Thãgbaa Thɔ̃thɔnaa Thɔ̃ 25
25
Pol Fɛsɩtusii ƴɛra
1Ɔbɔɔkɛ Fɛsɩtusi danɩ le, balãther a cɔ sa the le Sejare a jal Jerujalɛm. 2Dɩ bonɩ jidaar kɔ̃tɩnasɔ na Juifi kɔ̃tɩna gbaar Polɩda a mɩgʋʋ sa phʋʋr Fɛsɩtusi, 3a jɛ wɩ bʋɔra sa cʋɛ Pol a pɔ Jerujalɛm; sɩ jaa wɩ gbɛbɩrɛ pɩ sa nʋɔ hʋɛra wɩ kʋʋ. 4Sɩ Fɛsɩtusi birse, Pol hale khaɩra Sejare, dɩ ɩnɛrɛɛ thɛthɛ na birə na jal dɔdɔ. 5Dɔ wɩrɛ dɔnɩ kɔ̃tɩna anɩ thɩ̃thɩɩn n jal kha na mɛrɛ, dɩ ado dɩkhaa thɩ̃ puu kuunile cʋʋ, nɩ pɩɛraa sor.
Pol wer Sejaar Rɔmɛ̃ fãgadaar kɔ̃tɩ̃ɩ i
6Sɩ Fɛsɩtusi toore Jerujalɛm wire makõther wire yʋɔrsɔ dɩbara, sa gba jal Sejare. Dɩ dɩɩ wɩl dɩ too ɔɔ kɩɩl too pa sa yɩ, wɩ kpa Pol a pɔna. 7Ɔbɔɔkɛ a danɩ, Juifisɔɔkɛ thɛnɩ Jerujalɛm diirəəre dɩ wa‐n pɩɛraa sɔ bərəəm dɩɩ puuro ka. Sɩ ga do wɩ‐n marɛ wo dɩ wɩ jɩɩ mɩɩ dɩ sobɔr n yɩraˈ. 8Dɩ Pol fʋrɛ ɔɔ so hɛl kɛ̃kɛrɛ̃ thɩmɩɩ ayɩ: Ma dɩ Juifisɔɔ jɔfʋra ga, dɩ ma dɩ dakha Thãgba fʋɔr cɔ kɔ̃tɩɩna ga, dɩ Sejaar fãgadaar kɔ̃tɩɩna gɩ dɩ ɩ̃ daˈ. 9Dɩ Fɛsɩtusiikɛ n ƴaalɛnɩ a da Juifisɔ haar birsere Pol: Fa ture na jal Jerujalɛm dɩ wa kɩɩlna fɩ le ɩ̃ ƴɛra ya? 10Dɩ Pol birsee: Mɩ jɩɩlɛ Sejaarɩ kɩɩl pa, le gɩ teena wɩ kɩɩlna mɩ. Ma dɩ Juifisɔra thɩ̃ bɩɛlla ga, fɛrɛ yɛrɛrakɛ fɩ jɩ gɛr bɔɔbɔɔbɔɔ. 11Ado mɩ cʋʋrɛ dɩkhaa puu, dɩ a dɩkhaa sopugo gɩɩkɛ teananɩ khir ma bo na yɩ ma khəə ga; sɩ ado sorɩkɛra wɩ‐n pɛ marnɩ na do sobɔraˈ, tibil na hana hʋɛ a na fʋ mɩ na ha waˈ; foo thɩmɩɩrɩkɛ n dã Sejaarɩ pa. 12Le Fɛsɩtusi gʋʋr kha na so gʋʋrdara sa so: Sejaarɩ iikɛ fɩ wenɩ, Sejaarɩ pa fa jal.
