbaa bobonasɔɔ thɩmɩɩ haar ya, Agɩrɩpa fãgadaar? Mɩ jɩrɛ fɩ pɛrɛ haar. 28Dɩ Agɩrɩpa so Polla: Gɩ do fɩ yɩrna mɛr bɔɔ gberaakɛ dɩ ɩ̃ do Kirisitiida bɛɛ? 29Dɩ Pol birsee: A nɛnɛ̃ gɩ, a dɩkhõo gɩ yoo, mɩ‐n bɩɛlɛ Thãgba dɩ ga‐n do fɛrɛ dɩbara ga, sɩ wɩrɛ fɛʋʋkɛ n pɛ mɩnɩ nũu nɩ̃ n deba a hana mɔ̃ mɩ hanɩ, sɩ jɔrkɔ lir na‐n halaˈ.
30Dɩ fãgadaar, na gobanɛr, na Berenɩsɩ, na wɩrɛ fɛʋʋkɛ tɔɔna wɩnɩ ɩɩr 31a thɩɩr dɩ wa‐n mɩɩ khasɔ aa: Sa yɩ kuunnaakɛ thɩ̃ɛɛkɛ a cʋʋnɩ dɩɩ teena khir agɩbo khaɩ pɛraˈ. 32Dɩ Agɩrɩpa so Fɛsɩtusira: Wɩ kɔɔ punone faa kuunikɛ adora aa kɔɔ we Sejaarɩ iəˈ.
Currently Selected:
Thãgbaa Thɔ̃thɔnaa Thɔ̃ 26: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
