Thãgbaa Thɔ̃thɔnaa Thɔ̃ 22
22
1Nɛr omɩna na thɛsɔ, nɩ pɛ nũu ɩ̃ so hɛl kɛ̃kɛrɛ̃ thɩmɩɩraakɛ mɩ hananɩ nɛnɛ̃. 2Ɔbɔɔkɛ wɩ nɩɛnɩ da‐n mɩɩna wɩ ebirə thɩmɩɩr, wɩ jɩɛ pɩr dɩphã cɩcɩcɩ. Dɩ Pol so war:
3Juifi ha mɩ, Silisi Tarsɩ wɩ kɔ̃ mɩ, sɩ kɩɛr dɩɩraakɛ wɩ kɔɔ haan mɩ, dɩ Gamalɩɛlɩ kal ƴɔɔ mɩ kɔɔ too a dɩɩr thɩ̃ɛ a jɩ mɔ̃kɛ asɩ mama thɩ kɔ̃tɩ̃sɔɔ jɔfʋ hanɩ ɓibi. Mɩ‐n kɔɔ gbɛ̃gbɛrɛnɛ Thãgbaadara mɔ̃kɛra nɛrɛ fɛʋ hanɩ gɩrɛ nĩ.#Th t t 5:34–39 4Mɩ kɔɔ kpoore wɩrɛraakɛ hanɩ Kɔ̃tɩnɩ hʋraakɛ, dɩ ma‐n kʋʋrna wɩ, dɩ ɩ̃ fʋlɛna kona na khɛra a li a na to khaɩra.#Th t t 8:3; 26:9–11 5Gbõdaar na kɔ̃tɩnasɔɔkɛ punone mɩɩ nɩ ɩ̃da mɔ̃ gɩ hanɩ. Wɛr thɛthɛrarakɛ mɩ kɔɔ tee sɛbɛ ɩ̃ jalnana ɩ̃ ha omɩnaakɛ hanɩ Damasɩ, sɩ ɩ̃ fʋlɛ wɩrɛɛkɛ hanɩle ɩ̃ ɩnana Jerujalɛm ɩ̃ heen wɩ sor.
Pol mɩɩrɛ gɩrɛɛkɛ kɔɔ danaanɩ
(Th t t 9:1–19; 26:12–18)
6Sɩ mɔ̃kɛ mɩ kɔɔ hanɩ hʋɛra dɩ ma‐n wɔrɔ̃ Damasɩ, ʋlkhɔɔ gɩ kɔɔ do, dɩ dapaara dahɩrɛ kɔ̃tɩ̃ɩ kɔɔ ther ƴũ a carã dii mar; 7dɩ ɩ̃ təə ji thʋnɔ sa nɩɛ wire dɩɩ so mar aa: Sɔl, Sɔl, mɔ̃gɩdo dɩ fa‐n kpoo mar mɛ̃? 8Dɩ ɩ̃ birsee: Kɔ̃tɩn, fɛr amɛ gɩ? Dɩ birse mi: Mɛr dʋɔn Najarɛtɩ Jejuukɛra fɩ‐n kpooronɩ. 9Wɩrɛ kɔɔ hanɩ kha na mɛrɛ wɩ yɩrɛ dahɩrɛ bɔɔbɔɔ, sɩ wa kɔɔ nɩ wireekɛ mɩana mɩnaˈ. 10Dɩ le mɩ bulee, ɩ̃ cʋɛ anye ya, Kɔ̃tɩn? Dɩ Kɔ̃tɩn birse mi ayɩ, ɩ̃ ɩrɛ jala Damasɩ; le wa so mar gɩrɛ fɛʋʋkɛ Thãgba thɩɩn marnɩ ɩ̃ cʋɛ. 11Sɩ gɩdonɩ dahɩrɛ caranɛɛle cʋʋ mɛr dɩ ma‐n yaˈ, wɩrɛɛkɛ kɔɔ hana mɩnɩ kha fʋ mɛr nyɔ̃ɔ a hal dɩ ɩ̃ dã Damasɩ.
12Sɩ kũu bɩɛl gɩ da‐n do Ananɩasɩ; a‐n cʋrɛ Thãgba da‐n hɩɩnna ɔɔ jɔfʋ, dɩ Juifisɔ fɛʋʋkɛ hanɩ dɩɩraale n mɩɩrɛ ɔɔda bɔ, 13a pɔr a jɩɩl mar sa so mar: Sɔl ɩ̃ omi, birə na yɛ. Dɩ liirrə dapaara ɩ̃ yi khɛr dɩ ɩ̃ yɩɩ. 14Dɩ so: Asɩ mama thɩ kɔ̃tɩ̃sɔɔ Thãgba thɩnɛ fɩ fɩ jɛ ɔɔ tuur, a yɛ Tɩɩ sarʋ, a nɛ ɔɔ nɔ thɩmɩɩ; 15gɩdonɩ fɛr na dɔ ʋrɛ na‐n mɩanɩ ɔɔda tɩbɩla fɛʋʋ ƴɛra, mɔ̃kɛra fɩ yɩɛnɩ a nɩɛna dɩɩ ha. 16Dɩ nɛnɛ̃ dɩphã, anye sɛ fɩ ˈlo? Ɩrɛ, wɩ kpɛɛ fɩ nyʋɔnɔ, dɩ dɔ dakha afɩ sopugo n cɔcɔɔ mɔ̃ fɩ wenɩ Kɔ̃tɩnɩ i.