Fɛsɩtusi mɩɩrɛ Agɩrɩpa fãgadaar Polɩda
13A wire gbe kɔɔ ka, Agɩrɩpa fãgadaar na Berenɩsɩ pɔr le Sejare wɩ fʋɔr Fɛsɩtusi. 14Sɩ mɔ̃ wɩ toonɩ le a na pʋɔr gbe, Fɛsɩtusi gbaar Polɩda a mɩɛ fãgadaarra a so aa: Kũu bɩɛl hakɛ Felɩsɩ faanɩ khaɩra. 15Ɔbɔɔkɛ mɩ kɔɔ hanɩ Jerujalɛm, bonɩ jidaar kɔ̃tɩnasɔ nakha Juifi kɔ̃tɩnasɔ kɔɔ pɩɛraarɛ sor sa bɩɛl mɩ ɩ̃ heenee sor. 16Sɩ mɩ kɔɔ so warɛ Rɔmɛ̃sɔ na mɩlna tibil gba ˈlaarɛ, sɩɩ do wa haa hʋɛ dɩ jɩɩl wɩrɛ n pɩɛraanɩ sorɩ ƴɛ thɩ̃thɩɩn na so hɛl kɛ̃kɛrɛnɛɛkɛ a na kɛ̃kɛrɛnɩ gɩrɛraakɛra wɩ pɩɛraanɩ sor ɓoaa ga. 17Dɩ gɛr gɩ dɩ wɩ ɩ̃ kha na mɛrɛ; ma kɔɔ pʋɔraˈ, sɩ ga dɩ wɩlla mɩ kɔɔ toore kɩɩl paar sa yɩ wɩ kpa kuunilera a ɛna. 18Dɩ ɔbɔɔkɛ wɩrɛɛkɛra n pɩɛraanɩ sor kɔɔ pɔnɩ, wa kɔɔ pɩɛraa ga so puu caakɛ mɩ kɔɔ pɛrnɩ haar gɛr wa pɩɛraa ga. 19Sɩ wɩ kɔɔ hananɛ sor dɩɩ do awɩ Thãgba fʋɔrda gɩ‐n hɩɩn dɩbara dɔrɔɔm, na tibil bɩɛllaakɛ wɩ‐n wenɩ Jejuukɛ kɔɔ khenɩ, sɩ dɩ Polla n so dɩ yɩ aa: Gel, a hananɛ yire. 20Dɩ gɩdonɩ ma jɩɩ jɩ mɔ̃ ma ˈlonɩ ga so caalaˈ, mɩ kɔɔ bulele Pol ado a na ture na jal Jerujalɛm dɩ wa kɩɩlnaa le ga soolera. 21Sɩ gɩdonɩ Pol wer Sejaarɩ i, a ƴaal wɩ sɛ nar ɔr fãgadaar kɔ̃tɩ̃ɩ n gʋʋr ɩnɩ so, dɩ gɛr gɩ dɩ ɩ̃ so wa‐n bɛraa phaphapha ɩ̃ thɔnaa Sejaarɩ para. 22Dɩ Agɩrɩpa so Fɛsɩtusira: Mɛrɛ dakha, mɩ‐n ƴaalɛ ɩ̃ pɛ kuunilee thɩmɩɩra nũu. Dɩ Fɛsɩtusi birsee: Cʋɔ fa nɩɛrɛ ɔɔ nɔ.
Pol Agɩrɩpaa ƴɛra
23Gɛr gɩ dɩ dɩɩ wɩl dɩ Agɩrɩpa na Berenɩsɩ pɔ dakpɛ pʋɔ, a lõ thɩmɩɩ mɩɩ cʋɔrɔ na sɔrasɛɛ sɛfʋsɔ na kɔ̃tɩnasɔ dɩɩra. Dɩ Fɛsɩtusi so wɩ kpa Pol a pɔna. 24Le Fɛsɩtusi so aa: Agɩrɩpa fãgadaar, na nɛrɛ fɛʋʋkɛ hanɩkɛ gɩrɛ na sɛrɛ, nɩ yɩrɛ kuunikɛ Juifisɔ fɛʋʋkɛ hanɩ Jerujalɛm na kɛkɛdara bɩɛl mɩnɩ dɩ wa‐n hulena: Ga teena a hana yire bã. 25Ado mɛrra gɩ, mɩ yɩɛrɛ dɩɩ do aa cʋʋ thɩ̃ɛɛkɛ teananɩ khirəˈ, sɩ gɩdonɩ ɔɔ thɛthɛ wɛ Sejaarɩ i, mɩ yɩɛrɛ dɩɩ bɔr dɩ a na jal le. 26Ma jɩɩ jɩ bɔɔbɔɔ gɩrɛɛkɛ ma kherenɩ ɔɔdarara a na ha fãgadaar kɔ̃tɩ̃aˈ. Gɛr dɔ kɩrʋ dɩ ɩ̃ kpaa ɩna anɩ ƴɛra, sɩ caca afɩ ƴɛra, fɛr Agɩrɩpa fãgadaar, dɩ mɛ̃ ma jɩ gɩrɛ ma kherenɩ ado fɩ gʋʋr ɔɔda a hɩɩn. 27Gɩdonɩ, ado mɛrra gɩ, ga tee kha a mɩ thɔna Sejaarra khaɩdaar sɩ ma so sorɩkɛ wɩ pɩɛraanaa ga.
Currently Selected:
Thãgbaa Thɔ̃thɔnaa Thɔ̃ 25: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