Thãgba thɔnɩ Pol ca kpalaa thɩ̃thɩɩn
17Dɩ mɔ̃ mɩ kɛrnɩ bir dã Jerujalɛm dɩ ma‐n bɩɛl Thãgba Thãgba fʋɔr cɔ kɔ̃tɩɩna, mɩ yɩrɛ thɩ̃ yɩr dɩɩ do daphuronaa. 18Kɔ̃tɩn mɩ yɩ dɩ so mar ayɩ: Phana kɔrɔ a thɛ Jerujalɛm, gɩdonɩ wa tu ɩ̃daakɛ fa mɩɩnɩ a na pɛ maraˈ. 19Dɩ ɩ̃ so: Kɔ̃tɩn, wɛr thɛthɛ jɩrɛ dɩ mɛr n kɔɔ fʋlɛnɛ Juifisɔɔ Thãgba fʋɔr cɔnanɔ wɩrɛ kɔɔ pɛ fɩnɩ haar dɩ ɩ̃ ciil, sa to wɩ khaɩra. 20Dɩ ɔbɔɔkɛ wɩ‐n kʋnɩ Etɩɛn afɩ sobɔ so jɩdaar, mɩ kɔɔ harrɛ a tu awɩda dɩ ma‐n hɩɩn wɩrɛ n kʋɔnɩɩ kẽkẽsɔ.#Th t t 7:58 21Dɩ Kɔ̃tɩn so marɛ ɩ̃ jala aa, ƴɔɔ ɩna thɔ̃ mɩ ca kpalaa pa.
Pol nɩnanɛ dɩ Rɔmɛ̃ a do
22Dɩ wɩ kɔɔ pɩɛrɛ nũu phaphapha a dana thɩmɩɩrɩle sa hulẽ ayɩ: Cʋɛ tibil ca ʋrɛ a khi, aa teena yi haraˈ. 23Dɩ wɩ hulene dɩ wa‐n dʋʋrna kẽkena#22:23 Kẽkẽ dʋʋrnanɛ na thɩnɩkɛ wɩ‐n dʋʋrnanɩ ƴũ: Kɩrʋ dʋɔn, i kʋɛ thɩmɩɩr gɩ dɩ wa‐n ƴaal wɩ nɩaˈ., dɩ wɩ kpɩɩrna thɩn na dʋʋrna ƴũ. 24Dɩ sɔrasɛɛ sɛfʋ sor wɩ kpa Pol a lonana sɔrasɛɛ cɔ a ciilee na khasa sa bulenee, a jɛ gɩrɛ dɔnɩ kɩrʋ dɩ wɩ hulẽ thale na pɩɛraa. 25Ɔbɔɔkɛ wɩ liini na lɔ pɩ sɩ wɩ ciil, a bulele sɔrasɛ tamaa kɔ̃tɩ̃ɩkɛ jɩlɛnɩ bɛrrɔ ayɩ: Nɩ hananɛ hʋɛ na ciil kuunikɛ dɔnɩ Rɔmɛ̃ ha khasa, kɛ wa heennɩnakɛ sora ya? 26Ɔbɔɔkɛ sɔrasɛ tamaa kɔ̃tɩ̃ kɔɔ nɩɛnɩ gele, a jaal so sɔrasɛɛ sɛfʋra: Mɔ̃ fa do gɩrɛ? Kuunikɛ Rɔmɛ̃ gɩ. 27Dɩ sɔrasɛɛ sɛfʋ pɔr a so Polla: Sɔ mar Rɔmɛ̃ ha fɩ gerɩ? Dɩ birsee: Ɔɔ. 28Dɩ sɔrasɛɛ sɛfʋ bir so: War mer kʋɛ jɔɔ sa debi a do gɩ. Dɩ Pol birsee, sɩ me wer mɛ̃ wɩ kɔɔ kɔ̃ mɩ. 29Dɩ dapaara wɩrɛ kɔɔ gbɛbanɩ pɩ wɩ ciil Pol, wɩ fagʋʋrɛ; dɩ mɔ̃ sɔrasɛɛ sɛfʋ yɩɛnɩ dɩɩ do Rɔmɛ̃ Pol do, maar fʋʋrɛ gɩdonɩ a kɔɔ liire.
Pol so gʋʋrdaraa ƴɛra
30A dɩɩ wɩl, sɔrasɛɛ sɛfʋ ƴaalɛ a jɩɩ jɩ bɔɔbɔɔ gɩrɛra dɔnɩ kɩrʋ dɩ Juifisɔ pɩɛraa sor; a thʋbʋʋrɛ sa we bonɩ jidaar kɔ̃tɩna na so gʋʋrdara fɛʋ, dɩ wɩ kpa kha a jɛ sɩ dɩ kpaa gbuno awɩ ƴɛra.
Currently Selected:
Thãgbaa Thɔ̃thɔnaa Thɔ̃ 22: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
